50. ୫୦. ଯିଶୁ ମାରିଡ଼େସି ୱାତାନ୍
ପାକାପାକି ରୁଣ୍ତିୱେୟୁ ପାଟେଙ୍ଗ୍ ଆସ୍ସି, ୱିଜୁ ପୁର୍ତିବୀଦୁ ନାଣ୍ତୋଦାଣ୍-ନାଣ୍ତୋ ଲୋକୁ ଯିଶୁ କ୍ରିଷ୍ଟଦି ବିସୟଦି ନେଗିକାବୁର୍ ୱେନ୍ଜିନାର୍। ମଣ୍ତଲି ପିରିଦେଙ୍ଗ୍ ଆସ୍ସିନାତ୍। ଯିଶୁ ସପତ୍ କିତାମାହାନ୍ ଜେ ଦୁନିଆ ୱିଜ୍ନିୱେଡ଼ାଦୁ ଡ଼େସିୱାନାନ୍। ଆତିଙ୍ଗାବା ୱାଣ୍ତ୍ରୁ ଇୟାସାନ୍ଦି ଡ଼େସିରେଏନ୍, ମାରିବା ୱାଣ୍ତ୍ରୁ ୱାନି ପାର୍ମାଣାମ୍ଦିଙ୍ଗ୍ ପୁରା କିନାନ୍।
ଏନେଟ୍ଗି ମାପୁ ଯିଶୁଦି ଡ଼େସିୱାନିଦାନିଙ୍ଗ୍ କାପ୍କିଜିନାପ୍, ମାପ୍ରୁ ମାନ୍ସୁକିଜିନାନ୍ ଜେ ମାପୁ ଉଣ୍ତ୍ରେ ଆଇୱାଜା ଜିନିକା ଆକା ପବିତ୍ର ମାରି ୱାନିଙ୍ଗ୍ ମାରିଆ ସିନାନ୍। ୱାଣ୍ତ୍ରୁ ଇକା ବା ମାନ୍ସୁକିଜିନାନ୍ ଜେ ମାପୁ ୱାନି ରାଜି ବିସୟଦାନ୍ ଆଇୱାରିଙ୍ଗ୍ ୱେର୍ନାଟ୍। ଏସ୍ତିୱାଲେ ଯିଶୁ ପୁର୍ତିବୀଦୁ ମାହାନ୍, ୱାଣ୍ତ୍ରୁ ୱେର୍ତାନ୍, “ନା ସିସୁର୍ ମାପ୍ରୁଦି ରାଜି ବିସୟଦାନ୍ ନେଗିକାବୁର୍ଦିଙ୍ଗ୍ ପୁର୍ତିବୀଦି ୱିଜୁ ବାଡିଦୁ ପ୍ରଚାର୍ କିନାର୍, ମାରି ୱେନ୍କା ୱିଜ୍ନିୱେଡ଼ା ୱାନାତ୍।”
ନାଣ୍ତୋ କୁଟୁମ୍ଦି ଲୋକୁ ଇୟାସାନ୍ଦି ଯିଶୁଦି ବିସୟଦାନ୍ ୱେନ୍ଏର୍। ଯିଶୁ ସରଗ୍ଦୁ ସନି ଆଗ୍ଡ଼ି, ୱାଣ୍ତ୍ରୁ ନିଜେଦି ୱେନ୍କା ବୁଲାନିୱାରିଙ୍ଗ୍ ୱେହ୍ତାମାର୍ହାନ୍ ଜେ ଆୟା ଲୋକା ଡାଗ୍ରୁ ନେଗିକାବୁର୍ ପ୍ରଚାର୍ କିଦୁ ଏମେକାର୍ଗି ଇୟାସାନ୍ଦି ୱେନ୍ଏର୍। ୱାଣ୍ତ୍ରୁ ୱେର୍ତାନ୍, “ସନ୍ଡ୍ରୁ ମାରି ୱିଜୁ କୁଟୁମ୍ଦି ଲୋକାଙ୍ଗ୍ ସିସୁର୍ କିଦୁ!” ମାରି ମାଡିତି ଦିନ୍ସୁୱିଜୁ କଇନିୱାନ୍ଦିଙ୍ଗ୍ ପାଣ୍ତିତାତ୍ନି!”
