37. Jisun Lajar a d’ong karahidan saring abdite.

Bo dinna, Jisun bo panglang beran hangle do Lajar boi-boi asu lingan daku. Lajar do bagu a tonananji manan, Meri do Marta, Jisun adam kulam dakuleji. Jisun angante kan a panglang ber amdangle, anin gameten “Kan asu karahidan sikkoija ted, bindo Kitungan a ganugu panemengan apsale na.” Jisun a kulamanji a d’ong timyemeten bindo anin u’ante a darakunaling dakule tedte bagu-dinna dakuneten.

Bagu dinna takudle a tiki Jisun a hanangna maranji a d’ong gameten, “Jaba, anlen Juda desaban a yerba.” Hanangna maranji jalangle gamleji “E hang-hangmar asui ayam adnang mandranji d’ongnam a kabhidben asan ogalleji!” Jisun gameten “Gardi-len Lajar demadneten do anin a d’ong drimadnan saring abdeben detena.”

Jisun a hanangna maranji jalangle gamleji, E Hang-hang mar bogad Lajar demad-lenden anin deten. “Ante saring Jisun rojol-logi gameten, “Lajar kahidle. Yante gamle amben mangba-hen rapti a derten, anten asan hen tette adakulih, kan asan hen m’oihdatih.”

Jisun ante adnang Lajaran a gardaban yeraiten. Lajar kahidan kahidle andreng unji dinna tariltil lingan dakule. Martan Jisun a d’ong a rabangben yerre do gameten “ E Gamang bogad aman tedne dakulenanden ubba-hen akkahide badih. Bindo hen dertenai aman Kitungan a d’ong etente garte antate anin d’ongnam tiytam.”

Jisun jalangla gameten “Yanarmengan do Mandrengna Hen na. Butente mang-ling-Hen derten anin kahidlen janangden m’engte. Butente mang-ling-Hen derten anin anga janang akkahide. Kanate amamn derten po? “Martan jalangheten “U’u Gamang! Hen dertenai do aman Kitungan a Onan Kristun na.”

Anta tiki Meri ardule. Anin Jisun a j’engba turdumle gameten “E Gamang, bogad aman tedne dakulenanden ubba-hen akkahide badih. “Jisun aninji a d’ong u’alle gameten “Lajar a d’ong u’an a dakkule?” Aninji anin a d’ong gamleji “Taril-til l’ung lingan. Iyai do gija. “Ante saring Jisun edaneten.”

Tarilna s’ingan bo lugar dakule do a t’odlung lingan bo arengan ranuban dele. Jisun agante tarilna s’ingban ardule, anin aniji a d’ong gameten “arengan table sangai dedba. “Bindo Martan gameten “anin kahidan kahidle andreng unji-dinna dele. Andreng kodte s’ole.”

Jisun jalangle gameten “bogad aman derrenden Kitungan a ganugu panemengan gijte, gamle Hen opunglam, ijja po?” Anten asan aninji arengan table sangai dedleji.

Anta tiki Jisun Ruangban tered-madlen gameten “E U’ang, garberna Hen amdangten asan sentam. Aman dile tordong berna-Hen amdangte kun ate Hen galam, bindo ayar-yar a tananglen a onla mandraji asan Hen kanate opungtai. “Ante saring Jisun surda sarrang batte gameten “E Lajar dunglen yerai.”

Anten asan Lajar dunglen yeraiten! Kun ayam adnang janang anin tariltil-lung-kaban batte ambnolod dakule. Jisun aninji a d’ong gameten “Kan tariltil-lung-kaban a d’ong lingan saring table a d’ong lingan abnolodanji urba!” Jisun kan a rubmang baran asan ateng Juda maranji anin amang lingan derrenji.

Bindo Juda maranji a murda buyanji barabdaleji, anten asan yangamle Jisun do Lajar a d’ong a kabhidben dete antate rukkulen arber-daleji.