4. ୪. ଈଶ୍ୱର ଅବ୍ରାହାମ ହୁଦାଙ୍ଗ୍ ପାର୍ମାଣ୍ କିତାନ୍
ବନ୍ୟାନି ବେସି ବାର୍ହୁ ପାଚେ ପୁର୍ତିତାକେ ବେସିହେନି ମାନାୟାର୍ ବାହା କିଦେଙ୍ଗ୍ ଲାଗାତାର୍ ଆରେ ହେୱାର୍ ର ବାଷାତାଙ୍ଗ୍ ନେ ବେଣ୍ କିଜି ମାଚାର୍। ଈଶ୍ୱର ଆଦେସ୍ତାଙ୍ଗ୍ ପୁର୍ତିନି ଚାରିବେଣ୍ତାଙ୍ଗ୍ ବାହାକିନି ବାଦୁଲ୍ତ, ହେୱାର୍ ୱିଜାକାର୍ ରବେ ଆଜି ବାଉଣ୍ଡେରି ଲେକେ ର ଗଡ଼୍ ରସ୍ତେଙ୍ଗ୍ ଲାଗାତାର୍।
ହେୱାର୍ ବେସି ଗାର୍ବିୟା ମାନାୟ୍ ମାଚାର୍ ଆରେ ଈଶ୍ୱର କାତାତିଙ୍ଗ୍ ମାନିକିୱାଦାଙ୍ଗ୍ ମାଚାର୍। ହେୱାର୍ ସରଗ୍ଜପି ଏକେଦେଙ୍ଗ୍ ବେସି ଗାଜା ଗଡ଼୍ ରସ୍ତାର୍। ଈଶ୍ୱର ହୁଡ଼୍ତାନ୍ ଯେ, ଯଦି ହେୱାର୍ କରାପ୍ କାମାୟ୍ କିଦେଙ୍ଗ୍ ଲାଗିମାନାର୍, ଲାଗିଙ୍ଗ୍ ହେୱାର୍ ଆଦିକ୍ ପାପ୍ତାଙ୍ଗ୍ ପୁରାଆତି କାମାୟ୍ କିନାର୍।
ଲାଗିଙ୍ଗ୍ ଈଶ୍ୱର ହେୱାର୍ ବାଷାତିଙ୍ଗ୍ କେତେକ୍ ବାଷାତାକେ ବାଦ୍ଲାୟ୍ କିତାନ୍ ଆରେ ପୁର୍ତିନି ବାରବିନି ବାହାତାକେ ହେୱାରିଙ୍ଗ୍ ପକ୍ତାନ୍। ଇମ୍ଣି ଦେସ୍ତାକେ ହେୱାର୍ ଗଡ଼୍ ରହ୍ନାକା ଆରମ୍ କିଜି ମାଚାର୍, ତା ତର୍ ବାବିଲ୍ ଗଡ଼୍ ମାଚାତ୍, ଇଦାଙ୍ଗ୍ନି ଅର୍ତ ବେଣ୍ “ବୁଜାଆୱି କାତା।”
ଶହେ ବାର୍ହୁ ପାଚେ, ରକାନ୍ ମାନାୟ୍, ଅବ୍ରାମ ହୁଦାଙ୍ଗ୍ ଈଶ୍ୱର ବେଣ୍ କିତାନ୍। ଈଶ୍ୱର ଅବ୍ରାମତିଙ୍ଗ୍ ୱେଚ୍ଚାନ୍, “ମି ପରିବାର୍ ଆରେ ମି ଦେସ୍ ପିସ୍ତି ଆନେଙ୍ଗ୍ ଇମ୍ଣି ଦେସ୍ ଚଚ୍ଚାନାଙ୍ଗ୍, ହେ ଦେସ୍ତାକେ ହାଲା। ଆନେଙ୍ଗ୍ ନିଙ୍ଗେଙ୍ଗ୍ ଆଶ୍ରିବାଦ୍ କିଦ୍ନାଙ୍ଗ୍ ଆରେ ନିଙ୍ଗେଙ୍ଗ୍ ଗାଜା ଦେସ୍ ହିଦ୍ନାଙ୍ଗ୍। ଆନେଙ୍ଗ୍ ନି ତର୍ଦିଙ୍ଗ୍ ଗାଜା କିନାଙ୍ଗ୍। ଇମ୍ଣାକାର୍ ନିଙ୍ଗେଙ୍ଗ୍ ଆଶ୍ରିବାଦ୍ କିଦ୍ନାର୍, ହେୱାରିଙ୍ଗ୍ ଆନେଙ୍ଗ୍ ଆଶ୍ରିବାଦ୍ କିନାଙ୍ଗ୍, ଇମ୍ଣାକାର୍ ଅବିଶାପ୍ ହିଦ୍ନାର୍, ହେୱାରିଙ୍ଗ୍ ଅବିଶାପ୍ ହିନାଙ୍ଗ୍। ନି କାଜିଙ୍ଗ୍ ପୁର୍ତିନି ୱିଜୁ ପରିବାର୍ ଆଶ୍ରିବାଦ୍ ପାୟାଆନାର୍।”
