49. ୪୯. ମାପ୍ରୁଦି ପୁନି ନିୟମ୍
ଉନ୍ଡ୍ରେ ସାର୍ଗିଦୁତ୍ ମରିୟମ୍ ଦୋରୁତି ଅରେତ୍ ରିପାଦିଙ୍ଗ୍ ୱେର୍ତାମାର୍ହାନ୍ ଜେ ୱାଦୁ ମାପ୍ରୁଦି ମାରିନ୍ଦିଙ୍ଗ୍ ଜନମ୍ କିନାତ୍। ଆୟାୱେଡ଼ାଦୁ ୱାଦୁ ମାତର୍ ଡିଣ୍ତାରିପା ମାର୍ହାତ୍, ମାରି ପବିତ୍ରଆତ୍ମା ଦାନି ମୁସ୍କୁ ରେତାତ୍, ମାରି ୱାଦୁ ପଟାଦୁ ଆତାତ୍ ମାରି ଉନ୍ଡ୍ରେ କଡ଼ଦିଙ୍ଗ୍ ଜନମ୍ ସିତାତ୍, ୱାନି ଦରୁ ଯିଶୁ ଇଟ୍ତାର୍, ଇୟାୱାନ୍ଦିଙ୍ଗ୍ ଯିଶୁ ମାପ୍ରୁ ମାରି ଲୋକୁବା ଆନାନ୍।
ଯିଶୁ ନାଣ୍ତୋ କାବାଆନି ପାଣି କିତାମାର୍ହାନ୍ ଇନିକା ତର୍ପ୍ତାନ୍ ଜେ ୱାଣ୍ତ୍ରୁ ମାପ୍ରୁ। ୱାଣ୍ତ୍ରୁ ଏରୁ ମୁସ୍କୁ ବୁଲାତାନ୍ ମାରି ଗାଲିଦିଙ୍ଗ୍ ଆଲେକିତାନ୍। ୱାଣ୍ତ୍ରୁ ନାଣ୍ତୋ ରୋଗ୍ଲୋକାଙ୍ଗ୍ ନେଗେଣ୍ତ୍ କିତାମାର୍ହାନ୍। ମାରି ନାଣ୍ତୋ ଲୋକୁଦି ବାଣାନ୍ ଦୁବେଙ୍ଗାଁ ଡ଼ିସ୍ପିସ୍ତାମାର୍ହାନ୍। ୱାଣ୍ତ୍ରୁ ସାତିୱାରିଙ୍ଗ୍ ମାରିଢେସି ନିକ୍ତାନ୍, ମାରି ୱାଣ୍ତ୍ରୁ ଆଇଦୁ ରୁଟି ମାରି ରୁଣ୍ତି ମିନ୍କୁ ନାଣ୍ତୋ ଖାଦିଦୁ ବାଦ୍ଲେ କିତାନ୍, ଏମେଦାନିଙ୍ଗ୍ଗି ପାଞ୍ଚ୍ ଅଜାର୍ ଲୋକୁ ପଟା ବର୍ତି ଉଟାର୍।
ଯିଶୁ ବା ଅରେନ୍ ପେରିକାନ୍ ଅଜାକିନିକାନ୍ ମାର୍ହାନ୍। ୱାଣ୍ତ୍ରୁ ଏମେକା ଅଜାକିତାନ୍, ୱାଣ୍ତ୍ରୁ ପୁରା ଟିକ୍-ଟାକ୍ ସିକିୟା ସିତାନ୍। ୱାଣ୍ତ୍ରୁ ଲୋକାଙ୍ଗ୍ ଇନିକା କିଦେଙ୍ଗ୍ ୱେର୍ନାନ୍, ୱାରୁ ଆୟାପାଣି କିଦେଙ୍ଗ୍ ଦର୍କାର୍। ମାତର୍ ୱାଣ୍ତ୍ରୁ ମାପ୍ରୁଦି ମାରିନ୍। ଉଦାହରଣ୍ ୱାଜା, ୱାଣ୍ତ୍ରୁ ଆଜାକିତାନ୍ ଜେ ନିନୁ ଆଇ ଲୋକାଙ୍ଗ୍ ଆୟାୱାଜା ଜିଉନୋନିକା ଦର୍କାର୍, ଏମେୱାଜାଗି ନିନୁ ନିଜେ ନିଜେଦିଙ୍ଗ୍ ଜିଉନୋଜିନି।
