3. ୩. ଈଶ୍ୱର ବନ୍ୟା ପକ୍ତାନ୍
କେତ୍ଦିନ୍ ପାଚେକେତେକ୍ ମାନାୟାର୍ ପୁର୍ତିତାକେ ବାହା କିଜି ମାଚାର୍। ହେୱାର୍ ବେସି କରାପ୍ ଆରେ ଟେମ୍ଫ୍ରିୟାର୍ ମାଚାର୍। ପୁର୍ତି ବେସି କରାପ୍ ଆତାତ୍ ଲାଗିଙ୍ଗ୍ଈଶ୍ୱର ୱିଜୁ ପୁର୍ତିତିଙ୍ଗ୍ ଗାଜା ବନ୍ୟା କିଜି ବୁଡାଇ କିଦେଙ୍ଗ୍ ଇଚା କିତାନ୍।
ମାତର୍ ନୋହ ତର୍ଦାକାନ୍ ଈଶ୍ୱର କାଣ୍କୁକାଙ୍ଗ୍ ଆଶ୍ରିବାଦ୍ ପାୟାଆଜି ମାଚାନ୍। ହେୱାନ୍ କରାପ୍ ମାନାୟାର୍ ବିତ୍ରେ ରକାନ୍ ଦାର୍ମି ମାନାୟ୍ ଲେକେ ଜିବୁନ୍ କାଟିକିଜି ମାଚାନ୍। ଈଶ୍ୱର ନୋହଙ୍ଗ୍ ବନ୍ୟା ପକ୍ନି ବିଷୟରେ ୱେଚ୍ଚାନ୍, ହେୱାନ୍ ନୋହଙ୍ଗ୍ ର ଗାଜା ଜାଜ୍ ରସ୍ତେଙ୍ଗ୍ ୱେଚ୍ଚାନ୍।
୧୪୦ ମିଟର୍ ଡେଙ୍ଗା, ୨୩ ମିଟର୍ ଅହାର୍ ଆରେ ୧୩.୫ ମିଟର୍ ଉଚାନି ଜାଜ୍ ରସ୍ତେଙ୍ଗ୍ ଈଶ୍ୱର ନୋହଙ୍ଗ୍ ୱେଚ୍ଚାନ୍, ଇ ଜାଜ୍ତିଙ୍ଗ୍ ମାର୍ତାଙ୍ଗ୍ ରସ୍ତେଙ୍ଗ୍ ଆରେ ତିନ୍ ମହଲା କିଜି ବେସି ବାକ୍ରାଙ୍ଗ୍, ର ଚାତ୍ ଆରେ ର ଜର୍କା ରସ୍ତେଙ୍ଗ୍ ୱେଚ୍ଚାନ୍। ଇ ଜାଜ୍ ବନ୍ୟା ଆନିହିଙ୍ଗ୍ ନୋହ, ତା ପରିବାର୍, ଆରେ ୱିଜୁ ପଶୁ ପଟିକାଙ୍ଗ୍ ଇଡ଼୍ଦେଙ୍ଗ୍ ହେ ଜାଜ୍ ରସ୍ତେଙ୍ଗ୍ ୱେଚ୍ଚାନ୍।
ନୋହ ଈଶ୍ୱର କାତାତିଙ୍ଗ୍ ମାନି କିତାନ୍। ଈଶ୍ୱର ଇନେସ୍ ୱେଚ୍ଚାନ୍, ଟିକ୍ ହେଲେକେ ନୋହ ଆରେ ତିନ୍ଜାଣ୍ ମେହିର୍ ଜାଜ୍ତିଙ୍ଗ୍ ରସ୍ତାର୍। ଜାଜ୍ ରସ୍ତେଙ୍ଗ୍ ବେସି ବାର୍ହୁ ଲାଗିସ୍ ମାଚାତ୍ ଇନେସ୍କି ଇ ଜାଜ୍ ବେସି ଗାଜା ମାଚାତ୍। ୱାନି ବନ୍ୟା ବିଷୟରେ ନୋହ ମାନାୟାରିଙ୍ଗ୍ ୱେଚ୍ଚି ମାଚାନ୍, ଆରେ ଈଶ୍ୱର ନିପଣ୍ ହାଞ୍ଜେଙ୍ଗ୍ ୱେଚ୍ଚି ମାଚାନ୍, ମାତର୍ ମାନାୟାର୍ ନୋହ କାତାତିଙ୍ଗ୍ ପାର୍ତି କିୱାତାର୍।
