13. Kitungan Israelanji ampara anosaij ganabrin

Kitungan israelanji a d'ong Sup ganingan appadetenji atiki, Anin bo asarsolan sanle Sinai a baruban urungaitenji. Kan ate kun a barun dakule uante Mojes a ge’m neban gijjeten. Barun a jaita mandranji aninji a tambunji tangleji.

Kitungan Mojes do Israelanji a d'ong gameten, “Amben bogad banaihen a manelenden bar anosaij-Hen a rabrablenden, etteden ambenji tanurtum bztti-Hen, buyanji aboi raja tegan do aboi marid dzsan detaben.

3 dinna a tiki, mandranji a janggarda linganji a oskailenanji a tiki, Kitungan dardumturan, sismalaijturan, umudan, bar abo surda surakompedan batte Sinai baruban ladsolen yeraiten. Sattan Mojes barun alanka yerben a d’ong anorden hangeten.

Ante saring Kitungan aninji a d’ong Anin anosaijan tietenji bar gametenji, “Hen amben a Kitungan tordong gamangtungan na, butente do’ngben Misor a tanolbadan saring urre urunglaben. Beggarda kitunganji a d'ong a gankeldong.

“Iteja anokke mukka a sabjadong orde aninji a d'ong a gankeldong. Iten asan gamlenden, Hen barabdataen a Kitungan. Ahim Hen er ganugudage a hanramdong. Layumna dinnan maridloge manneba. Beggarda garamgaman batte delenden sattan tudru dina lingan amben a kuddub baran lumba do anab gulji dinna amben apsele luluna dinnan dette, bar amben do’ng Hen ayemtih.

“Amben a uan do yangan a d'ong abpemenga. Kabhi-mardongne. A jundarda d'ong. A jumbur dong. Bukkai ber-dong. Toito sing marnam a dukrin, asi’ng lingan a janab itente anin ate antate a gijmaddong.”

Ante saring Kitungan bagu areng potta lingan kan anosaijanji idoleten bar Mojes a d'ong tiyeten. Kitungan okij beggarda beggarda anosaijanji do banaihanji manneben asan tietenji. Kitungan jzbjzble gameten manan, bogad mandranji kan a kuddub banaihan bar anosaijan mannele lumlenjiden, etteden Anin aninji a d'ong absittate, bar ranabraban tiyteji. Bogad kun a kuddub abmannelenjiden, etteden Kitungan aninji a d'ong padradte.

Kitungan bar janang Israelanji a d'ong aboi tambun apsele ansadagen abernan gadlametenji, antate aninji alumben apsele anin opungeten. Kan ate ranukkun a tambu singan ganaman dele, do tedne lingan 2 akkul singan dakule, itente bo surda danangkaban batte anabansan dele. Sattan murda buyan danangkaban a mijtal maneng adakun akkuling aganben asan anordin hangeten, iten asan gamlenden tedte Kitungan basueten.

Buteja a mandra Kitungan anosaijan meddelenden anin Kitungan apsele aboi kanubge aboi jontun a d'ong ranukkusing tambun a mukaban dakulen arangaban rapti panglaiji. Bo buyan antate kabhidle arangan a langka soiyeten. Kanuban a delen a jontun a mihaman kun a mandran a pintun ruble dakkueten, bar kun a mandra a pintun Kitungan a ganijgij lingan manaridan dele. Kitungan Mojes a buhang Aron bar anin a s’ing birindanji a d'ong buya baran a lumben asan sedaetenji.

Kuddub mandraji Kitungan aninji a d'ong a tiyten anosaijjanji a manneben apsele, sattan Kitungan a d'ong gankelben asan bar anin apsele ansadage a mandranji deben asan aro-rdzleji. Bindo aninji Kitungan anosaijan a manneben asan jzbjzb-lenanji asui ayam atiki aninji barantongijdage a pintun lumleji.

Ateng dinna sikoija Mojes Sinai a barulengan Kitungan batte arberdaleji. Mojes a daiyarna omdiata-omdiata mandranji mangaleji do er-uyubge deleji. Anten asan aninji Aron amangban ranan pangle anin a d'ong aninji apsele aboi kungdaijan sabjaben apsele opungleji.

Aron kun a ranan batte aboi aontangan anokkz kungdaijan sabjaeten. Mandranji paransakardijdage kun a kungdaijan gankelleji bar kanuban kubleji! Aninji a pintunji asan aninji alanka lingan Kitungan a bananraban karran barabdale do aninji a d'ong absi’dben asan ogaleten.

Bindo Mojes aninji apsele garbereten bar Kitungan anin a garberan amdangle bar aninji a d'ong adnabsi’dad. Mojes angante barun saring ladsole yeraiten bar kun a kungdaijan gijjeten, anin dijhe barabdale do Kitungan ayengante areng pota lingan 10 banaiberanji idoleten anin antate sidle abrardieten.

Ante saring Mojes kun a kundaijan tzdle abrardieten bar kun a rardin da’lingan sideten do kun a da’n gaben asan mandranji a d'ong tietenji. Kitungan mandranji a mang lingan rulingan appaiyaiten bar kun a rulingan batte ateng mandranji kahidleji. Mojes ayengante aparmang arengan paleten anta a panardun anin aboi tabme areng lingan 10 banaiberan idoleten.

Ante saring bar okij anin kun arengban daijeten bar Kitungan a temang lingan, mandranji a d'ong tabmabben asan garberreten. Kitungan Mojes a garberan amdangle aninji a d'ong tabmadetenji. Mojes barun saring arengan a pota lingan 10 banaiberan ampara ladsole yeraiten. Ante saring Kitungan Sinai barun saring janibjib disaban Israelanji a d'ong abanjingle urungeten.