48. ୪୮. ଯିଶୁ ଆଜିନାନ୍ ପାର୍ମାଣାମ୍ କିତିମାହି ଖ୍ରୀଷ୍ଟ
ଏସ୍ତିୱାଲେ ମାପ୍ରୁ ସାମ୍ସାରାମ୍ଦିଙ୍ଗ୍ ତିଆର୍ କିତାନ୍ ୱିଜୁ ନେଗେଣ୍ତ୍ ମାର୍ହାତ୍। ଇନି ପାପାମ୍ ସିଲେଣ୍ତା ମାର୍ହାତ୍। ଆଦମ୍ ମାରି ହବା ୱାରି-ୱାରି ଲୋଇ ବଲ୍ପାଏଆଜି ମାର୍ହାର୍, ମାରି ୱାରୁ ମାପ୍ରୁଦିଙ୍ଗ୍ ବଲ୍ପାଏ ଆଜିମାହାର୍। ଇନି ରୋଗ୍ ବା ମାରି ସାଉ ସିଲେଣ୍ତା ମାର୍ହାତ୍। ମାପ୍ରୁ ଇୟାୱାନେ ସାମ୍ସାରାମ୍ଦିଙ୍ଗ୍ ମାନ୍ସୁ କିଜିମାର୍ହାନ୍।
ସୟତାନ୍ ହବା ୱାଲେ ସାରାସୁୱାଜା ଆଜି ଡୋଡିଦୁ ୱାର୍ଗିତାନ୍, ମାତର୍ ୱାଣ୍ତ୍ରୁ ଦାନିଙ୍ଗ୍ ଦକା ସିଦେଙ୍ଗ୍ ମାନ୍ସୁକିଜି ମାର୍ହାନ୍। ଦାନିୱେନ୍କା ହବା ମାରି ଆଦମ୍ ମାପ୍ରୁଦି ବିରୁଦ୍ଦୁ ପାପାମ୍ କିତାର୍। ମାତର୍ ୱାରୁ ପାପାମ୍ କିତାମାର୍ହାର୍, ଆୟାୱାନ୍ଦିଙ୍ଗ୍ ୱିଜୁ ଲୋକୁ ସାଜିନାର୍।
ମାତର୍ ଆଦମ୍ ମାରି ହବା ପାପାମ୍ କିତାର୍, ଆୟାୱାନ୍ଦିଙ୍ଗ୍ ସେଇ ଗଟ୍ନା ଗଟେଆତାତ୍। ୱାରୁ ମାପ୍ରୁଦି ଶତ୍ରୁ ଆତାର୍। ଆୟାୱାନ୍ଦିଙ୍ଗ୍, ଆବେଣାନ୍ ୱିଜେରେ ଉଣ୍ତ୍ରେ ପାପାମ୍ କିତାମାନାର୍। ଜନମ୍ଦାନ୍ ୱିଜେରେ ମାପ୍ରୁଦି ଶତ୍ରୁ। ମାପ୍ରୁ ମାରି ଲୋକାଲୋଇ ଶାନ୍ତି ସିଲେଣ୍ତା ମାର୍ହାତ୍। ମାତର୍ ମାପ୍ରୁ ଶାନ୍ତି ସିଦେଙ୍ଗ୍ ମାନ୍ସୁକିଜି ମାର୍ହାନ୍।
ମାପ୍ରୁ ପାର୍ମାଣାମ୍ କିତାମାର୍ହାନ୍ ଜେ ହବାଦି ଉଣ୍ତ୍ରେ କୁଟୁମ୍ ସୟତାନ୍ଦି ତାଲାଦିଙ୍ଗ୍ କତ୍ନାତ୍। ୱାଣ୍ତ୍ରୁ ଇକା ୱିଜୁ ୱେହ୍ତାମାନାନ୍ ଜେ ରେଡିଦୁ ଟକ୍ତାତ୍। ଆଇ ଅର୍ଥଦାନ୍, ସୟତାନ୍ ଯିଶୁଦିଙ୍ଗ୍ ସାୟାମାର୍ଗା