45. ୪୫. ଷ୍ଟିପେନ୍ ମାରି ଫିଲିପ୍
ପାର୍ତୁମ୍ଦୁ କ୍ରିଷ୍ଟାନ୍ ନେତାଦି ଡାଗ୍ରୁ ସ୍ତିଫାନ୍ ଦରୁତି ଆରେନ୍ ଲୋକୁ ମାର୍ହାନ୍। ୱିଜେରେ ୱାନିଙ୍ଗ୍ ମାରିଆଦି କିଜିମାର୍ହାର୍। ପବିତ୍ରଆତ୍ମା ୱାନିଙ୍ଗ୍ ନାଣ୍ତୋ ସାତୁ ମାରି ବୁଦି ସିତାମାର୍ହାନ୍। ସ୍ତିଫାନ୍ ନାଣ୍ତୋ କାବାଆନି ପାଣି କିଜିମାର୍ହାନ୍। ଏସ୍ତିୱାଲେ ୱାଣ୍ତ୍ରୁ ଯିଶୁଦିଙ୍ଗ୍ ମୁସ୍କୁ ବରସାକିନି ବିଷୟ୍ ସିକିୟା ସିଜିମାର୍ହାନ୍, ମାରି ନାଣ୍ତୋ ଲୋକୁ ୱାନିଙ୍ଗ୍ ବିସ୍ବାସ୍ କିତାର୍।
ଅର୍ନେଣ୍ତ୍, ସ୍ତିଫାନ୍ ଯିଶୁଦି ବିଷୟ୍ଦାନ୍ ସିକିୟା ସିଜିମାର୍ହାନ୍, ମାରି ଏସୋ ଯିହୁଦୀ ମାରି ଯିଶୁଦିଙ୍ଗ୍ ବିସ୍ବାସ୍ କିଏଜି ମାର୍ହାର୍, ୱାରୁ ୱାଜି ୱାନିୱାଲେ ମାଟାଦିଙ୍ଗ୍ ମାଟା ୱାର୍ଗିଦେଙ୍ଗ୍ ଆସ୍ତାର୍। ୱାରୁ ନାଣ୍ତୋ କାକା ଆତାର୍, ମାରି ୱାଣ୍ତ୍ରୁ ଦାର୍ମୁଦି ନେତାଦି ଡାଗ୍ରୁ ସନ୍ସି ୱାନି ବିଷୟ୍ ବାଡିସ୍ସି ୱେର୍ତାନ୍। ୱାରୁୱେର୍ତାର୍, “ମାପୁ ୱେହାପ୍ ଜେ ସ୍ତିଫାନ୍ ମୋଶା ମାରି ମାପ୍ରୁଦି ବିଷୟ୍ଦାନ୍ ସେଇ ମାଟା ୱେହ୍ନିକା ୱେହାପ୍!” ମାରି ଦାର୍ମୁ ନେତାର୍ ସ୍ତିଫାନ୍ଦିଙ୍ଗ୍ ତହ୍ସି ପେରିଯାଜକ୍ ଆୟାୱାନ୍ଦିଙ୍ଗ୍ ଆଇ ଯିହୁଦୀ ନେତାରି ଡାଗ୍ରୁ ତାତାର୍। ମାରିବା ନାଣ୍ତୋ ବାଣ୍ତିସ୍ନି ସାକି ୱାଜି ମାରି ୱାରୁ ସ୍ତିଫାନ୍ ବିଷୟ୍ଦାନ୍ ବାଣ୍ତିସ୍ତାର୍।
ପେରିଯାଜକ୍ ସ୍ତିଫାନ୍ଦିଙ୍ଗ୍ ୱେନ୍ବାତାନ୍, “ଇୟା ଲୋକୁ ନି ବିଷୟ୍ଦାନ୍ ନିକାମେ ୱେହ୍ସିନାର୍ ନା?” ସ୍ତିଫାନ୍ ପେରିଯାଜକ୍ଦିଙ୍ଗ୍ ଉତର୍ ସିଦେଙ୍ଗ୍ ନାଣ୍ତୋ ମାଟା ୱେର୍ତେଙ୍ଗ୍ ଆରାମ୍ କିତାନ୍। ୱାଣ୍ତ୍ରୁ ୱେର୍ତା ମାର୍ହାନ୍ ଗାନି ଅବ୍ରାମ୍ଦି ୱେଡ଼ାଦାନ୍ ଯିଶୁଦି ୱେଡ଼ା ସାନ୍ଦି, ମାପ୍ରୁ ଇସ୍ରାଏଲ୍ଦି ଲୋକା ୱାନ୍ଦିଙ୍ଗ୍ ନାଣ୍ତୋ କାବାଆନି ପାଣି କିତାମାର୍ହାନ୍। ମାରି