46. ୪୬. ପାଉଲ ଯିଶୁଦି ସିସୁର୍ ଆତାନ୍
ଶାଉଲ ଦୋରୁତିକାନ୍ ଅରେନ୍ ଲୋକୁ ମାର୍ହାନ୍ ଏୟେନ୍ଗି ଯିଶୁଦିଙ୍ଗ୍ ବିସ୍ବାସ୍ କିଏଜି ମାର୍ହାନ୍। ୱାଣ୍ତ୍ରୁ ଏସ୍ତିୱାଲେ ମୁର୍ଲି ମାର୍ହାନ୍, ଆୟାୱରଡ଼ାଦୁ ୱାଣ୍ତ୍ରୁ ଷ୍ଟିଫେନ୍ ସାୟାମାର୍ଗା ଢେଇନି ଲୋକୁଦି ସୋକା କାପ୍କିତା ମାର୍ହାନ୍। ୱେନ୍କା ୱାଣ୍ତ୍ରୁ ବିସ୍ବାସ୍ ଲୋକାଙ୍ଗ୍ ଦୁଃକାମ୍ ସିତାନ୍। ୱାଣ୍ତ୍ରୁ ଯିରୁଶାଲାମ୍ଦୁ ଇଲ୍କାଙ୍ଗ୍-ଇଲ୍କାଙ୍ଗ୍ ସନ୍ସି ମେମାର୍ ମାରି ଆଇମେକାଙ୍ଗ୍ ତହ୍ସି ଜଇଲ୍ଦୁ ଇଡ୍ଜିମାର୍ହାନ୍। ଦାନିୱେନ୍କା ୱିଜେରିଙ୍ଗ୍ ପେରି ଯାଜକର୍ ଶାଉଲଦିଙ୍ଗ୍ ଦମ୍ମେସକ ଗଡ଼୍ଦୁ ସୋନ୍ଣ୍ତ୍ରେଙ୍ଗ୍ ମାଟା ସିତାମାର୍ହାର୍। ୱାଣ୍ତ୍ରୁ ଆବେନୁ ମାନି କ୍ରିସ୍ଟାନ୍ ଲୋକାଙ୍ଗ୍ ତହ୍ସି ୱାରିଙ୍ଗ୍ ଯିରୁଶାଲମଦୁ ଡ଼େପ୍ସି ତାତେଙ୍ଗ୍ ୱେହ୍ତାମାର୍ହାନ୍।
ମାରି ଶାଉଲ ଦମ୍ମେସକ ସନ୍ଡ୍ରେଙ୍ଗ୍ ଆସ୍ତାର୍। ୱାଣ୍ତ୍ରୁ ଗଡ଼୍ଦୁ ଇତି ଆଗ୍ଡ଼ି ବାଦଢ଼ଦୁ ଉଣ୍ତ୍ରେ ଜାଇ ୱାନି ସାରିବେଡ୍ତି କାସ୍ସି ନିଙ୍ଗିଁତାତ୍ ମାରି ୱାଣ୍ତ୍ରୁ ବୁମିଦୁ ଆର୍ତାନ୍। ଶାଉଲ ଏୟେନ୍ ଅରେନ୍ ୱେର୍ନିକା ୱେର୍ହାନ୍, “ଏ ଶାଉଲ! ଏ ଶାଉଲ! ନିନୁ ନାଙ୍ଗିଁ ଇନିଦାନିଙ୍ଗ୍ ଦୁଃକାମ୍ କିଜିନି!” ଶାଉଲ୍ ୱେନ୍ବାତାନ୍ ଏ ପ୍ରବୁ ନିନୁ ଏୟେନ୍? ଯିଶୁ ୱାନିଙ୍ଗ୍ ଉତର୍ ସିତାନ୍, ନାନୁ ଯିଶୁ ନିନୁନାଙ୍ଗିଁ ଦୁକାମ୍ ସିଜିନି।
