49. ୪୯. ମରିୟମ ତରଦାକାଦେଲ୍ ରଞ୍ଜେଲ୍ ୱାଟା ଜିପଲିଙ୍ଗ୍ ର ଦୁତ୍ ୱେଚ୍ଚାତ୍ ଯେ ଏନେଙ୍ଗ୍ ଈଶ୍ୱର ମେହିତିଙ୍ଗ୍ ଜନମ୍ ହିନାୟ୍।
ଏଚେପାଦ୍ନା ମରିୟମ ୱାଟା ଜିପଲି ମାଚାତ୍, ହେଦେଲିଙ୍ଗ୍ ପବିତ୍ର ଆତ୍ମା ୱାତାତ୍ ଆରେ ହେଦେଲ୍ ପଟ ଆତାତ୍, ଲାଗିଙ୍ଗ୍ ହେଦେଲ୍ ର ହିମ୍ଣା ଗାଟାଆତାତ୍ ଆରେ ତା ତର୍ ଯୀଶୁ ହିତାର୍।ଇନେସ୍କି ଯୀଶୁ ଆନାନା ଈଶ୍ୱର ଆରେ ମାନାୟ୍ ଲେକେ।
ଯୀଶୁ ଈଶ୍ୱର ମେହି ଇଞ୍ଜି ଚଚି ଆନି କାଜିଙ୍ଗ୍ କେତେକ୍ ଚାନିଆଆନି କାମାୟ୍ କିତାନ୍।ହେୱାନ୍ ଏଜୁଙ୍ଗ୍ ଜପି ତାଙ୍ଗ୍ତାନ୍, ଡ଼ୁଇଦୁକାତିଙ୍ଗ୍ ତିର୍ କିତାନ୍, କେତେକ୍ ବେମାର୍ ମାନାୟାରିଙ୍ଗ୍ ହାର୍ କିତାନ୍, ବୁତ୍କୁକାଙ୍ଗ୍ ପେସ୍ତାନ୍, ହାଃତାକାରିଙ୍ଗ୍ ଜିବୁନ୍ କିତାନ୍ ଆରେ ୫୦୦୦ ତାଙ୍ଗ୍ ଆଦିକ୍ ମାନାୟାରିଙ୍ଗ୍ ପାଞ୍ଚ୍ଗଟା ରୁଟିଙ୍ଗ୍ ଆରେ ରିଣ୍ଡାଙ୍ଗ୍ ମିନ୍କୁତାଙ୍ଗ୍ ପଟ ପାଞ୍ଜୁ ରଞ୍ଜାଙ୍ଗ୍ ଚିଚ୍ପାତାନ୍।
ଯୀଶୁ ରକାନ୍ ୱିଜୁତାଙ୍ଗ୍ ଗାଜା ମାଷ୍ଟେର୍ ପା ମାଚାନ୍, ଆରେ ହେୱାନ୍ ଆଦିକାର୍ ହୁଦାଙ୍ଗ୍ ବେଣ୍ କିଜି ମାଚାନ୍, ଇନେସ୍କି ହେୱାନ୍ ଈଶ୍ୱର ମେହି ମାଚାନ୍।ହେୱାନ୍ ହିକ୍ଷା ହିଜିମାଚାନ୍ ଯେ ଇନେସ୍ ଏପେଙ୍ଗ୍ ଜାର୍ତିଙ୍ଗ୍ ଲାଡ୍ କିନାଦେରା ହେଲେକେ ଜେକନିକାରିଙ୍ଗ୍ ପା ଲାଡ୍ କିନି ଦର୍କାର୍।
ହେୱାନ୍ ଆରେ ପା ହିକ୍ଷା ହିତାନ୍ ଯେ ଏପେଙ୍ଗ୍ ଇମ୍ଣି ବିଷୟତିଙ୍ଗ୍ କି ମି ଦନ୍ ସମ୍ଫତିତିଙ୍ଗ୍ ଲାଡ୍ କିନି ବାଦୁଲ୍ ଈଶ୍ୱରତିଙ୍ଗ୍ ଆଦିକ୍ ଲାଡ୍ କିଦେଙ୍ଗ୍ ଆନାତ୍।
