18. Rajaman a pallangan

Ateng mihum a tiki Daudon a karahid dele do a onger onan Solomon Israelanji a lananka rajagodben susueten. Kitungan Solomon a d’ong do anin eten ate kuddub saring ateng sanai-saij antate ualeten. Angante Solomon ganalaman apsele garbereten, Kitungan kun lingan m’oihdale do anin a d’ong ordar lingan kuddub saring aur ganalam mar abse’eten. Solomon ateng bernan (bisoyo) hangneten do anin bo surda ganalam bitsara mar dele. Bar janang Kitungan anin a d’ong ateng bitti mar abm’eten.

Jirusalem lingan, Solomon sarebasingan gutuleten, etente ate a u’an oskaiyeten do janabanji rukkule dakkueten. Mandranji Kitungan a d’ong senpurre do sanoi kanuban ranukku tambusing lingan a lumtenji a panardu sarebasing lingan a lumben susuleji. Kitungan yerrai do sarebasing lingan dakulen bar anin a mandranji ampara basueten.

Bindo Solomon biggarda disan a insaloji a d’ong timyemeten. Anin 1000 biggarda desan a insaloji a d’ong sidrunglen Kitungan a er-manannemar dele. Kan a insalonji saring ateng bayeran a desa saring yerraiji do aninji ampara aninji a kitunganji panglaiji do dile-tordong aninji a d’ong senpurleji. Solomon angante talaibale, anin janang aninji a kitunganji a d’ong senpureten.

Kitungan Solomon a mang lingan boi-boi barabdale do Solomon a er-dernadage a panadradan ambrij Solomon a karahidan a tiki Israel desan panllangle b’agu rajaman a deben asan gabri-j’eneten.

Solomon a kahidlen a tiki, a onger onan Riyaboam raja dele. Riyaboam aboi duaih mar dakule. Israel desa lingan kuddb mandranji aboj’e abmelen anin a d’ong raja gamle gabrileji. Aninji Riyaboam a d’ong dabalen opungleji do Solomon aninji a d’onganji lagin baran a lumben asan do biggarda-biggarda a janitanka dele.

Riyaboam aninji a d’ong banadrab sarrang batte jalangle gameten “amben a ogalte do u’ahen Solomon d’ongben lagin baran baihbenten, bindo anin saring bar okkij ateng kal-kal baran a lumben asan, do anin saring ateng hen banandraban batte d’ongben padradtai.

Israel desa lingan galji-tega Riyaboam asanggem lingan barableji. Sattan bagu tega anin a lananka manannedage dakulenji. Kan bagu a tega Judan a rajam dakule.

Israel desa lingan biggarda galji teganji Riyaboam asanggem lingan yerreji do Jeroboam a d’ong raja gamle tabgijleji. Aninji kandrabardi sengban a rajamanji gutulleji do aninji Israel rajaman orde desa ganaman dele.

Jeroboam Kitungan asanggem lingan deneten do mandranji a d’ong pintun abumengtenji. Juda rajam lingan a dakulen a sarebasing ling Kitungan a d’ong a senpurtaben a panardu kungdaij puran a lumben asan a mandranji apsele b’agu kungdaijan sabjaeten.

Juda rajaman do Israel rajaman asanggeman gadelle do ateng tara anin-aninji asanggem lingan sanulenji.

Israel a tabme rajam lingan kuddubanji er-bangsa raja dakuleji. Kan a kuddub a rajaji saring ateng raja biggarda Israelanji batte kanabhidan deleji, butente aninji a dane lingan raja a deben ogalleji.

Kuddub rajanji do Israel rajam lingan kuddub mandra kundaijan purreji. Aninji a kungdaij pur-pur adnag ateng ayam lingan jundarda-jundardin a er-maridan do passijan kanuban dele.

Judan a rajaji Daudon a tegaji dakuleji. Kan a kuddub rajanji saring ateng banangsa maranji dakuleji, butente hadab logi rajagodleji do Kitungan a d’ong senpurleji. Bindo Juda lingan ateng rajanji karsijdage do parsakardijdage dakuleji do aninji kungdaijan purreji. Kan ambrij dajing rajaji aninji a o’nanji a d’ong ardod kitunganji amang kubleji. Juda lingan ateng ateng mandra janang kitungan asanggem lingan dilenji do biggarda kitunganji a d’ong senpurreji.