ୱାଣ୍ତ୍ରୁ ଇକାବା ଅଜାକିତାମାର୍ହାନ୍ ଜେ ନିନୁ ମାପ୍ରୁଦିଙ୍ଗ୍ ୱିଜୁ ଜନିସ୍ଦାନ୍ ମାରି ନି ସମ୍ପତିଦାନ୍ ନାଣ୍ତୋ ଜିଉନୋନିକା ଦର୍କାର୍।
ଯିଶୁ ୱେର୍ତାମାନାନ୍ ଗାନି ଦେଶେମ୍ତି ଇନିକା ପାଏଆନି ବାଦ୍ଲୁ ମାପ୍ରୁଦି ରାଜିଦୁ ମାନ୍ଜିନିକା ନେଗେଣ୍ତ୍। ୱାନି ରାଜିଦୁ ନିନୁ ଡ଼ୁଗ୍ନି ୱାନ୍ଦିଙ୍ଗ୍ ମାପ୍ରୁ ମିଙ୍ଗିଁ ମି ପାପାମ୍ଦାନ୍ ରକ୍ଷା କିଦେଙ୍ଗ୍ ଦର୍କାର୍।
ଯିଶୁ ୱେର୍ତାମାର୍ହାନ୍ ଗାନି ଏସୋଲୋକୁ ୱାନିଙ୍ଗ୍ ନିଜେଦି କିନାର୍। ମାପ୍ରୁ ଆୟା ଲୋକାଙ୍ଗ୍ ରକ୍ଷା କିନାନ୍। ମାରି ଆଇକାର୍ ୱାନିଙ୍ଗ୍ ନିଜେଦି କିଏର୍। ୱାଣ୍ତ୍ରୁ ଇକା ୱିଜୁ ୱେହ୍ତାମାନାନ୍ ଜେ ଏସୋଲୋକୁ ନେଗି ବୁମି ୱାଜା, ମାତର୍ ୱାରୁ ଯିଶୁଦି ବିସୟ୍ଦାନ୍ ନେଗିକାବୁର୍ ନିଜେଦି କିନାର୍। ମାରି ମାପ୍ରୁ ୱାରିଙ୍ଗ୍ ରକ୍ଷା କିନାନ୍। ମାରି ଏସୋଲୋକୁ ସାରିଦି ୱାହ୍ତି ବୁମି ୱାଜା। ମାପ୍ରୁଦି ବାକ୍ୟ ଗିଡା ୱାଜା ସାରିଦୁ ଆର୍ନାତ୍, ମାରି ଆବେ ଇନିକା ବା ପିରିଏତ୍। ଇୟା ଲୋକୁ ମାପ୍ରୁଦି ବିସୟ୍ଦାନ୍ ମାନାଏନ୍। ୱାରୁ ୱାନି ରାଜିଦୁ ଡୁଗ୍ଦେଙ୍ଗ୍ ମନା କିନାନ୍।
ଯିଶୁ ସିକ୍ୟା ସିଜିନାନ୍ ଜେ ମାପ୍ରୁ ପାପିରିଙ୍ଗ୍ ନାଣ୍ତୋ ଜିଉନୋନାନ୍। ୱାଣ୍ତ୍ରୁ ୱାରିଙ୍ଗ୍ କେମା କିଦେଙ୍ଗ୍ ମାରି ୱାରିଙ୍ଗ୍ ୱାନି ମାରିନ୍ କିଦେଙ୍ଗ୍ ମାନ୍ସୁକିଜିନାନ୍।
ଯିଶୁ ଇକାବା ୱେର୍ତାମାର୍ହାନ୍ ଗାନି ମାପ୍ରୁ ପାପାମ୍ଦିଙ୍ଗ୍ କାରାଇ ଇନାନ୍। ମାରି ଆଦମ୍ ମାରି ହବା ପାପାମ୍ କିତାର୍, ଇୟାୱାନ୍ଦିଙ୍ଗ୍ ୱାରି ୱିଜୁ କୁଟୁମ୍ ବା ପାପାମ୍ କିତାର୍। ଇୟା ଦୁନିଆଦୁ ମାନ୍ଜିମାନି ୱିଜୁଲୋକୁ ପାପାମ୍ କିନାର୍ ମାରି ମାପ୍ରୁଦି ବାଣାନ୍ ଆକୋ ମାନ୍ଜିନାର୍। ୱିଜେରେ ମାପ୍ରୁଦି ସାତ୍ରୁ।
