38. Jisun a d’ong asanggem maranji a s’i ling sanurpidan dele

Dele mihuman Judanji Anelai Abduran lumle yerraiji. Ateng s’oa mihum a purba, Kitungan yangamle purban a mandranji a d’ong b’oanta mandrengnan saring tandile urungaitenji, kaninna kun abduran. Jisun anur-dage do hanang baran asusulen yagi-mihum a tiki a hanangna maranji a d’ong Jirusalem lingan aninji ampara Anelai Abduran a lumben asan ogaleten do tette anin a d’ong kanabhidan deti.

Jisun a hanangna maranji saring Iskariyot Juda gamle a himan bo hanangna maran dakule. Iskariyot Judan hanagna maranji a darakku tanka a sagalben apsele tanabgijan dele, bindo anin tanka gijmadle do ateng ayam kun darakku tanka lingan saring tanka (Lebun) jumbwreten. Jisun do a hanangna maranji Jirusalem ardulenji atiki Iskariyot Judan Lebun a panardu Jisun a d’ong asanggem maranji a s’i ling a surped ben asan Judanji abmang-god mar amangba iyeten. Jisun Kristun na gamle Judanji abmang-god maranji a dernadji do aninji Jisun a d’ong a kabhidben asan oskailenji gamle kan ate Iskariyot Juda galameten.

Judanji abmangod maranji do murda buyanji batte Jisun a d’ong asanggem maranji a s’i ling a surpedben asan Bonkurdi-galji terder ruppa lebun tiyleji. Tungmaggij maranji atam bernan ambrij kanate ojoraile. Isakariyot Juda kanate ordean ordele lebun dongsile yereten. Anin yante gamle Jisun a d’ong hamle asanggem maranji a s’i lingan surpidte atabmele royongan saijeten.

Jirusalem lingan Jisun a hanangna maranji ampara anelai abduran lumleji. Anelai abduran a jumlenji ayamlingan, Jisun ruti pun pangan pangle pijeten. Anin gameten “Naba, kan jumba. Kanate d’ong-Hen, etente amben apsele taniyan deli. D’ong-Hen ayemben asan kan lumba. “Kan ambrij Jisun gameten aninji apsel a d’ongan kanuban dete.

Ante saring Jisun bo pinsaman hamle do gameten “Kan g’aba. Kanate tabme anosaijhen a mihaman na, etente pintun a tanamad apsele lanan dele. Amben dile ayam lingan kan a gaten adnang d’ong-Hen ayemba.”

Ante saring Jisun a hanagna maranji a d’ong gameten “mangling ben saring bo mandra d’ong-Hen asanggem maranji a s’i ling surpitih.” Hanangna maranji bantongij dage deleji do kan ambrij a bara buten lumte gamle u’alleji. Jisun gameten “Hen ayengan a mandra a d’ong kan ruti pun pijle tiytai anin d’ong-Hen asanggem maranji a s’i ling a surpitihen a mandra na. “ante saring anin kun a rutipu Iskariyot Juda a d’ong tiyle.

Iskariyot Juda kun a panijan a rutipu jalen a tiki duai-suman a d’ong lingan ganeten. Iskariyot Juda kun saring dunglen yerre do Jisun a d’ong a hamben asan Juadan abmangod maranji a d’ong a sayamben yereten. Kun ayam adnag togalle.

Togal jumdaran takudlen a tiki Jisun do a hanangna maranji halen-halen Jeto baruban yerreji. Jisun gameten “Amben kudduben d’ong-Hen a umdrengtih. Anidan daku “Hen gupa maran a d’ong tidtai do marandan a murkundardanji barsing gardaige deteji.

Pitor jalangle opungeten “kuddub mandra d’ong- Nam umrengteji, bindo hen adnumrengai!” Jisun Pitor a d’ng jalangle gameten “Duai suman amben kudduben ampara a dakunaben asan ogalte bindo Pitor yante gamle derna-nam abalaiye kan apsele Hen garberrai. Kan ambrij do, nami a togalan, tardariman endrang ulen adnag aman yagi-tara adnabpengba-ih.”

Ante saring Pitor Jisun a d’ong gameten “hen a kahidben delen janagden, anga janangden d’ong-Nam adsosolangnai!” Ettegoi janang kuddub hanangna maranji gamleji.

Ante saring Jisun a hanangna maranji ampara Getsemani ahiman bo darakunaban yerreji. Yante gamle hanangna maranji tanunjing linga agganeji ante apsele Jisun a hanangna maranji a d’ong a garbernaben asan baihetenji. Ante saring Jisun a garbernaben asan yereten.

Jisun yagi-tara garberneten “E U’a-Hen, bogad rapti delenden, etteden kan a pinsaman temang-Hen saring sangaijete. Bindo mandranji a tanamad asan bogad kan sadan-sadle okkij eteja agasa, etteden itsumnam ojoraete. “ Jisun boi-boi dukkadale do anin a uhulan surda janatad mihaman ambrij dele. Anin a d’ong arabduben asan Kitungan anin amangban bo pinsirdian appaieten.

Dile ayaman ambrij garberan kaddablen atiki, Jisun a hanangna maranji a mang yeraiten bindo boi-boi demad-daleje. Anin anab-yagi-tara a yarnaiten adnang Jisun gamaten “Denaba, banansi mar-Hen andreng arduaiten.

Iskariyot Judan abmangod maranji, sanu maranji do onla maranji ampara yeraiten. Aninji kardiban do tanapo tudanji donsileji. Iskoriyot Judan Jisun adamba yeran-yerre gameten “E Hang-hang-mar lemtam” do anin a d’ong kur-kurtameten. Judan abmanggod maranji bute a d’ong a hamben dete kaninna arabmadan dakule. Ante saring Jisun gameten “E Isakariyot Juda kanur-kur-kurtaman batte po aman d’ong-Hen asanggem maranji a s’i ling surpidtih?”

Angante sanu maranji Jisun a d’ong hamleji, Pitor a kardiban table do gugu buyan a boantan a d’ong sabludeten. Jisu gameten “Kardiban sangai dakkua! D’ong-Hen a dangraben asan pisirdianji bo ompu U’a-Hen a d’ong rapti gartai. Bindo Hen U’a-Hen anosaijan a manneben dete. “Ante saring Jisun kun a mandra a ludan absamangeten. Jisun hanaman delen atiki kuddub hanangna maranji aduduge yerreji.