ଲୋକୁ ୱିଜୁଦିନାମ୍ ମାପ୍ରୁଦିଙ୍ଗ୍ ମାଟା ମାନାଏତାର୍। ସ୍ତିଫାନ୍ ୱେର୍ସିନାନ୍, “ମିରୁ ମାପ୍ରୁଦିଙ୍ଗ୍ ବିରୁଦ୍ କିନି ଲୋକୁ। ମିରୁ ୱିଜୁଦିନାମ୍ ପବିତ୍ରଆତ୍ମାଦିଙ୍ଗ୍ ପରିକା କିତିମାନି, ଏୟେର୍ଗି ମା ପୁର୍ବାମ୍ତି ଲୋକୁ ୱିଜୁଦିନାମ୍ ପବିତ୍ରଆତ୍ମାଦିଙ୍ଗ୍ ପରିକା କିତାମାର୍ହାର୍ ମାରି ୱାନି ବାବବାଦିଦିଙ୍ଗ୍ ୱିଜୁଦିନାମ୍ ସାୟାମାର୍ଗା ଡ଼େଇଜିମାର୍ହାର୍। ମାରି ୱାରୁଏମେକା କିତାର୍ ଆକା ଆଜିନାତ୍ ନିନୁ ୱାନିବାଣାନ୍ ସେଇ ପାଣି କିତିମାନି! କ୍ରିଷ୍ଟଦିଙ୍ଗ୍ ସାୟାମାର୍ଗା ଡ଼େଇତି!”
ଏସ୍ତିୱାଲେ ଆୟା ଦାର୍ମୁ ନେତାର୍ ଇକା ୱେହାର୍, ୱାରୁ ନିସା ରିସା ଆତାନ୍ ଜେ ୱାରୁ ଗିତଣି ମୁକ୍ସି ମାରି ନାଣ୍ତୋ ସେଉଡ଼ୁଦାନ୍ ସେଉଡ଼ୁ ଆତାର୍। ୱାରୁ ସ୍ତିଫାନ୍ଦିଙ୍ଗ୍ ଗଡ଼୍ଲୋଇହାନ୍ ଆତ୍ରେ ରେଲ୍ଜି ଅସି ମାରି ୱାନିଙ୍ଗ୍ ସାପିସ୍ତେଙ୍ଗ୍ କାଲୁ ପକ୍ତାର୍।
ଏସ୍ତିୱାଲେ ସ୍ତିଫାନ୍ ସାଜିମାର୍ହାନ୍, ୱାଣ୍ତ୍ରୁ ସେଉଡ଼ୁ ଆଜି ୱେର୍ତାନ୍, ଏ ପ୍ରବୁ, ନା ଆତ୍ମାଦିଙ୍ଗ୍ ମାନାଆଁ!” ଦାନିୱେନ୍କା ୱାଣ୍ତ୍ରୁ ମେଣ୍ତେଙ୍ଗ୍ ଉର୍ଜି ମାରି ଅର୍ସୁ ସେଉଡ଼ୁ ଆଜି ୱେର୍ତାନ୍, “ଏ ପ୍ରବୁ ଇୟା ପାପାମ୍ ୱାରି ମୁସ୍କୁ ଦସ୍ ତିଗ୍ମା।” ଦାନିୱେନ୍କା ୱାଣ୍ତ୍ରୁ ସାତାନ୍।
ଆୟାଦିନ୍, ଯିରୁଶାଲାମ୍ଦୁ ମାନ୍ଜିମାହି ନାଣ୍ତୋ ଲୋକୁ ଯିଶୁଦି ୱେନ୍କା ବୁଲାନିୱାରିଙ୍ଗ୍ ଦୁକ୍ସିଦେଙ୍ଗ୍ ଆରାମ୍ କିତାର୍, ମାରି ବିସ୍ବାସିର୍ ଆଇ ବାଡିଦୁ ଉକ୍ତାର୍। ମାରିବା ୱାରୁ ଏମେତରନ୍ ସହାର୍ ୱାରୁ ଯିଶୁଦି ବିଷୟ୍ଦାନ୍ ପ୍ରଚାର୍ କିତାର୍।
