4. ୪. ଆବ୍ରାହାମଦି ୱାଲେ ମାପ୍ରୁଦି ନିୟମ୍
ବାତ୍ୟାଆଜି ନାଣ୍ଡୋ ପାଟେଙ୍ଗ୍ ୱେନ୍କା, ସଂସାରାମ୍ଦୁ ନାଣ୍ଡୋ ଲୋକୁ ମାନ୍ଜି ମାର୍ହାର୍, ମାରି ଆକାର୍ ଇଏଲ୍ୱିଜୁ ମାପ୍ରୁଦି ମାରି ୱେରି ୱାରି ୱିରୁଦ୍ତାଣ୍ ପାପାମ୍ କିଜିମାର୍ହାର୍। ମାତର୍ ଆକାର୍ ୱିଜେରେ ଉଣ୍ଡ୍ରେ ଭାଷା ୱେର୍ହ୍ସି ମାର୍ହାର୍, ଇୟାନୁୱାନ୍ଦିଙ୍ଗ୍ ଆକାର୍ ଉଣ୍ଡ୍ରେ ବାଡିଦୁ କୁମାଆଜି କୁଡିତା ମାହାର୍ ମାରି ଉଣ୍ଡ୍ରେ ଗଡ୍ ତିଆର୍ କିଦେଙ୍ଗ୍ ଲାଗେଆତାର୍। ଏନେଟ୍ବା ମାପ୍ରୁ ମାଟା ସିତାମାହାନ୍, ଆୟାୱାଜା ଆକାର୍ ୱିଜୁ ଦେଶେମ୍ଦୁ ବାଟା ଆଏତାର୍।
ଆକାର୍ ନାଣ୍ଡୋ ଗାରା ଆଜି ମାହାର୍, ମାରି ୱାରିଙ୍ଗ୍ ଏମେୱାଜା ଜୀଉ ଜିଦେଙ୍ଗ୍ ଇୟା ବିଷୟଦିଙ୍ଗ୍ ଆକାର୍ ମାପ୍ରୁଦି ମାଟା ମାନାଦେଙ୍ଗ୍ କେଏଜି ମାହାର୍। ଇୟାୱାନ୍ଦିଙ୍ଗ୍ ଆକାର୍ ଉଣ୍ଡ୍ରେ ଇୟାୱାଜା ଗଢ଼ ତିଆର୍ କିଦେଙ୍ଗ୍ ଆରାମ୍ କିତାର୍ ଏମେକା ସାର୍ଗି ଦାନ୍ ଇଦେଙ୍ଗ୍ ଆଟ୍ନାତ୍। ମାପ୍ରୁ ସୁଡ୍ତାନ୍ଜେ ଜଦି ଆକାର୍ ଉଣ୍ଡ୍ରେବାନୁ କୁଢ୍ଜି ପାପାମ୍ କିନାର୍, ମାରି ୱାରୁ ନାଣ୍ଡୋ ପାପାମ୍ ପାଣି କିଦେଙ୍ଗ୍ ଆଟ୍ନାର୍।
ଇଆୱାନ୍ଦିଙ୍ଗ୍ ମାପ୍ରୁ ୱାରି ଭାଷାଦିଙ୍ଗ୍ ୱିଜୁ ଭାଷାଦିଙ୍ଗ୍ ୱେର୍ହେ କିତାନ୍ ମାରି ୱାରିଙ୍ଗ୍ ୱିଜୁ ଦେଶେମ୍ଦୁ ଛିନ୍ଛତର୍ କିତାନ୍। ଏମେ ଗଡ଼ଦୁ ୱାରୁ ତିଆର୍ କିଦେଙ୍ଗ୍ ଆରାମ୍କିତାମାହାର୍ ଆକା ବାବିଲ୍ ୱେହ୍ତାର୍, ଏୟେଦି ଅର୍ତ “ ଗଡ୍ବଡ୍”।
