3. Golingdan

Ateng ayam atiki, Ordar lingan ateng mandranji basuleji. Aninji karran duaih do idal-dam dakuleji. Dijhne pansardin dele do, Kitungan barij Ordaran surda golengdan batte absi’dben apsele gabrz-je’neten.

Bindo, Noa Kitungan a ganij-gij lingan asuyem hanrang-mar dakule. Anin ersz maranji a tarangdi lingan roitad mandrengnan abhanaeten. Gamang Kitungan goling-dan appai-taen apsele Noan ado’ng gadlameten. Anin Noa ado’ng aboi surda engda bungsangan sabjaben asan baiheten.

Ajanalen 140 miter, a lana’ngan 23 miter, bar a lanankan 13.5 miter, aboi engdasingan sabjaben asan Kitungan Noa ado’ng baiheten. Kan ate aran batte do yagi tarding lingan ateng akkul-singan, aboi balengan do aboi kintal-singan sabjaben asan opungeten. Kan a engdasingan gollingdan ayam lingan Noan, asi’ng maranji do kuddub janab asar-sol lingan Jontunji ado’ng dangrable dakkute.

Noa Kitungan aberna mannzeten. Kitungan engale opungeten, Noa do yagi a onger onanji ettigoina engda-si’ngan sabjaleji. Engdasingan sabjaben asan ateng minhum dingle, eten asan gamlenden bungsangan ateng surda dakule. Ayertaen a golingdan apsele Noa mandranji ado’ng abkzl-kzle dakulen do Kitungan atimangban daiyarben asan opungetenji, bindo aninji anin abernan addirnadji.

Kitungan Noan do a si’ng-maranji ado’ng aninjidam bar Jontunji apsele tulladage ganagan rukuben asan opungeten. Angante kudduban anoskaiyan dele, Noan ado’ng Kitungang gameten, “nami aman, dukri-nam, 3 onnamji bar a insalonji; kudduban 8 mandra engdasingan alung gannaben ayam arduaiten”.

Kitungan jontunji do anengtidanji a dile jatti similinji a do’ng, Noan amang abamjingeten. Yante gamle golingdan ayam lingan aninji engdasing lingan zrabmuij rapti dakutenji. Gamangtungan kanuban asan tan-gulji onger do insalo kuddub-jontunji Noan amang abamjingeten. Aninji angante bungsang lingan dakuleji, Gamang Kitungan sanangan ingadeten.

Ante saring karran ganurben susule. 40 dinna do 40 togal, er kaddablabe ganurle. Ordaran alanka da’n a hangben susule. Ordaran a kuddub lingan, ednegoi do kuddub saring lanka barun janang da’n batte sosoben uneten.

Engdasingan alung lingan adakulen a mandranji do jontunji do anengtidanji sadan sadle Ordaran a basulen a kuddub tanongyem purardanji kahidaileji. Engdasingan da’n alanaka pingdale dakule bar engdasing lingan adakulen kuddubanji ado’ng ablule dakkueten.

Ganuran kaddablen atiki, endasingan 5 angai sikoija da’n alananka pingdale dakule, bar kan ayam lingan d’an tarudle pangeten. Ante saring bo dinna engdasingan, bo muttibwr lingan adlen bindo kan ayam sikoija Ordaran da’n lingan tabuble dakule. Bar yagi anggai atiki, a muttibwranji gijtale.

Bar 40 dinna atiki da’n ahadle ordi ijja, kan ate agijben asan Noa aboi Kakan ado’ng bayeran abengeten. Kakan aparung darakunan asan saile, engle gorodle, bindo adrabangad.

Ante atiki Noa okij aboi ontidan manan Kukkuran ado’ng bayeran abengeten. Bindo anin janang aparung darakunan adrabangad, anten asan Noan amangban daiyeraiten. Bo-palli atiki Noa bar-okij Kukkuran abengle bar anin Jito neban a ledeng olan pakuble daiyeraiten. Da’n derga tarudle do ne’ebanji bar-okij marangle.

Noa bar okij bo palli omdzlen atiki anab-yagi-tara Kukkuran bayeran abengeten. Nami anin lulunaben asan darakunan hangan hangle okij addayaraiten. Da’n derga derga tarudle.

Bagu angai atiki Kitungang Noa ado’ng gameten, si’ng-marnamji do kuddub jontu-ontedanji bar aman, engdasingan saring rapti adungten. Ateng o’nan do udleng-onan kudle Ordaran badrijba. Ante saring Noa do asi’ng-maranji endasingan saring dunglenaiji.

Noa engdasingan saring dunglenaen atiki, anin aboi kanub arangan oskaieten bar kanuban apsele sanaisai-dage jontunji saring dajingante janab jontunji pangle kanuban kubeten. Kitungan kanub-kub lingan mo’ihle. Noa do asi’ng maranji ado’ng absittaeten.

Kitungan gameten, “Hen jib-jibtenai do mandran asan okij ordaran adnangai orde, bogad parsij ayam saring mandran pansardi deleji janangden Hen okij ordaran golingdan batte adnab-si’dai.

Janzbjzban a bo a rabmadge Kitungan riang lingan abmang irdinbongan amdungle. Dile tordong angante riang lingana irdinbongan gijtate, Gamangtungan Anin a janzbjzban ayemte, kun ambrijna mandranji janang lumteji. Baibolan a bo kattaberan: Aparmangta 6-8 Tanub