ଫିଲିପ ଦରୁତି ଯିଶୁଦିଡାଗ୍ରୁ ଅରେନ୍ ବିସ୍ବାସି ମାର୍ହାନ୍। ଆଇ ବିସ୍ବାସିରି ଲେକେନ୍ ୱାଣ୍ତ୍ରୁ ବା ଯିରୁଶାଲାମ୍ ଡିସ୍ସି ସର୍ହାନ୍। ୱାଣ୍ତ୍ରୁ ଶମିରୋଣି ନାରୁଦୁ ସର୍ହାନ୍। ଆବେ ୱାଣ୍ତ୍ରୁ ଲୋକାଙ୍ଗ୍ ଯିଶୁଦି ବିଷୟ୍ଦାନ୍ ପ୍ରଚାର୍ କତାନ୍। ନାଣ୍ତୋ ଲୋକୁ ୱାନି ମୁସ୍କୁ ବିସ୍ବାସ୍ କିତାର୍ ମାରି ଉଦାର୍ ପାଏ ଆତାର୍। ଉଣ୍ତ୍ରେଦିନ୍, ମାପ୍ରୁଦି ବାଣାନ୍ ଅରେନ୍ ଦୁତ୍ ଫିଲିଦ୍ଦି ଡାଗ୍ରୁ ୱାତାନ୍ ମାରି ୱାନିଙ୍ଗ୍ ଗରତୁ ସନିୱାନ୍ଦିଙ୍ଗ୍ ମାରି ସାରିଦୁ ଉଣ୍ତ୍ରବୁଲାଦେଙ୍ଗ୍ ୱେର୍ତାନ୍। ଫିଲିପ ଆବେନୁ ସର୍ହାନ୍। ଏସ୍ତିୱାଲେ ୱାଣ୍ତ୍ରୁ ଆୟା ସାରିଦୁ ସନିୱାଲେ ମାରି ୱାଣ୍ତ୍ରୁ ଅରେନ୍ ଲୋକୁଦିଙ୍ଗ୍ ୱାନି ରତ୍ଦୁ ସନିକା ସୁଡ୍ତାନ୍। ଇୟା ଲୋକୁ ଇଥିଓପିଆର୍ ଦେଶେମ୍ଦି ଅରେନ୍ ପେରି ଅଦିକାର୍ତିକାନ୍ ମାର୍ହାନ୍। ପବିତ୍ରଆତ୍ମା ଫିଲିପଦିଙ୍ଗ୍ ୱେର୍ତାନ୍ ଜେ ଆବେନୁ ସନ୍ସି ଆୟା ଲୋକୁଦି ୱାଲେ ୱାର୍ଗିଆ।
ମାରି ଫିଲିପ ରତ୍ଦୁ ସର୍ହାନ୍। ୱାଣ୍ତ୍ରୁ ୱେହାନ୍ ଜେ ୱାଣ୍ତ୍ରୁ ଇଥିଓପିଆର୍ ମାପ୍ରୁଦି ବାକ୍ୟ ପଡ଼ାଜିମାର୍ହାନ୍। ଏମେକାଗି ଯିଶାଇୟ ବାବବାଦି ରାସ୍ତାମାର୍ହାନ୍ ଆକା ପଡାଜି ମାର୍ହାନ୍। ୱାଣ୍ତ୍ରୁ ପଡାଜି ମାହାନ୍, ୱାରୁ ୱାନିଙ୍ଗ୍ ସାୟାମାର୍ଗା ଡେଇନି ୱାନ୍ଦିଙ୍ଗ୍ ମେଣ୍ଢାୱାଜା ଆତାମାର୍ହାନ୍ ମାରି ମେଣ୍ତେଙ୍ଗ୍ ନେଗେଣ୍ତ୍ ମାହିଙ୍ଗ୍ ୱାଣ୍ତ୍ରୁ ଇନି ମାଟା ବା ୱେହ୍ଏଣ୍ତା ମାର୍ହାନ୍। ୱାରୁ ୱାନିୱାଲେ ସେଇ ବ୍ୟବହାର୍ କିତାନ୍ ମାରି ୱାନିଙ୍ଗ୍ ମାନାଏର୍। ୱାରୁ ୱାନି ଜିଉ ଅତାନ୍।”
ଫିଲିପ କୁଶିଦିଙ୍ଗ୍ ୱେନ୍ବାତାନ୍, “ନିନୁ ଏମେକା ପଡାଜିନି ଆକା ୱିଜୁ ନିନୁ ବୁଜାଦେଙ୍ଗ୍ ଆଟ୍ସିନି ନା?” ଆୟା କୁଶି ଉତର୍ ସିତାନ୍, “ସିଲେ। ଏମେସାନ୍ଦି ଏୟେନ୍ ଆପିନ୍ଦା ବୁଜାକିଏତିଙ୍ଗାଁ, ଆୟାସାନ୍ଦି ନାଙ୍ଗିଁ ଏଣ୍ତେସ୍ ବୁଜାଦେଙ୍ଗ୍ ଆଟ୍ଏ, ଦୟାକିଜି ନା ଡାଗ୍ରୁ ୱାଜି ବାସ୍ଆ। ଇନିକା ଯିଶାଇୟ ମାହାନ୍ ନା ନିଜେ ବିସୟ୍ଦାନ୍ ମାରି ଆଇ ଏୟେ ବିସୟ୍ଦାନ୍ ଇକା ରାସ୍ସିନାନ୍?”
