19. Tungmaggij maranji

Israelanji a lanad-sakki-kamb’ol ling, Kitungan aninji a mangba tungmaggij maraji appaiyeten. Tungmaggij maranji Kitungan saring berna amdangleji do ante saring Kitungan a berna mandranji a d’ong opungleji.

A-ab angante Israel rajam lingan raja dakule ante ayam Eliya bo tungmaggij-mar dakule. A-ab aboi er-bangsa mar dakule, butente baal ahiman aboi jolda tungan a d’ong a purben asan mandraji a d’ong abuyaeten. Eliyan A-ab a d’ong gameten “hen adnopungain sikkoija Israel desa lingan engadele janang ganuran agganure.” Kan asan A-ab boi-boi barabdale.

Eliyan a d’ong a kabhidben asan a saijeten A-ab saring tulabban a dakun bo dungdam-da ban a sonaben asan Kitungan opungeten. Dile tagaldan do dile ouruban ontidanji rutipun do jelun pangtihleji. A-ab do asanu maranji Eliyan a d’ong saijleji, bindo aninji anin a d’ong adrabangadji. Kantaran dijne aurre do a tanakud lingan dungdam-dan janang derga-derga ahadle.

Anten asan Eliyan bo toij-toij desaban yereten. A kantaralen asan kun desa lingan bo joar-boi do a onger onan a ganaga a hidle. Eten asan gamlenden agganurren asan kantarale bindo aninji Eliyan a d’ong sagalleji, do Kitungan aniji a ganagan oskayeten do a darakku bandraijan do miholan agaja adnahidad. Kun kantaran a hidlen sikkoija a ganaganji dakule. Eliyan tette ateng mihum sikkoija dakuneten.

Yagi mihum-tudru anggai a tiki, Kitungan Eliyan a d’ong Israel desaban a yarnaben asan opungeten do A-ab a d’ong a opungben asan do anin bar okkij ganuran appaitai. Angante A-ab Eliyan a d’ong gijeten, anin gameten “aman po kan a kanal-kal anabme maran!” Eliyan anin a d’ong jalangle gameten “aman kan a kanal-kal anabme maran!” Amben janardi Kitungan Tordong Gamangtungan a d’ong a omdale do baal a d’ong a senpurte. Israel desa lingan kuddub mandranji a d’ong Karmel barun adamba urungaiba.”

450 baal tungmaggij maranji maile Israel desa lingan kuddub mandra Karmel baruban yerraije. Eliya mandranji a d’ong gameten, “amben dajing ayam sikkoija monnabe bandale a yerte? Bogad Tordong Gamang Kitungan dakulenden, etteden anin a d’ong gankilba! Bogad baal kitung den, etteden anin a d’ong gankilba!”

Ante saring Eliyan baal a tungmaggij maranji a d’ong opungeten “a boi tangliyan kabhidba do anate kanuban a psele oskaiba, bindo tedne t’ogin asoidong. Hen janang ante lumtai. Ayengan a Kitung t’ogin batte olangte anin sakkai Kitung dete.” anten asan baal a tunmaggijmaranji aboi sanoi kanuban oskaileji bindo kotte t’ogin adsoiyadji.

Ante saring, baal a tungmaggij maranji baal a d’ong garberreji, “baal garberren amdanga!” Barij dinna sikkoija aninji garberrenji do surda sarrangan batte uailogi guleji do a d’ongdamanji kundin batte gad-damlenji, bindo buteja janalangan adhangadji.

Dinnan a tanakud ayam lingan, Eliya Kitungan amangba bo sanoi kanuban osakaiyeten, sanoi kanub lingan jelu, agalan, bar janag sanoi kanuban aranggaban a yar-yar maneng a labo d’an kuddub maneng adjamengen sikkoija miggal surrda labo dang lingan d’an pangle rubmaeten.

Ante saring Eliya garberneten, “E Abraam, Isaak, do Jakob a Kitung Tordong Gangtung, nami allenji a d’ong absuija do aman Israel a Kitung do hen boantanam na. d’onghen jalangihn yante gamle kan a kuddub mandra galamteji do aman sakkai Kitungan na.”

Anta tabdong, riangan saring t’ogin galuan galule sanoi kanub lingan a dakulen a jelu, agalan, arenga, arardi solan do kan ambrij sanoi kanuban a yar-yar maneng a dakulen a d’a janang jumeten, mandranji angante kan gijleji aninji labo lingan turkurduble g’ungle gamleji “Tordong Gamangtungan na Kitungan! “Tordong Gamangtungan na Kitungan!

Ante saring Eliyan opungeten, “baal a tungmaggij maranji buteja allurdongji!” anten asan mandranji baal a tungmaggij maranji a d’ong hamle kabhidleji.

Ante saring Eliyan gameten, “gardban umengle yarnaba, eten asan gamlenden ganuran yertai.” Tabdong riangan yagadam a debe susle do ateng ganuran dele. Jioban kantaran andreng takkudeten do anini sakkai Kitungan anate anin arabsuijan tieten.

Eliyan ayam a tiki, Kitungan Elisa a himan bo mandra a d’ong a tungmaggij maran a deben asan sedaeten. Kitungan Elisan batte ateng rubmang baran lumete. Naaman a lananka aboi rubmangdage baran dele, butente aboi assangem sanu anobamar dakule, butente bantogijdage a mutta bem-bem dele. Anin Elisan a berna amdangneten anten asan anin yeran yerre sanamangan a hangben asan anin a d’ong opungeten. Elisa Naaman a d’ong Jordon alo ling gulji tara tabbub-naben asan opungeten.

Aparmangtan Naaman barabdale do kan adlumad, eten asan gamlenden kanate kekan ambrij anin ab-padli-eten. Bindo anab-botara ayam lingan anin abyar j’elen Jordon alo lingan gulji tara tabbub-damneten. Anin angante a tanakud adnang buban-buble dunglen yeraiten ante adnang a usalan barij sanamangan dele! Kitungan anin a d’ong absamangeten.

Kitungan bar okkij tungmaggij maranji a d’ong appaiyeten. Aninji kuddub mandra kungdai puran a omdaben asan opungeten do biggardanji a d’on sakkai do asuyeman absuijben asan opungetenji. Tungmaggij maranji a d’ong ab kil-kille gameten do bogad aninji er-bangsa baran a lanum adnumrengeje do Kitungan a mananne ling addakuneje, etteden Kitungan aninji a d’ong abdusale bitsarate do aninji a d’ong panadradan tiyte.

Ateng ayam mandranji Kitungan a er-mananne deleji. Aninji ateng ayam lingan tungmaggij maranji ampara er-bangsa taram-tamandage abseleji do anga-anga kan ambrij janang kabhileji. Bo, ayam Jirimiya tungmaggijmar a d’ong bo asar gailungda lingan paned-pedan dele do anin a kahidten sikkoija tedte ansoijan omdaleji. Anin gailungda lingan a dakun a jobba lingan tabuble, bindo rajan anin a lananka lingan asuyem imnan yeraiten do Jirimiya a kahidten abmang anin a d’ong gailungda lingan saring amdungle a urungaiben asan anin a boantanji a d’ong banaihan tieten.

Tungmaggij maranji a d’ong mandranji ardermadlenji janang aninji Kitungan apsele berna opungleji. Aninji mandranji a d’ong abkel-kelle opungleji do bogad aninji akkudidamlenajiden Kitungan aninji a d’ong abs’idte. Kitungan anappai Kristun yertai gamle kun a janeb-jeb ber janang aninji a mandranji a d’ong a bayemle dakkuetenji.