ଈଶ୍ୱର ନୋହଙ୍ଗ୍ ଆରେ ତା ପରିବାର୍ କାଜିଙ୍ଗ୍ ଆରେ ପଶୁ କାଜିଙ୍ଗ୍ ବେସି କାଦିକଣ୍ଡା ରୁଣ୍ଡାଇ କିଦେଙ୍ଗ୍ ୱେଚ୍ଚାନ୍। ଏଚେପାଦ୍ନା ୱିଜୁ ରସ୍ତେଙ୍ଗ୍ ଆଡ଼୍ତାର୍, ଈଶ୍ୱର ନୋହଙ୍ଗ୍ ୱେଚ୍ଚାନ୍, ନଙ୍ଗୟ ଏନେଙ୍ଗ୍, ନି ଡକ୍ରୁଦି, ମି ହିମ୍ଣାଙ୍ଗ୍ ଆରେ ତା ଡକ୍ରୁହିକ୍ ୱିଜାକାଦେର୍ ଆଟ୍ଜାଣ୍ ଜାଜ୍ ବିତ୍ରେ ହଣି ସମୟ୍ ଆତାତ୍ନା।
ବନ୍ୟାତାଙ୍ଗ୍ ରକ୍ଷା ପାୟାଆନି କାଜିଙ୍ଗ୍ ଈଶ୍ୱର ୱିଜୁ ପଶୁଙ୍ଗ୍ ବିତ୍ରେତାଙ୍ଗ୍ ରିଣ୍ଡାଙ୍ଗ୍-ରିଣ୍ଡାଙ୍ଗ୍ କିଜି ୱିଜେକିୟାଙ୍ଗ୍ ନୋହ ଜାଜ୍ ଲାଗାୟ୍ ପକ୍ତାନ୍। ବଲି ପୁଜା କିଦେଙ୍ଗ୍ ଈଶ୍ୱର ପଶୁକାଙ୍ଗ୍ ସାତ୍ ଜୁଡ଼ି ଆଣ୍ଡ୍ରା କଗ୍ଲେ କିଜି ପକ୍ତାନ୍। ଆରେ ହେୱିଜୁ ଜାଜ୍ ବିତ୍ରେ ହଟିପାଚେ ଈଶ୍ୱର ନିଜେ ଜାଜ୍ନି କାପାଟ୍ତିଙ୍ଗ୍ ଗେସ୍ତାନ୍।
ତାପାଚେ ବେସି ବାର୍ହା ଆରମ୍ ଆତାତ୍। ୪୦ ଦିନ୍ ଆରେ ୪୦ ରାତି ଆସ୍ତି ଗାଡ଼ାଗାଡ଼ି ବାର୍ହା ଆତାତ୍। ପୁର୍ତି ଜପି ବାର୍ହା ଏଜୁଙ୍ଗ୍ ଡୁଙ୍ଗା ଆଦେଙ୍ଗ୍ ଲାଗିତିକ୍। ପୁର୍ତିନି ୱିଜୁ ଗାଜା-ଗାଜା ମାଡ଼ି ପା ଏଜୁଙ୍ଗ୍ ମଚ୍ଚେଙ୍ଗ୍ ଲାଗାତାତ୍।
ଜାଜ୍ ବିତ୍ରେ ମାନି ମାନାୟାର୍ ଆରେ ପଶୁ ପଟିକାଙ୍ଗ୍ ପିସ୍ତି ପୁର୍ତିତାକେ ମାନି ୱିଜୁ ପଶୁ ପଟିଙ୍ଗ୍ ବାହା କିଜି ମାଚିକିକ୍ ହେୱେକ୍ ହାଃତିକ୍। ଜାଜ୍ ଏଜୁଙ୍ଗ୍ ଜପି ବଡ଼ା ଆଦେଙ୍ଗ୍ ଲାଗାତାତ୍ ଆରେ ଜାଜ୍ ବିତ୍ରେ ମାନି ୱିଜାକାରିଙ୍ଗ୍ ଏଜୁଙ୍ଗ୍ତାକେ ମୁଞ୍ଜ୍ନିତାଙ୍ଗ୍ ରକ୍ଷା ଆତାତ୍।
