2. ୨. ହବା ପାପ୍ ଦୁନିଆତାକେ ହଟାତ୍
ଈଶ୍ୱର ହେୱାର୍ କାଜିଙ୍ଗ୍ ରସ୍ତି ହଲ୍ନି ବଗିଚାତାକେ ଆଦମ ଆରେ ତା କଗ୍ଲେ ବେସି ୱାରିନି ଜିବୁନ୍ କାଟିକିଜି ମାଚାର୍। ହେୱାର୍ ଇନେର୍ପା ହେନ୍ଦ୍ରା ପାଟାଙ୍ଗ୍ ଉସ୍ପାୱାଦାଙ୍ଗ୍ ମାଚାର୍, ମାତର୍ ଇଦାଙ୍ଗ୍ ହେୱାର୍ କାଜିଙ୍ଗ୍ ଲାଜୁ ହିଲାତାତ୍। ଲାଗିଙ୍ଗ୍ ଜଗ୍ତାତାକେ ପାପ୍ ହିଲାତାତ୍। ହେୱାର୍ ୱିଜୁଦିନ୍ ବଗିଚାତାକେ ହାନାକା ୱାନାକା ଆରେ ଈଶ୍ୱର ହୁଦାଙ୍ଗ୍ ବେଣ୍ କିବାଆଜି ମାଚାର୍।
ମାତର୍ ହେ ବଗିଚାତାକେ ରଞ୍ଜାଙ୍ଗ୍ ଚାତୁର୍ ରାଚ୍ ମାଚାତ୍। ହେ ରାଚ୍ କଗ୍ଲେଙ୍ଗ୍ ୱେନ୍ବାତାତ୍, “ହାତ୍ପା ମିଙ୍ଗେଙ୍ଗ୍ ଈଶ୍ୱର ଇ ବଗିଚାନି ଇମ୍ଣି ମାର୍ତି ପାଡ଼୍ ପା ତିନ୍ୱେଦେଙ୍ଗ୍ ୱେଚ୍ଚାତାନ୍ନା କି?”
କଗ୍ଲେ ୱେଚ୍ଚାତ୍, “ଈଶ୍ୱର ମାଙ୍ଗେଙ୍ଗ୍ ୱେଚ୍ଚାତାନ୍ନା ବଲ୍ ଆରେ ମନ୍ଦ୍ ଜ୍ଞାନ୍ ହିଦ୍ନି ମାର୍ନି ପାଡ଼୍ତିଙ୍ଗ୍ ପିସ୍ତି ୱିଜୁ ମାର୍ନି ପାଡ଼୍ ଆପେଙ୍ଗ୍ ଚିଞ୍ଜେଙ୍ଗ୍ ଆଡ୍ନାପ୍। ଈଶ୍ୱର ମାଙ୍ଗେଙ୍ଗ୍ ୱେଚ୍ଚାତାନ୍, ‘ଏପେଙ୍ଗ୍ ଯଦି ହେ ମାର୍ନି ପାଡ଼୍ ତିନାଦେର୍ କି ଆସ୍ପାନାଦେର୍ ହେ ଦିନ୍ ଏପେଙ୍ଗ୍ ହାଃନାଦେର୍।’”
ରାଚ୍ କଗ୍ଲେଙ୍ଗ୍ ୱେଚ୍ଚାତ୍, “ହେଦାଙ୍ଗ୍ ସତ୍ ଆକାୟ୍,ଏପେଙ୍ଗ୍ ହାଃଉଦେର୍। ଈଶ୍ୱର ପୁନାନ୍ ଯେ, ଏପେଙ୍ଗ୍ ଚିଚି ଦାପ୍ରେ ଈଶ୍ୱର ଲେକେ ଆନାଦେର୍ ଆରେ ହେୱାନ୍ ଲେକେ ବଲ୍ ଆରେ ମନ୍ଦ୍ ବୁଜା ଆଦେଙ୍ଗ୍ ଆଡ୍ନାଦେର୍।”
କଗ୍ଲେ ହେ ପାଡ଼୍ତିଙ୍ଗ୍ ହୁଡ଼୍ତାତ୍ ହେଦେଙ୍ଗ୍ ବେସି ହଲ୍ଜି ମାଚାତ୍ ଆରେ ଚିଞ୍ଜେଙ୍ଗ୍ ହୱାଦ୍ ମାଚାତ୍। ହେଦେଲ୍ ପା ବୁଦିମାନ୍ ଆଦେଙ୍ଗ୍ ଇଚା କିତାତ୍, ହେଦାଙ୍ଗ୍ କାଜିଙ୍ଗ୍ ହେଦେଲ୍ କେତ୍ଗଟା ପାଡ଼୍ ଏଚ୍ଚାତ୍ ଆରେ ଚିଚାତ୍। ତାପାଚେ ହେଦେଲ୍ କେତ୍ଗଟା ପାଡ଼୍ ତା ଡକ୍ରାହିଙ୍ଗ୍ ଅସି ହିତାତ୍, ହେୱାନ୍ ପା ହେ ଅସିହିତି ପାଡ଼୍ ଇଚ୍କେ ଚିଚାନ୍।