ଯିଶୁ ଇକା ବା ୱେର୍ତାନ୍, “ଅରେନ୍ ଲୋକୁଦି ଗତିମୁର୍ଲି ନିଜେ ମାଲିକ୍ଦି ବାଣାନ୍ ପେରିକାନ୍ ଆଏନ୍। ଇୟା ଦେସେମ୍ତି ପେରି ଲୋକୁ ନାଙ୍ଗିଁ କାରାଇ ଇନାର୍, ମାରି ୱାରୁ ୱିଜୁ ମିଙ୍ଗିଁ ଦୁକାମ୍ ସିନାର୍ ମାରି ନା ୱାନ୍ଦିଙ୍ଗ୍ ମିଙ୍ଗିଁ ସାୟାମାର୍ଗା ଡେଇନାର୍। ଇୟା ଦେସେମ୍ଦୁ ମିରୁ କାଷ୍ଟାମ୍ ଆନିଦେର୍, ମାରି ଶାକ୍ତି ଆନିଦେର୍, ମାତର୍ ନାନୁ ସୟତାନ୍ଦିଙ୍ଗ୍ ଆରାକିତାମାନା, ଏୟେନ୍ଗି ଇୟା ଦେଶେମ୍ଦିଙ୍ଗ୍ ଶାସନ୍ କିନାନ୍। ଜଦି ମିରୁ ୱିଜ୍ନି ସାନ୍ଦି ନା ୱାଲେ ବିସ୍ବାସ୍ଦାନ୍ ମାନ୍ଜିନିଦେର, ମାରି ମାପ୍ରୁ ମିଙ୍ଗିଁ ରକିଆ କିନାନ୍!”
ଦୁନିଆ ୱିଜିତିଙ୍ଗାଁ ଲୋକୁଦି ୱାଲେ ଇନିକା ଆନାତ୍ ଆକା ବୁଜାକିନି ୱାନ୍ଦିଙ୍ଗ୍ ଯିଶୁ ନିଜେ ସିସୁରିଙ୍ଗ୍ ଉଣ୍ତ୍ରେ କାତା ୱେର୍ତାନ୍। ୱାଣ୍ତ୍ରୁ ୱେର୍ତାନ୍, “ଅରେନ୍ ଲୋକୁ ନିଜେ ମାଡିଦୁ ନେଗି ୱିତୁ ୱିତ୍ତାନ୍। ଏସ୍ତିୱାଲେ ୱାଣ୍ତ୍ରୁ ସୁନ୍ଜିମାର୍ହି ୱେଡ଼ାଦୁ ୱାନି ସାତ୍ରୁର୍ ୱାଜି ଗଦ୍ମୁ ଗିଡେଙ୍ଗାଁ ଡାଗ୍ରୁ ଆଇ ଗିଡେଙ୍ଗ୍ ୱିତ୍ତାନ୍, ମାରି ୱେନ୍କା ୱାଣ୍ତ୍ରୁ ସର୍ହାନ୍।
“ଏସ୍ତିୱାଲେ ମାରାକୁ ୱିଜୁ ପିରିତେ, ଆୟା ଲୋକୁଦି ଗତିମୁର୍ଲିର୍ ୱେର୍ତାର୍, “ଏ ମାଲିକ୍, ନିନୁ ଆୟା ମାଡିଦୁ ନେଗି ୱିତୁ ୱିତ୍ତି। ମାରି ଇବେନୁ ଆଇ ୱିତୁ ଏନେଟ୍ ନେରିତାତ୍?’ ୱାଣ୍ତ୍ରୁ ୱାନିଙ୍ଗ୍ ଉତର୍ ସିତାନ୍, ‘ମାତର୍ ନା ସାତ୍ରୁର୍ ଆୟାୱିଜୁ ଉହ୍ତେଙ୍ଗ୍ ମାନ୍ସୁ କିନାର୍। ଇକା ନା ସାତ୍ରୁରି ଲୋଇହାନ୍ ଅରେନ୍ ଏୟେନ୍ଗି ଇକା କିତାମାନାନ୍।”’
