1. ୧. ଈଶ୍ୱର ୱିଜୁ ଜିନିଷ୍ତିଙ୍ଗ୍ ଉବ୍ଜାଣ୍ କିତାନ୍
ଈଶ୍ୱର ୱିଜୁ ଜନିଷ୍ତିଙ୍ଗ୍ ଇଲେକେ ଉବ୍ଜାୟ୍ କିତାନ୍। ଚଅଦିନ୍ ବିତ୍ରେ ଈଶ୍ୱର ସରଗ୍ ଆରେ ପୁର୍ତି ଆରେ ହେବେନି ୱିଜୁ ବିଷୟତିଙ୍ଗ୍ ଉବ୍ଜାୟ୍ କିତାନ୍। ଈଶ୍ୱର ଉବ୍ଜାୟ୍ କିତି ପାଚେ ପୁର୍ତି ମାଜ୍ଗା ଆରେ ଇନାକା ହିଲାତାତ୍। ଇନାକା ପା ଉବ୍ଜା ଆୱାଦାଙ୍ଗ୍ ମାଚାତ୍। ମାତର୍ ଈଶ୍ୱର ଆତ୍ମା ଏଜୁଙ୍ଗ୍ ଜପି ମାଚାତ୍।
ତାପାଚେ ଈଶ୍ୱର ୱେଚ୍ଚାନ୍, “ଅଜଡ଼୍ ଆୟେତ୍, ହେବେତାଙ୍ଗ୍ ଅଜଡ଼୍ ଆତାତ୍।” ଈଶ୍ୱର ଅଜଡ଼୍ତିଙ୍ଗ୍ ହାର୍ ହୁଡ଼୍ତାନ୍ ଆରେ ତା ତର୍ ଅଜଡ଼୍ ଇଞ୍ଜି ୱେଚ୍ଚାନ୍। ହେୱାନ୍ “ଅଜଡ଼୍ତିଙ୍ଗ୍" ମାଜ୍ଗାତାଙ୍ଗ୍ ଜେକ କିତାନ୍, ଲାଗିଙ୍ଗ୍ ହେୱାନ୍ ୱେଚ୍ଚାନ୍ “ନାଣା।” ଈଶ୍ୱର ପାର୍ତୁମ୍ ଦିନ୍ ଅଜଡ଼୍ତିଙ୍ଗ୍ ଉବ୍ଜାଣ୍ କିତାନ୍।
ଉବ୍ଜାୟ୍ କିତି ଆର୍କାତ୍ ନାଞ୍ଜିଙ୍ଗ୍ ଈଶ୍ୱର ପୁର୍ତି ଜପି ବାଦାଡ଼୍ ଉବ୍ଜା ଆଦେଙ୍ଗ୍ ୱେଚ୍ଚାନ୍। ହେୱାନ୍ ତାରେନ୍ନି ଏଜୁଙ୍ଗ୍ତାଙ୍ଗ୍ ଜପିନି ଏଜୁକାଙ୍ଗ୍ ଜେକକିନି କାଜିଙ୍ଗ୍ “ବାଦାଡ଼୍” ଉବ୍ଜାୟ୍ କିତାନ୍।
ତା ଆର୍କାତ୍ ନାଞ୍ଜିଙ୍ଗ୍ ଈଶ୍ୱର ୱେଚ୍ଚାନ୍,“ୱାଚ୍ଚି ମେଦ୍ନିତାଙ୍ଗ୍ ଏଜୁକାଙ୍ଗ୍ ଜେକ ଆଦେଙ୍ଗ୍ ୱେଚ୍ଚାନ୍।” ହେୱାନ୍ ୱାଚ୍ଚି ମେଦ୍ନିତିଙ୍ଗ୍ “ପୁର୍ତି” ଇଞ୍ଜି ୱେଚ୍ଚାନ୍ ଆରେ ହେୱାନ୍ ଏଜୁକାଙ୍ଗ୍ “ହାମ୍ଦୁର୍” ଇଞ୍ଜି ୱେଚ୍ଚାନ୍। ଈଶ୍ୱର ହୁଡ଼୍ତାନ୍ ହେୱାନ୍ ଇନାକା ଉବ୍ଜାୟ୍ କିଜି ମାଚାନ୍ ହେଦାଙ୍ଗ୍ ହାର୍ ମାଚାତ୍।