ଡ଼େଇନାନ୍, ମାରି ମାପ୍ରୁ ୱାନିଙ୍ଗ୍ ମାରିଡ଼େସି ନିକ୍ନାନ୍। ଇୟାୱେନ୍କା, ମାପ୍ରୁ ସୟତାନ୍ଦି ସାତୁଦିଙ୍ଗ୍ ୱିଜୁଦିନାମ୍ ୱାନ୍ଦିଙ୍ଗ୍ ୱିସ୍ନାନ୍। ନାଣ୍ତୋ ପାଟେଙ୍ଗ୍ ୱେନ୍କା, ମାପ୍ରୁ ସିତାନ୍ ଜେ ୱାଣ୍ତ୍ରୁ ଆଜିନାନ୍ ମାପ୍ରୁ ଯିଶୁ।
ମାପ୍ରୁ ନହଦିଙ୍ଗ୍ ଉଣ୍ତ୍ରେ ଡଙ୍ଗା ତିହାର୍ କିଦେଙ୍ଗ୍ ୱେହ୍ତାମାର୍ହାନ୍ ଇୟାବାଣାନ୍ ୱାଣ୍ତ୍ରୁ ୱାରି ପରିବାର୍ଦିଙ୍ଗ୍ ମାପ୍ରୁ ପକିସ୍ତେଙ୍ଗ୍ ସନ୍ସିମାହି ବାତ୍ୟା ଦୁକାମ୍ଦାନ୍ ରକିୟା କିଦେଙ୍ଗ୍ ଆଟ୍ନାନ୍। ଇୟାୱାଜା ମାପ୍ରୁ ଆୟା ଲୋକାଙ୍ଗ୍ ଜିପିସ୍ତାନ୍ ଏୟେନ୍ଗି ୱାନି ମୁସ୍କୁ ବିସ୍ବାସ୍ କିଜିମାର୍ହାର୍। ଇୟାୱାଜା ୱିଜେରେ ପାପାମ୍ କିଜିମାହିଙ୍ଗ୍ ମାପ୍ରୁଦି ବାଣାନ୍ ସାନିଡଣ୍ତ୍ ପାଏଆଦେଙ୍ଗ୍ ଜଗ୍। ମାରି ମାପ୍ରୁ ଯିଶୁଦିଙ୍ଗ୍ ୱାନି ମୁସ୍କୁ ବିସ୍ବାସ୍ କିଜିମାହି ୱିଜେରିଙ୍ଗ୍ ଜିପିସ୍ନି ୱାନ୍ଦିଙ୍ଗ୍ ପୋକ୍ତାନ୍।
ନାଣ୍ତୋ ପାଟେଙ୍ଗ୍ ସାନ୍ଦି ଆସ୍ସି, ଯାଜକର୍ ମାପ୍ରୁଦି ଡାଗ୍ରୁ ବଲିଦାନ୍ ସିଜିମାର୍ହାର୍। ମାରି ଇକା ତର୍ପସିନାନ୍ ଜେ ଲୋକୁ ପାପାମ୍ କିତାର୍ ମାରି ମାପ୍ରୁଦିବାଣାନ୍ ଡଣ୍ତ୍ ଜଗ୍ ମାର୍ହାର୍। ମାତର୍ ଆୟା ବଲିଦାନ୍ ୱାରି ପାପାମ୍ଦି କେମା କିଦେଙ୍ଗ୍ ଆଟ୍ଏଜିମାର୍ହାର୍। ଯିଶୁ ଆଜିନାନ୍ ୱିଜେରିଙ୍ଗ୍ ପେରିଯାଜକ ମାର୍ହାନ୍। ୱାଣ୍ତ୍ରୁ ଆକା କିତାନ୍ ଏମେକାଗି ଯାଜକ୍ ବା କିଦେଙ୍ଗ୍ ଆଟ୍ଏଜି ମାର୍ହାନ୍। ୱାଣ୍ତ୍ରୁ ନିଜେଦିଙ୍ଗ୍ ଉଣ୍ତ୍ରେମାତର୍ ବଲିଦାନ୍ ନିଜେଦିଙ୍ଗ୍ ସର୍ପେଆତାନ୍ ଏମେକା ୱିଜେରି ପାପାମ୍ ନର୍ଦେଙ୍ଗ୍ ଆଟ୍ନାତ୍। ୱାଣ୍ତ୍ରୁ ମାନାତା ମାନାନ୍ ଜେ ମାପ୍ରୁ ଆଜିନାନ୍ ୱାନି ପାପାମ୍ ୱାନ୍ଦିଙ୍ଗ୍ ୱାନିଙ୍ଗ୍ ଡଣ୍ତ୍ ସିଦୁ। ଆୟା ୱାନ୍ଦିଙ୍ଗ୍, ଯିଶୁ ଅରେନ୍ ପବିତ୍ର ପେରିଯାଜକ୍ ମାର୍ହାନ୍।
