27. Bangsa Sameriya maran arapsui beran

Bo dinna, bo anosai galam Juda maran Jisun a d’ong a tunjingben asan ualeten, “E Hang-hangmar, er-ahidan a manrengna a hangben asan hen eten a lumben sanai saidam?” Jisun jalangle gameten “anosai kambol lingan eten anidolan daku?”

Anosai galam maran jalangle gamaten do Kitungan anosai gamte “Amben Gamang Kitungan a d’ong barij j’en, barij purardan, barij ranaptin do barij monnan batte timyemba. Bar toi-toi marnam a d’ong d’ong damnam ambrij timyema.” Jisun jalangle gameten “aman sakkai abyar-berre! Kanate luma, etteden aman m’engtam.”

Bindo anosai galam maran anin-daman abroittad-damnaben itsuman-itsumle ualeten “Toi-toi marhen buten?”

Jisun anosai galam maran a d’ong bo arapsuiberan opungle jalangeten. “Bo mandra Jirusalem saring Jeriko gardaban yereten.

Manran angante yereten, kun ayam lingan anin bo ompu ruju maranji batte anab gegen dele. Amangan a dakulen a kudub janaban aninji pangle yerreji do anin a d’ong abraud tidleji anta tiki aninji yerreji.”

Kun ayam lingan bo Juda buya kun a tangor sanle yereten. Angante a raud maran a d’ong kun buya gijeten anin tagoran sadle mittal padle yereten, ayengan a manra sanayaman sanai-sai dakule kun a manra saring mordengle yereten.”

“Ante saring asui ayam lingan, kun a tagor sanle bo Lebi maran yeraiten. Lebi aboi Judanji a jati, butente buyanji a d’ong sarebasing lingan sayamleji. Lebi maran janang kun a tagor sadle mittal padle yerre kun a raud maran, butente a d’ong ruju maranji ruijleji do tanidan jumle a g’ungle a manra saring mordengle yereten.

“Anta tiki ayam lingan, ayengante a manra kun a tagor sanle yereten ani bo Sameriya mar dakule. (Sameriyanji a maranji Judan a teganji na butente luka maranji ampara sidrunglenji). Sameriyanji do Judanji di-dargam arsanggemleji. Bindo, Sameriya maran angante kun Juda maran a d’ong gijeten, anin a d’ong asuyemdale. Anten asan anin a d’ong sagaleten do anin a panaran gosodeten.”

“Ante saring ku Sameriya maran kun manran a d’ong abdile a pekuddam lingan a bolgoble do tagoran adamba bo barituna-singban urungeten, tette anin a d’ong sagaleten.”

“Anabiyo, kun Sameriya maran anin a hanagod lingan yereten. Anin barituna-singan a tur-turren a manra a d’ong dajing Lebun tiyle opungeten “anin a d’ong sagala do kan saring bogad aman ateng karsulenden, etteden hen a dayartaen ayam lingan kuddub karsunamji abyartam.”

Ante saring Jisun anin anosai galam maran a d’ong ualeten “Aman eten ogalte? Kan yagi manra lingan saring ruju maranji a s’i ling a galulen a manra atoi-toijmar buten? Anin jalangle, “Butente anin a d’ong asuyeman absuijeten, anin.” Jisun anin a d’ong gameten “Ettegoi na aman janang ma e luma.”