12. Surda Hanagodan

Misor aumrengtenji asan Israelanji a man’oihan ateng dakule. Aninji okij boanta deandele addakunadji, do aninji sanibdaij dzsan yerteji. Israelanji itente a kuddub Misoranji adong garlejii, aninji anta-kuddub tiyleji, ednegoi do ranan bar rupan bar janatti janbanji tiyleji. Bzggarda disa maranji saring dajingte mandra Kitungan amang derrenji bar Israelanji Misor saring dunglenanji ayam aninji ampara yerreji.

Dinnan ayam lingan Kitungan aninji amukkaban aboi lanka tzrub-sunan batte aninji adong abhanale urungetenji, bar togalan ayam lingan lanka togi-sunan dele. Kitungan aninji ampara dile tordong dakuneten bar aninji hanagod linanji ayam tangor lingan abhanaetenji. Aninji ado’ng a sandungben sanaisaij dakule.

Asui ayam atiki, Paro do anin a mandranji abyar j’elenji bar Israelanji adong bar-okij aninji a boantanji deben asan itsumleji. Kitungan Paron a d’ong bar okij darda uggar abm'eten, yante gamle mandranji sattan aboidna janardi ameng Kitung antate rapte galamteji, bar galamteji do Paro bar anin a kungdaijanji saring anin jznjzn ranaptidam.

Anten asan bar-okij aninji adong boantan abmeben apsele aninji a kandungban sandung sandungle Paron do anin a boantanji yerreji. Misor sanumaranji a yertaenji ate Israel maranji angante gijleji, aninji imlenji do, Paron a sanumaranji do Sup ganingan a tarangdi lingan paludleji. Aninji karran bantongijdage deleji bar aninji uai sarrangle gule gamleji , “Anlen iten asan Misor umrenglabe? Anlen a kahibben asan yertabe.”

Mojes Israel maranji adong gameten, “Batongben kaddabba! Kitungan nami amben asan sanuten, ambenji ado’ng dangrabtaben.” Ante saring Kitungan Mojes a do’ng gameten, “ Mandranji a d’ong Sup ganingan amanengban a yerben asan opungaji.”

Ante saring Kitungan Sundang tudan Misoranji bar Israelanji a tarangdi lingan dakkueten, yante gamle Misoranji Israelanji adong rapte aggijjeji.

Kitungan Mojes anin asin terrele ganingdan bagu pallang apseben asan baiheten. Anta tiki Kitungan rangen ab-yzng-yzngle kanrabardiseng do janru’mseng da’n abdenaeten, yante gamle ganingda lingan aboi tangoran gadelle.

Israel maranji ganingan a tarangdi asarsol lingan halen yerreji bar aninji a bagu manengan da’n a kzntal a tanang dakule.

Anta atiki Kitungan tette saring taruban a lanankaban yerrben baheten yante gamle Israel maranji solen ayertenji ate Misoranji rapti aggijjeji. Misoranji aninji a kandungbanji gongben apsele gabri j’elenji.

Anten adan ganing lingan a delen atangoran sanle Israelanji a kungdunba abrijlenji, bindo Kitungan Misoranji a d’ong abkalkalleten do aninji a gardi-kuranji tabbubeten. Aninji uaile gamleji, “yerrba! Kitungan Israelanji ampara dean dele sanuten!”

Israellanji ganingan a mittal banangsan batte ardulenji atiki Kitungan Mojes a si’n bar okij terzdsinaben asan baiheten. Angante anin Kitungan abernan ambrij mannieten da’n Misoranji a lananka yerraiten do ganingan abmang ambrij abo-sarin dele. Kuddub Misor a sanumaranji ganinda lingan tabubaileji.

Israelanji angante Misoranji kahidaileji gamle gijleji, salette aninji Kitungan amang derrenji bar Mojes Kitungan abo tungmadgijmar, antate derrenji.

Israelanji janang karran anirdakan batte moihlenji, iten asan gamlenden Kitungan aninji adong boanta baran bar karahidan saring rabrabetenji! Nami aninji Kitungan adong gankelben apsele anurdage dakuleji. Isral maranji aninji anur dinnanji ayemben asan do Kitungan adong senkenraben asan ateng kenkenan kenleji iten asan gmlenden Anin aninji adong Misoranji a s’in saring rabrabetenji.

Kitungan Israelanji adong Misoranji saring yangamle dainan tietenji bar boantagodan saring yangamle rabetenji, antate ayemben asan Israelanji a d’ong anelai abduran a lumben apsele baihetenji. Aninji aboi er-balso aon murkundardan a kubtenji batte do er gabrungsalan batte anta jelun a januman batte abduran lumleji