47. ୪୭. ଫିଲିପି ଗଡ଼୍ଦୁ ପାଉଲ ମାରି ସିଲା
ଏସ୍ତିୱାଲେ ଶାଉଲ ୱିଜୁ ରୋମ ରାଜିଦୁ ବୁଲାତି ୱେଡାଦୁ ୱାଣ୍ଡ୍ରୁ ୱାନି ରୋମ୍ ରାଜିତି ଦୋରୁ ‘ପାଉଲ’ ଦିଙ୍ଗ୍ ବ୍ୟବହାର୍ କିଦେଙ୍ଗ୍ ଆସ୍ତାନ୍। ଅର୍ନେଣ୍ତ୍, ପାଉଲ ମାରି ୱାନି ତୋଡୁ ସିଲା ଫିଲିପ୍ପି ଗଡ୍ଦୁ ଯିଶୁଦି ବିଷୟ୍ଦାନ୍ ସୁସମାଚାର୍ ପ୍ରଚାର୍ କିଦେଙ୍ଗ୍ ସର୍ହାର୍। ୱାରୁ ଗଡ୍ଦି ବାଇଲୁଦି ଗାଡା ଡାଗ୍ରୁ ମାନି ଉଣ୍ତ୍ରେ ବାଡିଦୁ ସହାର୍ ଏମେବାନୁଗି ଲୋକୁ ପାର୍ତନା କିଦେଙ୍ଗ୍ ଉଣ୍ତ୍ରେବାନୁ ମାର୍ହାର୍। ଆବେ ୱାରୁ ଲୁଦିଆ ଦୋରୁତିକାତ୍ ଅରେତ୍ ଆଇଲି କଢୋଦିଙ୍ଗ୍ କୁଡିତାମାହାର୍ ଏହେତ୍ ଅରେତ୍ ବେପାରିଏନ୍ ମାହାତ୍। ଆକାତ୍ ମାପ୍ରୁଦିଙ୍ଗ୍ ଜିଉ ନଜି ମାର୍ହାର୍ ମାରି ୱାନି ଉପାସନା କିଜିମାର୍ହାର୍।
ମାପ୍ରୁ ଲୁଦିଆଦିଙ୍ଗ୍ ଯିଶୁଦି ବିଷୟ୍ଦି ମାଟାଦି ବିସ୍ବାସ୍ କିଦେଙ୍ଗ୍ ସାୟାମ୍ କିତାମାର୍ହାନ୍। ପାଉଲ ମାରି ସିଲା ଦାନିଙ୍ଗ୍ ମାରି ଦାନି ପରିବାର୍ଦିଙ୍ଗ୍ ଡୁବନ୍ ସିତାର୍। ୱାଦୁ ପାଉଲ ମାରି ସିଲାଦିଙ୍ଗ୍ ଦାନିଙ୍ଗ୍ ଇଲୁଦୁ ମାନ୍ଣ୍ଡ୍ରେଙ୍ଗ୍ କୁକ୍ତା ମାର୍ହାର୍, ଇୟାୱାନ୍ଦିଙ୍ଗ୍ ୱାରୁ ଆବେ ମାର୍ହାର୍।
ପାଉଲ ମାରି ସିଲା ଏସେଙ୍ଗ୍-ଏସେଙ୍ଗ୍ ଲୋକା ୱାଲେ କୁଡିତା ମାର୍ହାର୍ ଏମେଗି ଯିହୁଦି ପାର୍ତନା କିଜି ମାର୍ହାର୍। ୱିଜୁଦିନାମ୍ ନାସ୍ତିୱାଲେ ୱାରୁ ଆବେ ସନ୍ସି ମାର୍ହାର୍ ଉଣ୍ତ୍ରେ ସେଇ ଜିଉ ମାନି ଅରେତ୍ ଦାସି ଆଇଲି ୱାରିଙ୍ଗ୍ ୱେନ୍କା ୱେନ୍କା ସନ୍ସି ମାର୍ହାତ୍। ଇୟା ସେଇ ଜିଉଦାଣାନ୍, ଆଦି ଲୋକୁଦି ଭବିଷ୍ୟତ୍ମାଟା ୱେର୍ସି ମାର୍ହାତ୍, ଇୟାୱାନ୍ଦିଙ୍ଗ୍ ଆଦି ଭବିଷ୍ୟତ୍ମାଟା ୱେର୍ନି ଲୋକାୱାଜା ଆଜି ନିଜେ ସାଉକାର୍ଦି ୱାନ୍ଦିଙ୍ଗ୍ ନାଣ୍ତୋ ଡାବୁ ଲାବାମ୍ କିଜିସିଜି ମାର୍ହାତ୍।