ଗତିମୁର୍ଲି ୱାନି ସାଉକାରିଙ୍ଗ୍ ଉତର୍ ସିତାନ୍, ‘ଇନିକା ମାପୁ ଆୟା ଆଇ ୱିତୁଦିଙ୍ଗ୍ ସୋପ୍ନାଟ୍ ନା?’ ଆୟା ସାଉକାର୍ ୱେର୍ତାନ୍, ‘ସିଲେ। ଜଦି ମିରୁ ଆକା କିନିଦେର୍, ମାରି ମିରୁ ଇନି ଗଦ୍ମୁ ବା ରେଲ୍ନିଦେର୍। କଇନି ସାନ୍ଦି କାପ୍ କିଦୁ। ଦାନିୱେନ୍କା ଆୟା ସେଇସାରାଦିଙ୍ଗ୍ ଉନ୍ଡ୍ରେବାନୁ ଇଡ୍ଦୁ ଏଣ୍ତେସ୍ଗି ମିରୁ ଆକେଙ୍ଗ୍ ଡରୁ ଆଟ୍କ୍ନିଦେର୍। ମାତର୍ ଗଦ୍ମୁଦିଙ୍ଗ୍ ନା ଗାର୍ସାଦୁ ତାଗାଟ୍।”
ସିସୁର୍ କାତାଦି ଅର୍ଥ ବୁଜାଦେଙ୍ଗ୍ ଆଟ୍ଏତାର୍, ମାରି ୱାରୁ ଯିଶୁଦିଙ୍ଗ୍ ଆକା ବୁଜାକିଦେଙ୍ଗ୍ ୱେର୍ତାର୍। ଯିଶୁ ୱେର୍ତାନ୍, “ଏୟେନ୍ ନେଗି ୱିତୁ ୱିତାନ୍, ୱାଣ୍ତ୍ରୁ ଖ୍ରୀଷ୍ଟଦିଙ୍ଗ୍ ତର୍ପନାତ୍ ମାରି ମାଡି ଦୁନିୟାଦିଙ୍ଗ୍ ତର୍ପନାତ୍। ନେଗି ଗିଡା ମାପ୍ରୁଦି ରାଜିଦି ଲୋକାଙ୍ଗ୍ ତର୍ପନାତ୍।”
ସେଇମାରାନୁ ଆୟା ସେଇ ଲୋକୁଦିଙ୍ଗ୍ ତର୍ପନାତ୍। ଆୟାଲୋକୁଦି ଶାତ୍ରୁ ଆୟା ସୟତାନ୍ଦିଙ୍ଗ୍ ବୁଜାକିନାନ୍, ଏୟେନ୍ ଲାଟା ଉର୍ତାନ୍, ୱାଣ୍ତ୍ରୁ ସୟତାନ୍ଦିଙ୍ଗ୍ ତର୍ପନାନ୍। କଇଜି ମାଟିସ୍ନି ଲୋକୁ ଦୁନିଆଦି ୱିଜ୍ନିୱେଡ଼ାଦିଙ୍ଗ୍ ତର୍ପନାର୍ ମାରି କଇନିତାନି ଲୋକୁ ମାପ୍ରୁଦି ସରଗ୍ଦୁତ୍ଙ୍ଗାଁ ତର୍ପନାନ୍।”
“ଏସ୍ତିୱାଲେ ଦୁନିଆ ୱିଜ୍ନାତ୍, ସରଗଦୁତ୍ଙ୍ଗୁଁ ସୟତାନ୍ଦି ୱିଜୁ ଲୋକାଙ୍ଗ୍ ଉଡ୍ରେବାନୁ କିନେ। ଆୟାସରଗ୍ଦୁତ୍ଙ୍ଗୁଁ ୱାରିଙ୍ଗ୍ ନାଣ୍ତୋ ୱେସ୍ନି ସିସୁଦୁ ପକ୍ନେ। ଆବେନୁ ଆୟା ଲୋକୁ ନାଣ୍ତୋ ଆଡ଼୍ବାନାର୍ ମାରି ବୟଙ୍କର୍ ଦୁକାମ୍ଦାନ୍ ପାଲ୍କୁ କାତ୍ରିସ୍ନାର୍। ମାତର୍ ଏମେକାର୍ ଦାର୍ମୁ ଲୋକୁ, ଏମେକାର୍ଗି ଯିଶୁଦି ୱେନ୍କା ବୁଲାନିକାର୍, ୱାରୁ ୱାରି ବୁବା ମାପ୍ରୁଦି ରାଜିଦୁ ୱେଡ଼ାଦି ୱାଜା ଜାଇ ଆନାର୍।”