ଯୀଶୁ ୱେଚ୍ଚାନ୍ ଯେ ଜଗତ୍ତାକେ ମାନି ଇମ୍ଣି ବେସି ମିଲ୍ୟକାଟି ବିଷୟ ବାଦୁଲ୍ ଈଶ୍ୱର ସାସନ୍କିନି ରାଜି ଆଦିକ୍ ମୁଲ୍ୟକାଟାକା।ଇମ୍ଣି ମାନାୟ୍ କାଜିଙ୍ଗ୍ ୱିଜୁତାଙ୍ଗ୍ ମୁଲ୍ୟନି ବିଷୟ ଆନାତା ଯେ ହେୱାନ୍ ଈଶ୍ୱର ସାସନ୍ କିନି ରାଜିତାକେ ହାଞ୍ଜେଙ୍ଗ୍ ଆଡ୍ନାନ୍।ଈଶ୍ୱର ସାସନ୍ କିନି ରାଜିତାକେ ହାନି କାଜିଙ୍ଗ୍, ଏନେଙ୍ଗ୍ ହାତ୍ପା ନି ପାପ୍ତାଙ୍ଗ୍ ଉଦାର୍ ପାୟାଆଦେଙ୍ଗ୍ ଆନାତ୍।
ଯୀଶୁ ୱେଚ୍ଚାନ୍, “କେତେକ୍ ମାନାୟ୍ ହେୱାନିଙ୍ଗ୍ ଆସ୍ତି ଉଦାର୍ ପାୟାଆନାର୍, ମାତର୍ ଜେକନିକାର୍ ଆହୁର୍।” ହେୱାନ୍ ୱେଚ୍ଚାନ୍, “କେତେକ୍ ମାନାୟ୍ ହାର୍ ମେଦ୍ନି ଲେକେ। ହେୱାର୍ ଯୀଶୁତି ହାର୍ଦିକାବୁର୍ ୱେନ୍ଞ୍ଜି ଉଦାର୍ ପାୟାଆନାର୍।” ଜେକନିକାର୍ ହାଜି ଲାଗାୟ୍ ମାନି ର ରେଚ୍କି ମେଦ୍ନି ଲେକେ, ଇମେତାକେ ଈଶ୍ୱର କାତାନି ମାଞ୍ଜି ହଣ୍ଡେଙ୍ଗ୍ ଆଡୁତ୍ ଆରେ ତାସ୍ କାଜିଙ୍ଗ୍ ପାଡ଼୍ ଉବାଜା ଆଉତ୍। ଇମ୍ଣି ମାନାୟାର୍ ଯୀଶୁତି ହାର୍ଦିକାବୁର୍ତିଙ୍ଗ୍ ମାନି କିଉର୍ ହେୱାର୍ ତା ସାସନ୍ କିନି ରାଜିତାକେ ହଣ୍ଡେଙ୍ଗ୍ ଆଡୁର୍।
ଯୀଶୁ ହିକ୍ଷା ହିଜି ମାଚାନ୍ ଯେ ଈଶ୍ୱର ପାପି ମାନାୟାରିଙ୍ଗ୍ ଆଦିକ୍ ଲାଡ୍ କିନାନ୍। ହେୱାନ୍ ହେୱାରିଙ୍ଗ୍ କେମା କିଜି ତା ହିମ୍ଣା କିଦେଙ୍ଗ୍ ଇଚା କିନାନ୍।
ଯୀଶୁ ମାଙ୍ଗେଙ୍ଗ୍ ଆରେ ପା ୱେଚ୍ଚାତାନ୍ ଯେ, ଈଶ୍ୱର ପାପ୍ତିଙ୍ଗ୍ ଗିଣ୍ କିନାନ୍। ଏଚେପାଦ୍ନା ଆଦମ ଆରେ ହବା ପାପ୍ କିତାର୍, ହେଦାଙ୍ଗ୍ ହେୱାର୍ ୱିଜୁ ଲାତ୍ରାତିଙ୍ଗ୍ ବିଚା ଆତାତ୍। ଇଦାଙ୍ଗ୍ନି ପାଡ଼୍ ଲେକେ, ଜଗତ୍ତାକେ ମାନି ୱିଜୁ ପାପ୍ କିନାର୍ ଆରେ ଈଶ୍ୱରତାଙ୍ଗ୍ ଜେକ ଆନାର୍। ଇନେସ୍କି ୱିଜାକାର୍ ଈଶ୍ୱରତିଙ୍ଗ୍ ଶତ୍ରୁ ଆତାର୍ନା।