ୱାରୁ ବୁଲାନିୱେଡାଦୁ ଆୟା ଦାସି ଆଇଲି ଆଉଲି ଆଜି ୱେର୍ସିମାର୍ହାତ୍, “ଇୟା ଲୋକୁ ୱିଜୁଦାନ୍ ମୁସ୍କୁ ମାପ୍ରୁଦି ସେବକର୍। ୱେରୁ ଉଦାର୍ ପାଏଆନି ସାରି ନିଙ୍ଗିଁ ୱେହ୍ସିନାର୍!” ଆକାତ୍ ୱିଜୁଦିନାମ୍ ଇୟାୱାଜାନେ କିଜିମାର୍ହାତ୍ ଆଦେଙ୍ଗେଁ ପାଉଲ କାକା ଆତାନ୍।
ୱିଜ୍ନି ୱେଡାଦୁ, ଅର୍ନେଣ୍ତ୍ ନାସ୍ତିୱାଲେ ଆୟା ଦାସି ଆଉଲି ଆଜି ୱେହ୍ତେଙ୍ଗ୍ ଆସ୍ତାତ୍, ଆଦେଙ୍ଗେଁ ପାଉଲ ୱାନି ତୋର୍ନ ବୁଲାଜି ଦାନି ଲୋଇ ମାନି ସେଇଜିଉଦିଙ୍ଗ୍ ୱେର୍ତାନ୍, ”ଯିଶୁଦି ଦୋରୁଦାଣ୍ ଦାନି ଲୋଇର୍ହାନ୍ ସୋସି ସନ୍ଆ।” ଦାପେ ଦାପେ ଆୟା ସେଇଜିଉ ଦାନିଙ୍ଗ୍ ଢିସ୍ସି ସର୍ହାତ୍।
ଆୟା ଦାସିଦି ସାଉକାର୍ ନାଣ୍ତୋ କାକା ଆତାର୍! ୱାରୁ ନେସ୍ତାର୍ ଗାନି ସେଇଜିଉ ଢିସ୍ତିଙ୍ଗାଁ ଆୟା ଦାସି ଆଇଲି ଲୋକୁରି ଭବିଷ୍ୟତ୍ ମାଟା ୱେର୍ତେଙ୍ଗ୍ ଆଟ୍ଏତ୍। ଇକା ଅର୍ତ ଇକାଜେ ଆକାତ୍ ଲୋକୁର୍ ଭବିଷ୍ୟତ୍ ମାଟା ୱେର୍ତିଙ୍ଗାଁ ୱାରୁ ଦାନିଙ୍ଗ୍ ସାଉକାର୍ଦିଙ୍ଗ୍ ଡ଼ାବୁମାରି ସିଏର୍।
ଆଦେଙ୍ଗେଁ ଆୟା ଦାସିଦି ସାଉକାର୍ରିଙ୍ଗ୍ ପାଉଲ ମାରି ସିଲାଦିଙ୍ଗ୍ ରୋମ ଦେଶେମ୍ତି ସରକାରିଲୋକୁଦି ଡାଗ୍ରୁ ଅତାର୍, ଏମେକାର୍ ପାଉଲ ମାରି ସିଲାଦିଙ୍ଗ୍ ଢେଇତାର୍ ମାରି ୱେନ୍କା ୱାରିଙ୍ଗ୍ ଜୋଇଲ୍ଦୁ ନିର୍ତାର୍।