ହେଦାପ୍ରେ ହେୱାର୍ ହୁଡ଼୍ତାର୍, ଆରେ ବାବିକିତାର୍ ଯେ, ହେୱାର୍ ନାଗ୍ଡ଼ା ଆତାର୍ନା। ଆକିକାଙ୍ଗ୍ ସିଲାଇ କିଜି ହେୱାର୍ ଗାଗାଡ଼୍ତିଙ୍ଗ୍ ହୁକ୍ତେଙ୍ଗ୍ ଉପାଇ କିତାର୍।
ତାପାଚେ ଈଶ୍ୱର ବଗିଚାତାକେ ତାଙ୍ଗ୍ଜି ୱାନାକା ହେୱାର୍ ୱେଚାର୍। ହେୱାର୍ ରିକାର୍ ଈଶ୍ୱରତାଙ୍ଗ୍। ତାପାଚେ ଈଶ୍ୱର ଆଣ୍ଡ୍ରେନିଙ୍ଗ୍ କୁକ୍ତାନ୍, “ଏନେଙ୍ଗ୍ ଇମେତାକେ ମାନାୟ୍?” ଆଦମ ୱେଚ୍ଚାନ୍, “ଏନେଙ୍ଗ୍ ବଗିଚାତାକେ ତାଙ୍ଗ୍ଜି ୱାନାକା ଆନେଙ୍ଗ୍ ୱେଚାଙ୍ଗ୍ ଆରେ ପାଣ୍ଡ୍ରା ଆତାଙ୍ଗ୍, ଇନେସ୍କି ଆନେଙ୍ଗ୍ ନାଗ୍ଡ଼ା ମାଚାଙ୍ଗ୍ ଲାଗିଙ୍ଗ୍ ଆନେଙ୍ଗ୍ ଡ଼ୁକ୍ତାଙ୍ଗ୍।”
ଲାଗିଙ୍ଗ୍ ଈଶ୍ୱର ୱେନ୍ବାତାନ୍, “ଏନେଙ୍ଗ୍ ନାଗ୍ଡ଼ା ମାନାୟ୍ ଇଞ୍ଜି ମିଙ୍ଗେଙ୍ଗ୍ ଇନେର୍ ୱେଚ୍ଚାତାର୍?” ଇମ୍ଣି ପାଡ଼୍ ଆନେଙ୍ଗ୍ ତିନ୍ମାଟ୍ ଇଞ୍ଜି ୱେଚ୍ଚି ମାନ୍ଞ୍ଚାଙ୍ଗ୍, ହେ ପାଡ଼୍ ଏପେଙ୍ଗ୍ ଚିଚାଦେର୍ କି? ଆଣ୍ଡ୍ରେନ୍ ୱେଚ୍ଚାନ୍, “ଇ କଗ୍ଲେଙ୍ଗ୍ ଏନେଙ୍ଗ୍ ନା ଲାଗାୟ୍ ପକ୍ତାତାୟ୍ ହେଦେଲ୍ ନାଙ୍ଗେଙ୍ଗ୍ ପାଡ଼୍ ଚିଞ୍ଜେଙ୍ଗ୍ ହିତ୍ତାତ୍। ଈଶ୍ୱର କଗ୍ଲେଙ୍ଗ୍ ୱେନ୍ବାତାନ୍, ଇଦାଙ୍ଗ୍ ଏନେଙ୍ଗ୍ ଇନାକା କିତାୟ୍?” ହେ କଗ୍ଲେ ୱେଚ୍ଚାତ୍, “ରାଚ୍ ନାଙ୍ଗେଙ୍ଗ୍ ବୁଲ୍କାଇ କିତ୍ତାତ୍।”
ଈଶ୍ୱର ରାଚ୍ତିଙ୍ଗ୍ ୱେଚ୍ଚାନ୍, “ଏନେଙ୍ଗ୍ ଅବିଶାପ୍ ପାୟାଆତାୟ୍ନା,ଏନେଙ୍ଗ୍ ନି ପଟତାଙ୍ଗ୍ ତାଙ୍ଗ୍ନାଇ ଆରେ ଦୁଡ଼ି ତିନାଇ। ଏପେଙ୍ଗ୍ ଆଣ୍ଡ୍ରା ଆରେ କଗ୍ଲେ ଜାର୍-ଜାର୍ ବିତ୍ରେ ଗିଣ୍ କିବା ଆନାଦେର୍। ଆରେ ମି ହିମ୍ଣା ଆରେ ତା ହିମ୍ଣାଙ୍ଗ୍ ପା ଗିଣ୍ କିବାଆନାର୍। କଗ୍ଲେନି ଲାତ୍ରା ମି କାପ୍ଡ଼ାତିଙ୍ଗ୍ ଇଡ଼୍ଦାନାତ୍ ଆରେ ଏନେଙ୍ଗ୍ ତା କାଲ୍ନି କୁନା କାତ୍ରାଇ କିନାୟ୍।”
