33. Orro maran arapsuijber

Bo dinna, Jisun ganingan a pardiba bo surda onla maranji a d’ong hanangan tieten. Ateng mandra amdangben asan Jisun amangba yerraeji bar yante gamle hadab darakunan saring mandranji a d’ong hanangan rapti tiyte anten asan anin pardiba a maneng bo bungsang lingan goble. Anin bungsang lingan gobangoble mandranji a d’ong hanangan tieten.

Jisun kan a kataber opungle. “Bo Orro maran oseng jabmolan a bwdben asan dungle yereten. Anin agante asi'n batte jabmolan bwdeten, dajing jabmolan tangor lingan galule, do ontidanji kun jabmolan iylai jumeji.”

“Biggarda a jabmolanji ate talasol lingan galule, u’ante asui labon dakule. Talasol lingan a dakulen a jabmol tabdong gurdible, bindo kun ajedanji jarusol lingan rapti a gganad. Agante dungyungle do dagale, ne'ban baldedle do kahidle.”

“Deli janang biggarda a jabmol ate ebba nebanji a tarangdi lingan galule. Kan a kuddub jabmol a marangben susule, bindo ebbanji kun a kuddub ladladle sidleji.

“Biggarda a Jabmolanji bangsa sol lingan galule. Dajingante jabmolan banwdan dele, kun a kuddub jabmolan marangle 30, 60, do kan ambrij 100 tarding sikkoija jandruman j'ole. Butente amdangben asan aludan daku, anin amdangete!”

Kan a kataber orde arabsuiberan hanangna maranji a d’ong ge-geyim dagi abme'ten. Anten asan Jisun gadlamle opungetenji, “Jabmolan Kitungan a bernan na. Tangoran ate ayengan a mandra Kitungan a berna amdangte aninna, bindo anin rapti aggalame, do duaih suman amangan saring bernan panle yerte.”

“Talasol lingan ate kun a mandra na butente Kitungan a berna amdangte do man'oihan batte antate jate. Bindo angante anin kanalkalan do tanamderan a imdamna a j'elingan hangte, anin g’ungte.”

“Ebba-neb lingan a labon ate kun a mandra na butente Kitungan a berna amdangte, bindo agante ayaman yertai, a sagalten a bitti do kan a mandrengna ogir man’oihan Kitungan amang ling a dakuten a tanimyeman abladnale pangeten.” Atam j'on ambrij, etente a hanangber anin amdangte antate j’on rapti adj'oe.”

“Bindo bangsa solan ate kun a mandra na, butente Kitungan a berna amdangte, derten, do j'on j'ote.”