ୱାରୁ ପାଉଲ ମାରି ସିଲାଦିଙ୍ଗ୍ ଆୟା ଜୋଇଲ୍ଦୁ ଇଟ୍ତାର୍ ଏମେବାନୁଗି ନାଣ୍ତୋ ଜୋଇଲ୍ରକ୍ଷା କିନିକାର୍ ମାହାର୍। ଇୟାୱାଜାଗି ୱାରୁ ପେରିପେରି ମୁଟ୍ଲେଙ୍ଗାଁ ୱାଲେ ୱାରି ପାଦାମ୍ଙ୍ଗାଁ ତହ୍ତାମାହାର୍। ମାତର୍ ମାଜେର୍ନାଡା ପାଉଲ ମାରି ସିଲା ମାପ୍ରୁଦି ପ୍ରଶଂସା ପାଟା ପାର୍ଜିମାହାର୍।
ଗାଦେମ୍, ଉଣ୍ଡ୍ରେ ବୁମି କାଦ୍ଲିତାତ୍! ୱିଜୁ ଜୋଇଲ୍ଦି ସେହ୍ଲା ରେୟାତାତ୍, ମାରି ୱିଜୁ ଜୋଇଲ୍ଦୁ ମାନ୍ଜିନି ଲୋକୁର୍ ତୋର୍ହାତିମାର୍ହି ସିକ୍ଣି କୁଦ୍ଜି ଆର୍ତାତ୍।
ଏସ୍ତିୱାଲେ ଜଇଲ୍ ରକ୍ଷା କିନିକାନ୍ ନିଙ୍ଗିଁତାନ୍। ୱାଣ୍ଡ୍ରୁ ସୁଡ୍ତାନ୍ ଗାନି ଜଇଲଦି ସେହ୍ଲା କୁଦିତା ମାନାତ୍। ୱାଣ୍ଡ୍ରୁ ଅଡ୍ବିତାନ୍ ଗାନି ୱିଜୁ ଜୋଇଲ୍ଦୁ ମାନ୍ଜିନି ଲୋକୁ ଉରୁକ୍ତାର୍। ୱାଣ୍ଡ୍ରୁ ତିଲାଜି ମାର୍ହାନ୍ ଗାନି ୱାରୁ ଉରୁକ୍ନି ୱାନ୍ଦିଙ୍ଗ୍ ରୋମ୍ ଦେଶେମ୍ତି ଅଦିକାରି ଲୋକୁ ୱାନିଙ୍ଗ୍ ସାଗୁମାର୍ଗା ଢେଇନାର୍, ଇୟାୱାନ୍ଦିଙ୍ଗ୍ ୱାଣ୍ଡ୍ରୁ ନିଜେଦିଙ୍ଗ୍ ଢେୟାଦେଙ୍ଗ୍ ତିଆର୍ ଆତାନ୍! ମାତର୍ ପାଉଲ ୱାନିଙ୍ଗ୍ ସୁଡ୍ଜି ଆଉଲି ଆଜି ୱେର୍ତାନ୍, “ମାନ୍ଆଁ! ନିଜେଦିଙ୍ଗ୍ ଢେୟାମା। ମାପୁ ୱିଜେରେ ଇବେ ମାନାପ୍।”
ଆୟା ଜୋଇଲ୍ ରକ୍ଷାକିନିକାନ୍ ତିଏଲାଦାନ୍ ପାଉଲ ମାରି ସିଲାଦି ଡାଗ୍ରୁ ୱାଜି ୱେନ୍ବାତାନ୍, “ପରିତ୍ରାଣ୍ ପୁଟିନିୱାନ୍ଦିଙ୍ଗ୍ ନାନୁ ଇନିକା କିନା?” ପାଉଲ ଉତର୍ ସିତାନ୍, “ମାପ୍ରୁ ଯିଶୁଦି ଡାଗ୍ରୁ ବିସ୍ବାସ୍ କିଆ, ଆଦେଙ୍ଗେଁ ନିନୁ ମାରି ନି ପରିବାର୍ ପରିତ୍ରାଣ୍ ପାଏଆନିଦେର୍।” ଦାନିୱେନ୍କା ଜଇଲରକ୍ଷା କିନିକାନ୍ ପାଉଲ ମାରି ସିଲାଦିଙ୍ଗ୍ ୱାନି ଇଣ୍ଡ୍ରୋ ଅସ୍ସି ୱାରି ଗାଉଦିଙ୍ଗ୍ ତେଲିତାନ୍। ପାଉଲ ଯିଶୁଦି ବିଷୟ୍ଦି ନେଗିକାବୁର୍ ୱାରି ଇଣ୍ଡ୍ରୋଣି ୱିଜେରିଙ୍ଗ୍ ୱେନିସ୍ତାନ୍।
