48. ୪୮. ଈଶ୍ୱର ଏଚେପାଦ୍ନା ପୁର୍ତିତିଙ୍ଗ୍ ରସ୍ତାନ୍, ହେପାଦ୍ନା ୱିଜୁ ବିଷୟ ପୁରା ଆଜି ମାଚାତ୍।
ହେପାଦ୍ନା ଇନା ପାପ୍ ପା ହିଲାତାତ୍।ଆଦମ ଆରେ ହବା ଜାର୍-ଜାର୍ ଲାଡ୍ ଜିକି ମାଚାର୍ ଆରେ ହେୱାର୍ ଈଶ୍ୱରତିଙ୍ଗ୍ ଲାଡ୍ କିଜି ମାଚାନ୍।ହେପାଦ୍ନା ଇନା ବେମାର୍ କି ହାଃନାକା ହିଲାତାତ୍।ପୁର୍ତିନି ମାନାୟାର୍ ପା ଇଲେକେ ନେ ଆୟେର୍ ଇଞ୍ଜି ଈଶ୍ୱର ଇଚାକିଜି ମାଚାନ୍।ହବାଙ୍ଗ୍ ଟକାୟ୍ କିନି କାଜିଙ୍ଗ୍ ଶୟତାନ ର ରାଚ୍ତାଙ୍ଗ୍ ବେଣ୍ ୱେଚ୍ଚାନ୍।
ତାପାଚେ ହବା ଆରେ ଆଦମ ଈଶ୍ୱର ବିରଦ୍ତାକେ ପାପ୍ କିତାର୍।ଇନେସ୍କି ହେୱାର୍ ପାପ୍ କିତାର୍, ହେଦାଙ୍ଗ୍ କାଜିଙ୍ଗ୍ ପୁର୍ତିତାକେ ମାନି ୱିଜାକାର୍ ବେମାର୍ ଆନାର୍ ଆରେ ୱିଜାକାର୍ ହାଃନାର୍।ଇନେସ୍କି ଆଦମ ଆରେ ହବା ପାପ୍ କିଜି ମାଚାର୍, ଇଦାଙ୍ଗ୍ତାଙ୍ଗ୍ ଆଦିକ୍ ବୟଙ୍କାର୍ ବିଷୟ ଗଟାଆତାତ୍।
ହେୱାର୍ ଈଶ୍ୱରତିଙ୍ଗ୍ ଶତ୍ରୁ ଆତାର୍।ଇ ପାଡ଼୍ ଲେକେ, ହେ ଦିନ୍ତାଙ୍ଗ୍ ଜନମ୍ ଆନି ୱିଜାକାର୍ ମାନାୟ୍ ପାପ୍ ବ୍ୟବହାର୍ତାଙ୍ଗ୍ ଜନମ୍ ଆନାର୍ ଆରେ ଈଶ୍ୱରତିଙ୍ଗ୍ ଶତ୍ରୁ ଆନାର୍।ଈଶ୍ୱର ଆରେ ମାନାୟ୍ ବିତ୍ରେ ମାନି ରୱାଣ୍ ପାପ୍ କାଜିଙ୍ଗ୍ ବାଙ୍ଗାଆଜି ମାଚାତ୍।ମାତର୍ ହେ ରୱାଣ୍ତିଙ୍ଗ୍ ଆରେରଗ ରସ୍ତେଙ୍ଗ୍ ଈଶ୍ୱର ର ଉପାୟ୍ କିଜି ମାଚାନ୍।ଈଶ୍ୱର ପାର୍ମାଣ୍ କିଜି ୱେଚ୍ଚି ମାଚାନ୍ ଯେ ହବା ଲାତ୍ରାତାଙ୍ଗ୍ ଜନମ୍ ଆତାକାନ୍ ଶୟତାନନି କାପ୍ଡ଼ାତିଙ୍ଗ୍ ଗୁଣ୍ଡା କିନାନ୍, ଆରେ ଶୟତାନ ତା ମେଣ୍ଡାକାଙ୍ଗ୍ ଗାଉ କିନାନ୍।
ଇଦାଙ୍ଗ୍ନି ଅର୍ତ ଆନାତା ଶୟତାନ ଖ୍ରୀଷ୍ଟଙ୍ଗ୍ ମାର୍ନେ ଅହ୍ନାନ୍, ମାତର୍ ଈଶ୍ୱର ହେୱାନିଙ୍ଗ୍ ହାଃତାକାର୍ତାଙ୍ଗ୍ ଆରେରଗ ଜିବୁନ୍ କିଜି ନିକ୍ନାନ୍, ଆରେ ତାପାଚେ ଖ୍ରୀଷ୍ଟ ୱିଜ୍ୱିଦିନ୍ ପାତେକ୍ ଶୟତାନନି ଶାକ୍ତିତିଙ୍ଗ୍ ଗୁଣ୍ଡା କିନାନ୍। କେତେକ୍ ବାର୍ହୁ ପାଚେ, ଈଶ୍ୱର ଚଚ୍ଚାନ୍ ଯେ ଯୀଶୁ ନେ ଆନାନା ହେ ଖ୍ରୀଷ୍ଟ।