50. ୫୦. ଯୀଶୁ ବାଦ୍ଲାୟ୍ କିନାନ୍
୨୦୦୦ ବାର୍ହୁତାଙ୍ଗ୍ ଆଦିକ୍ ସମୟ୍ତ ୱିଜୁ ପୁର୍ତିତାଙ୍ଗ୍ ଆଦିକ୍ତାଙ୍ଗ୍ ଆଦିକ୍ ମାନାୟ୍ ଯୀଶୁ ଖ୍ରୀଷ୍ଟ ବିଷୟରେ ହାର୍ଦିକାବୁର୍ ୱେନ୍ଞ୍ଜି ୱାନାରା। ମଣ୍ଡ୍ଲି ବାଡାଆଦେଙ୍ଗ୍ ଲାଗାନାତା। ଯୀଶୁ ପାର୍ମାଣ୍ କିତାନ୍ ଯେ ହେୱାନ୍ ଶେସ୍ ସମୟ୍ତ ଜଗତ୍ତିଙ୍ଗ୍ ଆରେରଗ ଲେଉଟାଆଜି ୱାନାନ୍।ଯଦି ହେୱାନ୍ ନଙ୍ଗୟ ପାତେକ୍ ୱାୱାତାନ୍ନା, ହେୱାନ୍ ତା କିତି ପାର୍ମାଣ୍ତିଙ୍ଗ୍ ରକ୍ଷା କିନାନ୍।
ଆପେଙ୍ଗ୍ ଯୀଶୁ ୱାନାକା କାସି-କାସି, ଈଶ୍ୱର ଇଚା କିନାନ୍ ଇନେସ୍କି ଆସେଙ୍ଗ୍ ର ପବିତ୍ର ଆରେ ହେୱାନିଙ୍ଗ୍ ଗୌରବ ହିନି ଲେକେ ଜିବୁନ୍ କାଟିକିନାସ୍। ହାୱାନ୍ ଇଚା କିନାନ୍ ଇନେସ୍ ଆସେଙ୍ଗ୍ ତା ରାଜି ବିଷୟରେ ଜେକନିକାରିଙ୍ଗ୍ ୱେଚ୍ନାସ୍। ଯୀଶୁ ପୁର୍ତିତାକେ ବାହା କିତିହିଙ୍ଗ୍ ୱେଚ୍ଚାତାନ୍, “ନା ଚେଲାର୍ ଈଶ୍ୱର ସାସନ୍ କିନି ରାଜିନି ହାର୍ଦିକାବୁର୍ ଜଗତ୍ତାକେ ମାନି ୱିଜୁ ମାନାୟାରିଙ୍ଗ୍ ଶୁଣାୟ୍ କିନାର୍, ତାପାଚେ ନେ ଯୁଗ୍ ସେସ୍ ଆନାତ୍।”
କେତେକ୍ ମାନାୟ୍ ନଙ୍ଗୟ୍ ପାତେକ୍ ଯୀଶୁ ବିଷୟରେ ୱେନ୍ୱାତାର୍ନା।ହେୱାନ୍ ସରଗ୍ତାକେ ହାନି ଆଗେ, ଇମ୍ଣାକାର୍ ଇନେୱାଡ଼୍ଙ୍ଗ୍ ପା ହାର୍ଦିକାବୁର୍ ୱେନ୍ୱାତାର୍ନା ହେୱାର୍ ଲାଗାୟ୍ ହାର୍ଦିକାବୁର୍ ଶୁଣାୟ୍କିନି କାଜିଙ୍ଗ୍ ଯୀଶୁ ଖ୍ରୀଷ୍ଟାନ୍ ମାନାୟାରିଙ୍ଗ୍ ୱେଚ୍ଚାନ୍ନା।ହେୱାନ୍ ୱେଚ୍ଚାନ୍, “ଏପେଙ୍ଗ୍ ହାଲ୍ଜି ୱିଜାକାର୍ ମାନାୟାରିଙ୍ଗ୍ ଚେଲା ରହାଟ୍।ଆରେ ତେଜ୍ନି କାଜିଙ୍ଗ୍ ତାସ୍ ହେନ୍ତାତ୍ନା।”