ମାପ୍ରୁ ଅବ୍ରାମ୍ଦିଙ୍ଗ୍ ୱେହ୍ତାମାର୍ହାନ୍, ନାନୁ ନି ବାଣାନ୍ ଦେଶେମ୍ତି ୱିଜୁ ଜାତିଦିଙ୍ଗ୍ ଆସିର୍ବାଦ୍ ସିନା। ଯିଶୁ ଇୟା ଅବ୍ରାମ୍ଦି କୁଟୁମ୍ ମାର୍ହାନ୍। ମାପ୍ରୁ ଅବ୍ରାମ୍ଦି ବାଣାନ୍ ୱିଜେରି ପରିବାର୍ଦିଙ୍ଗ୍ ଆସିର୍ବାଦ୍ କିନାନ୍, ମାତର୍ ଏନ୍ ଯିଶୁଦି ଡାଗ୍ରୁ ବିସ୍ବାସ୍ କିନାନ୍ ମାପ୍ରୁ ୱିଜେରିଙ୍ଗ୍ ପାପାମ୍ଦାନ୍ ରକିୟା କିନାନ୍। ଏସ୍ତିୱାଲେ ଇୟା ଲୋକୁ ଯିଶୁଦି ଡାଗ୍ରୁ ବିସ୍ବାସ୍ କିନାର୍, ମାପ୍ରୁ ୱାରିଙ୍ଗ୍ ଆବ୍ରାମ୍ଦି କୁଟୁମ୍ୱାଜା ନିଜେଦି କିନାନ୍।
ମାପ୍ରୁ ଅବ୍ରାମ୍ଦିଙ୍ଗ୍ ୱାନି ନିଜେ କୋଡଦିଙ୍ଗ୍ ବଲିଦାନ୍ ସିଦେଙ୍ଗ୍ ୱେହ୍ତାମାର୍ହାନ୍। ଦାନିୱେନ୍କା ମାପ୍ରୁ ଇସାକ୍ଦି ବାଦ୍ଲୁ ଉଣ୍ତ୍ରେ ମେଣ୍ତା ସିତାନ୍। ମାପୁ ୱିଜେରେ ନିଜେ ପାପାମ୍ ୱାନ୍ଦିଙ୍ଗ୍ ସାଦେଙ୍ଗ୍ ଜଗ୍ ମାହାପ୍! ମାରି ମାପ୍ରୁ ମା ବାଡିଦୁ ଯିଶୁଦିଙ୍ଗ୍ ବଲିଦାନ୍ ୱାଜା ସିତାନ୍। ଇୟାୱାନ୍ଦିଙ୍ଗ୍ ମାପୁ ଯିଶୁଦିଙ୍ଗ୍ ମାପ୍ରୁଦି ମେଣ୍ତା ଇଜି ୱେହ୍ସି ମାନ୍ଜିନାଟ୍।
ଏସ୍ତିୱାଲେ ମାପ୍ରୁ ମିସର୍ ମୁସ୍କୁ ୱିଜ୍ନି ମର୍ଡି ପୋକ୍ତାନ୍, ୱାଣ୍ତ୍ରୁ ୱିଜୁ ଇସ୍ରାଏଲ୍ ପରିବାର୍ଦିଙ୍ଗ୍ ଉଣ୍ତ୍ରେ ମେଣ୍ତା ବଲିଦାନ୍ ସିଦେଙ୍ଗ୍ ୱେହ୍ତାମାର୍ହାନ୍। ଆୟା ମେଣ୍ତାଦି ଇନି ଦସ୍ ମାନ୍ଡ୍ରେଙ୍ଗ୍ ସିଲେଣ୍ତା ମାନ୍ଡ୍ରେଙ୍ଗ୍ ମାନାତ୍। ଦାନିୱେନ୍କା ୱାରୁ ୱାରି ଦୁୱାର୍ ମୁସ୍କୁ ମାରି ସାରିସୁରୁଲାଦାନି ନେତେର୍ ଆଡ୍ଗିସ୍ତେଙ୍ଗ୍ ମାର୍ହାତ୍। ଏସ୍ତିୱାଲେ ମାପ୍ରୁ ସୁଡ୍ତାନ୍ ଆୟା ନେତେର୍ ୱାଣ୍ତ୍ରୁ ୱାରି ଇଲୁ ଡେୱାଦୁ ମୁସ୍କୁ ସର୍ହାନ୍ ମାରି ୱାରି ପାର୍ତୁମ୍ ଜନମ୍ କଡ଼ଦିଙ୍ଗ୍ ସାୟାମାର୍ଗା ଡ଼େଏର୍। ଏସ୍ତିୱାଲେ ଇକା ଗଟେଆତାତ୍, ମାପ୍ରୁ ଦିନିଙ୍ଗ୍ ନିସ୍ତାର୍ ପଣ୍ତୋଇ ଇଜି ୱେର୍ତାନ୍।
ଯିଶୁ ନିସ୍ତାର୍ ପଣ୍ତୋୟଦୁ ଉନ୍ଡ୍ରେ ମେଣ୍ତା ଲେକେନ୍। ୱାଣ୍ତ୍ରୁ ଏସେଙ୍ଗ୍ବା ପାପାମ୍ କିଏଣ୍ତା ମାର୍ହାନ୍, ମାରି ୱାନିୱାଲେ ଇନି ବୁଲ୍ ସିଲେଣ୍ତା ମାର୍ହାତ୍। ନିସ୍ତାର୍ ପଣ୍ତୋୟ ୱେଡାଦୁ ୱାନିଙ୍ଗ୍ ସାୟାମାର୍ଗା ଡାକ୍ତାମାର୍ହାର୍। ଏସ୍ତିୱାଲେ ଏୟେନ୍ଗ ଯିଶୁଦି ମୁସ୍କୁ ବିସ୍ବାସ୍ କିନାନ୍, ନାସ୍ତିୱାଲେ ଯିଶୁଦି ନେତେର୍ ଆୟା ଲୋକୁଦି ପାପାମ୍ ୱାନ୍ଦିଙ୍ଗ୍ ଦୟା ସିନାମାନ୍ଜିନାନ୍। ଇକା ଇୟାୱାଜାନେ ଜେ ମାପ୍ରୁ ଆୟା ଲୋକୁଦିବାଣାନ୍ ଆଗ୍ଡ଼ି ସନାନ୍, ମାତର୍ ୱାଣ୍ତ୍ରୁ ୱାନିଙ୍ଗ୍ ଡଣ୍ତ୍ ସିଏନ୍।
ମାପ୍ରୁ ଇସ୍ରାଏଲ୍ତି ୱାରିୱାଲେ ଉନ୍ଡ୍ରେ ନିୟମ୍ କିତାନ୍, ମାତର୍ ୱାରୁ ଆୟାୱାଜା ଲୋକୁ ମାର୍ହାର୍। ଏୟେଙ୍ଗିଁ ମାପ୍ରୁ ନିଜେଦି କିଦେଙ୍ଗ୍ ମାନ୍ସୁ କିଜିମାର୍ହାନ୍। ମାରି ଇଏଲ୍ ମାପ୍ରୁ ଉଣ୍ତ୍ରେ ନିୟମ୍ କିତାନ୍ଜେ ଏମେକାଗି ୱିଜେରି ୱାନ୍ଦିଙ୍ଗ୍ କିତାନ୍। ମାରି ଏମେ ଜାତିତି ଏୟେର୍ ଇୟା ପୁନି ନିୟମ୍ ନିଜେଦି କିନାର୍, ମାରି ୱାଣ୍ତ୍ରୁ ଆବେ ସନ୍ସି ମାପ୍ରୁଦି ୱାଲେ କୁଡ୍ଦେଙ୍ଗ୍ ଆଟ୍ନି। ୱାଣ୍ତ୍ରୁ ଆୟାୱାନ୍ଦିଙ୍ଗ୍ କିଜିମାହାନ୍ ମାତର୍ ୱାଣ୍ତ୍ରୁ ଯିଶୁଦିଙ୍ଗ୍ ବିସ୍ବାସ୍ କିଜିମାର୍ହାନ୍।
