47. Sol barij Rom garda a hanagod lingan adakulin ayamling anin Rom himan "Pol" handrameten.

Bo dinna Pol do anin a gardin Sila Pilippi gardaban Jisun a bangsa a noblingan a oblingben asan yerreji. Aninji gardan a bayera Jordon a manengba bo darakunaban yerreji uante mandranji garbernaben asan rukkulinji. Titte aninji Ludia ahiman bo tanimna boi a d’ong gijleji. Anin Kitungan a d'ong tamyemeten bar ganangkilan lumeten. Jisun aru' beran yante gamle Ludia derten anten asan Kitungan anin a madan rieten, do anin bar anin asi'ng berindanji tabbubdalinji.

Anin Pol do silan anin asi'ng lingan dakunaben asan gudingetenji, anten asan aninji anin ampra do anin asi'ng berindan ampra basuleji.Pol do sila ganarber darakuna lingan ateng ayam mandranji a d'ong rabanglaji.

Dile dinnan ambrij aninji angante kun ganarber darakunaban yerreji, anten adnang aboi hamkul dangardi sijan aninji a kandungban sandungetenji. Kan kulman batte anin tungmadgij beran mandranji a d'ong oblingle raptieten, anten asan anin anin agamangan apsele aboi tungmadgij berboij gamle ateng tangkan tartumle tiyeten. Aninji halen a yerrenji ayamlingan kun hamkul boantin er lululenbe gule gamaten"kani amandraji kuddub saring lanangka Kitungan a boantanji.

Aninji ranabraban ahangben a tangoran oblingteji!" Anin ateng ayam sikoija kan ambrij abm’etenji do Pol kan ate amdangan amdangle musaldayemle. Atanakud lingan angante kun boanti dangardin gule bernaben susuneten Pol dayargudlen kun boantin a mangling a dakulin a jangardan a d'ong gameten" Jisun a himling kani a mangban saring dunglen yera.

Anta tabdong kun a kulma anin anin a d'ong umdrengle yereten. Ayengante amandra kun boanti dangardin a d'ong danegodeten, anin au'r barabdale.

Aninji ogandileji do kulman sadle kun boanti dangardin mandranji a tungmadgijber oblingle a draptie. Kan agaramgaman dele mandranji a tungmadgij berben asan aninji kun boanti dangardin adane mar a d'ong tangkan adtieji. Anten asan kun boanti dangardin a dane maranji Pol do Silan a d'ong Rom anab-hanamar amang urungleji, ayengante amandraji Pol do Silan a d'ong apparale karoijo sing lingan pidlaji.

Aninji Pol do Silan a d'ong karoijo sing lingan au'r ranabrab darakuna lingan dakkule aninji ajinganji jileji.

Delijanang tungar togal adnang aninji Kitungan atemangban sanen kanendra kenan kuddub kenben susuleji. Abubmung au'r bantongijdage yurlon dele.

Karoijo singan a dakulen a kuddub sanangan rzneten, do kuddub barondi maranji a silingan saring tanolbadan apwraile. Karoijosing turturmar dimadnan saring adlingle dzneten. Bar angante anin gijeten do karoijo singan a kuddub sanangan rzaineten, anin bantongijdage dele.

Anin ogandieten do kuddub koijo maranji dunglen yerreji,anten asan anin anindam kabhid damnaben ogandieten. (anin galameten do bogad anin kanoijo maranji ayerben anorden tiyeten den Rom danegodmar anin a d'ong kabhidte). Bindo Poln anin a d'ong gijan gijle dzneten"e gai, aman apparadamdongne. Anlen kuddublen tedne daku. Karoijosing turtur maran angante Pol do Silan amangba iyeten, anin bantongan batte takarre do gameten, anablun a hangben asan hen yan abmenaben detih?

Pol jalangle gameten" Jisun amangling, butente hang hangmar, derna; etteden aman do aman si'ng marnamji anablun ahangte. Anta tiki kun karoijo singan a turturmar anin a si'ngan Pol do Silan urungle aninji apanaran a bareten. Aninji asi'ng lingan a dakulinji kuddub mandranji a d'ong Jisun aberna bangsa anoblingan oblingeten. Karoijosing turturmaran do a si'ng maranji kuddub deran derren tabbubdan hanglaji.

Karoijo singan a turturmar Pol do Silan a d'ong rujumetenji do aninji kuddubanji bo mainalingan mo'ihlinji. anab biyo gardan abmanggod maranji Pol do Silan a d'ong karoijo singan saring umdrenglaji do aninji a d'ong Pilippi saring ayerben asan garberre oblinglaji.

Pol, Silan, Ludia do bigarda dajingte gardinji ampra alrabanglenji atiki aninji kun gardan dunglen yerreji. Jisun aberna bangsa anoblingan harre dakule, bar ranukun janang a marangben susuneten. Pol do bigarda kristu abmang godmaranji ateng gardalingan endunglaji do Jisun abangsa anoblingan oblingle hanangan tiyleji.

Aninji ranukulingan adakulenji a derna maranji a d'ong abwyublaji bar hanangan a tiyben asan ateng sittinji idolleji. Kan a sittiling saring dajingante Baibol lingan kambolan dete.