ଯୀଶୁ ଆରେ ୱେଚ୍ଚାନ୍, “ଦାସ୍ ତା ମାଲିକ୍ତାଙ୍ଗ୍ ଗାଜା ଆକାୟ୍।ଇ ଜଗତ୍ନି ଆଦିକାର୍ ପାୟାଆତି ମାନାୟାର୍ ଇନେସ୍ ନାଙ୍ଗେଙ୍ଗ୍ ଗିଣ୍ କିଦ୍ନାର୍, ଟିକ୍ ହେଲେକେ ହେୱାର୍ ନା କାଜିଙ୍ଗ୍ ମିଙ୍ଗେଙ୍ଗ୍ ଦୁକ୍ ହିଜି ମାର୍ନେ ଅସ୍ତାନାର୍।ଏପେଙ୍ଗ୍ ଯଦି ଇ ଜଗତ୍ତାକେ ଦୁକ୍କଷ୍ଟ ପାୟାଆନାଦେର୍, ୱାରି ଆଡ ଇନେସ୍କି ଜଗତ୍ତିଙ୍ଗ୍ ସାସନ୍ କିନି ଶୟତାନତିଙ୍ଗ୍ ଆନେଙ୍ଗ୍ ଜିତାଆତାଙ୍ଗ୍ନା।ଏପେଙ୍ଗ୍ ଯଦି ସେସ୍ ପାତେକ୍ ନା ଲାଗାୟ୍ ବିସ୍ବସ୍ତ ଆଜି ମାନାଦେର୍, ଲାଗିଙ୍ଗ୍ ଈଶ୍ୱର ମିଙ୍ଗେଙ୍ଗ୍ ରକ୍ଷା କିଦ୍ନାନ୍।”
ଇନେର୍ ଜଗତ୍ ସେସ୍ ଆନିହିଙ୍ଗ୍ ମାନାୟାର୍ କାଜିଙ୍ଗ୍ ଇନାକା ଗିଟାଆନାତ୍ ହେଦାଙ୍ଗ୍ ବୁଜାଇ କିନି କାଜିଙ୍ଗ୍ ଯୀଶୁ ତା ଚେଲାହିରିଙ୍ଗ୍ ର କାତା ୱେଚ୍ଚାନ୍,“ “ରକାନ୍ ମାନାୟ୍ ତା ଜମିତ ହାର୍ଦି ବିୟାନ୍ ୱିତ୍ତାନ୍। ହେୱାନ୍ ହୁନ୍ଞ୍ଚିହିଙ୍ଗ୍ ତା ଶତ୍ରୁ ୱାଜି କୁଲିଙ୍ଗ୍ ହୁଦାଙ୍ଗ୍ କାଚ୍ରା ବିୟାନ୍ ୱିତ୍ତାନ୍ ଆରେ ହେୱାନ୍ ହାଚାନ୍।”
“ଏଚେପାଦ୍ନା ବିୟାନ୍ ଗଜା ଆତାତ୍, ହେ ମାଲିକ୍ନି ଦାସ ମାନାୟାର୍ ୱାଜି ୱେଚ୍ଚାର୍, ଏ ଗୁରୁ, ଏନେଙ୍ଗ୍ ହେ ଜମିତାକେ ହାର୍ଦି ବିୟାନ୍ ୱିତ୍ଦି ମାଚାୟ୍।ଲାଗିଙ୍ଗ୍ ହେବେ ଇନାକିଦେଙ୍ଗ୍ କାଚ୍ରାଙ୍ଗ୍ ଚଞ୍ଜ୍ଞ୍ଜିନିକା? ମାଲିକ୍ ୱେଚ୍ଚାନ୍, ରକାନ୍ ଶତ୍ରୁ ହେଦାଙ୍ଗ୍ କିତାନ୍ନା।”