ଈଶ୍ୱର ଏଚେପାଦ୍ନା ର ବନ୍ୟାତାଙ୍ଗ୍ ୱିଜୁ ପୁର୍ତିତିଙ୍ଗ୍ ନଷ୍ଟ କିତାନ୍, ହେପାଦ୍ନା ଇମ୍ଣାକାର୍ ହେୱାନ୍ତାକେ ପାର୍ତି କିତାର୍ ହେୱାରିଙ୍ଗ୍ ରକ୍ଷା କାଜିଙ୍ଗ୍ ରଞ୍ଜାଙ୍ଗ୍ ଜାଜ୍ ଜଗାୟ୍ କିତାନ୍।
ଟିକ୍ ହେଲେକେ ୱିଜୁ ମାନାୟ୍ ହେୱାର୍ ଜାର୍-ଜାର୍ ପାପ୍ କାଜିଙ୍ଗ୍ ନଷ୍ଟ ଆଦେଙ୍ଗ୍ ଯଗ୍ୟ ମାଚାର୍, ମାତର୍ ଇମ୍ଣାକାର୍ ହେୱାନ୍ତାକେ ପାର୍ତିକିନାର୍ ହେୱାରିଙ୍ଗ୍ ରକ୍ଷା କିନି କାଜିଙ୍ଗ୍ ଈଶ୍ୱର ଯୀଶୁଙ୍ଗ୍ ଜଗାୟ୍ କିତାନ୍।ଶହେ-ଶହେ ବାର୍ହୁ ଆସ୍ତି ମାନାୟାର୍ ହେୱାର୍ ପାପ୍ କାଜିଙ୍ଗ୍ ଇମ୍ଣି ଦଣ୍ଡ୍ ପାୟାଆଦେଙ୍ଗ୍ ଯଗ୍ୟ ମାଚାର୍ ହେଦାଙ୍ଗ୍ ଚଚ୍ନି କାଜିଙ୍ଗ୍ ଈଶ୍ୱର ହେବାକିନି ମୁଡ଼୍ଦି ପୁଜାରିର୍ ୱିଜୁଦିନ୍ ଈଶ୍ୱର ଲାଗାୟ୍ ବଲି ପୁଜା କିଜି ମାଚାର୍।
ମାତର୍ ହେ ୱିଜୁ ବଲି ପୁଜା ହେୱାର୍ ପାପ୍ତିଙ୍ଗ୍ ଦେହା କିଦେଙ୍ଗ୍ ଆଡ୍ୱାଦାଙ୍ଗ୍ ମାଚାତ୍।ଯୀଶୁ ଆନାନା ଗାଜା ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରି। ଜେକନି ପୁଜାରିର୍ ଲେକେ ଆକାୟ୍, ଇନାକା ଯୀଶୁ କିଜି ଚଚ୍ଚାନ୍, ମାତର୍ ରଞ୍ଜାଙ୍ଗ୍ ବଲି ପୁଜା ଲେକେ ହେୱାନ୍ ଜାର୍ତିଙ୍ଗ୍ ହିୟାଆତାନ୍ ହେ ବଲି ପୁଜାତାଙ୍ଗ୍ ଜଗତ୍ତାକେ ମାନି ୱିଜାକାରିଙ୍ଗ୍ ପାପ୍ତାଙ୍ଗ୍ ଦେହା କିନାତ୍। ଯୀଶୁ ଟିକ୍ ଈଶ୍ୱର ହେବାକିନି ମୁଡ଼୍ଦି ପୁଜାରି ଇନେସ୍କି ଜଗତ୍ତାକେ ମାନି ଇମ୍ଣି ମାନାୟ୍ ଇମ୍ଣି ସମୟତ କିଜିମାଚି ୱିଜୁ ପାପ୍ନି ଦଣ୍ଡ୍ତିଙ୍ଗ୍ ହେୱାନ୍ ତା ଜପି ଅତାନ୍।