ବାର୍ହା ବନ୍ଦ୍ ଆତି ପାଚେ, ଜାଜ୍ ଏଜୁଙ୍ଗ୍ ଜପି ପାଞ୍ଚ୍ମାସ୍ ପାତେକ୍ ବଡ଼ାଆଜି ମାଚାତ୍, ଆରେ ହେପାଦ୍ନା ଏଜୁଙ୍ଗ୍ କମା ଆଦେଙ୍ଗ୍ ଲାଗିତିକ୍। ତାପାଚେ ଦିନେକ୍ ଜାଜ୍ ର ମାଡ଼ିନି ମୁଣ୍ଡି ବାଗ୍ତାକେ ଡୁକା ଆତାତ୍, ମାତର୍ ନଙ୍ଗୟ ପାତେକ୍ ପୁର୍ତି ଏଜୁକାଙ୍ଗ୍ ମୁନ୍ଞ୍ଜି ମାଚାତ୍। ଆରେ ତିନ୍ମାସ୍ ପାଚେ, ମାଡ଼ିନି ଜପ୍ଣାକା ହୁଡ଼୍ଦେଙ୍ଗ୍ ଗାଟାଆତ୍ତାତ୍।
ଆରେ ୪୦ ଦିନ୍ ପାଚେ ଏଜୁଙ୍ଗ୍ ନିକ୍ତିକ୍ କି ଆକାୟ୍ ହୁଡ଼୍ଦେଙ୍ଗ୍ ନୋହ ର ପଟି କାୱାତିଙ୍ଗ୍ ବାର୍ତ ପକ୍ତାନ୍। କାୱା ୱାଚ୍ଚି ବାହା ଦାସ୍ତେଙ୍ଗ୍ ହାଚାତ୍ ଇନିଆନି ଉମ୍ଜି ବୁଲାଆତାତ୍, ମାତର୍ ଇମ୍ଣି ବାହା ପା ଗାଟାଆୱାତାତ୍।
ପାଚେ ନୋହ ଆରେ ର ପଟି ପାଣ୍ଡ୍କାତିଙ୍ଗ୍ ବାର୍ତ ପକ୍ତାନ୍। ମାତର୍ ହେ ପାଣ୍ଡ୍କା ପା ଇମ୍ଣି ୱାଚ୍ଚି ବାହା ଗାଟାଆୱାତାତ୍, ଲାଗିଙ୍ଗ୍ ହେ ପାଣ୍ଡ୍କା ନୋହ ଲାଗାୟ୍ ଲେଉଟା ଆଜି ୱାତାତ୍। ର ଆଟ୍ପାଚେ ନୋହ ଆରେରଗ ପାଣ୍ଡ୍କାତିଙ୍ଗ୍ ବାର୍ତ ପକ୍ତାନ୍ ଆରେ ହେ ପାଣ୍ଡ୍କା ଜିତ୍ ମାର୍ନି ଡାଡ଼୍ ୱେଇଦ ଆସ୍ତି ୱାତାତ୍। ଏଜୁଙ୍ଗ୍ ଦିରେ କମା ଆତାତ୍ ଆରେ ମାର୍କୁ ଆରେରଗ ଗାଜା ଆଦେଙ୍ଗ୍ ଲାଗିତିକ୍।
ନୋହ ଆରେ ର ଆଟ୍ କାତି ପାଚେ ପାଣ୍ଡ୍କାତିଙ୍ଗ୍ ଆରେରଗ ବାର୍ତ ପକ୍ତାନ୍। ନଙ୍ଗୟ ହେ ପାଣ୍ଡ୍କା ଜମ୍ଦେଙ୍ଗ୍ ବାହା ଗାଟା ଆତାତ୍ ଆରେ ଲେଉଟା ଆଜି ହାଲ୍ୱାତାତ୍ଦେ। ଏଜୁଙ୍ଗ୍ ନିକ୍ତେଙ୍ଗ୍ ଲାଗିତିକ୍।