ମାତର୍ ଈଶ୍ୱର ଜଗତ୍ତାକେ ମାନି ୱିଜାକାରିଙ୍ଗ୍ ଇଲେକେ ଲାଡ୍ କିତାନ୍ ଯେ ହେୱାନ୍ ତା ରକାନ୍ ଇଞ୍ଜି ମାଜିଙ୍ଗ୍ ହିତ୍ତାନ୍ ଇନେସ୍କି ଇନେର୍ ହେୱାନ୍ତାକେ ପାର୍ତି କିନାନ୍, ହେୱାନ୍ ତା ପାପ୍ନି ଦଣ୍ଡ୍ ପାୟାଆୱାଦାଙ୍ଗ୍ ଈଶ୍ୱର ହୁଦାଙ୍ଗ୍ ୱିଜ୍ୱିଦିନ୍ ପାତେକ୍ ବାହା କିନାନ୍।
ମି ପାପ୍ କାଜିଙ୍ଗ୍ ଏପେଙ୍ଗ୍ ଦସିଆଜି ହାଃନି ଯଗ୍ୟ। ଈଶ୍ୱର ମି ଜପି ରିସା ଆଦ୍ନି କାତା, ମାତର୍ ହେୱାନ୍ ମି ଜପି ହେ ରିସା ଆୱାଦାଙ୍ଗ୍ ଯୀଶୁ ଜପି ମି ରିସାତିଙ୍ଗ୍ ହିତାନ୍। ଏଚେପାଦ୍ନା କୃଶକାଟ୍ତାକେ ଯୀଶୁ ହାଃତାନ୍, ହେପାଦ୍ନା ମି ଦଣ୍ଡ୍ ହେୱାନ୍ ପାୟାଆତାନ୍।
ଯୀଶୁ ଇନେୱାଡ଼ାଙ୍ଗ୍ ପା ପାପ୍ କିୱାତାନ୍ନା, ମାତର୍ ମିଦାଙ୍ଗ୍ ଆରେ ଜଗତ୍ତାକେ ମାନି ୱିଜାକାର୍ ପାପ୍ତିଙ୍ଗ୍ ପିଣ୍ଜି ଅନି କାଜିଙ୍ଗ୍ ର ଟିକ୍ଟାକ୍ ବଲି ପୁଜା ଲେକେ ଦଣ୍ଡ୍ ପାୟାଆଦେଙ୍ଗ୍ ଇଚା କିତାନ୍। ଇନେସ୍କି ଯୀଶୁ ଜାର୍ତିଙ୍ଗ୍- ଜାର୍ ବଲି ପୁଜା ଆତାନ୍, ହେଦାଙ୍ଗ୍ କାଜିଙ୍ଗ୍ ଈଶ୍ୱର ଇମ୍ଣି ପାପ୍, ଇଲେକେକି ୱିଜୁତାଙ୍ଗ୍ ବୟଙ୍କାର୍ ପାପ୍ ପା କେମା କିଦେଙ୍ଗ୍ ଆଡ୍ନାନ୍।
ହାର୍ଦି କାମାୟ୍ ମିଙ୍ଗେଙ୍ଗ୍ ଉଦାର୍ କିଦ୍ଦେଙ୍ଗ୍ ଆଡ଼୍ଦୁତ୍। ଈଶ୍ୱର ହୁଦାଙ୍ଗ୍ ମାହାଆଜି ମାନି କାଜିଙ୍ଗ୍ ଇଲେକେ ଇନା ବିଷୟ ହିଲେତ୍। ମାତର୍ ଯୀଶୁ ନେ ମି ପାପ୍ତିଙ୍ଗ୍ ନୁଜ୍ଦେଙ୍ଗ୍ ଆଡ୍ନାନ୍। ଯୀଶୁ ନେ ଈଶ୍ୱର ମେହି ଆରେ ମି ବାଦୁଲ୍ତ ଯୀଶୁ କୃଶକାଟ୍ତାକେ ହାଃତାନ୍ ଆରେ ଈଶ୍ୱର ହେୱାନିଙ୍ଗ୍ ଜିବୁନ୍ କିଜି ନକ୍ତାନ୍ ଇ ବେଣ୍ତିଙ୍ଗ୍ ଏପେଙ୍ଗ୍ ସତ୍ରେ ପାର୍ତି କିଦେଙ୍ଗ୍ ଆନାତ୍।