ଏସେଙ୍ଗ୍ ଶାଉଲ ନିଙ୍ଗିଁ ୱିସ୍ତାନ୍, ଆକାନ୍ ସୁଡ୍ଦେଙ୍ଗ୍ ଆଟ୍ଏତାନ୍। ୱାରି ତୋଡୁର୍ ୱାନିଙ୍ଗ୍ ଦମ୍ମେସକ୍ଦିଙ୍ଗ୍ ଅତାର୍। ଶାଉଲ ମୁଣ୍ତ୍ରି ଦିନାମ୍ ନାସେଣାନ୍ ଇନିକା ତିନ୍ଏତାନ୍ ମାରି ଉଣ୍ଏତାନ୍।
ଦମ୍ମେସକଦୁ ହନନିୟ ଦୋରୁତିକାନ୍ ଅରେନ୍ ସିସୁ ମାର୍ହାନ୍। ମାପ୍ରୁ ୱାନିଙ୍ଗ୍ ୱେହ୍ତାନ୍, “ଶାଉଲ ମାନ୍ଜିନି ଇଲୁଦୁ ସନ୍ଣ୍ତ୍ରୁ। ୱାନି ମୁସ୍କୁ କିୟୁ ଇଡ୍ଦୁ, ଏମେଫଲଦୁ ଆକାନ୍ ମାରିଢେସି ସୁଡ୍ଦେଙ୍ଗ୍ ଆଟ୍ନି।” ମାରି ହନନିୟ ୱେର୍ତାନ୍, “ମାପ୍ରୁ, ନାନୁ ୱେନ୍ଏ ଜେ ଇୟା ଲୋକୁ ଏମେୱାଜା ବିସ୍ବାସ୍ରିଙ୍ଗ୍ ଦୁଃକାମ୍ ସିଜିମାହାର୍ ମାପ୍ରୁ ୱାନିଙ୍ଗ୍ ମାଟା ସିତାନ୍, “ସନ୍ଣ୍ତ୍ରୁ! ଯିହୁଦୀଲୋକାଙ୍ଗ୍ ମାରି ଆଇ କୁଟୁମ୍ ଲୋକାଙ୍ଗ୍ ନା ଦୋରୁ ୱେର୍ତେଙ୍ଗ୍ ନାନୁ ୱାନିଙ୍ଗ୍ ଆସ୍କିତାମାନା। ଆକାନ୍ ନା ଦୋରୁଦି ୱାନ୍ଦିଙ୍ଗ୍ ନାଣ୍ତୋ କାସ୍ଟାମ୍ ଆନାନ୍।”
ମାରି ହନନିୟ ଶାଉଲଦି ଡାଗ୍ରୁ ସନ୍ସି ୱାନି ମୁସ୍କୁ କିୟୁ ଇଡ୍ଜି ୱେହ୍ତାନ୍, “ଯିଶୁ, ଇବେ ସନି ସାରିଦୁ ନିଙ୍ଗିଁ ସୁଡ୍ତାନ୍, ନାଙ୍ଗିଁ ମାରିଢେସି ମି ଡାଗ୍ରୁ ପକ୍ତାନ୍ ଏଣ୍ତେସ୍ଗି ନିନୁ ମାରି ସୁଡ୍ଦେଙ୍ଗ୍ ଆଟ୍ନି, ମାରି ପବିତ୍ରଜିଉ ନିଙ୍ଗିଁ ପୁରାକିନାତ୍।” ଆୟାଦାପ୍ରେ ଶାଉଲ ମାରିଢେସି ସୁଡ୍ଦେଙ୍ଗ୍ ଇଚାକିତାନ୍, ମାରି ହନନିୟ ୱାନିଙ୍ଗ୍ ଡୁବନ୍ସିତାନ୍। ଶାଉଲ ଇନି କାଦି ଉଣ୍ଜି ମାରିଢେସି ସାକ୍ତି ଆତାନ୍।