ତାପାଚେ ଈଶ୍ୱର ୱେଚ୍ଚାନ୍ “ପୁର୍ତିତାକେ ୱିଜୁ ପର୍କାର୍ ମାର୍କୁ ଆରେ କାଚ୍ରାଙ୍ଗ୍” ଉବ୍ଜା ଆୟେକ୍, ଆରେ ହେଲେକେ ଆତାତ୍। ଈଶ୍ୱର ହୁଡ଼୍ତାନ୍ ହେୱାନ୍ ଉବ୍ଜାୟ୍ କିତାକା ହାର୍ ମାଚାତ୍।
ଉବ୍ଜା ଆତି ଚାର୍ଦିନ୍ ନାଞ୍ଜିଙ୍ଗ୍ ଈଶ୍ୱର, “ୱେଡ଼ା, ଲେଞ୍ଜ୍ଆରେ ହୁକାକାଙ୍ଗ୍ ଉବ୍ଜାୟ୍ କିତାନ୍।” ଈଶ୍ୱର ହେ ୱିଜେକିୟାକାଙ୍ଗ୍ ପୁର୍ତିତାକେ ଅଜଡ଼୍ ହିଦେଙ୍ଗ୍ ଆରେ ୱେଡ଼ା, ନାଣା, ମାସ୍ ଆରେ ବାର୍ହୁ ଆଦେଙ୍ଗ୍ ୱେଚ୍ଚାନ୍। ଈଶ୍ୱର ଇନାକା ଉବ୍ୟ୍ କିଜି ମାଚାନ୍ ହେଦାଙ୍ଗ୍ ୱିଜୁ ହାର୍ ମାଚାତ୍।
ଉବ୍ଜା ଆତି ପାଞ୍ଚ୍ଦିନ୍ତ ଈଶ୍ୱର ୱେଚ୍ଚାନ୍, “ଏଜୁକାଙ୍ଗ୍ ମାନି ୱିଜୁ ଜାତୁଙ୍ଗ୍ ଆରେ ବାଦାଡ଼୍ତାକେ ଉମ୍ନି ପଟିକାଙ୍ଗ୍ ଉବ୍ଜାୟ୍ କିତାନ୍।” ଈଶ୍ୱର ହେୱେକିୟାକାଙ୍ଗ୍ ହାର୍ ହୁଡ଼୍ତାନ୍ ଆରେ ହେୱାନ୍ ହେୱେକିୟାକାଙ୍ଗ୍ ଆଶ୍ରିବାଦ୍ କିତାନ୍।
ଈଶ୍ୱର ଉବ୍ଜାୟ୍ କିତି ଚଅ ଦିନ୍ତ ୱେଚ୍ଚାନ୍, “ମେଦ୍ନିନି ୱିଜୁ ପର୍କାର୍ ପଶୁଙ୍ଗ୍ ଉବ୍ଜାଣ୍ ଆୟେକ୍।” ଈଶ୍ୱର ଇନେସ୍ ୱେଚ୍ଚାନ୍, ଟିକ୍ ହେଲେକେ ଆତାତ୍। କେତେକ୍ ଇଞ୍ଜ ପହାକିନି ପଶୁଙ୍ଗ୍ ମାଚିକ୍, କେତେକ୍ ପଟତାଙ୍ଗ୍ ରାଙ୍ଗା ଆନି ପଶୁ ଆରେ କେତେକ୍ ରାନ୍ତି ପଶୁଙ୍ଗ୍ ମାଚିକ୍। ଆରେ ଈଶ୍ୱର ହେୱେକିୟାକାଙ୍ଗ୍ ହାର୍ ହୁଡ଼୍ତାନ୍।
