44. Pitor do Jon bo gardemaran ado’ng absamangteji.

Bo dinna Pitor do Jon Sarebasingan yerreji. Aninji angante sarebasingan a garanaban arduleji, aninji aboi gardemaran a d’ong rabangleji.

Pitor gardemaran atimang tanangan tangmadle gijgijle gameten, “Tiyben asan manghen tankan agasa. Bindo manghen itente daku antate ma’ih do’ngnam tiytam. Najarita Jisun a him lingan diandzlen hana.

Tabdong Kitungan kun a gardemaran a d’ong absamangeten, bar yar yar maneng leledamlen hanaben susule. Sarebasingan a rondardi lingan a dakulen a mandraji rubmangdeleji.

Butente a mandara samangle anin a d'ong gijben asan onlamaranji iylaiji. Pitor aninji a d'ong gametenji, “Kan a mandra samanglen asan ambenji iten asan dakadne rubmangdataben? Ranaptilen orde banangsalen batte kun a mandra er ab-samang. Osantan, kanate Jisun a ranaptzn do Jisun a tietin a dernan na kun a mandran a d’ong absamangeten.”

Ambenna Jisun a d’ong kabhidben asan Rom anabhana maranji a d’ong abaile. Ambenji mandrengnatiy maran a d’ong a kabhidle, bindo Kitungan anin a d’ong karahidan saring abdzeten. Ambenji itente a kuddub alumte antate aggalamle janangden, Kristun kanalkalan hangle karahidan hangte kan a tungmadgij-beranji abojoraiben asan Kitungan baraben batte abojorayeten. Anten asan nami abyarj’enaba do Kitungan amangban daiyaraiba, yante gamle pintuben manadridan dete.

Pitor do Jon etente opungleji antate amdangan amdangle sarebasingan abmangod maranji kalai-bzllaige deleji. Anten asan ninji aninji-a d'ong bondile karoijosing lingan dakkuleji. Bindo ateng mandranji Pitor anobleng-beran derrenji bar Jisun a d'ong a derrenanji a mandranji a danisam 5000 lingan ardueten.

Anab-biyo Pitor bar Jon a d’ong murda buyanji do beggarda roitagod hang hang maranji amangban urunglaiji. Aninji Pitor do John a d’ong ualleji, “eten a ranapti batte kan a garde mar a d’ong amben absamangle?”

Pitor aninji a d'ong jalangetenji, “Kan a mandra Jisu Kristun a ranabten batte sanamangan dean dele a tanang daku. Amben Jisu Kristun a d’ong arakadang lingan a tangle, bindo Kitungan Anin a d’ong bar okij abyarmengeten! Amben Anin a d’ong adja’d bindo danangraban a hangben asan Jisun a ranaptin sadle iteja tangoran agasa.

Pitor do Jon dijne anuyuban batte bernan a oblenglenji ate gijan gijle abmanggod maranji rubmangdaleji. Eten asan gamlenden aninji gijleji do kan aninji oseng maranji butente er hangolmarji dakuleji. Bindo tiki aninji ayemle ji do kan aninji Jisun ampara dakuleji. Aninji Pitor do Jon a d’ong battongan battongle umrengleji.