ଈଶ୍ୱର ଅବ୍ରାହାମତିଙ୍ଗ୍ ୱେଚ୍ଚାନ୍, “ପୁର୍ତିତାକେ ମାନି ୱିଜୁ ମାନାୟାର୍ ନି କାଜିଙ୍ଗ୍ ଆଶ୍ରିବାଦ୍ ପାୟାଆନାର୍।” ଯୀଶୁ ରକାନ୍ ଇ ଅବ୍ରାହାମ ଲାତ୍ରା ମାଚାନ୍। ୱିଜୁ ମାନାୟାର୍ ହେୱାନ୍ତାଙ୍ଗ୍ ଆଶ୍ରିବାଦ ପାୟାଆନାର୍, ଇନେସ୍କି ଯୀଶୁ ତର୍ଦାଙ୍ଗ୍ ପାର୍ତିକିନି ୱିଜାକାର୍ ହେୱାର୍ ପାପ୍ତାଙ୍ଗ୍ ଉଦାର୍ ପାୟାଆତାର୍ନା, ଆରେ ଅବ୍ରାହାମନି ଲାତ୍ରା ଇଞ୍ଜି ଗାଣା କିନାନ୍।
ତା ମାଜି ଇସାହାକତିଙ୍ଗ୍ ବଲି ପୁଜା ହିନି କାଜିଙ୍ଗ୍ ଏଚେପାଦ୍ନା ଈଶ୍ୱର ଅବ୍ରାହାମତିଙ୍ଗ୍ ୱେଚ୍ଚାନ୍, ହେପାଦ୍ନା ତା ମାଜି ଇସାହାକ ବାଦୁଲ୍ତାକେ ବଲି ପୁଜା ଆନି କାଜିଙ୍ଗ୍ ର ମଣ୍ଢା ଜଗାୟ୍ କିତାନ୍। ଆସେଙ୍ଗ୍ ୱିଜାକାସ୍ ମା ପାପ୍ କାଜିଙ୍ଗ୍ ହାଃଦେଙ୍ଗ୍ ଆନାତ୍। ମାତର୍ ଈଶ୍ୱର ତା ମେଣ୍ଢା ଯୀଶୁଙ୍ଗ୍ ମା ବାହାତାକେ ର ବଲି ପୁଜାକିତି ଲେକେ ହାଃଦେଙ୍ଗ୍ ହିତ୍ତାନ୍। ଈଶ୍ୱର ଏଚେପାଦ୍ନା ମିଶର ଦେସ୍ତତାକେ ହାରିହାରା ମାର୍ଡି ପକ୍ତାନ୍, ହେୱାନ୍ ୱିଜୁ ଇସ୍ରାଏଲନି ପରିବାର୍ତିଙ୍ଗ୍ ରଞ୍ଜାଙ୍ଗ୍-ରଞ୍ଜାଙ୍ଗ୍ ଟିକ୍ଟାକ୍ ମେଣ୍ଢା ଅସ୍ତି ହେୱାର୍ ଇଲ୍ନି ଦୁୱାର୍ ବାନ୍ଦାକାଙ୍ଗ୍ ହେ ମେଣ୍ଢାନି ନେତେର୍ କାଜ୍ଦେଙ୍ଗ୍ ୱେଚ୍ଚାନ୍।
ଈଶ୍ୱର ଏଚେପାଦ୍ନା ନେତେର୍ ହୁଡ଼୍ତାନ୍, ହେୱାନ୍ ହେୱାର୍ ଇଲ୍ତିଙ୍ଗ୍ ପିସ୍ତାନ୍ ଆରେ ହେୱାର୍ ପାର୍ତୁମ୍ ଜନମ୍ ଆତି ହିମ୍ଣାକାଙ୍ଗ୍ ଅହ୍ୱାତାନ୍। ଇ ଗଟ୍ନାତିଙ୍ଗ୍ ନିସ୍ତାର ପାର୍ବୁ ଇଞ୍ଜି ୱେଚ୍ନାର୍। ଯୀଶୁ ଆନାନା ମା ନିସ୍ତାର ପାର୍ବୁନି ମେଣ୍ଢା ଲେକେ।
ହେୱାନ୍ ଟିକ୍ଟାକ୍ ଆରେ ପାପ୍ ହିଲାକାନ୍ ମାଚାନ୍ ଆରେ ନିସ୍ତାର ପାର୍ବୁ ତିନିହିଙ୍ଗ୍ ମାନାୟାର୍ ହେୱାନିଙ୍ଗ୍ ଅସ୍ତି ମାଚାର୍।ଇମ୍ଣାକାନ୍ ଯୀଶୁତାକେ ପାର୍ତି କିନାନ୍, ତା ପାପ୍ କାଜିଙ୍ଗ୍ ଯୀଶୁ ତା ନେତେର୍ ହିନାନ୍, ଲାଗିଙ୍ଗ୍ ଈଶ୍ୱର ହେ ମାନାୟ୍ତିଙ୍ଗ୍ ପିସ୍ତିହିତି ଲେକେ ଆନାତ୍ ଆରେ ହେୱାନିଙ୍ଗ୍ ଦଣ୍ଡ୍ ହିଉନ୍।ଈଶ୍ୱର ଇସ୍ରାଏଲ ଦେସ୍ନି ମାନାୟାର୍ ହୁଦାଙ୍ଗ୍ ର ନିୟମ୍ କିତାନ୍, ଇମ୍ଣାକାର୍ ତା ବାଚିକିତି ମାନାୟ୍ ମାଚାର୍।