ଏସୋ ୱାନ୍ଦା ପାଟେଙ୍ଗ୍ ଲୋଇ, ମାପ୍ରୁ ଆବ୍ରାମ୍ ଦୋରୁତି ଉଣ୍ଡ୍ରି ଲୋକୁ ୱାରର୍ଗିତାନ୍। ମାପ୍ରୁ ୱାନିଙ୍ଗ୍ ୱେର୍ତାନ୍,“ ନିଜେ ଦେଶେମ୍ ମାରି ନିଜେ ଲୋକାଙ୍ଗ୍ ଢିସ୍ସି ଆୟା ଦେଶେମ୍ଦୁ ସଣ୍ଡ୍ରୁ ନାନୁ ମିଙ୍ଗିଁ ତର୍ପ୍ନା୍। ନାନୁ ନିଙ୍ଗିଁ ଆର୍ଶିବାଦ୍ କିନା ମାରି ନିଙ୍ଗିଁ ଉଣ୍ଡ୍ରି ପେରି ଜାତି ତିଆର୍ କିନା। ନାନୁ ନି ଦୋରୁଦିଙ୍ଗ୍ ପେରିକା କିତାନ୍। ଏହେର୍ବା ମିଙ୍ଗିଁ ଆର୍ଶିବାଦ୍ କିନାର୍ ନାନୁ ୱାରିଙ୍ଗ୍ ଆର୍ଶିବାଦ୍ କିନା, ମାରି ଏହେନ୍ ମିଙ୍ଗିଁ ଆନାଦୁରିଆ କିନାନ୍ ୱାନିଙ୍ଗ୍ ନାନୁ ଆନାଦୁରିଆ ସିନା। ମିୱାନ୍ଦିଙ୍ଗ୍ ୱିଜୁ ଜାତି ଆର୍ଶିବାଦ୍ ପୁଟନାତ୍।”
ଇଆବାଜା: ଆବ୍ରାମ୍ ମାପ୍ରୁଦିଙ୍ଗ୍ ମାଟା ମାନ୍ଆନାନ୍। ଆକାନ୍ ନିଜେ ୱିଜେରିଙ୍ଗ୍ ଶେବା କିନିୱାରି ମାରି ନିଜେ ୱିଜୁ ସମ୍ପତି ୱାଲେ ନିଜେ ଆଡସି ସାରେଦିଙ୍ଗ୍ ଅତାର୍ ମାରି ଆୟା ଦେଶେମ୍ଦୁ, ମାରି କିଣାନ୍ ଦେଶେମ୍ଦୁ ସହାର୍ ଆୟା ମାପ୍ରୁ ୱାନିଙ୍ଗ୍ ତର୍ତା ମାହାନ୍।
ଏସେଙ୍ଗ୍ ଆବ୍ରାମ୍ କିଣାନ୍ ଦେଶେମ୍ଦୁ ଇତାର୍ ମାରି ମାପ୍ରୁ ୱେର୍ତାନ୍, “ ନିଜେ ଚାରିସରୁଲା ସୁଡ୍ଆ। ନାନୁ ନିଙ୍ଗିଁ ଇଆ ୱିଜୁ ଦେଶେମ୍ ସିନା ମାରି ନି କୁଟୁମ୍ ୱିଜୁୱାଲେ ଇବେ ଅଧିକାର୍ ଇଡ୍ନାନ୍।” ମାରି ଆବ୍ରାମ୍ ଆୟା ଦେଶେମ୍ଦୁ ମାର୍ହାନ୍।
ମଲ୍କିସେଦକ୍ ଦରୁଦି ଆରେନ୍ ମେମାର୍ ମାର୍ହାନ୍ ଆକାନ୍ ୱିଜେରିଙ୍ଗ୍ ମିଗ ମାପ୍ରୁଦି ଯାଜକ୍ ମାର୍ହାନ୍। ଉଣ୍ଡ୍ରି ଦିନାମ୍ ଏସେଙ୍ଗ୍ ଆବ୍ରାମ୍ ଜୁଦ୍ କିଜି ୱାଜି ମାର୍ହାନ୍ ମାରି ମଲ୍କିସେଦକ୍ ମାରି ଆବ୍ରାମ୍ କୁଡ଼ିତାର୍। ମଲ୍କିସେଦକ୍ ଆବ୍ରାମ୍ଦିଙ୍ଗ୍ ଆର୍ଶିବାଦ୍ କିତାନ୍ ମାରି ୱେର୍ତାନ୍ “ୱିଜେରିଙ୍ଗ୍ ମିଗ ମାପ୍ରୁ ଆକାନ୍ ସରଗ୍ ମାରି ଦେଶେମ୍ଦି ମାଲିକ୍ ନିଙ୍ଗିଁ ଆର୍ଶିବାଦ୍ କିନାନ୍। ମାରି ଆବ୍ରାମ୍ ଜୁଦ୍ ଦାନ୍ ଜିଣାତିମାହି ୱିଜୁ ଜିନିଷ୍ଦି ଦଶ୍ମାଙ୍ଗ୍ସ୍ (ଦଶ୍ ବାଟେଙ୍ଗାଁଣାନ୍ ରୁଣ୍ଡି ବାଟେଙ୍ଗ୍) ମଲ୍କିସେଦକ୍ଦିଙ୍ଗ୍ ସିତାନ୍।