ଦାପ୍ରେ ଦାପ୍ରେ ଶାଉଲ ଦମ୍ମେସକର ଯିହୁଦିରିଙ୍ଗ୍ ପ୍ରଚାର୍ କିଦେଙ୍ଗ୍ ଆସ୍ତାର୍। ଆକାନ୍ ୱେର୍ତାନ୍, “ଯିଶୁ ଆଜିନାନ୍ ମାପ୍ରୁଦି କଢୋ!” ଯିହୁଦିର୍ କାବା ଆତାର୍ ମାତର୍ ଶାଉଲ ବିସ୍ବାସିରିଙ୍ଗ୍ ସାୟାମାର୍ଗା ଢେଇଦେଙ୍ଗ୍ ଇଚାକିଜି ମାର୍ହାର୍, ମାରି ଇଏଲ୍ ଆକାନ୍ ଯିଶୁଦି ଡାଗ୍ରୁ ବିସ୍ବାସ୍ କିତାନ୍! ଶାଉଲ ଯିହୁଦିରି ୱାଲେ ୱାରି ୱାରିଲୋଇ ୱାର୍ଗିତାର୍ ଆକାନ୍ ତର୍ପନିକା ଜେ ଯିଶୁ ଆଜିନାନ୍ ଖ୍ରୀଷ୍ଟ।
ନାଣ୍ତୋ ଦିନାମ୍ ୱେନ୍କା ଯିହୁଦିର୍ ଶାଉଲଦିଙ୍ଗ୍ ସାୟାମାର୍ଗା ଢେଇନି ୱାନ୍ଦିଙ୍ଗ୍ ପାଣି କିଜିମାର୍ହାର୍। ୱାନିଙ୍ଗ୍ ସାୟାମାର୍ଗା ଢେଇନି ୱାନନଦିଙ୍ଗ୍ ଆକାର୍ ଗଡ୍ଦି ଦୁୱାର୍ତୁ ୱାନିଙ୍ଗ୍ ସୁଡ୍ନି ୱାନ୍ଦିଙ୍ଗ୍ ଲୋକାଙ୍ଗ୍ ପକ୍ତାନ୍। ମାରି ଶାଉଲ ଇୟା ପାଣି ବିଷୟ୍ଦାନ୍ ୱେହାନ୍ ମାରି ୱାରି ତୋଡୁର୍ ୱାନିଙ୍ଗ୍ ଢିବାଜି ସନ୍ଡ୍ରେଙ୍ଗ୍ ସାହାଯ୍ୟ କିତାନ୍। ଅର୍ନେଣ୍ତ୍ ନାଡା ଆକାର୍ ୱାନିଙ୍ଗ୍ ଡାଣିଦୁ ଗଡ୍ଦି କାତି ମୁସ୍କୁ ରେପ୍ତାର୍। ଶାଉଲ ଦମ୍ମେସକଦିଙ୍ଗ୍ ଉହ୍କ୍ତି ୱେନ୍କା ଆକାନ୍ ଯିଶୁଦି ବିଷୟ୍ଦାନ୍ ପ୍ରଚାର୍ କିଦେଙ୍ଗ୍ ଆସ୍ତାର୍।
ଶାଉଲ ପ୍ରେରିତରି ୱାଲେ କୁଡ୍ଦେଙ୍ଗ୍ ଯିରୁଶାଲମଦୁ ସର୍ହାର୍, ମାରି ଆକାର୍ ୱାନିଙ୍ଗ୍ ତିଲାତାର୍। ଦାନିୱେନ୍କା ବର୍ଣ୍ଣବ୍ବା ଦୋରୁତି ଅରେନ୍ ବିସ୍ବାସି ଶାଉଲଦିଙ୍ଗ୍ ପ୍ରେରିତରି ଡାଗ୍ରୁ ଅତାର୍। ଶାଉଲ ଦମ୍ମେସକଦୁ ଏମେୱାଜା ସାସ୍ଦାନ୍ ପ୍ରଚାର୍ କିତାମାର୍ହାନ୍, ଆକାନ୍ ୱାରିଙ୍ଗ୍ ୱେର୍ତାନ୍। ଇୟାୱେନ୍କା ପ୍ରେରିତର୍ ଶାଉଲଦିଙ୍ଗ୍ ନିଜେଦି କିତାର୍।