ତାପାଚେ ଈଶ୍ୱର ୱେଚ୍ଚାନ୍, “ୱାଡ ଆସେଙ୍ଗ୍ ମାନାୟ୍ତିଙ୍ଗ୍ ମା ଲେକେ କିଜି ରହ୍ନାସ୍। ପୁର୍ତି ଜପି ଆରେ ୱିଜୁ ପଶୁଙ୍ଗ୍ ଜପି ହେୱାର୍ ଆଦିକାର୍ ମାନ୍ଗାନାତ୍।”
ଲାଗିଙ୍ଗ୍ ଈଶ୍ୱର ଇଚ୍କେ ଦୁଡ଼ିତିଙ୍ଗ୍ ଅଜି, ମାନାୟ୍ତିଙ୍ଗ୍ ରସ୍ତାନ୍, ଆରେ ତା ବିତ୍ରେ ଜିବୁନ୍ ଆନି ଡ଼ୁଇ ତୁବ୍ତାନ୍। ଇ ମାନାୟ୍ନି ତର୍ ଆଦମ୍ ହିତାନ୍। ଈଶ୍ୱର ରଞ୍ଜାଙ୍ଗ୍ହଲ୍ନି ବଗିଚା ରୁସ୍ତାନ୍, ହେବେ ଆଦମ୍ ମାନ୍ଗାନାନ୍ ଆରେ ହେ ବଗିଚାତିଙ୍ଗ୍ ଜାତୁନ୍ କିନାନ୍।
ହେ ବଗିଚା ବିତ୍ରେ ଈଶ୍ୱର ରିଣ୍ଡାଙ୍ଗ୍ ମୁକ୍ୟ ମାର୍କୁ ରସ୍ତାନ୍, ହେଦାଙ୍ଗ୍ ଜିବୁନ୍ ହିଦ୍ନି ମାର୍ ଆରେ ବଲ୍ ମନ୍ଦ୍ ଜ୍ଞାନ୍ ହିଦ୍ନି ମାର୍। ଈଶ୍ୱର ଆଦମତିଙ୍ଗ୍ ୱେଚ୍ଚାନ୍,ଏନେଙ୍ଗ୍ ବଲ୍ ଆରେ ମନ୍ଦ୍ ଜ୍ଞାନ୍ ହିଦ୍ନି ମାର୍ନି ପାଡ଼୍ତିଙ୍ଗ୍ ପିସ୍ତି ବଗିଚାତାକେ ମାନି ୱିଜୁ ମାର୍ତି ପାଡ଼୍ ଚିଞ୍ଜେଙ୍ଗ୍ ଆଡ୍ନାୟ୍। ଏନେଙ୍ଗ୍ ଯଦି ଇ ମାର୍ତି ପାଡ଼୍ ତିନାୟ୍ ଲାଗିଙ୍ଗ୍ ହାତ୍ପା ହାଃନାୟ୍।
ତାପାଚେ ଈଶ୍ୱର ୱେଚ୍ଚାନ୍, “ମାନାୟ୍ ରୱାର୍ ମାନାକା ହାର୍ ଆକାୟ୍।” ମାତର୍ ଇମ୍ଣି ପଶୁଙ୍ଗ୍ ପା ଆଦମତିଙ୍ଗ୍ ସାଇଜ କିନିକିକ୍ ହିଲିତିକ୍।
ଲାଗିଙ୍ଗ୍ ଈଶ୍ୱର ଆଦମତିଙ୍ଗ୍ ବେସି ହୁଚ୍କାଣ୍କୁତାଙ୍ଗ୍ ହୁଚ୍ପି କିତାନ୍। ତାପାଚେ ଈଶ୍ୱର ଆଦମନି ର ପାଞ୍ଜ୍ରା ପେଣ୍ତିଙ୍ଗ୍ ଅଜି ର କଗ୍ଲେତିଙ୍ଗ୍ ରସ୍ତାନ୍ ଆରେ ହେଦେଲିଙ୍ଗ୍ ଆଦମ ଲାଗାୟ୍ ତାସି ୱାତାନ୍।