ଲାଗିଙ୍ଗ୍ ଆବ୍ରାମ ଈଶ୍ୱର କାତାତିଙ୍ଗ୍ ମାନି କିତାନ୍। ହେୱାନ୍ ତା ଡକ୍ରି ସାରିଙ୍ଗ୍, ତା ଦାସ୍ ମାନାୟ୍ରିଙ୍ଗ୍ ଆରେ ଇନାକା ତାଦି ମାଚାତ୍ ହେ ୱିଜୁ ଅଜି ଈଶ୍ୱର ଇମ୍ଣି ଦେସ୍ ଚଚ୍ଚି ମାଚାନ୍, ହେ କିଣାନ୍ ଦେସ୍ତ ହାଚାନ୍।
ଏଚେପାଦ୍ନା ଅବ୍ରାମ କିଣାନ୍ ଦେସ୍ତ ଇକାତାନ୍, ଈଶ୍ୱର ୱେଚ୍ଚାନ୍, “ନି ଚାରି ବେଣ୍ତିଙ୍ଗ୍ ହୁଡ଼ା। ଇନାକା ଏନେଙ୍ଗ୍ ହୁଡ଼୍ଦେଙ୍ଗ୍ ଆଡ୍ନାୟା, ଇ ୱିଜୁ ବାହା ଆନେଙ୍ଗ୍ ନିଙ୍ଗେଙ୍ଗ୍ ଆରେ ମି ଲାତ୍ରାତିଙ୍ଗ୍ ଆଦିକାର୍ ଲେକେ ହିଦ୍ନାଙ୍ଗ୍।” ତାପାଚେ ଅବ୍ରାମ ହେ ବାହାତାକେ ବାହାକିତାନ୍।
ଦିନେକ୍, ଅବ୍ରାମ ଗାଜା ଈଶ୍ୱରନି ପୁଜାରି, ମଲ୍କିଷେଦକ୍ ତର୍ଦାକାନିଙ୍ଗ୍ ଗିଟାଆତାନ୍। ମଲ୍କିଷେଦକ୍ ଅବ୍ରାମତିଙ୍ଗ୍ ଆଶ୍ରିବାଦ୍ ହିତାନ୍ ଆରେ ୱେଚ୍ଚାନ୍, “ୱିଜୁତାଙ୍ଗ୍ ଗାଜା ଈଶ୍ୱର ଇନେର୍ ସରଗ୍ ଆରେ ପୁର୍ତିନି ୱିଜୁ ଆଦିକାର୍, ଅବ୍ରାମତିଙ୍ଗ୍ ଆଶ୍ରିବାଦ୍ କିୟା।” ତାପାଚେ ଅବ୍ରାମ ତା ୱିଜୁ ଦନ୍ ସମ୍ଫତିନି ଦଶମାଂଶ ମଲ୍କିଷେଦକ୍ତିଙ୍ଗ୍ ହିତାନ୍।
କେତେକ୍ ବାର୍ହୁ ଆତାତ୍, ମାତର୍ ନଙ୍ଗୟ ପାତେକ୍ ଅବ୍ରାମ ଆରେ ସାରିଙ୍ଗ୍ ହିମ୍ଣାୱାକ୍ଡ଼ା ହିଲାତାର୍। ଈଶ୍ୱର ଅବ୍ରାମତିଙ୍ଗ୍ ଆରେରଗ ପାର୍ମାଣ୍ କିଜି ୱେଚ୍ଚାନ୍ ଯେ ମିଙ୍ଗେଙ୍ଗ୍ ର ହିମ୍ଣା ଆଦ୍ନାନ୍ ଆରେ ତା ଲାତ୍ରା ବାଦାଡ଼୍ନି ହୁକାଙ୍ଗ୍ ଲେକେ ଆନାର୍। ଈଶ୍ୱର ଆଦେସ୍ତିଙ୍ଗ୍ ଅବ୍ରାମ ପାର୍ତି କିତାନ୍। ଈଶ୍ୱର ଅବ୍ରାମତିଙ୍ଗ୍ ଦାର୍ମି ମାନାୟ୍ ଇଞ୍ଜି ୱେଚ୍ଚାନ୍, ଇନେସ୍କି ହେୱାନ୍ ଈଶ୍ୱରତାକେ ପାର୍ତି କିଜି ମାଚାନ୍।
ଲାଗିଙ୍ଗ୍ ଈଶ୍ୱର ଅବ୍ରାମ ହୁଦାଙ୍ଗ୍ ନିୟମ୍ ରସ୍ତାନ୍। ରି ଦଳ୍ ବିତ୍ରେ ର ପାର୍ମାଣ୍ କିନି ର ନିୟମ୍। ଈଶ୍ୱର ୱେଚ୍ଚାନ୍, “ନି ଗାଗାଡ଼୍ତାଙ୍ଗ୍ ଆନେଙ୍ଗ୍ ମି କାଜିଙ୍ଗ୍ ର ମାଜି ହିଦ୍ନାଙ୍ଗ୍। ମି ଲାତ୍ରାତିଙ୍ଗ୍ ଆନେଙ୍ଗ୍ କିଣାନ ଦେସ୍ ହିନାଙ୍ଗ୍।” ମାତର୍ ନଙ୍ଗୟ ପତେକ୍ ଅବ୍ରାମତିଙ୍ଗ୍ ହିମ୍ଣା ୱାକ୍ଡ଼ା ହିଲାତାର୍।
ବାଇବଲ୍ନି ର କାତା: ଆଦିବହି ୧୧-୧୫
Free to use, adapt, and share under an open license (CC BY-SA 4.0).