20. Tanolbadan do danayaran

Judan do Israel bagu a desa Kitungan asanggem lingan pintun lumleji. Kitungan Sinai baru lingan aninji ampara etente anosaij sabjaeten aninji kun anosaij meddeleji. Mandranji yante gamle aninji kudi damtenji do bar-okkij anin a d’ong senpur teji anten asan Kitungan a tungmaggij maranji a d’ong appaile abkil-kiletenji, bindo aninji antate abmanne-adji.

Anten asan Kitungan b’agun a desa asanggem maranji batte abs’idben asan anorden tieten. Aboi umpar do er-asuyem desan Assuriyan Israel a d’ong abs’ideten. Israel lingan a dakulen ateng mandranji a d’ong Assuriyanji kabhidleji, janatti janabanji pangleji do disa lingan ateng maneng t’ogin batte soileji.

Assuriyanji bitti maranji a d’ong barij ganalaman a dakulen a kuddub abmang-god maranji a d’ong rukkuleji do aninji a d’ong hamle Assuriya desaban urungleji. Sattan mai tungdam-jaddam a banagge Israelanji butente a d’ong tanuaban addead aninji Israel desa lingan dakuleji.

Ante saring Assuriyanji luka maranji a d’ong Israel desa lingan a basuben asan urungleji. Luka maranji anab s’idan a dele a garadanji bar gutuleji do butente tette dakulenji aninji Israelanji ampara sidrunglenji. Israelanji ayengan a birinda luka maranji ampara sidrunglenji aninji a d’ong Sameriya gamle ganudingan deleji.

Juda desan a mandraji gijleji do Israel desan a mandraji Kitungan a d’ong a derrenaji do a banaih beran abmannelenjin asan Kitungan aninji a d’ong padradeten. Bindo aninji Kananiya desan a kitungji do kungdaijanj senpurreji. Aninji a d’ong abkil-kilben asan Kitungan tungmaggij maranji a d’ong appaile, bindo aninji adnam-dagadji.

Assuriyanji Israel desan abs’idlenji 100 mihum atiki, Kitungan Babilon a raja Nebakadnejar a d’ong Juda desan abs’idben asan anappaiyan dele. Babilon aboi umpar desa dakule. Juda desan a raja Nebakadnejar a boanta adeben asan gabri j’eneten do dile mihum anin a d’ong ateng tangkan tieten.

Bindo asuij mihum atiki, Juda desan a raja Babilon asanggem lingan sanuneten. Anten asan, Babilon desan amandraji yaran yarrin Juda desan a d’ong suleji. Aninji Jirusalem gardan abge-gelaji, Jirusalem asareba s’ing rad-rdaileji do garda lingan do sareba s’ing lingan a bitti pangle yerreji.

Aninji asanggem lingan a sanuneten asan Juda desan a raja a d’ong Nebakadnejar a sanu marji rajan a’onanji a d’ong a temangba kabhidleji do anin a d’ong abkardule sidleji. Ante saring, yante gamle anin Babilon a karoijo s’ing ling kahidte anten asan anin a d’ong Babilon desaban urungleji.

Nebakadnejar do a sanu maranji Juda desan a kuddub mandranji Babilon desaban urungleji do jannong lingan a baranaben asan sattan tungdam-jaddam banagge maranji a d’ong Juda desa lingan umrengle yerreji. Kitungan a mandraji a d’ong janibjib desan saring balamattam a urunglenji ayaman na Tanolbadan gamle ganaman dele.

A pintunji asan Kitungan aninji a d’ong tanolbad linga biggarda desa ban appaiyeten na, bindo aninji a d’ong orde a janib-jib beranji anin akkareda-ad. Kitungan a mandranji a lananka a ganij-gijan adnumrengad do a tungmaggij maranji batte aninji a d’ong olangle dakunete. Anin jib-jib-berre do, Yakurdi-galji mihum a tiki aninji bar okkij a sanibdaij desaban yarren yertaiji.

Yakurdi-galji mihum atiki, Persia desan a raja Kuras Babilon desan abladnaeten, anten asan Persia desan Babilon desan a dane pangeten. Nami Israelanji a d’ong Juda gamle ganudengan dele do aninji a mandreng madtanji Babilon desa lingan basuleji. Sattan a talaibadalenji oseng Juda maranji Juda desan ayemleji.

Persia desan umpar radu dakule, bindo ayengante a mandraji a d’ong a bladnaleji kun a mandraji a lanankaleng asuyemanji dakule. Kuras Persia desa lingan raja a delen asui ayam a tiki, anin aboi banaihan tieten, ayengante amandra Persia desan sadle Juda desaban a yarnabe ogalteji aninji tette rapti yartenji. Bar janang sareba s’ingan abar gutulben apsele tankan tiyeten! Anten asan tanoldbad lingan yakurdi-galji mihum dakulen a tiki Judanji bo sanna ompu Juda desan Jirusalamba yarrenji.

Angante mandranji Jirusalem arduleji, aninji sareba s’ingan do gardan a yar-yar maneng a dakulen a kanti talan bargulleji. Aninji biggarda mandranji batte anabhanan delenji janagden, aninji bar-okkij sanibdaij desa linga basuleji do sareba s’ing lingan Kitungan a d’ong senleji.