16. Tanandi maranji

Joshua a kahidlen a tiki, Israelanji Kitungan a er-manane marji deleji do aninji a talnan Kananiyanji a d’ong adnamdungadji orde Kitungan anosaij abmanneadje. Israelanji Janardi Kitungan Jioban a d’ong a senpurtaben apanardu Kananiyanji a kitunganji senpurreji. Israelanji apsele buteja rajan adakuad, anten asan dile mandran butente yangamte a ganijgij liganji bangsa abpadlileji aninji anate lumleji.

Israelanji Kitungan er-manneling a yerrenji asan, Kitungan asanggem maranji a d’ong a anorden a tietin batte aninji a d’ong abladnan abladnale padradetenji. Kan asangem marji Israelanji ateng a janabanji jumburleji, aninji a bittinji absi’idleji do amang linganji saring ateng kanabhidan deleji. Ateng mihum Kitungan a d’ong er-manannelabe do asaggem maranji saring ateng kanalkalan hangle Israelanji kudidamlenji do a danangrabanji apsele Kitungan amangba garberreji.

Ante saring Kitungan aninji a d’ong bo danangrab maran oskaieten butente aniniji asanggem maranji saring dangrabte do desalingan sanabyun pagtai. Bindo ante saring mandranji Kitungan a d’ong karidaleji do bar okkij kungdaijanji a d’ong a senpurben susuleji. Anten asan Kitungan bo adam desaban Midiananji batte aninji a d’ong abladnaeten.

Midiannanji gulji-mihum sikkoija Israelanji a jandrum pangleji. Israelanji bantongijdage deleji; Midiananji yante gamle aninji a d’ong saijle a raptieji, kun apsele aninji boital lingan solenji. Atanakud lingan, aninji a dangrabin asan Kitungan amangba gu-gudinglenji.

Bo dinna, Gideon a himan bo Israel maran yante gamle Midiananji a jandruman pangle adyereji anin loihle alineten. Gamangtungan a pisirdia Gideon a mangba iyle gameten “ranapti sanumar, Kitungan aman ampara daku. Yera do Israel a d’ong Midiananji a s’i ling saring e dangrabaji.”

Aboi kungdaijan a kanub arangan dakule. Kun a kanub aranga a paiben asan Kitungan Gideon a d’ong opungeten. Bindo Gideon mandranji a d’ong bantongle, anten asan anin togalan a d’den sikkoijja omdieten. Anten asan anin kun kanub arangan paile sideten do radrdiete. Kungdaijan a mukaba ayengate a kunub aranga dakule kun arangaba anin Kitungan apsele aboi tabme kanub arangan sabjaeten do Kitungan apsele sanoi kanuban lumeten.

Anabiyo tagaldan mandranji gijleji do butente kun kanub arangan paile do radrdile sideten, do aninji boi-boi barabdaleji. Aninji Gideon a d’ong a kabhidben asan a s’ingban iyleji, bindo Gideon a u’a gameten “eten asan amben kitungben a d’ong a sayamben asan a erte-guijte? “bogad anin sakkai kitungden, anin rab-rab damnete!” anin kan abernan a opunglen saring mandranji Gideon a d’ong adnab kabhidadji.

Ante saring Midiananji Israelanji amang saring a jumburnaben asan bar okkij yerraiji. Aninji ateng adakulenji asan dasamle adraptiadji. Aninji ampara a sanunaben asan Giden Israelanji a d’ong rukkule. Kitungan Israel a d’ong a dangraben asan anin a d’ong handramte gamle, kan a berna jardijten na gamle agalaben asan Gideon Kitungan saring b’agu arabmadan gareten.

Abmangtara arabmadan kan ambrij, Gideon labo lingan aboi murkundarda-medan a usal bileten do Kitungan a d’ong tagaldan a kasirda labo lingan er-galulabe sattan kun a usal a lananka ling a galuben asan opungeten. Kitungan kun ambrij lumeten. Anabiyo a togal ling, anin Kitungan a d’ong gameten sttan labon jameng dakuete bindo usalan asar dakuete. Kitungan kun ambrij janag abmele. Kan bagu arabmadanji batte Gideon jardijten na gamle derneten do Midiananji a s’i ling saring Israelanji a d’ong a dangraben asan handramte.

