35. Asuyem mar U’an a kataber

Bo dinna, butente Jisun abernan amdangben asan rukkulenji kun onla maranji a d’ong hanangan tiyeten. Kan amandraji pannu maranji do aninji ampra beggarda maranji janang butente Mojes a banaih beran a manneben asan adnogaladji.

Tedte adakulenji dajing anosaij abmangod maranji Jisun a d’ong pintu maranji ampra gardin ambrij adakulenanji ate gijleji do aninji asanggem lingan arber-dale arbadeleji. Anten asan Jisun aninji a d’ong kan arapsuij beran opungeten.

“Bo mandra bagu dangarda onanji dakule. A tiki onan a u’an a d’ong gameten, U’ang, bittin saring etente atanuban dane-hen daku antate hen ti-ih! Anten asan a u’an bagu onger onanji a d’ong bantile tiyetenji.”

“A tiki onan kuddub a bittin tartumle sagai desaban yereten do barij anogir pansardi baralingan a mandrengnan abhanaben asan a bittin absi’deten.”

“Anta tiki, a sanna o’nan ayengan a desaling dakule, kun desalingan bo surda Kantaran dele, do ganagan ahiben asan amang lingan tankan adakuad. Anten asan Kambunanji a gupaben a bara sattan anin hangeten. Anin boi-boi tungdam-jaddam danukan do danulaih lingan a dakulen asan anin kambunanji a janumjum a jumben asan ogaleten.”

“A tanakud lingan, a tiki onger o’nan anin gamdamneten, ‘Hen eten lumtai? U’ahen a kuddub boantanji apsele ateng ganagan daku, do hen tidne dulaijan batte kahidtih. Hen u’ahen amangba yerte do a boantanji ambrij d’ong hen a dakkuben asan opungtai.”

“Anten asan a tiki onger o’nan a u’an amangba S’ingan a yarnaben asan dungneten. Anin agante sangai dakule, a u’an sangai saring gijan gijle asuyemdale. Anin a onger o’nan adamba aduduge yerre kundrumeten do kur-kurtameten.”

“A onger o’nan gameten, U’ang, hen Kitungan a asanggem ling do asanggem ling nam pintun lumlai. On-nam gamle ganudingan a hangben asan hen tungna ted.”

“Bindo a u’an anin a boantanji saring bo mandra a d’ong gameten, umengle yerre kuddub saring bangsa Ongikaban pangaiba do o’nhen a d’ong abrotudba! Anin a s’i lingan Engsi do a j’ing lingan Panduihan tiyba. Ante saring kuddub saring buge a ontangan kabhidba do allen ganaga-janum-juman oskaile a m’oihnaba, eten asan gamlenden onger o’nhen karahidan dele, bindo nami anin m’engle! Anin ardodle, bindo nami ranabangan dele!”

“Anten asan mandranji m’oihnaben asan susuleji. Ateng ayam adeten abmang, jannong lingan a baratenan adeba onan s’ingban yeraiten. Anin ken-kenan do tongsengan a sanaddan rapti amdangle do eten dele gamle rubmang dage dele.”

“Anin a buhangan a yeraiten asan kan a kuddub m’anoih jumdaran anoskaiyan dele, kan a berena angante adeba onger onan giyjeten, anten adnang anin boi-boi barabdale do alung s’ingan aggannad. A u’an yerrai do aninji ampra man’oih jumdaran a lumben asan labyule garbereten, bindo anin adno-rdiad.”

Adeba onan a u’an ad’ong gameten “dihne mihum sikkoija hen manannen batte baranam lumle yerrai! Banaihber-nam hen anggoija adnarderlai, dele janang aman hen apsele a onmedan ja attiylih yante gamle hen gardi mar-henji ampara hen rapti m’oihtenai. Bindo ayengan a onger on-nam er-bangsa baralingan bitti-nam abs’idle s’ingban yeraiten, aman anin apsele kuddub saring buge a ontangan kabhidle!”

“A u’an anin a’dong gameten, O’on, aman tordong ayam hen ampara daku, etente henate ante a kuddub amanate. Bindo, allen apsele irdka man’oih alumben tungna dele, eten asan gamlenden buhang-nam karahidan dele, bar nami am’eng daku. Anin ardodle, bindo nami ranabangan dele!”