43. Ranukkun a susunan

Jisun ruangan a daiyaretenan atiki, Jisun engale baihetenji kun ambrijna hanangna maranji Jerusalem lingan dakulenji. Derna maranji tedte garbernaben asan dile tordong abo rukkun dakulenji.

Anelai abduran 50 dinna a tiki dile minhum Juda maranji Pentikosto a himan bo murda dinnan aninji manneleji. Pentikosto gamlenden kun ayaman angante Juda maranji janruman a gadben abduran lumleji. Pentikosto abo-maina lumben asan Juda maranji Jerusalemban yerraiji. Kan a minhum lingan Jisun ruangban dailen bo palli a tiki Pentikosto dinnan yerraiten.

Dernamaranji angante abo-rukkun dakuleji, ayengante asi’ ng lingan aninji dakulenji beyaringan ambrij a sanadan kun a darakuna lingan barijle. Anta tiki togin ambrij la’nganji kuddub derna marannji a bob lingan ganijtan dele. Kun kuddubanji Marid Janggardan batte banarijan deleji bar beggarda beggarda lang langan batte bernan opungben su-suulenji.

Angante jerusalem lingan a dakulen a mandranji kan a sanadan amdangleji, iten dele antate gijben apsele rukumarle. Kitungan a rubmang lanuman derna maranrji a oblenglenji ate mandranji angante amdangleji, aninji rubmangdaleji eten asan gamlenden aninji antate aninji a lang langanji batte a berrenanji ate amdangleji.

Dajingante mandraji hanangna maranji tadaileji gamle dababerleji. Bindo Pitor tanangle aninji a d’ong gameten, “Berna hen amdangba , kan a kuddub mandra attadaiyadji! Kan ate Joel a tungmadgijlen a tungmadgijberan anojoraiyan dele, do uante Kitungan gameten do, “Tanakud ayam lingan Anlen a Janggardan a latai.”

“E Israel a mandranji, Jisun bo Mandra dakule butente Kitungan a ranaptin batten ateng gugu do rubmang baran lumeten, itente amben agijle bar agalamle. Bindo amben anin adong arakadang lingan a tangle.”

“Jisun kahidle, dele janangden Kitungan anin a d’ong karahidan saring abdieten. Kan ate kan a tungmadgijberan abojoraite, itente gamte, “ Aman marid maranji adong tariltil lu’ng lingan a sz’dben asan royongan attie. “Kitungan Jisun a d’ong bar okij mandrengnan tieten, anlenji kan ate sakki daku.

“Nami Jisun Ua’n a janrumsengban a gobgob daku. Bar Jisun yate gamle Marid Janggardan appaitai gamle oppungeten, kuni ambrijna Marid Janggadan a d’ong appaiyaiten. Nami amben itente abernan a gijte bar amdangte kan a kuddub Marid Janggardan abojorayete.

“Kan a Jisun a d’ong amben arakadang lingan a tangle. Bindo jardijten gamle galamba do Kitungan Jisun a d’ong Gamangtung bar Kristun aps’eten.”

Mandranji Pitor a berna amdangleji, bar anin a opunglen a bernan asan jaruloge uptztmoleji. Anten asan aninji Pitor bar beggarda hanangna maranji a d’ong ualleji, “E buhanganji anlen eten alumai?”

Pitor aninji a d’ong jalangatenji, “Amben dile mandran Gamangtung Jisun a Him lingan tabubdan deba yante gamle Kitungan pintubenji tabmate. Anta tiki Marid Janggardan a taniytiyan tiytaben.”

3000 ambrij a mandra Pitor anobleng beran deran derren Jisun a hanagna maranji deleji. Aninji deran derren Jerusalem a ranukku lingan abo tanub maranji deleji.

Hanangna maranji er kaddablabe abmang derna maranji a hanangan amdangleji, abo tanurdu lingan dakulenji, bar mailen garberlenji. Aninji abo tanurdu lingan Kitungan adong sempurben asan mo’inleji. Bar aninji ate itente dakule di dargamanji ampara banteleji. Dile mandran kuddubanji a banangsan ogalleji. Di-dina derna maranji a danisaman aurle.