ଇମ୍ଣି ମାନାୟ୍ ଯୀଶୁତାକେ ପାର୍ତି କିନାନ୍ ଆରେ ମା ମାପୃ ଇଞ୍ଜି ହେୱାନିଙ୍ଗ୍ ମାନି କିନାନ୍, ଈଶ୍ୱର ହେ ୱିଜାକାରିଙ୍ଗ୍ ଉଦାର୍ କିନାନ୍। ମାତର୍ ହେୱାନ୍ତାକେ ଇନେର୍ ପାର୍ତି କିଉନ୍ ହେୱାନ୍ ହେୱାନିଙ୍ଗ୍ ଉଦାର୍ କିଉନ୍। ଏପେଙ୍ଗ୍ ହାଉକାର୍ କି ଗରିବ୍, ଆଣ୍ଡ୍ରା କି କଗ୍ଲେ, ବୁଡ଼ା କି ବେଣ୍ଡିଆ ଇନେର୍ ଆତିସ୍ ପା ଯୀଶୁତାକେ ପାର୍ତି କିନାର୍, ଆରେ ହେୱାନ୍ ଇଚା କିନାନା ଯେ ୱିଜାକାର୍ ହେୱାନ୍ତାକେ ପାର୍ତି କିୟେର୍। ଈଶ୍ୱର ନିଙ୍ଗେଙ୍ଗ୍ ଲାଡ୍ କିଦ୍ନାନ୍ ଆରେ ଏନେଙ୍ଗ୍ ଇନେସ୍ ଯୀଶୁତାକେ ପାର୍ତି କିନାୟ୍ ହେଦାଙ୍ଗ୍ ଇଚା କିନାନ୍।
ଯୀଶୁତାକେ ପାର୍ତି କିଦେଙ୍ଗ୍ ଆରେ ଡୁବନ୍ ଅଦେଙ୍ଗ୍ ମିଙ୍ଗେଙ୍ଗ୍ କୁକ୍ତାନାନ୍, ଆରେହେୱାନ୍ ମି ହୁଦାଙ୍ଗ୍ ସାଙ୍ଗ ଆଜି ମାଞ୍ଜେଙ୍ଗ୍ ଇଚା କିନାନା। ଲାଗିଙ୍ଗ୍ ଯୀଶୁଙ୍ଗ୍ ଖ୍ରୀଷ୍ଟ ଆରେ ଈଶ୍ୱର ହିମ୍ଣା ଇଞ୍ଜି ପାର୍ତି କିନାଦେରା କି? ଏପେଙ୍ଗ୍ ର ପାପି ଆରେ ଈଶ୍ୱରତାଙ୍ଗ୍ ମି ପାପ୍ କାଜିଙ୍ଗ୍ ଦଣ୍ଡ୍ ହିଦ୍ନାନ୍ ଇଞ୍ଜି ଏପେଙ୍ଗ୍ ପାର୍ତି କିନାଦେରା କି? ମି ପାପ୍ତିଙ୍ଗ୍ ପିଣ୍ଜି ଅଜେଙ୍ଗ୍ ଯୀଶୁ କୃଶକାଟ୍ତାକେ ହାଃତାନ୍ନା ଇଞ୍ଜି ଏପେଙ୍ଗ୍ ପାର୍ତି କିନାଦେରା କି?
ଯୀଶୁ ମା କାଜିଙ୍ଗ୍ ଇନାକ କିତ୍ତାନ୍ନା ହେଦାଙ୍ଗ୍ତିଙ୍ଗ୍ ଏପେଙ୍ଗ୍ ପାର୍ତି କିତିସ୍, ଏପେଙ୍ଗ୍ ରକାଦେର୍ ଖ୍ରୀଷ୍ଟାନ୍ ମାନାୟ୍। ଈଶ୍ୱର ମିଙ୍ଗେଙ୍ଗ୍ ଶୟତାନନି ମାଜ୍ଗା ରାଜିତାଙ୍ଗ୍ ହପ୍ତାତାନ୍ନା ଆରେ ଈଶ୍ୱର ରାଜିନି ଅଜଡ଼୍ତାକେ ରସ୍ତାତାନ୍ନା।ଈଶ୍ୱର ମି ଆଗେନି ପାପ୍ କାମାୟ୍ନି ହାଜିୱିଜୁ ଅତାନ୍ନା ଆରେ ହେୱାନ୍ ମିଙ୍ଗେଙ୍ଗ୍ ପୁନି ଆରେ ଦାର୍ମି କାମାୟ୍ନି ହାଜି ହିତ୍ତାନ୍ନା।