32,000 Israel sanu maranji Gideon adamba yeraiji, bindo kitungan gameten do kan ate atengdam dete. Anten asan butente a sanunaben asan bantongte kan ambrij 22,000 mandranji a s’ing dambaji appaiyetenji. Kitungan Gideon a d’ong gameten do kan a danisam janag boi-boi atengdam. Anten asan Gideon 300 mandra sadan sadle atalnan kuddub mandra appaiyetenji.

Kun a togal ling Kitungan Gideon a d’ong gameten “Midiananji a tambuba iya do agante aninji a arbertenji ate amdangte, aman okkij bantongdong. “Anten asan kun a togal Gideon kun a tambuba iyeten do bo Midian sanu mara a gijeten a ganumte a gardi-maran a d’ong a opungeten ate amdangle. Kuna a mandra a gardi-mar gameten “kan a ganumte a garamgaman kani, Gideon a sanu marji Midiananji a d’ong abladnateji!” Gideon agante kan amdangle, anin Kitungan a d’ong senpureten.

Ante adnang Gideon a sanumaranji a mangba dayarre yerre dile mandra tangboi surakompedan, tangboi labo dangan do tanopon tietenji. Midian a sanu marji uante demadlenji aninji kun tambun a yar-yar maneng danglenje. Gideon a sanuna marji yante gamle Midiananji tanopo tudan a tan’ar rapti aggijei kun ambrij labo dang ling aninji tanopon dakkuleji.

Ante saring, Gideon a kuddub sanuna marji abo ayam a labodanganji palleji, kun batte kuddub a tanopo tudaji abubmung gijtale. Aninji a hamlenji a surakompedanji pedle uai sarrangle gamleji “Gamang Kitungan do Gideon apsele aboi kardiban!”

Kitungan Midiananji a d’ong galaih-piayaingge abme’etenji, kun batte aninji di-dargam arabgegele di-dargam arkabhileji. Anata tabdong atalna maranji Israelanji a d’ong a s’inganji saring ganudingan dea dele Midiananji a d’ong a gongben apsele a sayambe asan anopungan dele. Aninji aniji saring ateng mandra arkabhidleji do atalnan ateng mandranji a d’ong Israel desan saring bayeran gonleji. Kitungan Israelanji a d’ong dangrabete.

Mandranji Gideon a d’ong aninji apsele raja apseben asan ogalleji. Mandranji kun ambrij apseben asan Gideon anorden adtiad, bindo Midiananji saring aninji etente a rana lebanji pangleji kun a kuddub garetenji. Mandranji Gideon a d’ong l’apurge ranan tiyleji.

Ante saring gugu buyan a rotudtena a sindri ambrij aboi janatti dam a sindri Gideon kun rana leban batte sabjaete. Bindo mandranji kan ate aboi kungdaijan ambrij purreji. Anten asan Kitunhgan bar okkij aninji a d’ong panadradan tietenji eten asan gamlenden Israelanji kungaijan purreji. Aninji a d’ong abladnaben asan Kitungan aniji a d’ong anorden tieten. Atanakud lingan aninji bar okkij sanayaman asan Kitungan amangba garberlenji do Kitungan aninji apsele bar aboi danangrab maran appaiyeten.

Kan ambriji arobjong ateng tara yarren-yarren dale: Israelanji pintun lumleji, Kitungan aninji a d’ong padradetenji, anta tiki kudilenji do aninji a d’ong a dangrabben asan Kitungan aboi danagrabmar appaile dakunete. Ateng mihum sikkoija Kitungan ateng danangrab maraji a d’ong appaiyetenji butente Israelanji a d’ong aninji asanggem maranji saring tandileji.

Atanakud lingan, yantegamle kuddub desa lingan rajan dakule hadab kun ambrij raja a tabgijben asan mandranji Kitubgan a mangba garberreji. Aninji kan ambrij aboi rajan saijleji butente lanka, radudam do butente sanun asan tangorre pangte. Kitungan kan a ganarberan adnitsumad, bindo aninji yantegamle ogalleji kun ambrij aboi raja tietenji.