17. Daudon ampara Kitungan Anosaijan

Sol Israel lingan abmang tara raja dele. Aninji yangamte ambrij araja saijleji kun ambrij anin lanka do tamseng dakule. Dajing mihum sikkoija Sol bangsa raja dakulen Israelanji a d’ong raja godeten. Bindo, anta tiki anin bo duai mar dele do Kitungan a er-mananemar, ante asan yante gamle bo dinna anin apanardu bo biggarda mandra raja adeben asan Kitungan sedaeten.

Sol saring Kitungan bo dangarda a d’ng Israel a raja abseben asan sedaeten. Betliam garda lingan saring a yerraen Daudon gupamed mar dakule. Biggarda-biggarda ayam lingan angante a u’an a murkundardanji tur-tureten, anten adnand Daudon a murkundardanji abgege’ten aboi kinan do aboi sallua a d’ong kabhidete. Daudo a boi lagadmar do roitadmar dakule. Anin Kitungan amangba derren anin abanaihan manne’eten.

Daudo aboi sanumar do abmangod mar dele. Angante Daudon dangarda dakule, anin Goliat ahiman bo surda mar batte sanuneten. Goliat aboi sanu ganalam mar, umpar sanu mar do anin a lananka 3 miter dakule. Bindo Kitungan Goliat a d’ong kabhidle Israelanji a d’ong a dangraben asan Daudon a d’ong sayameten. Kan saring, Daudon Israel asanggem maranji alananka ateng ayam daidnan hangeten. Kun asan mandranji anin a d’ong abgu-guleji.

Daudon a lanaka mandranji a tanimyeman Sol sayele adraptiad. Sol ateng ayam Daudo a d’ong a kadhidben asan ereten-guijeten, anten asan Sol saring Daudon soneten. Bo dinna, Daudon a d’ong a kabhidben asan Sol anin a d’ong saijeten. Sol kun a boitalban yereten uante Daudon Sol saring iyeten sone, bindo Sol anin a d’on gijle adraptiad. Daudon nami Sol adamban dakule do anin anin ad’ong rapti kabhite badihn, bindo anini antate adlumad. Osantan Daudon Sol a d’ong arabmadan absuijben asan Sol a sindri ling saring bo raij-raij gadeten yantegamle anin raja a deben asan anin a d’ong akabhidad.

Atanakud lingan, Sol sanu lingan a purardan omdale do Daudon Isral a raja dale. Anin aboi bangsa raja dakule do mandranji anin a d’ong timyemleji. Kitungan Daudon a d’ong absittaen do daidnan tieten. Daudon ateng sanuneten do Kitungan Israel asanggem maranji a d’ong abladnaben asan anin a d’ong sayameten. Daudon Jirusalem daidnana hangle do kanate Jirusalem a rajama a murda barara s’ing (Rajodani) abme’ten. Daudon a rajadolen ayam lingan, Israel umpardam do bittidam dele.

Daudon aboi sareba s’ingan a sabjabe asan ogalle yante gamle kuddub Israel tette Kitungan a d’ong senpurteji do anin a him lingan sanoi kanuban lumteji. 400 mihun ambrij sikkoija, mandranji Kitungan a d’ong senpurreji do Mojes a sabjalen a ranukku tambusing lingan sanoi kanuban lumleji.

Bindo Kitungan Natan tungmaggijmar a d’ong Daudon amangba kan ambrij a panglangber appaiyeten, “Aman sanu mar delman, anten asan aman hen apsele kan a sarebasing gutuldong. “ Dangarda on nam antate gutulte. Bindo hen d’ongnam ateng absittatai. Tega lingnam saring bo mandra mandrahenji a lananka tarda ayam sikkoija rajagodte!” Tarda ayam rajagodle araptiten aboi sattan a tega Kristun na. Kristun Kitungan a sanedan na butente ordaran a mandraji a pintunji saring dangrabte.

Angante Daudo kan a kuddub amdangle, anin anta tabdong Kitungan a d’ong seneten do anin a d’ong abgu-gueten eten asan gamlenden anin Daudon a d’ong kan surda ganugu do ateng anabsittan a tiyben asan sibdaij bereten. Kitungan angan ayam kan a kuddub abmete antate Daudon aggalamad. Bindo kan ambrij ojoraile, do Israelanji Kristun a yertaen asan 1000 mihum ambrij omdileji.

Ateng mihum sikkoija Daudo hadab do dernan batte rajagodeten do Kitungan ani a d’ong absittaeten. Delejanangden, anin a mandrengnan a tanakud ayam lingan anin Kitungan asanggem ling bantongijdage a pintu lumeten.

Bo dinna, angante Daudon kuddub sanu maranji sanunaben asan s’ingan saring ateng sangai dakuleji, anin a raja darakuna s’ing lingan saring bayeran gij-gijeten do aboi langidaman a insalo umaten. Anin ahiman Botseba dakule.

Ganij-gijan biggarda abmetaben a panardu Daudon anin a d’ong a urugaiben asan bo mandra a d’ong appaiyeten. Anini anin batte tumneten do anin a d’ong a s’ing damban dayarre ayerben asan appaiyete. Dajing dinna a tiki Botseba Daudon a d’ong bo panglang beran appaile gameten do anin panguronle.

Uria a himan bo mandra Daudon a sanumar ling saring boi-boi bangsa sanumar, Botseban a tanongba dakule. Daudon sanuban saring gudingle anin a dukring amangba a yerben asan opungeten. Bindo, biggarda sanu maranji sanu lingan a dakutenji ayam s’inbgan ayerben asan adnordiad. Anten asan Daudon Urian a d’ong bar okkij sanu darakunaban appaile do yante gamle Uria asanggem maranji batte kanabhidan date, uante a maneng ateng radu asanggemaranji dakute kun ambrij amanengba anin a d’ong dakkuben asan sanu anoba maran a d’ong opungle appaiyeten.

Urian a d’ong panopon dele a tiki, Daudon Botseban a d’ong sidrungneten. Ante saring, anin Daudon a onger on kudeten. Daudon etente lumeten ante apsele Kitungan boi-boi barabdale, anten asan anin amangba Natan tungmaggijmar a d’ong appaile a pintun yan ambrij a karsijdage dakule antate gadlameten. Daudon a pintun apsele kudidameten do Kitungan a d’ong tanamadan gareten. Daudon atalna mandrengna lingan, kan ambrij ateng kanalkal dage ayam lingan janang Kitungan a d’ong sandungle anin a manannemar dele.

Bindo Daudon atam pintun ambrij a onger onan kahidle. Daudon atalna manrengnan ayam lingan birinda linga ar-rurdentum dakule do Daudon a ranapti boi-boi balaile yereten. Daudon Kitungan a temang lingan er-manannedage dakulen janagden Kitungan a sanibdaij-beranji a dangraben asan manannedage dakulen. Ayertaen ayam lingan Daudon do Botseban saring bar okkij aboi onger onan karukkudan dele, do aninji anin a d’ong Solomon gamle tiyhimleje.