ମାତର୍ ଈଶ୍ୱର ନଙ୍ଗୟ୍ ର ପୁନି ନିୟମ୍ କିତାନ୍ନା ହେଦାଙ୍ଗ୍ ୱିଜାକାରିଙ୍ଗ୍ ଦର୍କାର୍ ଆନାତ୍।ଇ ପୁନି ନିୟମ୍ତାଙ୍ଗ୍ ଇମ୍ଣି ମାନାୟାର୍ ବିତ୍ରେତାଙ୍ଗ୍ ଇମ୍ଣାକାନ୍ ଯୀଶୁଙ୍ଗ୍ ପାର୍ତିକିତି କାଜିଙ୍ଗ୍ ଈଶ୍ୱର ମାନାୟାରିଙ୍ଗ୍ ର ବାଗ୍ ଲେକେ ଆଦେଙ୍ଗ୍ ଆଡ୍ନାର୍।ମୋଶା ରକାନ୍ ଗାଜା ଈଶ୍ୱରତାଙ୍ଗ୍ ୱେଚି ବେଣ୍ତିଙ୍ଗ୍ ୱେଚ୍ନି ମାନାୟ୍ ମାଚାନ୍ ହେୱାନ୍ ଈଶ୍ୱର କାତା ଶୁଣାୟ୍ କିଜି ମାଚାନ୍।
ମାତର୍ ଯୀଶୁ ୱିଜୁ ଈଶ୍ୱରତାଙ୍ଗ୍ ୱେଚି ବେଣ୍ତିଙ୍ଗ୍ ୱେଚ୍ନି ମାନାୟାର୍ ବିତ୍ରେତାଙ୍ଗ୍ ଗାଜାକାନ୍ ମାଚାନ୍। ହେୱାନ୍ ନେ ଈଶ୍ୱର, ଲାଗିଙ୍ଗ୍ ହେୱାନ୍ ଇନା-ଇନାକା କିଜି ମାଚାନ୍ ଆରେ ହେଦାଙ୍ଗ୍ ଈଶ୍ୱର କାମାୟ୍ ଆରେ ଈଶ୍ୱର କାତା ମାଚାତ୍। ହେଦାଙ୍ଗ୍ କାଜିଙ୍ଗ୍ ଯୀଶୁଙ୍ଗ୍ ଈଶ୍ୱର କାତା ଇଞ୍ଜି ୱେଚ୍ନାର୍।ଈଶ୍ୱର ରାଜା ଦାଉଦତିଙ୍ଗ୍ ପାର୍ମାଣ୍ କିଜି ୱେଚ୍ଚାନ୍ ଯେ ତା ଲାତ୍ରା ବିତ୍ରେତାଙ୍ଗ୍ ରକାନ୍ ଈଶ୍ୱରନି ମାନାୟାର୍ ଜପି ୱିଜ୍ୱିଦିନ୍ ପାତେକ୍ ସାସନ୍ କିନାନ୍।
ଇନେସ୍କି ଯୀଶୁ ଈଶ୍ୱର ମେହି ଆରେ ଖ୍ରୀଷ୍ଟ ମାଚାନ୍, ହେୱାନ୍ ଦାଉଦ ରାଜା ଲାତ୍ରା ମାଚାନ୍ ହେୱାନ୍ ୱିଜ୍ୱିଦିନ୍ ପାତେକ୍ ସାସନ୍ କିନାନ୍। ଦାଉଦ ଇସ୍ରାଏଲନି ରାଜା ମାଚାନ୍, ମାତର୍ ଯୀଶୁ ୱିଜୁ ପୁର୍ତିନି ରାଜା।
ହେୱାନ୍ ଆରେରଗ ୱାନାନ୍ ଆରେ ନ୍ୟାୟ୍ ଆରେ ଶାନ୍ତିତାଙ୍ଗ୍ ୱିଜ୍ୱିଦିନ୍ ପାତେକ୍ ସାସନ୍ କିନାନ୍।
ବାଇବଲ୍ନି ର କାତା: ଆଦି ୧- ୩, ୬, ୧୪, ୨୨; ଯାତ୍ରା ୧୨, ୨୦; ୨ଶାମୁୟେଲ ୭; ଏବ୍ରୀ ୩, ୪: ୧୪- ୫: ୧୦; ୭: ୧- ୮: ୧୩; ୯: ୧୧- ୧୦: ୧୮; ପ୍ରକାଶିତ ୨୧୪୯;
Free to use, adapt, and share under an open license (CC BY-SA 4.0).