34. Jisun biggarda a kataberanji orde arapsui beranji batte hanangan tiyte.

Kitungan a rajam a berna sanle Jisun bar okkij ateng kataberanji opungeten. Bo arapsuij ambrij, anin gameten “Ruang Rajaman bo Sarsu jaban ambrij, antate bo mandra a kuta lingan pideten. Amben a galamte do Sarsu jaban kuddub jabmolanji saring boi boi sannadam.

“Bindo angante Sarsu jaban marangte, kuta lingan kuddub ne’b banji saring boi boi surda dam date, bar Ontidanji kun a kandar linganji iytai basueji.”

Jisun bar aboi arapsui beran opungle “Kitungan a rajaman aboi Gabrungan ambrij, etente bo insalon pangle bandrai lingan kudduban a maitenan sikkoija oseng bandrai lingan maite.”

Kitungan a rajaman bar janang anabsoso bittin ambrij; etente bo mandra pangan pangle bo’ jannong lingan absosole dakkueten. Bo biggarda mandra kan asoso bittin rabangle do absosoeten. Anin boi-boi m'oihndale do iyan iylen kuddub a bittin temeten do kun a jannong a hiben asan kun a bitti handrameten.”

“Kitungan a rajam aboi boi-boi janatti Muktan ambrij. Angante bo Mukta bebara maran kan ate gijeten, anin yeran yerre anindaman a kuddub teman temle kan a hiben asan kun a bitti handrameten.”

Anta tiki Jisun mandranji a d’ong aninji damam a bangsa bara lingan dera-derren biggarda mandranji a d’ong a pudyengtenji aberna sanle aboi kataberan opungle. Anin gameten “Bagu Mandra garbernaben asan sarebasingban yerreji. Aninji saring bo mandra Pannu mar do bo mandra Roitad Hang-hangmar dakule.”

“Kun roitad hang-hang maran kan ambrij garbereten, “E Kitung hen d’ongnam sintai do hen biggarda mandranji ambrij pintu marted, yante gamle manan jumbwran, er-roitad, janundarda, orde kan pannu maran abrij janang ted.”

“Arabsuijan ambrij, hen dile Palli bagu tara anamtenai, do a hanglaen a bitti do janab saring kuddud galji tanuban a mittub tiytai.

“Bindo Pannu maran roitad hang-hang maran saring aten sangai tanangle do ruangban a manggeben adnuyubad. Bindo anin atal s’in batte amayongan tadle do garberre gameten, “E Kitung, abasuyem gamle lananka linghen abasuyemih, eten asan gamlenden hen bo’ pintu mar.”

Ante saring Jusun gameten, “Jardihten-na he d’ongben opungtaben, Kitungan Pannu maran a garberan amdangle do anin roitad danisaman hangeten. Bindo kun roitad hang-hang maran a garber adnam dangad. Butente abgugudamten, Kitungan anin a d’ongan abladnate, do butente ablaggaddamten, Kitungan anin a d’ong abgugute.