10. Galji Rulingan

Mojes do Aron Paron amangban iyleji. Aninji gamleji, “ Israel a Kitungan Kan ambrij gamte, manan mandra Henji umrengba”, Paro aninji a bernan addaludad. Issraelanji ado’ng anuran atiyten apanardu, osantan aninji adong lagin baran adlulmnaetenji.

Mandranji adong anurnan tiyben asan Paro a sale, anten asan Kitungan er sanayedage 10 runingan, Misor desan appaiyeten. Kan a rulinganji batte Kitungan Paron adong apsuijeten do Paron bar Misor lingan a kudub kitunganji saring ateng ranaptidam daku.

Kitungan Nilo alon a d’aa miham lingan bandaeten, bindo Paro kan ayaman sikkoijja Israelanji adong adnumrengad.

Kitungan kuddub Misor disa lingan kandudanji appaiyeten. Kandudanji sabngaijben asan Mojes adong Paro labyu garbereten. Bindo kuddub kandudanji kahidle atiki, Paro anin a uggaran darda aps’eten do Israelanji adong adnomdad.

Anten asan Kitungan Siahbudan a rulingan appaiyaiten. Ante atiki Anin bartangbudan arulingan appaiyaiten. Paro Mojes do Aron adong gudingeten bar gameten; bogad aninji rulingan kuddub a kaddabnalenjiden, anin Israel maramji adong Misor saring yerben tiyte. Antate Mojes garbereten, Kitungan bartang budanji a kuddub Misor saring dedeten. Bindo Paro anin a uggaran darda aps’eten do amandranji adong adnumrengad.

Antateki Kitungan jannolingan a Kuddub jontunji; itente Misoranji ate dakule, abasule kabhideten. Bindo Paron a uggaran darda aps’eten do Israel maramji adong adnumrengad.

Ante saring Kitungan Mojes adong Paron atimang kumaban burben asan baiheten.Angante kan ate lumeten Misor-baiji a usal lingan anasudan do gurdan batte barijdam a kanz’ngan ganijtan dele, bindo Israel maranji adong addead. Kitungan Paron a uggaran darda aps'eten do Paro Israelanji adong adnumrengad.

Ante saring Kitungan arel-gzman batte Misor lingan ateng gan-ru’ranji apsi’deten, do butente bayeran dunglenji aninji kahidleji. Paro Mojes do Aron adong gudingle bar gameten, “Hen pintun lumlai amben rapti ayerte.” Ante atiki Mojes garbereten do riangan saring arelguman kaddablen.

Bindo okij Paron pintun lumeten bar anin auggaran darda abmeeten. Anin Israelanji adong a yerben asan anuran attiad.

Anten asan Kitungan Papparan arulingan appaiyeten bar barij Misor lingan haraile. Itente a ganru’ranji arelguman batte adsi’dad ante a kudduban kan Papparanji absi’dlaji.

Ante atiki Kitungan lanungudan appaiyaiten do antate 3 dinna sikoija dakule. Kan ate dijne lunguddam dakule do Misorbaiji asi’ngdamanji umrengle adraptiadji. Bindo uante Israel maranji basuleji tedte tna’ran dakule.

Kan 9 rulzngan a delen atiki janang Paro Israel maranji adong ad-numrengad. Paron adnamdangetenan asan Kitungan aboi tanakud runingan appaiben apsele oskaineten.