ଯିଶୁ ଇକା ବା ୱେର୍ତାମାନାନ୍ ଜେ ଦୁନିଆ ୱିଜ୍ନି ଆଗ୍ଡ଼ି ୱାଣ୍ତ୍ରୁ ପୁର୍ତିବୀଦୁ ମାରିଡ଼େସି ୱାନାନ୍। ୱାଣ୍ତ୍ରୁ ଏମେୱାଜା ସହାମାହାନ୍ ୱାଣ୍ତ୍ରୁ ଆୟାୱାଜାନେ ମାରିଡ଼େସି ୱାନାନ୍। ଏମେକାଗି, ୱାଣ୍ତ୍ରୁ ୱାନି ନିଜେଦି ମେନ୍ଦଲ୍ ମାନ୍ଜିନାତ୍ ମାରି ବାଦଡ଼୍ଦୁ ମେଗରତ୍ଦାନ୍ ୱାନାନ୍। ଏସ୍ତିୱାଲେ ଯିଶୁ ମାରିଡ଼େସି ୱାନାନ୍, ସାତିମାହିକାର୍ ଯିଶୁଦି ୱେନ୍କା ବୁଲାନି ୱିଜୁ ଲୋକୁ ସାତିବାଣାନ୍ ମାରିଡ଼େସି ନିଙ୍ଗ୍ନାର୍ ମାରି ୱାନିଙ୍ଗ୍ ବାଦଡ଼୍ଦୁ କୁଡ଼୍ନାର୍।
ଦାନିୱେନ୍କା ଜିଉମାନି ଯିଶୁଦି ୱେନ୍କା ବୁଲାନି ଲୋକୁ ବାଦଡ଼୍ଦୁ ନିକ୍ସି ଅନାର୍ ମାରି ସାତିବାଣାନ୍ ମାରିଡ଼େସି ନିଙ୍ଗିଁତିମାନି ଯିଶୁଦି ଆଇ ୱେନ୍କା ବୁଲାନି ଲୋକୁ ୱାଲେ କୁଡ଼୍ନାର୍। ୱାରୁ ୱିଜେରେ ଯିଶୁଦି ୱାଲେ ମାନ୍ଜିନାର୍। ଦାନିୱେନ୍କା, ଯିଶୁ ନିଜେ ଲୋକା ୱାଲେ ମାନ୍ଜିନାନ୍। ଏସ୍ତିୱାଲେ ୱାରୁ ଉନ୍ଡ୍ରେବାନୁ ମାନ୍ଜି ମାରି ୱିଜୁଦିନାମ୍ ୱାନ୍ଦିଙ୍ଗ୍ ପୁରା ସାନ୍ତି ପାଏଆନାର୍।
ଯିଶୁ ୱାନିଡାଗ୍ରୁ ବିସ୍ବାସ୍ କିଜିମାନି ୱିଜେରିଙ୍ଗ୍ ଉଣ୍ତ୍ରେ ମୁକୁଟ୍ ସିଦେଙ୍ଗ୍ ପାର୍ମାଣାମ୍ କିତାମାର୍ହାନ୍। ୱାରୁ ୱିଜୁଦିନାମ୍ ୱାନ୍ଦିଙ୍ଗ୍ ମାପ୍ରୁଦି ୱାଲେ ଶାସନ୍ କିନାନ୍। ୱାରିଙ୍ଗ୍ ପୁରା ସାନ୍ତି ପୁଟ୍ନାଟ୍।
ମାତର୍ ମାପ୍ରୁଦି ୱିଜେରିଙ୍ଗ୍ ବିସାର୍ କିନାନ୍ ଏମେକାର୍ଗି ଯିଶୁଦିଡାଗ୍ରୁ ବିସ୍ବାସ୍ କିଏର୍। ୱାଣ୍ତ୍ରୁ ୱାରିଙ୍ଗ୍ ନର୍କଦୁ ପୋକ୍ନାନ୍। ଆବେନୁ ୱାରୁ ଆଡ଼୍ବାନାର୍ ମାରି ପାଲ୍କୁ କାତ୍ରିସ୍ନାର୍, ମାରି ୱାରୁ ୱିଜୁଦିନାମ୍ ୱାନ୍ଦି କାଷ୍ଟାମ୍ ପାଏଆନାର୍। ଏମେ ସିସୁ ଏସେଙ୍ଗ୍ ବା ନାମ୍ଏତ୍ ୱାରିଙ୍ଗ୍ ୱିଜୁୱାଲେ ସିସୁ କାସ୍ସି ମାନ୍ଜିନାତ୍, ମାରି ପିଡ଼୍କୁ ୱାରିଙ୍ଗ୍ ତିନ୍ଡ୍ରେଙ୍ଗ୍ ବନ୍ଦ୍ କିଉ।