ମାରି ମାପ୍ରୁ ଇୟା ଦୁନିଆଦୁ ମାନ୍ଜିମାନି ୱିଜେରିଙ୍ଗ୍ ଇୟା ୱାଜା ଜିଉନୋଜି ମାର୍ହାନ୍ ଗାନି: ୱାଣ୍ତ୍ରୁ ୱାନି ଅରେନ୍ ମାତର୍ ମାରିସିଙ୍ଗ୍ ସିତାନ୍ ଏଣ୍ତେସ୍ଗି ମାପ୍ରୁ ୱାନିବାନୁ ବିସ୍ବାସ୍ କିଜିମାନ୍ଜିନି ଲୋକାଙ୍ଗ୍ ଡଣ୍ତ୍ ସିଏନ୍। ଇୟାବାଦ୍ଲୁ, ୱାରୁ ୱିଜୁଦିନାମ୍ ୱାନ୍ଦିଙ୍ଗ୍ ୱାନିୱାଲେ ମାନ୍ଜିନାର୍।
ନିନୁ ସାଦେଙ୍ଗ୍ ମାନାତ୍, ମାତର୍ ନିନୁ ପାପାମ୍ କିତିମାନି। ମାପ୍ରୁ ନିଙ୍ଗିଁ ଡଣ୍ତ୍ ସିଦେଙ୍ଗ୍ ମାର୍ହାତ୍, ଇୟା ବାଦ୍ଲୁ ୱାଣ୍ତ୍ରୁ ଯିଶୁଦିଙ୍ଗ୍ ଡଣ୍ତ୍ ସିତାନ୍। ୱାଣ୍ତ୍ରୁ ଯିଶୁଦିଙ୍ଗ୍ କ୍ରୁସଦୁ ସାନି ଡଣ୍ତ୍ ସିତାନ୍।
ଯିଶୁ ଏସେଙ୍ଗ୍ ବା ପାପାମ୍ କିଏଣ୍ତା ମାର୍ହାନ୍, ମାତର୍ ଯିଶୁ ମାପ୍ରୁଦିଙ୍ଗ୍ ନିଜେଦିଙ୍ଗ୍ ଡଣ୍ତ୍ସିନି ୱାନ୍ଦିଙ୍ଗ୍ ସିତାନ୍, ୱାଣ୍ତ୍ରୁ ସାଦେଙ୍ଗ୍ ମାନ୍ସୁ କିତାନ୍। ଇୟାୱାଜା ମି ପାପାମ୍ ମାରି ଇୟା ଦୁନିୟାଦୁ ମାନ୍ଜିନି ୱିଜେରି ପାପାମ୍ ଆକ କିନିୱାନ୍ଦିଙ୍ଗ୍ ୱାଣ୍ତ୍ରୁ ଉନ୍ଡ୍ରେ ପବିତ୍ର ବଲିଦାନ୍ ମାର୍ହାନ୍। ଯିଶୁ ନିଜେଦିଙ୍ଗ୍ ମାପ୍ରୁଦି ୱାନ୍ଦିଙ୍ଗ୍ ବଲିଦାନ୍ କିତାନ୍। ଇୟାୱାନ୍ଦିଙ୍ଗ୍ ମାପ୍ରୁ ଏମେ ପାପାମ୍ଦିଙ୍ଗ୍ ବା, ଇୟାୱାଜାନେ ବୟଙ୍କ୍କର୍ ପାପାମ୍ଦିଙ୍ଗ୍ ବା କେମା କିନାନ୍।
ଜଦି ବା ନିନୁ ନାଣ୍ତୋ ନେଗିପାଣି କିଜିନି, ମାପ୍ରୁ ନିଙ୍ଗିଁ ଇୟା ନେଗିପାଣିଦାଣ୍ ରକିୟା କିଏନ୍। ୱାନି ତଡ଼ୁ ଆନିୱାନ୍ଦିଙ୍ଗ୍ ଇୟାୱାଜା ଇନି ବିଷୟ୍ ସିଲେତ୍ ଏମେକାଗି ମିରୁ କିଦେଙ୍ଗ୍ ଆଟ୍ନିଦେର୍। ଇୟା ବାଦ୍ଲୁ ନିଙ୍ଗିଁ ବିସ୍ବାସ୍ କିଦେଙ୍ଗ୍ ପଡ଼େଆନାତ୍ ଜେ ଯିଶୁ ଆଜିନାନ୍ ମାପ୍ରୁଦି ମାରିସି, ମାରି ୱାଣ୍ତ୍ରୁ ମି ୱାନ୍ଦିଙ୍ଗ୍ କ୍ରୁସଦୁ ସାତାମାନାନ୍, ମାରି ମାପ୍ରୁ ୱାନିଙ୍ଗ୍ ମାରିଡ଼େସି ନିକ୍ତାମାନାନ୍। ଜଦି ମିରୁ ଇୟା ମୁସ୍କୁ ବିସ୍ବାସ୍ କିଆ, ମାପ୍ରୁ ମି ପାପାମ୍ କେମା କିନାନ୍।