ଜଇଲ୍ରକ୍ଷା କିନିକାନ୍ ମାରି ୱାନି ପରିବାର୍ ଯିଶୁଦିଙ୍ଗ୍ ବିସ୍ବାସ୍ କିତାର୍, ଇୟାୱାନ୍ଦିଙ୍ଗ୍ ପାଉଲ ମାରି ସିଲା ୱାରିଙ୍ଗ୍ ଡୁବନ୍ ସିତାର୍। ୱେନ୍କା ଜଇଲ୍ରକ୍ଷା କିନିକାନ୍ ପାଉଲ୍ ମାରି ସିଲାଦିଙ୍ଗ୍ ଉଣ୍ଡେଙ୍ଗ୍ ସିତାନ୍, ମାରି ୱାରୁ କୁଡ଼୍ଜି ଉଣ୍ଡ୍ରେ ଡାଗ୍ରୁ ସାର୍ଦା କିତାର୍।
ଦାନିୱେନ୍କାହି ଦିନାମ୍ ଗଡ୍ଦି ନେତାର୍ ପାଉଲ୍ ମାରି ସିଲାଦିଙ୍ଗ୍ ଜଇଲ୍ଦାନ୍ ସପ୍ସି ଡ଼ିସ୍ତାର୍ ମାରି ଫିଲିପ୍ପି ଗଡ଼୍ ଡିସ୍ସି ସଣ୍ଡ୍ରେଙ୍ଗ୍ ୱେର୍ତାର୍। ପାଉଲ୍ ମାରି ସିଲା ଲୁଦିଆ ମାରି ଆଇ ଇନି ତୋଡୁରିଙ୍ଗ୍ କୁଡ଼୍ଜି ଗଡ୍ ଡିସ୍ସି ସହାର୍। ଯିଶୁଦି ବିସୟଦାନ୍ ନେଗିକାବୁର୍ ସାରିତାତ୍ ମାରି ମଣ୍ତ୍ଲି ପିରିଦେଙ୍ଗ୍ ଆସ୍ତାତ୍।
ପାଉଲ ମାରି ଆଇ ବିସ୍ବାସି ନେତାର୍ ନାଣ୍ତୋ ଗଡ୍କାଙ୍ଗ୍ ବୁଲାତାର୍। ୱାରୁ ଲୋକାଙ୍ଗ୍ ଯିଶୁଦି ବିସୟଦାନ୍ ନେଗିକାବୁର୍ ୱେନିସ୍ତାର୍। ୱାରୁ ମଣ୍ତ୍ଲିଦୁ ବିସ୍ବାସିରିଙ୍ଗ୍ ବିସ୍ବାସ୍ଦାଣ୍ ସାର୍ଦା କିଦେଙ୍ଗ୍ ମାରି ସିକିୟା ସିନି ୱାନ୍ଦିଙ୍ଗ୍ ଏସୋ ସିଟିବା ରାସ୍ତା ମାର୍ହାର୍। ଇୟା ସିଟି ଲୋଇହାନ୍ ଏସଡ୍ ବାଇବଲ୍ଦି ବଇ ଆତାତ୍।
ପ୍ରେରିତ ୧୬:୧୧-୪୦ ବାଇବଲ୍ଦି ଉଣ୍ଡ୍ରେ କାତାନି
Free to use, adapt, and share under an open license (CC BY-SA 4.0).