ଏସ୍ତିୱାଲେ ଯିଶୁ ମାରିଡ଼େସି ୱାନାନ୍, ୱାଣ୍ତ୍ରୁ ସୟତାନ୍ ମାରି ଦାନିରାଜିଦିଙ୍ଗ୍ ପୁରା ନାସ୍ଟୁ କିନାନ୍। ୱାଣ୍ତ୍ରୁ ସୟତାନ୍ଦିଙ୍ଗ୍ ନରକ୍ଦୁ ପୋକ୍ନାନ୍। ସୟତାନ୍ ଆବେନୁ ୱିଜୁଦିନାମ୍ ୱାନ୍ଦିଙ୍ଗ୍ କାସ୍ନାତ୍, ଏମେକାର୍ ମାପ୍ରୁଦି ବାକ୍ୟ ମାନାମାନି ବାଦ୍ଲୁ ସୟତାନ୍ଦି ୱେନ୍କା ବୁଲାଦେଙ୍ଗ୍ ମାନ୍ସୁ କିତାର୍।
ମାତର୍ ଆଦମ ମାରି ହବା ମାପ୍ରୁଦିଙ୍ଗ୍ ମାନ୍ଆଏତାର୍ ମାରି ଇୟା ଦୁନିଆଦୁ ପାପାମ୍ ତାତାର୍, ମାପ୍ରୁଦି ଦୁନିଆଦିଙ୍ଗ୍ ଆନାଦୁରିୟା ସିତାନ୍ ମାରି ଦୁନିଆଦିଙ୍ଗ୍ ନାସ୍ଟୁ କିଦେଙ୍ଗ୍ ମାନ୍ସୁ କିତାନ୍। ମାତର୍ ଏସୋ ଦିନାମ୍ ମାପ୍ରୁ ଉଣ୍ଡ୍ରେ ପୁନି ସରଗ୍ ମାରି ଉଣ୍ଡ୍ରେ ପୁନି ପୁର୍ତିବୀ ତିଆର୍ କିନାନ୍ ଏମେକାଗି ପବିତ୍ର ଆନାତ୍।
ଯୀଶୁ ମାରି ୱାନି ଲୋକୁ ଆୟା ପୁନି ପୁର୍ତିବୀଦୁ ମାନ୍ଜିନାର୍, ମାରି ୱାଣ୍ତ୍ରୁ ୱିଜୁୱାଲେ ୱିଜୁ ବିଷୟ୍ ମୁସ୍କୁ ଶାସନ୍ କିନାନ୍। ୱାଣ୍ତ୍ରୁ ଲୋକୁଦି କାଣ୍କାଦାନ୍ ୱିଜୁ କାଣେର୍କୁ ତେଲ୍ନାନ୍। ମାରି ଏୟେର୍ ଦୁକ୍ବୋଗ୍ କିଏର୍ ଗି ଦୁକ୍ ଆଏର୍। ୱାରୁ ଆଡ଼୍ବାଏର୍। ୱାରୁ ରୋଗ୍ଦୁକ୍ ଆଏର୍। ମାରି ଆବେନୁ ଇନି ସେଇପାଣି ମାନ୍ଏତ୍। ଯିଶୁ ୱାନି ରାଜିଦୁ ନ୍ୟାୟ୍ ମାରି ସାନ୍ତିଦାନ୍ ସାସନ୍ କିନାନ୍। ୱାଣ୍ତ୍ରୁ ନିଜେ ଲୋକୁଦି ୱାଲେ ୱିଜୁଦିନାମ୍ ୱାନ୍ଦିଙ୍ଗ୍ ମାନ୍ଜିନାନ୍।
ମାଥିଉ ୧୩:୧୪;୨୮:୧୮; ଯୋହନ ୧୫:୨୦,୧୬:୩୩; ଥେସଲନୀକୀୟ ୪:୧୩-୫:୧୧; ଯାକୁବ ୧:୧୨ ପ୍ରକାଶିତବାକ୍ୟ ୨:୧୦;୨୦:୧୦; ୨୧-୨ ବାଇବଲଦି ଉଣ୍ଡ୍ରେ କତାନି
Free to use, adapt, and share under an open license (CC BY-SA 4.0).