ଏସ ପାଟେଙ୍ଗ୍ ସର୍ହାତ୍, ମାରି ଇଏଲ୍ବା ଆବ୍ରାମ୍ ମାରି ସାରେଦିଙ୍ଗ୍ ଇନି କଢ଼ୋ ସିଲେଣ୍ଡା ମାର୍ହାର୍। ମାପ୍ରୁ ଆବ୍ରାମ୍ଦି ୱାଲେ ୱାର୍ଗିତାନ୍ ମାରି ମାରିଅର୍ସୁ ସପତ୍ କିତାନ୍ ଜେ ୱାରିଙ୍ଗ୍ ଉଣ୍ଡ୍ରେ କଢ଼ୋ ଜନମ୍ ଆନାନ୍ ମାରି ଏନେଟ୍ ବାଦଢ୍ଦୁ ସୁକେଙ୍ଗ୍ ମାନେ ଆୟାୱାଜା ୱାରି ନାଣ୍ଡୋକୁଟୁମ୍ ଆନାର୍। ଆବ୍ରାମ୍ ମାପ୍ରୁଦି ସପତ୍ମିଗ ବିସାଷ୍ କିତାନ୍। ମାପ୍ରୁ ୱେର୍ତାନ୍ଜେ ଆବ୍ରାମ୍ ଅରେନ୍ ଦାର୍ମୁ ଲୋକୁମାର୍ହାନ୍ ମାତର୍ ୱାଣ୍ଡ୍ରୁ ମାପ୍ରୁଦି ସପତଦିଙ୍ଗ୍ ବିସାଷ୍ କିତା ମାର୍ହାନ୍।
ମାରି ମାପ୍ରୁ ଆବ୍ରାମ୍ୱାଲେ ଉଣ୍ଡ୍ରେ ନିୟମ୍ ତର୍ହ୍ତାର୍। ସାଦାସିଦା ଦାଣ୍, ଉଣ୍ଡ୍ରି ନିୟମ୍ ରୁଣ୍ଡି ଦଲ୍ ଲୋଇ ୱେରିଙ୍ଗ୍ ୱାରିଙ୍ଗ୍ ପାଣିକିଦେଙ୍ଗ୍ ଉଣ୍ଡ୍ରେ ବୁଜାମାଣା। ମାପ୍ରୁ ଆବ୍ରାମ୍ୱାଲେ ନାସ୍ତିୱେଡ଼ାଦୁ ସପତ୍ କିତାନ୍ ନାସ୍ତିୱାଲେ ଆକାନ୍ ଗୁର୍ତା ମାର୍ହାନ୍, ମାତର୍ ନାସ୍ତିୱାଲେବା ମାପ୍ରୁଦି ମାଟା ୱେଣ୍ଡ୍ରେଙ୍ଗ୍ ଆଟ୍ସି ମାର୍ହାର୍। ମାପ୍ରୁ ୱେର୍ତାନ୍, “ ନାନୁ ନି ମେନ୍ଦଲ୍ଲୋଇରାହାଣ୍ ଜନମ୍ ଆତିମାର୍ହି ଉଣ୍ଡ୍ରି ନିଜେ ମାରିନ୍ ସିନା। ନାନୁ ନି କୁଟୁମ୍ଦିଙ୍ଗ୍ ଇୟା କିଣାନ୍ ଦେଶେମ୍ ସିନା। ” ମାତର୍ ଇଏଲ୍ବା ଆବ୍ରାମ୍ଦିଙ୍ଗ୍ ଇନି ମାରିନ୍ ସିଲେଣ୍ଡା ମାର୍ହାର୍।
ଆଦି ପୁସ୍ତକ୍ ୧୧ -୧୫ ଦି ଉଣ୍ଡ୍ରି ବାଇବଲ୍ ଦି କାତାନି
Free to use, adapt, and share under an open license (CC BY-SA 4.0).