21. Kitungan Kristun apsele sibdaij-berte.

Susunan-na saring Kitungan Kristun a d’ong appaiben asan oskaieten. Abmang tara Adam do Oban amangba Kitungan a jeb-jeb-beran yeraiten. Kitungan jeb-jeb-bereten do Oban a birinda ling saring bo mandra karukkudan dete do anin j’adan a b’ob ab-rardite. Ayengante a j’ad Oban a d’ong joldaete anin duai-sum dakule. Janeb-jeb-beran a garam gaman kan ambrij dakule, Kristun duai-suman a d’ong abtakud ablad-nate.

Kitungan Abraam a d’ong sibdaij-berre opungeten do anin batte Ordaran a kuddub mandra anab-sittan deteji. Kan anab-sitta angante bo dinna yertai kan ate anojoraiyan dete. Ordar lingan kuddub mandraji danangdraban a hangben asan kanate rapti dete.

Ayertaen ayam lingan Mojes ambrij bo tungmaggij-mar anin tabnangte. Kristun apsele kan aboi biggarda sanibdaij-beran Kitungan Mojes a d’ong jeb-jeb-berre gameten.

Daudon a tega ling saring bo mandra Kitungan a mandraji a psele tarda ayam asan raja dete gamle Kitungan Daudo rajan a d’ong sibdaij-bereten.

Jirimiya tungmaggij-mar batte Kitungan sibdaij-berneten, anin aboi tabme anosaijan abmete, bindo Kitungan Israel ampara Sinai Baru lingan yangante anosaij subjaeten kun ambrij anosaijted. Tabme anosaij lingan Kitungan mandranji a uggar ling anin anosaijan idolte, mandranji di-dargam Kitungan a d’ong galamteji, aninji anin amandranji deteji do Kitungan a pintunji tadmadte. Kristun tabme anosaijan su-sute.

Kitungan a tungmaggij-maranji bar-okkij janag gamleji do Kristun bo tungmaggij-mar, buya do raja janang dete. Butente Kitungan a berna amdangle kun a berna mandranji amangba abpengbaleji aninji tungmaggij maranji na. Kitungan appaiben asan a sibddaij-berren a Kristu aboi roitad tungmaggij mar dete.

Israel buyanji Kitungan a mangba mandran saring aninji (mandraji) a pintunji a panadradan a panardu sanoi kanuban lumleji. Buyanji janag mandranji apsele Kitungan a mangba garberlenji. Mesian roitad buyan na, butente anindaman Kitunga a bo roitad sanoi kanubge surped-damten.

Aboi raja kuni-na a mandra dete, butente aboi desan abhanate do amandranji a d’ong bitsarate. Kristun bo roitad raja dete, butenet anin a purba jujun Daudon a raja garob-goban gobte. Anin barij Ordar lingan tarda ayam raja godte, do tordong janardin batte bitsarate do hadab gabri-j’eten.

Kitungan a tungmaggij maranji ateng biggarda-biggarda Kristun a bernanji opungleji. Mesian ayertaen abmang bo gugu tungmaggij maran yertai gamle Malaki tungmaggij-mar abmagaiten opungeten. Jisaiya tungmaggij-mar Kristun bo poilong-boijan a kampung ling saring karu-kudan dete gamle tungmaggij beran opungeten. Betliam garda linga anin karu-kudan dete gamle Mika tungmaggij-mar opungeten.

Jisaiya tungmaggij-mar gameten, Kristun Galili desa lingan basute, palang uggar maranji a d’ong a babyete, do koijjo maranji a d’ong aburnaben asan abpengbate do ambanondi maranji a d’ong aburnate. Anin bar okkij janang tungbaggij beran opungle, anin bem-bem maranji butente amdangle, gijle, berren do halen adraptieji, aninji a d’ong absamangte.

Bar janang tungmaggij-mar Jisaiyan tungmaggij beran opungle gameten, Kristun a d’ong anasanggeman dete do anin a d’ong ajj’aeje. Biggarda tungmaggij maranji janang tungmaggij beran opungle gamleji, butente kristun a d’ong kabhidleji aninji a sindrin apsele karamma ganijan gijteji do aboi gardi-maran anin a d’ong bansite. Jikoriya tungmaggij mar tungmaggij beran opungle gameten, Kristun a d’ong a bansiben asan kun gardin a d’ong bokurdi-galji ruppa leban taniyan dete.

Krinstun yangamle karahidan date kan apsele janag tungmaggij maranji tungmaggij beran opungleji. Jisaiya tungmaggij berre gameten do mandranji Jisun a d’ong bijolteji, anin a d’ong gabroi-matteji, do anin a d’ong tidteji (tadteji, tanghateji). Anin eteja anardodan adlumeten janagden aninji anin a d’ong poteji do anin ateng tanunjing do satid-samoih batte karahidan dete.

Tungmaggij maranji bar janang gamleji do, Kristun roitad dete, anin eteja a pintun a dakue. Anin biggarda maranji a pintu a panadradan a hangben asan karahidan dete. Anin a panadradan Kitungan do mandranji amang lingan sanabyun pangtai. Kan asan, Kristun a kahidben asan Kitungan a itsuman dakule.

Tungmaggij maranji tungmaggij beran opungle abpengbaleji do, Kristun karahidan dete do Kitungan karahidan saring anin a d’ong abdete. Kristun a karahidan do a yanarmengan batte pintu maranji a tandiben do aboi tabme anosaijan a su-suben asan Kitungan anin anoskai-baran abojoraite.

Kitungan tungmaggij maranji a d’ong ateng Kristun a bernaji ab-pungge’eten, bindo Kristun kan a kuddub a mandraji saring buteja ayam lingan adnang adyeraiten. Kan a kuddub tungmaggij beranji tian-tiyle 400 mihum saring ateng mihum a tiki, hadab ayam lingan, Kitungan Ordarban Kristun a d’ong appailai.