ଫିଲିପ ରତ୍ ମୁସ୍କୁ ଏକ୍ସି ବାସ୍ତାନ୍। ଦାନିୱେନ୍କା ୱାଣ୍ତ୍ରୁ ଇଥିଓଦିଆଦିଙ୍ଗ୍ ୱେହ୍ତାମାର୍ହାନ୍ ଗାନି ଯିଶାଇୟ ଯିଶୁଦି ବିଷୟ୍ଦାନ୍ ଏମେକା ରାସ୍ତାମାନାନ୍। ଫିଲିପ ମାପ୍ରୁଦି ବାକ୍ୟଦି ଆଇଆଇ ବିଷୟ୍ଦାନ୍ ୱିଜୁ ୱାର୍ଗିତାର୍। ଇୟାୱାଜା ନେ ୱାଣ୍ତ୍ରୁ, ୱାନିଙ୍ଗ୍ ଯିଶୁଦି ବିଷୟ୍ଦାନ୍ କାବୁର୍ ୱେର୍ତାନ୍।
ଫିଲିପ ମାରି ଆୟା କୁଶି ବୁଲାନି ୱେଡ଼ାଦୁ ୱାଣ୍ତ୍ରୁ ଏରୁଦୁ ୱାତାନ୍। ଆୟା କୁଶି ୱେର୍ତାନ୍, ”ସୁଡ୍ଆ! ଇବେ ଏରୁ ମାନେ! ନାନୁ ଡୁବନ୍ ଆଦେଙ୍ଗ୍ ଆଟ୍ନା ନା?” ମାରି ରତ୍ଦିଙ୍ଗ୍ ବନ୍ଦ୍କିଦେଙ୍ଗ୍ ୱେର୍ତାନ୍।
ମାରି: ୱାରୁ ଏରୁ ଲଇ ସର୍ହାର୍, ମାରି ଫିଲିପ ଆୟା ଇଥିଓପିଆରଦିଙ୍ଗ୍ ଡୁବନ୍ ସିତାନ୍। ଏସ୍ତିୱାଲେ ୱାଣ୍ତ୍ରୁ ଏରୁଦାନ୍ ସସିୱାତାର୍, ପବିତ୍ର ଆତ୍ମା ଗାଦେମ୍ ଫିଲିପ୍ଦିଙ୍ଗ୍ ନିକ୍ସି ଆଇ ବାଡିଦୁ ଅତାନ୍। ଆବେ ଫିଲିପ ଲୋକାଙ୍ଗ୍ ଯିଶୁଦି ବିଷୟ୍ଦାନ୍ ୱେର୍ତେଙ୍ଗ୍ ଆସ୍ତାନ୍।
ୱାଣ୍ତ୍ରୁ ସାର୍ଦାମାନାନ୍ ଜେ ୱାଣ୍ତ୍ରୁ ଯିଶୁଦିଙ୍ଗ୍ ନେସ୍ତାମାର୍ହାନ୍।
ପ୍ରେରିତ ୬:୮-୮:୫;୮:୨୬-୪୦ ଦି ଉଣ୍ତ୍ରେ ବାଇବଲ୍ ଦି କାତା
Free to use, adapt, and share under an open license (CC BY-SA 4.0).