32. Jisun bo hamkul maran do bo bim-bim boijan a d’ong absamangte.

Bo dinna, Jisun do a hanangna maranji bo bungsang lingan daidle Garasiya baiji a basutenji a ganing mittal pardiba yerreji.

Agante aninji ganingan amittal maneng arduleji, bo hamkul maran Jisun adamba aduduge yeraiten.

Kan a mandra amang ateng ranaptin a dakulen asan anin ado’ng buteja abladnale adraptiadji. Mandranji anin akumbul si’nji do ajingan kuddub sikardi langan batte jileji, bindo anin kun a kuddub tadle sideten.

Kun desalingan adakulen a kintalodring kan a mandra basueten. Kan a mandra dile dinna do dile togal uai logi gule dakunetin. Anin sindrija adjijinad bar ateng ayam areng lingan siddamlin aninn-daman appara-damneten.

Agante anin Jisun adamba yeraiten, anin amukaban turdum jingnlin sid-damneten. Jisun kun kulman ado’ng gameten “kan a mandra saring dunglin yerai! “

Hamkul maran surda sarrangan batte gameten “E kuddub saring lananka Kitungan a On Jisu aman bar hen eten amaina daku? Abasuyem gamle abkal-kal dogih. Ante saring Jisun kun kulman ad’ong ualle gameten “ahim nam eten?” anin gameten “ahim hen Kanuduai, eten asan gamlenden allen ateng.” (Rom sanu ompu lingan a dakun ateng ajjar saring bo ompu.)

Kulmanji Jisun ado’ng labyule order garberre gamleji “abasuyem gamle allenji ad’ong kan a darakuna ling saring biggarda appai donglen!” Kan adamba bo baru lingan bo maranda kambunanji saijumlenji. Anten asan, kun kulmanji garberre gamleji “kan apanardu do'nglen kun onla bun lingan appailen!” Jisun gameten “Yerba!”

Kulmanji anta mandran saring dunglin yerre onla bun lingan ganleji. Kun kambunanji barun alanka saring aduduge ladsole yerre ganing ligan tabuble kahidleji. Kun kambunanji a danisam 2000 ambrij maranda lingan dakuleji.

Ayengan a mandraji kambunanji a do’ng gupaleji aninji eten deli antate gijleji, aninji gardaban aduduge yerreji do Jisun eten-eten lumle antate aninji dajingante mandranji rabangleji kuddubanji gadlamleji. Gardan saring a dakulenji a mandranji yerre abmang a hamkullen a mandra a do’ng eten-eten dele kun a kuddub gijleji. Anin lanagadan batte, sindrin jijian jijilen lagad monnan batte bangsa maran ambrij a gobeten ate gijleji.

Mandranji boi-boi bantongijdage deleji bar aninji a desanji a tannodban saring Jisun a do’ng dunglen a yerben asan opungleji. Ante asan Jisun bungsang lingan daidle a yerben asan oskaineten. Ayengan a mandra ham-kulle anin Jisun ampra a yerben asan anin a do’ng garbereten.

Bindo Jisun anin a do’ng gameten “Ijja, hen ogaltai, aman S'ingba-nam yera do gardi-namji do kulam-namji a d’ong Kitungan aman apsele etente-etente lumeten do aman apsele etente asuyeman absuijamten kun a kuddub e opunga.”

Anten asan kun a mandra a tangor daman yereten do Jisun anin apsele etente-etente lumeten kun a kuddub bernan gadlameten. Butente anin abernan amdangleji aninji rubmangdage do bantongij-dage daleji.

Jisun ganingan a mittal pardiba dayarre yereten. Anin tedte ardulen atiki, bo surda onla maranji rukkulenji do anin alanka arrungdang-rungdangleji. Onla marlingan saring bo Insalon miggal mihum sikkoija jarammi bembem ling dakule. Anin ateng tiyre maranji amang yerre sanamangan a deben asan kuddub bittin karsule bindo dinnan saring dinnan ayaman osantan er-bangsantum dele.

Anin amdangle do Jisun ateng bem-bem maranji a do'ng absamageten bar ogalle “Jardijtenna hen Jisun a sendrin sattan mai jablaenden, hen sanamangan hangtai.” Anten asan anin Jisun a kandungban iyan iyle a sendrin jabeten. Angante anin sendrin jabeten anten adnang a jarammi bem-bem man kaddablen.

Tabdong Jisun amangang saring ranaptin dunglen a yerre ate a j'e lingan galamle. Anten asan anin dayargudlen gameten “buten do'nghen jabeten?”

Hanangna maranji jalangleji “ateng mandra yar-yar maneng nam dakuji do arrungdang-rungdang-tamji. Eten asan ”do'nghen buten jabeten?” gamle opungte? Kun insalo boijan Jisun a mukaba turdumle siddamlin, anin takarre do boi-boi batongle. Anin eten lumeten, kun a kuddub opungeten do anin sanamangan hangeten. Jisun anin a do'ng gameten “derna-nam absamanglam. Sanabyu lingan yera.”