“ଦାସ୍ ମାନାୟାର୍ ତା ମାଲିକ୍ତିଙ୍ଗ୍ ୱେଚ୍ଚାର୍, ଆସେଙ୍ଗ୍ ଇନାକା କାଚ୍ରାକାଙ୍ଗ୍ ଜେଲ୍ନାସ୍?” ମାଲିକ୍ ୱେଚ୍ଚାନ୍, “ଆକାୟ୍ ଯଦି ଏପେଙ୍ଗ୍ ଏଲେଙ୍ଗ୍ କିନାଦେର୍, ତା ହୁଦାଙ୍ଗ୍ ଏପେଙ୍ଗ୍ କୁଲିଙ୍ଗ୍ ପା ଜେଲ୍ନାଦେର୍। ତାସ୍ ହେନ୍ନି ପାତେକ୍ କାସି ମାନାଟ୍, କାଚ୍ରାକାଙ୍ଗ୍ ରବେ କିଜି କାଡିକିୟାଟ୍, ମାତର୍ କୁଲିକାଙ୍ଗ୍ ନା ଟୁଣ୍ଡିତାକେ ତାସି ୱାଡ।”
ଚେଲାହିର୍ ହେ କାତାନି ଅର୍ତ ବୁଜା ଆୱାତାର୍, ଲାଗିଙ୍ଗ୍ ହେୱାର୍ ହେଦାଙ୍ଗ୍ ବୁଜାଇକିଜି ହିଦ୍ନି କାଜିଙ୍ଗ୍ ଯୀଶୁଙ୍ଗ୍ ୱେଚ୍ଚାର୍। ଯୀଶୁ ୱେଚ୍ଚାନ୍, “ଇମ୍ଣି ମାନାୟ୍ ହାର୍ ବିୟାନ୍ ୱିତ୍ନାନ୍ ହେୱାନ୍ ଖ୍ରୀଷ୍ଟନି ମାନାୟ୍। ଜମି ଆନାତା ଜଗତ୍। ହାର୍ଦି ବିୟାନ୍ ଈଶ୍ୱର ରାଜିନି ମାନାୟାରିଙ୍ଗ୍ ବୁଜାଇ କିନାତା।”
“କାଚ୍ରା ଆନାତା ହେ ମାନାୟାରିଙ୍ଗ୍ ବୁଜାଇ କିନାତ୍ ଇମ୍ଣାକାର୍ କରାପ୍। ଇମ୍ଣି ଶତ୍ରୁ କାଚ୍ରାଙ୍ଗ୍ ୱିତ୍ତାନ୍ ଆରେ ହାଚାନ୍ ହେୱାନ୍ ଆନାନା ଶୟତାନ। ତାସ୍ ହେନ୍କା ଆନାତା ଜଗତ୍ନି ସେସ୍ ଆରେ ରୁଣ୍ଡାଇ କିନାକାର୍ ଆନାରା ଈଶ୍ୱର ଦୁତ୍କୁ।”
“ଏଚେପାଦ୍ନା ଜଗତ୍ ସେସ୍ ଆନାତ୍, ହେପାଦ୍ନା ଦୁତ୍କୁ ପାପ୍ନି ହିମ୍ଣାରିଙ୍ଗ୍ ରବେକିଜି କାଚାଆନି ନାଣିତାକେ ତୁସି ହିନିକ୍, ଇମେତାକେ ଆଡ଼୍ବାନାକା ଆରେ ଟାଡାଙ୍ଗ୍ କିଡ଼ିମିଡ଼ି ଆନାତ୍। ହେପାଦ୍ନା ଦାର୍ମି ମାନାୟାର୍ ହେୱାର୍ ଆବା ଈଶ୍ୱର ରାଜିତାକେ ୱେଡ଼ା ଲେକେ ଅଜଡ଼୍ ଆନାର୍।”