ଯଦି ଏନେଙ୍ଗ୍ ରକାୟ୍ ଖ୍ରୀଷ୍ଟାନ୍ ମାନାୟ୍ତି, ଲାଗିଙ୍ଗ୍ ଯୀଶୁ ଇନାକା କିତ୍ତାନ୍ନା ହେଦାଙ୍ଗ୍ କାଜିଙ୍ଗ୍ ଈଶ୍ୱର ନି ପାପ୍ ୱିଜୁ କେମା କିତ୍ତାନ୍ନା।ନଙ୍ଗୟ୍ ଏନେଙ୍ଗ୍ ଈଶ୍ୱରତି ରକାୟ୍ ଶତ୍ରୁ ଆୱାଦାଙ୍ଗ୍ ଆରେ ତା ସାଙ୍ଗହି ଆନି କାଜିଙ୍ଗ୍ ଈଶ୍ୱର ଚିନ୍ତା କିନାନ୍।
ଏନେଙ୍ଗ୍ ଯଦି ଈଶ୍ୱର ସାଙ୍ଗହି ଆରେ ମାପୃ ଯୀଶୁଙ୍ଗ୍ ହେବା କିନାକାୟ୍, ଲାଗିଙ୍ଗ୍ ଯୀଶୁ ଇନାକା ହିକ୍ଷା ହିଦ୍ନାନ୍ ହେଦାଙ୍ଗ୍ କିନି କାଜିଙ୍ଗ୍ ଏନେଙ୍ଗ୍ ଇଚା କିନାୟ୍। ଯଦି ଏନେଙ୍ଗ୍ ରକାୟ୍ ଖ୍ରୀଷ୍ଟାନ୍ ମାନାୟ୍ତି, ଆତିସ୍ପା ଏନେଙ୍ଗ୍ ପାପ୍ କିନି କାଜିଙ୍ଗ୍ ଇଚା କିନାୟ୍। ମାତର୍ ଈଶ୍ୱର ବିସ୍ବସ୍ତ ଆରେ ହେୱାନ୍ ୱେଚ୍ଚାନାନ୍ ଯେ ଯଦି ଏନେଙ୍ଗ୍ ନି ପାପ୍ୱିଜୁ ମାନି କିନାୟ୍, ହେୱାନ୍ ନିଙ୍ଗେଙ୍ଗ୍ କେମା ହିଦ୍ନାନ୍। ପାପ୍ ବିରଦ୍ତାକେ ଯୁଜ୍ କିନି କାଜିଙ୍ଗ୍ ହେୱାନ୍ ନିଙ୍ଗେଙ୍ଗ୍ ଶାକ୍ତି ଜଗାୟ୍ କିଦ୍ନାନ୍।
ଏପେଙ୍ଗ୍ ଇନେସ୍ ପାର୍ତାନା କିନାଦେର୍, ତା କାତା ପଡ଼ି କିନାଦେର୍, ଜେକନି ଖ୍ରୀଷ୍ଟାନାର୍ ହୁଦାଙ୍ଗ୍ ହେୱାନିଙ୍ଗ୍ ହେବା କିନାଦେର୍ ଆରେ ହେୱାନ୍ ମି କାଜିଙ୍ଗ୍ ଇନା-ଇନାକା କିତ୍ତାନ୍ନା ହେଦାଙ୍ଗ୍ ଜେକନିକାରିଙ୍ଗ୍ ୱେଚ୍ନାଦେର୍, ଇଦାଙ୍ଗ୍ ଈଶ୍ୱର ମିଙ୍ଗେଙ୍ଗ୍ ୱେଚ୍ଚାନାନ୍। ଇ ୱିଜୁ ମିଙ୍ଗେଙ୍ଗ୍ ହେୱାନ୍ ହୁଦାଙ୍ଗ୍ ର ବେସି ରୱାଣ୍ ରହ୍ନି କାଜିଙ୍ଗ୍ ସାଇଜ କିଦ୍ନାନ୍।
ବାଇବଲ୍ନି ର କାତା: ରୋମୀୟ ୩: ୨୧- ୨୬; ୫: ୧- ୧୧; ଯୋହନ ୩: ୧୬; ମାର୍କ ୧୬: ୧୬; କଲସିୟ ୧: ୧୩- ୧୪; ୨କରନ୍ଥୀୟ ୫: ୧୭- ୨୧; ୧ଯୋହନ ୧: ୫- ୧୦
Free to use, adapt, and share under an open license (CC BY-SA 4.0).