29. Er-asuyem boantan arapsuiber

Bo dinna Pitor Jisun a d’ong ualeten, “E Hang-hangmar, angante buhanghen asanggem ling hen irsen lumetenden hen anin a d’ong dajin tara tanamadan tiai? Gulji tara sikkoija po? Jisun gameten “gulji tara ted, bindo Yakkurdi-gaji tarding gulji tara sikkoija!” Kan batte, Jisun a opungeten a garamgaman dakule do “Anlen tordong a tabmadben dete na.” Ante saring Jisun aboi arabsuij beran opungeten.

Jisun gameten “Kitungan a rajaman kan ambrij, bo rajan ambrij, butente anin a boantanji ampara goble rirdan a sujjiben asan ogaleten. Anin a boantanji saring bo mandra 2,00,000 mihun ateng rerdan pangeten.

Kun boantan rirdan abyartiyben adraptiad, anten asan rajan gamete “kan a mandra do a birindan a d’ong teman temle a rerdan a danul-dulan d’ete.”

Kun boantan rajan a jingba sid-damlen gameten ‘abasuyem gamle hen abmele uyubsayena, do mangling nam a daku kuddub rerda henji hen abyartiytam.’ Rajan kun boantan a d’ong asuyemdale, anten asan anin a rerdan kudduban abureten.

Bindo kun boantan angante rajan amang saring yereten, ante adnang anin bar bo a turdu boantan rabangle, butente a mangan saring Unji anggai a rerda abyarben dakule. Ku boantan anin a turdu boantan a sankan hamle opungeten “manghen saring a pangle a rerda abyarih!”

“A turdu boantan kun a boanta a j’engba siddamlen gameten ‘abasuyem gamle hen asan uyubsayena, do hen a pangle a kuddub rerda d’ong nam abyartam. ‘Bindo ettele a gameten dam anin rerdan abyarten sikkoija anin a d’ong karoijjosing lingan sideten.

“Ayengan a boantaji kan a kudduban gijleji, aninji dukkadaleji. Aninji rajan a mangba iyle kan a kuddub bernan gadlamleji.

“Rajan kun boantan a d’ong gudingle gameten, “aman duaih boanta!” Aman d’onghe tanamadan a garrihen asan hen kuddub rerdanam aburrlam! Aman janan hadab kan ambrij a lumben dakule badih. ‘Rajan ateng a barabdalen asan kun duaih boantan a kuddub rerdan abyartiyten sikkoija karoijjosing linga sideten.

Ante saring Jisun gameten “ayengante a mandra a buhanganji a d’ong tanamadan atiye Ruang lingan Ua Hen janang aninji a lananka lingan kun ambrij abmete.”