ଯୀଶୁ ଆରେ ୱେଚ୍ଚାନ୍, “ଜଗତ୍ ସେସ୍ଆନି ଟିକ୍ ଆଗେ ହେୱାନ୍ ପୁର୍ତିତାକେ ୱାନାନ୍। ହେୱାନ୍ ଇନେସ୍ ପୁର୍ତିତାଙ୍ଗ୍ ସରଗ୍ତାକେ ହାଲ୍ଜି ମାଚାନ୍, ହେୱାନ୍ ଟିକ୍ ହେଲେକେ ପୁର୍ତିତାକେ ୱାନାନ୍। ହେୱାନିଙ୍ଗ୍ ର ଗାଗାଡ଼୍ ମାନାତ୍ ଆରେ ହେୱାନ୍ ବାଦାଡ଼୍ତାଙ୍ଗ୍ ୱାନାନ୍।” ଯୀଶୁ ଏଚେପାଦ୍ନା ୱାନାନ୍, ଏଚେଜାଣ୍ ଖ୍ରୀଷ୍ଟାନ୍ ମାନାୟାର୍ ହାଃଜି ମାନାର୍, ହେୱାର୍ ହାଃତିତାଙ୍ଗ୍ ଜିବୁନ୍ ଆନାର୍ ଆରେ ହେୱାନିଙ୍ଗ୍ ବାଦାଡ଼୍ତାକେ ହୁଡ଼୍ନାର୍।
ତାପାଚେ ଇମ୍ଣି ଖ୍ରୀଷ୍ଟାନାର୍ ଜିବୁନ୍ ମାନ୍ଗାନାର୍ ହେୱାର୍ ହାଃତିତାଙ୍ଗ୍ ଜିବୁନ୍ ଆଜି ନିଙ୍ଗ୍ତି ଖ୍ରୀଷ୍ଟାନାର୍ ହୁଦାଙ୍ଗ୍ ମାହାଆଜି ବାଦାଡ଼୍ତାକେ ହାନାର୍। ହେୱାର୍ ୱିଜାକାର୍ ହେବେ ଯୀଶୁ ହୁଦାଙ୍ଗ୍ ମାନ୍ଗାନାର୍। ତାପାଚେ ଯୀଶୁ ତା ମାନାୟାର୍ ହୁଦାଙ୍ଗ୍ ୱିଜୁ ଶାନ୍ତି ଆରେ ଏକ୍ଆଜି ୱିଜ୍ୱିଦିନ୍ ପାତେକ୍ ମାନ୍ଗାନାର୍।
ଇମ୍ଣାକାର୍ ଯୀଶୁତାକେ ପାର୍ତି କିନାର୍ ହେୱାରିଙ୍ଗ୍ ର ମୁକୁଟ୍ ହିନି କାଜିଙ୍ଗ୍ ଯୀଶୁ ପାର୍ମାଣ୍ କିତାନ୍ନା। ହେୱାର୍ ଈଶ୍ୱର ହୁଦାଙ୍ଗ୍ ପୁରା ଶାନ୍ତିତାଙ୍ଗ୍ ବାହାକିଜି ସାସନ୍ କିନାର୍।
ମାତର୍ ଇମ୍ଣାକାର୍ ଯୀଶୁତାକେ ପାର୍ତି କିଉର୍ ଈଶ୍ୱର ହେୱାରିଙ୍ଗ୍ ବିଚାର୍ କିନାନ୍। ହେୱାନ୍ ହେୱାରିଙ୍ଗ୍ ଆଡ଼୍ବାନାକା ଆରେ ଟାଡାଙ୍ଗ୍ କିଡ଼ିମିଡ଼ି ଆନି ନରକ୍ତାକେ ତୁସିହିନାନ୍, ଇଲେକେ ର ନାଣି ଇନେୱାଡ଼ାଙ୍ଗ୍ ପା ହାଉତ୍ ଆରେ ୱିଜୁଦିନ୍ କାଚାଆଜି ମାନାତ୍, ଆରେ ପିକୁଙ୍ଗ୍ ହେୱାରିଙ୍ଗ୍ ତିନାକା ଟେବାଇ କିଉକ୍।