ଏସୋ ବିସ୍ବାସିର୍ ଯିରୁଶାଲାମତି ଦୁକ୍ଦାନ୍ ସନ୍ସି ଆଣ୍ଟିଅଖ ଗଡ୍ଦୁ ସନ୍ସି ଯିଶୁଦି ବିଷୟ୍ଦାନ୍ ପ୍ରଚାର୍ କିତାନ୍। ଆନ୍ତିୟଖିଆର୍ ଏସୋ ଲୋକୁ ଯିହୁଦି ଆଏର୍, ମାରି ପର୍ତୁମ୍ ଜାରିଙ୍ଗ୍ ୱାନ୍ଦିଙ୍ଗ୍ ଯିହୁଦିର୍ ବିସ୍ବାସି ଆତାର୍। ଇୟା ପୁନି ବିସ୍ବାସିରିଙ୍ଗ୍ ଯିଶୁଦି ବିଷୟ୍ଦାନ୍ ନାଣ୍ତୋ ସିକିଆ ସିନାଟ୍ ମାରି ମଣ୍ତ୍ଲି ସାତୁକିନି ୱାନ୍ଦିଙ୍ଗ୍ ବର୍ଣ୍ଣବ୍ବା ମାରି ଶାଉଲ ଆବେ ସର୍ହାର୍। ଆନ୍ତିୟଖିଆଦୁ ନେ ଯିଶୁଦିଡାଗ୍ରୁ ବିସ୍ବାସିରିଙ୍ଗ୍ ପର୍ତୁମ୍ କ୍ରିଷ୍ଟାନ୍ ୱେହ୍ତାମାର୍ହାର୍।
ଅର୍ନେଣ୍ତ୍ ଆନ୍ତିୟଖିଆଦୁ ଯିଶୁଦି ୱେନ୍କା ବୁଲାନି ଲୋକୁ ଉପାସ୍ ମାରି ପାର୍ତନା କିଜିମାର୍ହାର୍। ପବିତ୍ରଜିଉ ୱାରିଙ୍ଗ୍ ୱେହ୍ତାତ୍, “ବର୍ଣ୍ଣବ୍ବା ମାରି ଶାଉଲ ନାଙ୍ଗିଁ ଏମେ ପାଣି କିଦେଙ୍ଗ୍ ୱେହ୍ତାମାନାନ୍, ଆକା କିଆ।” ମାରି ଆନ୍ତିୟଖିଆର ମଣ୍ତ୍ଲି ବର୍ଣ୍ଣବ୍ବା ମାରି ଶାଉଲଦି ନୁଣ୍ତିଙ୍ଗ୍ ପାର୍ତନା କିତାର୍ ମାରି ୱାରି ମୁସ୍କୁ କିୟୁ ଇଡ୍ତାନ୍। ଦାନିୱେନ୍କା ଆକାର୍ ଆଇ ନାଣ୍ତୋ ଜାଗାଦୁ ଯିଶୁଦି ବିଷୟ୍ଦାନ୍ ନେଗିକାବୁର୍ ପ୍ରଚାର୍ କିଦେଙ୍ଗ୍ ୱାରିଙ୍ଗ୍ ପକ୍ତାନ୍। ବର୍ଣ୍ଣବ୍ବା ମାରି ଶାଉଲ ଆଇ ଆଇ କୁଟୁମ୍ ଲୋକାଙ୍ଗ୍ ସିକିଆ ସିତାର୍,ମାରି ନାଣ୍ତୋ ଲୋକୁ ଯିଶୁଦିଡାଗ୍ରୁ ବିସ୍ବାସ୍ କିତାର୍।
ପ୍ରେରିତ୮:୩; ୯:୧-୩୧; ୧୧:୧୯-୨୬; ୧୩:୧-୩ ବାଇବଲ୍ଦି ଉଣ୍ଡ୍ରେ କାତାନି
Free to use, adapt, and share under an open license (CC BY-SA 4.0).