ଏୟେର୍ ଯିଶୁଦି ଡାଗ୍ରୁ ବିସ୍ବାସ୍ କିନାର୍ ମାରି ୱାନିଙ୍ଗ୍ ପ୍ରବୁ ୱାଜା ନିଜେଦି କିନାନ୍, ୱିଜେରିଙ୍ଗ୍ ମାପ୍ରୁ ରକିୟା କିନାନ୍। ମାରି ଏୟେର୍ ୱାନିଙ୍ଗ୍ ବିସ୍ବାସ୍ କିଏର୍ ୱାଣ୍ତ୍ରୁ ୱାରିଙ୍ଗ୍ ରକ୍ଷା କିଏନ୍, ନିନୁ ଦନି ନା ଗରିବ, ମେମାର୍ ସିଲେତିଙ୍ଗାଁ ଆଇମା, ଡକ୍ରା ସିଲେତିଙ୍ଗାଁ ମୁର୍ଲି, ଇକା ମାପ୍ରୁ ୱାନ୍ଦିଙ୍ଗ୍ ପରକ୍ ପଡ଼େଆଏତ୍ ମାପ୍ରୁ ନିଙ୍ଗିଁ ଜିଉନୋନାନ୍ ମାରି ମାନ୍ସୁ କିନାନ୍ ଜେ ମିରୁ ଯିଶୁଦିବାନୁ ବିସ୍ବାସ୍ କିଦୁ ଏଣ୍ତେସ୍ଗି ୱାଣ୍ତ୍ରୁ ମି ତଡ଼ୁ ଆନାନ୍।
ଯିଶୁ ନିଙ୍ଗିଁ ବିସ୍ବାସ୍ କିଦେଙ୍ଗ୍ ମାରି ଡୁବନ୍ ଆଦେଙ୍ଗ୍ କୁକ୍ସିନାନ୍। ନିନୁ ବିସ୍ବାସ୍ କିଆ ଜେ ମାପ୍ରୁଦି ଅରେନ୍ ମାତର୍ ମାରିସି ଯିଶୁ ଆଜିନାନ୍ କ୍ରିଷ୍ଟ? ଇନିକା ନିନୁ ଇକା ବିସ୍ବାସ୍ କିଜିନି ନା? ନିନୁ ଅରେନ୍ ପାପି ମାରି ନିନୁ ମାପ୍ରୁଦି ବାଣାନ୍ ଡଣ୍ତ୍ ପାଏଆଦେଙ୍ଗ୍ ମାନାତ୍? ଇନିକା ନିନୁ ଇକା ବିସ୍ବାସ୍ କିଜିନା ନା? ମି ପାପାମ୍ କେମା କିନିୱାନ୍ଦିଙ୍ଗ୍ ଯିଶୁ କ୍ରୁସଦୁ ସାତାମାନାନ୍।
ମାରି ନିନୁ ଯିଶୁଦି ମୁସ୍କୁ ବିସ୍ବାସ୍ କିଆ ମାରି ଆକାନ୍ ନି ୱାନ୍ଦିଙ୍ଗ୍ ଇନିକା କିତାମାନାନ୍ ଆକା ମାନାଆ, ମାରି ନିନୁ ଯିଶୁଦି ୱେନ୍କା ବୁଲାନି! ଶଇତାନ୍ ମାରି ସିକାଟିଦି ରାଜିଦୁ ନି ମୁସ୍କୁ ସାସନ୍ କିଏନ୍। ଇଏଲ୍ ମପ୍ରୁ ୱାନି ଜାଇ ରାଜିଦୁ ନି ମୁସ୍କୁ ସାସନ୍ କିନାନ୍। ନିଙ୍ଗିଁ ପାପାମ୍ କିଇନୁଣ୍ତିଙ୍ଗ୍ ୱେର୍ତା ମାନାନ୍, ଏମେକାଗି ନିନୁ ଆଗ୍ଡ଼ିହାନ୍ କିତିମାହି। ଆକାନ୍ ନିଙ୍ଗିଁ ଉନ୍ଡ୍ରେ ପୁନି, ନେଗି ଜିଉ ସିତାମାନାନ୍।
