40. Jisun arakkadang lingan anamdaijan dele.

Turkanji Jisun a d’ong gabroilenji a tiki, aninji arakkadang lingan amdaiben asan anin a d’ong urungleji. Anin ayengante arakkadang ling tanangan dete kun arakkadang adtambedlaji.

Turkanji “a jangbab” a himan aboi darakunaban urungleji do arakkadanglingan atal s’in do atal j’eng lingan gojalan batte tangleji. Bindo Jisun gameten “E U’ang aninji a d’ong tabmada, eten asan gamlenden etente aninji lumteji antate aninji aggalameji.” “JUDANJI A RAJA” gamle idle Jisun a b’oban a lanka abjidben asan Pilat aninji a d’ong gameten.

Turkanji Jisun a sindri apsel karamma ganijan gijleji. Angante aninji kan lumleji anopungan adelen a tungmaggij beran ojoraile. “Aninji sindri Hen banteleji do sindri Hen apsele karamma ganijan gijleji.”

Jisun a d’ong bagu jumbwr maranji a tarangdi ling arakkadang lingan tanangan dele. Aninji saring bo mandra Jisun a d’ong gabroijeten, bindo bo biggarda mandra gameten “aman Kitungan a d’ong abbantonge po?” Anlen danusa maranji, bindo kan a mandra adanusan agasa. “Ante saring anin Jisun a d’ong gameten “abasuyem gamle rajam lingnam d’ong hen ayemih. Jisun anin a d’ong gameten “nami aman Hen ampara paradis lingan dakuten.

Judan abmangod maranji do onla maranji saring ateng Jisun a d’ong goiberre gabroimadleji. Aninji anin a d’ong gamleji “Bogad aman Kitungan a O’n den arakkadang lingan saring ladsolen yerai do d’ong nam dangraba! Etteden anlen d’ong nam a dertenai.”

Ante saring anta ayam tengbobyungan delen janagden kuddu maneng riangan lugud-dam dele. Tengbobyungan ayam dele janangden lungud-dam dele do yagi-gonta sikkoija lugudle.

Ante saring Jisun uai sarrangan batte gudingle gameten “takudle! E U’ang Jangarda-Hen s’i ling-Nam-Hen surpidtai. “Anta tiki anin labduij-babneten do purardan omdale. Angante anin purardan omdale, kun adnang yurlon dele do sareba singan ayengan a danang-kaban Kitungan a temangba saring mandranji a d’ong abansale dakkueten antate langkan saring jaittan sikkoija r’idle bartung dale.

Jisun a karahidan batte mandranji a d’ong Kitungan adamba ayerben asan tangoran ranen dele. Jisun a d’ong a tur-turrenji a turkanji angante kan a kuddub a delen ate gijleji anin gametenji “Jarditihna anin er-dusa mar dakule. Anin Kitungan a O’n dakule.”

Ante saring Josep do Nikodemas, Jisun a d’ong a derrenanji bagu Judan abmang-god maranji Jisun a mardu a pangben asan Pilat amang saring anorden pangleji. Aninji aboi sindrin batte anin a d’ongan bolongle etente atariltilan areng lingan anganailung dakule tette antate dakkuleji. Ante saring aninji tariltillung lingan a t’odban bo surda arengan kudle ruble yerreji.