ତାପାଚେ ଈଶ୍ୱର କଗ୍ଲେଙ୍ଗ୍ ୱେଚ୍ଚାନ୍, “ଏନେଙ୍ଗ୍ ହିମ୍ଣା ଜନମ୍ କିନିହିଙ୍ଗ୍ ଆନେଙ୍ଗ୍ ନିଙ୍ଗେଙ୍ଗ୍ ବେସି ନନାକା ଆହି କିଦ୍ନାଙ୍ଗ୍। ଏନେଙ୍ଗ୍ ନି ଆଣ୍ଡ୍ରାଙ୍ଗ୍ ହୁଡ଼୍ନାୟ୍ ଆରେ ହେୱାନ୍ ନି ଜପି ସାସନ୍ କିଦ୍ନାନ୍।”
ଈଶ୍ୱର ମାନାୟ୍ତିଙ୍ଗ୍ ୱେଚ୍ଚାନ୍, “ଏନେଙ୍ଗ୍ ନି ଡକ୍ରି କାତା ୱେଚାଇ ଆରେ ନାଙ୍ଗେଙ୍ଗ୍ ମାନି କିଦ୍ୱାତାଇ। ନଙ୍ଗୟ ମେଦ୍ନି ଅବିଶାପ୍ ଆତାତ୍, ଆରେ ଏପେଙ୍ଗ୍ କାଦିକଣ୍ଡା ଦାସ୍ତେଙ୍ଗ୍ ବେସି କଷ୍ଟନି କାମାୟ୍ କିନାଦେର୍।” ଏପେଙ୍ଗ୍ ହାଃନାଦେର୍ ଆରେ ମି ଗାଗାଡ଼୍ ଚିକ୍ଲାତାକେ ହାନାତ୍। ଆଣ୍ଡ୍ରା ତା କଗ୍ଲେଙ୍ଗ୍ ହବା ତର୍ ହିତାନ୍, “ତା ଅର୍ତ ଜିବୁନ୍ ହିଦ୍ନାକାଦେଲ୍,” ଇନେସ୍କି ହେଦେଲ୍ କେତେକ୍ ମାନାୟ୍ନି ଆୟା ଆନାତ୍। ଆରେ ଈଶ୍ୱର ଆଦମ ଆରେ ହବାଙ୍ଗ୍ ପଶୁନି ତଲ୍ ଉସ୍ପି କିତାନ୍।
ତାପାଚେ ଈଶ୍ୱର ୱେଚ୍ଚାନ୍, “ନଙ୍ଗୟ ବଲ୍ ଆରେ ମନ୍ଦ୍ ପୁଚି କାଜିଙ୍ଗ୍ ମାନାୟ୍ ମା ଲେକେ ରକାନ୍ ଆତାନ୍ନା, ହେୱାର୍ ୱିଜୁଦିନ୍ ଜିଜି ମାନିକାଜିଙ୍ଗ୍ ଜିବୁନ୍ ହିଦ୍ନି ମାର୍ନି ପାଡ଼୍ ତିନି ଦର୍କାର୍ ଆକାୟ୍।” ଲାଗିଙ୍ଗ୍ ଈଶ୍ୱର ଆଦମ ଆରେ ହବାଙ୍ଗ୍ ହଲ୍ନି ବଗିଚାତାଙ୍ଗ୍ ହପ୍ତାନ୍ ଆରେ ଦେହା ପକ୍ତାନ୍। ଜିବୁନ୍ ହିଦ୍ନି ମାର୍ନି ପାଡ଼୍ତିଙ୍ଗ୍ ଇନେସ୍ ତିନ୍ୱି କାଜିଙ୍ଗ୍, ଈଶ୍ୱର ଶାକ୍ତିକାଟି ଦୁତ୍କୁକାଙ୍ଗ୍ ବଗିଚାନି ଗେଟ୍ତାକେ ଜାଗ୍ୱାଡ଼ି ଲେକେ କିଜି ଇଡ଼ିତାନ୍।
ବାଇବଲ୍ନି ର କାତା: ଆଦିବହି ୩
Free to use, adapt, and share under an open license (CC BY-SA 4.0).