ଯୀଶୁ ଏଚେପାଦ୍ନା ୱାନାନ୍, ହେୱାନ୍ ପୁରାପୁରି ବାବ୍ରେ ଶୟତାନ ଆରେ ତା ରାଜିତିଙ୍ଗ୍ ନଷ୍ଟ କିନାନ୍। ହେୱାନ୍ ଶୟତାନତିଙ୍ଗ୍ ଆରେ ଈଶ୍ୱର କାତାତିଙ୍ଗ୍ ମାନିକିୱି ବାଦୁଲ୍ ତା ୱାନାକାଦିଙ୍ଗ୍ ଇଚାକିତି ୱିଜାକାରିଙ୍ଗ୍ ନରକ୍ତାକେ ତୁସି ହିନାନ୍ ହେବେ ୱିଜ୍ୱିଦିନ୍ ପାତେକ୍ କାଡ଼୍ଜି ମାନାର୍।
ଇନେସ୍କି ଆଦମ ଆରେ ହବା ଈଶ୍ୱର କାତାତିଙ୍ଗ୍ ମାନି କିୱାତାର୍ ଆରେ ଇ ଜଗତ୍ତାକେ ପାପ୍ ଦେସ୍ କିୟିକିତାର୍, ଲାଗିଙ୍ଗ୍ ଈଶ୍ୱର ଇଦାଙ୍ଗ୍ତିଙ୍ଗ୍ ଅବିସାପ୍ ହିତାନ୍ ଆରେ ଇଦାଙ୍ଗ୍ତିଙ୍ଗ୍ ନଷ୍ଟକିନି କାଜିଙ୍ଗ୍ ଇଚା କିତାନ୍। ମାତର୍ ଦିନେକ୍ ଈଶ୍ୱର ର ପୁନି ସରଗ୍ ଆରେ ପୁନି ପୁର୍ତି ରହ୍ନାନ୍ ହେଦାଙ୍ଗ୍ ସିଦ୍ ଆରେ ପୁରା ଆନାତ୍।
ଯୀଶୁ ଆରେ ତା ମାନାୟାର୍ ପୁନି ପୁର୍ତିତାକେ ବାହା କିନାର୍, ଆରେ ଇନାକା ୱିଜୁ ମାନାତ୍ ହେ ୱିଜୁ ଜପି ହେୱାନ୍ ୱିଜ୍ୱିଦିନ୍ ପାତେକ୍ ସାସନ୍ କିନାନ୍। ହେୱାନ୍ ୱିଜାକାରିଙ୍ଗ୍ କାଣେଲିଙ୍ଗ୍ ନେନ୍ଦ୍ଦି ହିନାନ୍ ଆରେ ଇନସ୍ତା, ଦୁକ୍, ଆଡ଼୍ବାନାକା, କରାପ୍, କଷ୍ଟ କି ହାଃନାକା ହିଲ୍ଗୁତ୍। ଯୀଶୁ ଶାନ୍ତି ଆରେ ନ୍ୟାୟ୍ତାଙ୍ଗ୍ ତା ରାଜି ଜପି ସାସନ୍ କିନାନ୍ ଆରେ ହେୱାନ୍ ତା ମାନାୟାର୍ ହୁଦାଙ୍ଗ୍ ୱିଜ୍ୱିଦିନ୍ ପାତେକ୍ ମାନ୍ଗାନାନ୍।
ବାଇବଲ୍ନି ର କାତା: ମାଥିଉ ୨୪: ୨୪; ୨୮: ୧୮; ଯୋହନ ୧୫:୨୦, ୧୬: ୩୩; ପ୍ରକାଶିତ ୨: ୧୦; ମାଥିଉ ୧୩: ୨୪- ୩୦, ୩୬- ୪୨; ୧ଥେସଲନିକୀୟ ୪: ୧୩- ୫: ୧୧; ଯାକୁବ ୧: ୧୨; ମାଥିଉ ୨୨: ୧୩; ପ୍ରକାଶିତ ୨୦: ୧୦; ୨୧: ୧- ୨୨: ୨୧
Free to use, adapt, and share under an open license (CC BY-SA 4.0).