ଜଦି ନିନୁ ଅରେନ୍ ଯିଶୁଦି ୱେନ୍କା ବୁଲାନିକି ଆତିମାନି, ମାରି ଯିଶୁ ଇନିକା କିତାମାନାନ୍ ଆୟାୱାନ୍ଦିଙ୍ଗ୍ ମାପ୍ରୁ ନି ପାପାମ୍ କେମା କିତାମାନାନ୍। ଇଏଲ୍ ମାପ୍ରୁ ନିଙ୍ଗିଁ ସାତ୍ରୁ ବାଦ୍ଲୁ ଉନ୍ଡ୍ରେ ନିଜେ ତଡ଼ୁ ୱାଜା ମାନାନାନ୍।
ଜଦି ନିନୁ ମାପ୍ରୁଦି ତଡ଼ୁ ମାରି ପ୍ରବୁ ଯିଶୁଦି ସେବାକିନିକି ଆନି, ମାରି ମିରୁ ଯିଶୁ ଅଜାକିତିମାନି ୱିଜୁ ସିକିୟାଦିଙ୍ଗ୍ ମାନାଦେଙ୍ଗ୍ ମାନ୍ସୁ କିନାର୍। ଜଦି ମିରୁ ଯିଶୁଦି ୱେନ୍କା ବୁଲାନିକିଦେର୍, ଇଏଲ୍ ବା ଶଇତାନ୍ ମିଙ୍ଗିଁ ପାପାମ୍ କିଦେଙ୍ଗ୍ ପରିକା କିନାତ୍। ମାରି ମାପ୍ରୁ ୱିଜୁଦିନାମ୍ ଇନିକା କିନାନ୍ ୱାଣ୍ତ୍ରୁ ଆକା କିନାନ୍। ୱାଣ୍ତ୍ରୁ ୱେହ୍ନାନ୍ ଜେ ଜଦି ମିରୁ ପାପାମ୍ ମାନାଦୁ, ମାରି ୱାଣ୍ତ୍ରୁ ମିଙ୍ଗିଁ କେମା କିନାନ୍। ୱାଣ୍ତ୍ରୁ ମିଙ୍ଗିଁ ପାପ୍ ବିରୁଦ୍ଦୁ ଜୁଜାନି ୱାନ୍ଦିଙ୍ଗ୍ ସାକ୍ତି ସିନାନ୍।
ମାପ୍ରୁ ମିଙ୍ଗିଁ ପାର୍ତନା କିଦେଙ୍ଗ୍ ମାରି ୱାନି ବାକ୍ୟ ପଡ଼ାଦେଙ୍ଗ୍ ୱେର୍ନାନ୍। ଆଇୱାରି ଆଗ୍ଡ଼ି ୱାଣ୍ତ୍ରୁ ମିଙ୍ଗିଁ ଆଇ ବିସ୍ବାସିରି ୱାଲେ ଉପାସନା କିଦେଙ୍ଗ୍ ୱାଣ୍ତ୍ରୁ ୱିଜୁ ୱେର୍ନାନ୍। ୱାଣ୍ତ୍ରୁ ମି ୱାନ୍ଦିଙ୍ଗ୍ ଇନିକା କିତାମାନାନ୍ ଆକା ମିରୁ ଆଇ ଲୋକାଙ୍ଗ୍ ୱେହ୍ତୁ ଜଦି ମିରୁ ଇୟା ୱିଜୁ ପାଣି କିଦୁ, ମିରୁ ୱାନି ତଡ଼ୁ ଆନିଦେର୍।
ରୋମୀୟ ୩:୨୧-୨୬,୫:୧-୧୧; ଯୋହନ ୩:୧୬; ମାର୍କ ୧୬:୧୬; କଲସୀୟ ୧:୧୩-୧୪; ୨କରିନ୍ଥୀୟ ୫:୧୭-୨୧; ୧ଯୋହନ ୧:୫-୧୦ ବାଇବଲ୍ ଦି ଉଣ୍ଡ୍ରେ କାତାନି
Free to use, adapt, and share under an open license (CC BY-SA 4.0).