ଏଚେପାଦ୍ନା ଆଦମ ହେଦେଲିଙ୍ଗ୍ ହୁଡ଼୍ତାନ୍, ଆରେ ହେୱାନ୍ ୱେଚ୍ଚାନ୍, “ହାରିହାରା! ଇୱାନ୍ ରକାନ୍ ନା ଲେଗ୍ଦାକାନ୍! ହେୱାନିଙ୍ଗ୍ କଗ୍ଲେ ଇଞ୍ଜି କୁକିୟା ଆନାତ୍, ଇନେସ୍କି ହେଦେଲ୍ ନର୍ତାଙ୍ଗ୍ ରହି ଆତାତ୍ନା।” ଇଦାଙ୍ଗ୍ କାଜିଙ୍ଗ୍ ମାନାୟ୍ ତା ଆୟାଆବାରିଙ୍ଗ୍ ପିସ୍ତି ତା କଗ୍ଲେ ହୁଦାଙ୍ଗ୍ ଏକ୍ ଆନାର୍।
ଈଶ୍ୱର ଆଣ୍ଡ୍ରା ହିମ୍ଣା ଆରେ କଗ୍ଲେ ହିମ୍ଣାତିଙ୍ଗ୍ ତା ଲେକେ କିଜି ରସ୍ତାନ୍। ହେୱାନ୍ ହେୱାରିଙ୍ଗ୍ ଆଶ୍ରିବାଦ୍ କିତାନ୍ ଆରେ ୱେଚ୍ଚାନ୍, “କେତେକ୍ ହିମ୍ଣାୱାକ୍ଡ଼ା ଆରେ ନାତି ନାତ୍ନିକାଙ୍ଗ୍ ଜନମ୍ କିୟାଟ୍ ଆରେ ପୁର୍ତିତିଙ୍ଗ୍ ପୁରା କିୟାଟ୍।” ଈଶ୍ୱର ଇନାକା ୱିଜୁ ରସ୍ତାନ୍ ହେୱିଜୁ ଆଦିକ୍ ହାର୍ ହୁଡ଼୍ତାନ୍। ହେୱାନ୍ ହେ ୱିଜୁକାଙ୍ଗ୍ ହେୱାନ୍ ବେସି ୱାରିଆଜି ମାଚାନ୍। ଇ ୱିଜୁ ବିଷୟ ଉବ୍ଜାୟ୍ କିତି ଚଅ ଦିନ୍ତ ଆତାତ୍।
ଏଚେପାଦ୍ନା ସାତ୍ଦିନ୍ ୱାତାତ୍, ଈଶ୍ୱର ତା ୱିଜୁ କାମାୟ୍ ୱିସ୍ତି ମାଚାନ୍। ଲାଗିଙ୍ଗ୍ ଈଶ୍ୱର ୱିଜୁ କାମାୟ୍ତାଙ୍ଗ୍ ଜମ୍ତାନ୍। ହେୱାନ୍ ସାତ୍ଦିନ୍ନି ଦିନ୍ତିଙ୍ଗ୍ ଆଶ୍ରିବାଦ୍ କିଜି ପବିତ୍ର କିତାନ୍। ଇନେସ୍କି ଇ ଦିନ୍ତ ହେୱାନ୍ ତା କାମାୟ୍ତାଙ୍ଗ୍ ଜମ୍ଜି ମାଚାନ୍। ଇଲେକେ ଈଶ୍ୱର ପୁର୍ତି ଆରେ ହେବେନି ୱିଜୁ ବିଷୟତିଙ୍ଗ୍ ରସ୍ତାନ୍।
ବାଇବଲ୍ନି ର କାତା: ଆଦିବହି ୧-୨
Free to use, adapt, and share under an open license (CC BY-SA 4.0).