15. Sanebdaij Desa

Atanakud lingan Israelanji sanebdaij desa Kananiya lingan a ganben bo ayaman dakule. Yar-yarmaneng radutalan batte adakulen Kananiya desa Jeriko gardan a saijben do a galamben asan Josua bagu loihle melgij maranji a d’ong appaieten. Kun garda lingan Rakab gamle bo sani boij dakule butente anin kun loile melgij maranji a d’ong soan sole a tiki aninji a d’ong dunglen a yerben asan sayametenji. Anin kan ambrij lumeten, eten asan gamlenden anin Kitungan a mangba derneten. Israelanji angante Jerikon abs’idteji gamle kan jeb-jebberneten do aninji Rakab do a birindan a d’ong dangrabteji

Israelanji sanebdaij desa lingan a ganben asan Jordon alo a pabben dakule. Kitungan Josua a d’ong gameten “abmang buyanji yereteji.” Angante buyanji ayerben asan Jordon alo lingan a jinganji padludben susuleji, kun ayam langkan saring ayeraiten a yer-yer d’an andanabge tanageten do Israelanji asar solingan halen-halen Jordan alo padleji.

Mandranji Jordon alo padlenji a tiki, umpar Jeriko gardan yangamle abs’idben dete antate Kitungan Josuan a d’ong opungeten. Mandranji Kitungan a banaihn manneleji. Kitungan yante gamle opungetinji, kun ambrij sanu maranji do buyanji bo dinnan bo tangor kan ambrij Tudru dinna Jeriko gardan a yar-yar maneng yar-yarlenji.

Ante saring anab gulji-dinna lingan, Israelanji gulji tara yar-yarrenji. Angante aninji gardan a yar-yar maneng a tanakud ayam asan yar-yarenji ante adnag sanu maranji daina sarrangle uailogi guleji do buyanji a surakompedanji pedleji.

Kun adnag Jeriko a kanti talanji rardaile galule. Kitungan atam banaihan ambrij Israelanji garda lingan a kuddub janabanji abs’idleji. Aninji sattan Rakab do a birindan a d’ong dangrableji, aninji Israel a danen deleji. Kananiya desa lingan a dakulenanji a mandraji angate kan a berna amdanglenji do Isrelanji Jeriko gardan abs’idleji gamle, aninji allen janang abgegelangtenji gamle bantogijdage deleji.

Kananiya desa linag buteja a ompu-marji ampara sanabyu sanibdaijberan a gabribented gamle Kitungan Israelanji a d’ong banaihan tieten. Bindo Gibeon gamle bo Kananiya ompu-maran Josuan a d’ong joldalaji do aninji Kananiya saring ateng sangai a darakuna saring yerraiji. Aniji Josuan a d’ong aninji ampara sanabyu sanibdaijberan a gabriben asan opungleji.

Gibeonanji u’an saring yeraiji antate Josuan do Israelanji Kitungan a d’ong adnualadji bar Josua aninji ampara sanabyu sanibdaijberan gabrieten. Gibeonanji garda baiji aninji a d’ong joldaleji gamle agante Israelanji galamleji aninji barabdaleji, bindo aninji aninji ampara a lumlenji a sanabyu sanibdaijberan a ganabrin manneleji eten asan gamlenden kanate Kitungan abo anosaijan dakule. Dajing ayam a tiki, Kananiya deasa lingan a dakulen Emor ahiman bo ompu-mar a rajaji amdanglenji do aninji Israelanji ampara bo sanabyu sanibdaijberan a gabrileji, anten asan aninji a sanumaranji urungan urungle Gibeonanji a d’ong abgegeleji. Gibeonanji Josuan amang yerre sanayaman asan panglangberan appaileji.

Anten asan Josua Israel sanumaranji rukkule Gibeonanji amangba arduben asan tampagal halen yerreji. Umeng tagaldan adnang aninji Emoranji a sanumarji a d’ong abubmung abgegelaji.

Kitungan kun a dinna Israelanji a temang ligan sanuneten. Anin Emor a sanumarji a d’ong galaih piyaihge abme-eten do arelan appaile ateng Emoranji kahidleji.

Kitungan riang lingan uyungan a d’ong abo darakuna linga tabnagle dakkueten yante gamle Israel ateng ayam sikkoija Emoranji a d’ong barij tardange abladnateji. Kuna a dinna Kitungan Israelanji apsele bo surda daidnan hangeten.

Kitungan kan a kuddub sanu maranji abladnalen a tiki, bar okkij ateng Kananiya ompu maranji Israelanji a d’ong abgegeben asan rukkulenji. Josua do Israelanji aninji a d’ong abladnaleji do abs’idleji.

Kan a san ling Kitungan Israel a d’ong dele tegan a d’ong a janeb-jeb desan a di-dargam danen ambrij tiyetenji. Kan saring Kitungan Israel a tannodba a dakun a kuddub desanji ampara sanabyun tiyeten.

Joshua anagante talaibale, anin Israel a kuddub mandranji rukkule gudingeten. Ante saring Kitungan Israelanji ampara etente anosaij Sinai baru lingan sabjaeten kun anosaij dile mandranji a d’ong a bayemle. Mandraji Kitungan amangba manannedage a dakunaben do anosaijanji a mannebe asan jeb-jebetenji.