ମୋଶା ଇୟାୱାଜା ଅରେନ୍ ବାବବାଦି ମାହାନ୍ ଏୟେନ୍ଗି ପେରି ସାତୁଦାନ୍ ମାପ୍ରୁଦି ବାକ୍ୟ ପ୍ରଚାର୍ କିଜିମାର୍ହାନ୍। ମାତର୍ ଯିଶୁ ୱିଜୁ ବାବବାଦି ବାଣାନ୍ ପେରିକାନ୍। ୱାଣ୍ତ୍ରୁ ଆଜିନାନ୍ ମାପ୍ରୁ, ମାରି ୱାଣ୍ତ୍ରୁ ଇନିକା କିଜିମାର୍ହାନ୍ ମାରି ୱେହ୍ତାମାହାନ୍ ଆକା ମାପ୍ରୁଦି ପାଣି ମାରି ମାଟା ମାର୍ହାତ୍। ଇୟାୱାନ୍ଦିଙ୍ଗ୍ ପବିତ୍ରସାସ୍ତ୍ରର୍ ଯିଶୁଦିଙ୍ଗ୍ ମାପ୍ରୁଦି ବାକ୍ୟ ଇଜି ୱେର୍ନାତ୍।
ମାପ୍ରୁ ରାଜା ଦାଉଦ୍ଦିଙ୍ଗ୍ ନିୟମ୍ କିତାମାର୍ହାନ୍ ଗାନି ରାଜାୱାଜା ୱାନି ଅରେନ୍ କୁଟୁମ୍ ମାପ୍ରୁଦି ଲୋକା ମୁସ୍କୁ ୱିଜୁଦିନାମ୍ ୱାନ୍ଦିଙ୍ଗ୍ ଶାସନ୍ କିନାନ୍। ଯିଶୁ ଆଜିନାନ୍ ମାପ୍ରୁଦି ମାରିସି ମାରି କ୍ରିଷ୍ଟ, ଆୟାୱାନ୍ଦିଙ୍ଗ୍ ୱାଣ୍ତ୍ରୁ ରାଜା ଦାଉଦ୍ଦି ଉନ୍ଡ୍ରେ ମାତର୍ କୁଟୁମ୍ ଆଜିନାନ୍ ଏୟେନ୍ଗି ୱିଜୁଦିନାମ୍ ୱାନ୍ଦିଙ୍ଗ୍ ରାଜିଦୁ ଶାସନ୍ କିଦେଙ୍ଗ୍ ଆଟ୍ନାନ୍।
ଦାଉଦ୍ ତୋ ଇସ୍ରାଏଲ୍ଦି ରାଜା ମାର୍ହାନ୍, ମାତର୍ ଯିଶୁ ୱିଜୁ ଦେଶେମ୍ତି ରାଜା! ୱାଣ୍ତ୍ରୁ ମାରିଡ଼େସି ୱାଜି ନିୟାୟ୍ ମାରି ସାନ୍ତିଦାନ୍ ୱାନି ରାଜିଦିଙ୍ଗ୍ ଶାସନ୍ କିନାନ୍।
ଆଦି ୧-୩,୬,୧୪,୨୨; ଯାତ୍ରା ୧୨,୨୦;୨ ଶାମୁୟେଲ ୭; ଏବ୍ରୀ ୩:୧-୪:୧୪-୫:୧୦,୭:୧-୮:୧୩, ୯:୧୧-୧୦:୧୮; ପ୍ରକାଶିତ ୨୧ ଦି ଉନ୍ଡ୍ରେ ବାଇବଲ୍ଦି କାତାନି
Free to use, adapt, and share under an open license (CC BY-SA 4.0).