46. Stipan a d'ong a kabhidlenji a mandraji a sendrin a turtureten a dangarda-mar Sol dakule.

Anin Jisun a manglingan a dderneten, anten asan anin derna maranji ado'ng abkal-kaletenji. Ongeranji do insalonji yante gamle anin jile pangben asan anin Jerusalemban adakulin dile derna maranji asi'ng lingan ganeten bar karoijo sing lingan pidetinji. Damasika lingan a dakulinji a kristu maranji a do'ng yante gamle Sol hamle Jerusalemban urungte anten asan anin murda buyan anin a d’ong anorden tiyeten. Sol angante Damasika tangor lingan yereten, riangan saring aboi surda tana'r panuangan anin a yaryar maneng puangle bar anin labo lingan gu'ngle.

Bo mandra butente kan a bernan a gameten a sarrangan Sol amdangeten," e Sol! e Sol! aman iten asan do'nghen tamdertih?" Sol ualeten “E Gamang aman buten?” Jisun jalangle gameten" Hen Jisun na.” Aman do'nghen tamdertih!" Sol angante deneten, anin iteja gijle adraptiad.

Anin a turdu maranji anin a d’ong Damasika apsele tangorre urungleji. Sol yagi dinna sikoija iteja adjumeten orde aggaeten. Ananiya ahiman aboi Kitungan aboantan Damasika lingan basueten.

Kitungan anin a d’ong gameten" Sol a dakutenan a si'ng lingan iya. Anin a langka sinam e dakkua yante gamle anin gijben a ranaptin bar okkij hangle raptite.” Bindo Ananiya jalangle gameten "E Kitung kani amandra yangamle derna maranji a do'ng tamderte antate hen amdanglai." Kitungan anin a d'ong jalangle gameten" ma yera! Juda maranji do bigarda jatti maranji a temangling a himhen abpimingben asan hen anin a d'ong tabngijlai. Anin ahimhen apsele ateng kanalkalan do satidsamoihan hangte. Anten asan Anania Sol adakuneten asi'ng lingan iyeten, anin alangkalingan anin asin dakkule bar gameten"aman tedne a yeraiten ayamlingan Jisu mangbanam abgijdamneten, anin na do'nghen mangbanam appa-ihten, yante gamle aman gijben a ranaptin bar okij hangte bar Marid Janggardan batte barijdam detam.

Sol tabdong gijben aranapti bar okij hangeten, do Ananiya anin a d'ong tabbubdan tiyetin. Anta tiki Sol asuij gaganan gaeten do ranaptin bar okij hangeten. Anta tabdong Damasika lingan a dakulinji Juda maranji amangban kan abernan a oblingben susuneten"Kitungan a On Jisun na.!"

Ayengante a mandra derna maranji a d'ong absi'dben asan ereten guijeten do anin na nami Jisun amang ling derten kun aberna Juda maranji rubmangdale bantongijdagi deleji. Sol Juda maranji ampra badebereten do Jisun na Kitungan a On. Ateng dinna atiki, Sol a d’ong a kabhidben asan Juda maranji oskaileji.

Aninji anin a d'ong a kabhidben asan gardan a garan-ganba turturben asan mandranji a napaiyan dele. Bindo Sol kun anogande beran amdangeten, bar tette saring dunglin yerben asan anin a gardinji sayamleji. Bo togal lingan aninji aboi turdud lingan anin a d'ong kantitalan a langka saring mittal ablatsolaji. Sol Damasika saring dunglin yereten a tiki, anin Jisun aberna a oblingben susuneten. Sol hanangna maranji a d’ong rabangben asan iyeten, bindo aninji anin a d’ong bantongleji.

Anta tiki Barnaba a himan bo dernamar hanangna maranji a mangba Sol a d'ong urungeten bar aninji a d’ong gamleji do anin yangamle Damasika lingan anuyuban batte oblingeten. Anta tiki, hanangna maranji Sol a d'ong jaleji. Ayengante a derna maranji tanamderan asan Jirusalem umdrengle yereji, aninji Antiokia sikoija yerre Jisun aberna a oblingben susuleji.

Antiokia lingan adakulinji ateng mandranji Juda marji addakuadji,bindo abmang tara aninji amanglinganji saring ateng derna marji deliji. Barnaba do Sol tette adakulinji tabme derna maranji a d'ong Jisun aberna ateng oblingben asan do ranukun a d'ong abuyuben asan iyleji. Antiokia lingan adakulinji a derna maranji abmang tara"Kristu"gamle ganudingan deleji. Bo dinna, antiokia ranuku lingan adakulinji kristu maranji anumlin do garberlinanji ayamling Marid Jangardan aninji a d'ong gameten"Barnaba do Sol itente abaran asan hen gudinglaiji kun apsele aninji a d'ong hen apsele ansabaji."

Anten asan Antiokia a ranukun Barnaba do Sol apsele garberan garberre aninji a lanangka surpidleji. Anta a tiki aninji ateng manengban Jisun aberna bangsa anoblingan oblingben asan aninji a d'ong appaileji.barnaba do Sol bigarda bigarda ompunji a d'ong hanangan tiyleji bar ateng mandranji Jisun amang lingan derrinji.