ରି ମାସ୍ ପାଚେ ଈଶ୍ୱର ନୋହଙ୍ଗ୍ ୱେଚ୍ଚାନ୍, “ମି ପରିବାର୍ ଆରେ ୱିଜୁ ପଶୁପଟିଙ୍ଗ୍ ଆରେ ଏପେଙ୍ଗ୍ ଜାଜ୍ତାଙ୍ଗ୍ ବାର୍ତ ହତେଙ୍ଗ୍ ଆଡ୍ନାଦେର୍। ବେସି ହିମ୍ଣାୱାକ୍ଡ଼ା ଆରେ ନାତିନାତ୍ନି ଜନମ୍ କିଜି ପୁର୍ତିତିଙ୍ଗ୍ ବାର୍ତି କିୟାଟ୍।” ଲାଗିଙ୍ଗ୍ ନୋହ ଆରେ ତା ପରିବାର୍ ଜାଜ୍ତାଙ୍ଗ୍ ବାର୍ତ ହତ୍ତାର୍।
ନୋହ ଜାଜ୍ତାଙ୍ଗ୍ ବାର୍ତ ହସିୱାତି ପାଚେ, ହେୱାନ୍ ର ବେଦି ରସ୍ତାନ୍ ଆରେ ଇମ୍ଣି ପଶୁକାଙ୍ଗ୍ ବଲି ପୁଜା କିନି ଦର୍କାର୍, କେତେକ୍ ପର୍କାର୍ ପଶୁକାଙ୍ଗ୍ ଅଜି ବଲି ପୁଜା କିତାନ୍। ଈଶ୍ୱର ବଲି ପୁଜାତିଙ୍ଗ୍ ୱାରି ଆତାନ୍। ନୋହ ଆରେ ତା ପରିବାର୍ତିଙ୍ଗ୍ ଈଶ୍ୱର ଆଶ୍ରିବାଦ୍ କିତାନ୍।
ଈଶ୍ୱର ୱେଚ୍ଚାନ୍, “ଆନେଙ୍ଗ୍ ପାର୍ମାଣ୍ କିନାଙ୍ଗା ଯେ, ମାନାୟାର୍ କାଜିଙ୍ଗ୍ ମେଦ୍ନିତିଙ୍ଗ୍ ଇନାୱାଡ଼ାଙ୍ଗ୍ ପା ଅବିଶାପ୍ କିଉଙ୍ଗ୍ କି ମାନାୟାର୍ ତା ହିମ୍ଣା ୱେଡ଼ାତାଙ୍ଗ୍ ପାପି ଆତିସ୍ ପା ଆନେଙ୍ଗ୍ ପୁର୍ତିତିଙ୍ଗ୍ ଆରେରଗ ବନ୍ୟାତାଙ୍ଗ୍ ନଷ୍ଟ କିଉଙ୍ଗ୍।”
ପାର୍ମାଣ୍ନି ର ଚିନା ଲେକେ ଈଶ୍ୱର ପାର୍ତୁମ୍ ତୁବ୍ଡ଼ା ରସ୍ତାନ୍। ୱିଜୁଦିନ୍ ବାଦାଡ଼୍ତାକେ ଇନାୱାଡ଼ାଙ୍ଗ୍ ତୁବ୍ଡ଼ା ଚନ୍ଞ୍ଜାନାତ୍, ଈଶ୍ୱର ତା ପାର୍ମାଣ୍ତିଙ୍ଗ୍ ୱେନାନ୍, ହେଲେକେ ମାନାୟାର୍ ପା କିନାର୍।
ବାଇବଲ୍ନି ର କାତା: ଆଦିବହି ୬-୮
Free to use, adapt, and share under an open license (CC BY-SA 4.0).