23. Jisun a karukkudan.

Josep a himan bo roitad mar Merin batte garboijan dele. Merin panggur onle gamle anin angante galamle, anin galameten do kun passijan anin saring ted. Anin Merin a d’ong a gabroij-madben adnitsumad, anten asan anin loihle a umrengben asan ogaleten. Anin kun a lumlen abmang bo pisirdia anin amangban yerre anin a absuij damlen anin a d’ong gameten.

Pisirdian gamete, “Josep, dukrinam Merin a d’ong a pangben asan bantongdong. Anin a darakkuon lingan a dakun a passij Marid-janggardan saring dele. Ani bo onger O’nan kudte. Anin a himan Jisu gamle tiyhimte (agaram-gaman “Kitungan Dangrab langten), etene asan gamlenden anin mandraji a pintu saring dangrabte.”

Anten asan Josep Merin a d’ong sidrungnete do a dukridaman gamle jale a s’ing damban urungeten, bindo bo onger O’nan a karukud endrang d’en sikkoija aninji adtumnadji.

Angante Merin a kud-kudon ayam ardulai, Romi sorokar kuddub mandranji a d’ong di-dargam desaban yerre ahimanji abidolben asan opungle. Josep do Merin a darakunabanji Najarita saring Betliam a yerben asan hana godan ateng sangai dakule. Eten sana gamlenden aninji a ju-junji Daudon a gorjang daman Betliam dakule.

Aninji angante Betliam arduleji, aniniji a dakunaben apsele darakunan adakuad. Jontunji a darakunasing ling satta mai a dakunaben asan aninji darakunan hangleji. Resasijan tette karu-kudan dele do ayangan anin a d’ong bo tariyda bungsang lingan tabmueten. Eten asan gamlenden anin a d’ong a tabmuben asan amangbanji tarabmu onan adakuad. Aninji anin a d’ong Jisu gamle tiyhimleji.

Anta togal kun adamba bo baseng lingan dajing gullanji maranda murkundardanji a d’ong tur-turreji. Abubmung bo panuang pisirdian aninji amangba yeraiten, do aninji bantongijdage deleji. Pisirdian gameten, “a bantongdong, eten asan gamlenden amben apsele mangbahen bo bangsa anobling beran daku. Kristu Gamangan Betliam lingan karu-kudan dele!”

“Kun a passij a d’ong e saijba, do amben anin a d’ong Gung-gusingan bo bungsang ling bo garusaijkab lingan do a demadlen abo passijan a d’ong amben a gijte. Abubmung, riangan pisirdianji batte barij dele do Kitungan a d’ong senkendrale gamleji “lananka Kitungan a d’ong ganugu panemengan do Ordar desa lingan anin a sanabyun man’oihan mandranji amang lingan d’ete!”

Gullanji adu-duge yerre Jisun u’ante dakule tette arduleji do pisirdian atam anopungan ambrij aninji Gun-gusingan bo bungsang lingan a demdlen a passijan a d’ong gijleji. Aninji boi-boi moihdaleji. Gullanji a maranda murkundardaban dayarre yerreji do aninji etente a kuddub amdangleji do gijleji ante apsele Kitungan a d’ong abgu-guleji.

Dajing ayam a tiki, darungyung desaban saring a yerraenji Karadanji riang lingan bo rubmangdage a tuij-tuij gijleji. Aninji a uggardam linganji imdamlenji do Judanji apsele bo tabme rajan a karukkudan a berna ganalaman dele. Anten asan, aninji kan a raja a gijben asan sangai desan saring yerraiji. Aninji Betliam gardaban yerraiji do Jisun do anin a u’an, ayangan ayengante a s’ing ling dakuleji kun a s’ing rabangleji.

Karardanji angate Jisun a d’ong ayangan ampara gijleji, aninji turdum jingle lemleji. Aninji Jisun a d’ong boi-boi janatti janaban tiyleji. Anta tiki aninji a desa banji dayarre yerreji.