48. Kitungan angante ordaran gabdeleten, kun a yam lingan kuddub bangsa dakule.

Kun ayam lingan iteja pintun addakuad. Adam do Oba di dargam ar tamyemleji bar aninji Kitungan a d'ong tamyemleji. Kun ayam lingan iteja bem-beman orde karahidan addakuad. Oban a d'ong agabroijben asan sonuman aboi ja'dan sanle bernan oblingeten.

Anta tiki anin do Adam Kitungan asanggem ling pintun lumleji. Eten asan gamlenden aninji pintun lumleji, anten asan ordarlingan a dakun a kuddubanji bem-beman hangteji do karahidan deteji. Eten asan gamlenden Adam do Oba pintun lumleji, kan saring bar okij bantongijdagi abernan gadelle.

Aninji Kitungan asaggem mar deleji. Kani a jo'ambrij, kun a dinna saring karudkudan adeten a dele mandran pintun batte karudkudan hangteji bar Kitungan assangim mar deteji. Kitungan do mandran a tarangdiling dakun a imalaman batte pintun analdingan dele. Bindo kun imalaman bar okij tabngijben asan Kitungan aboi anogalan pangaten. Kitungan jibji-blin gameten do Oban a birinda saring karudkudan a deten bo mandra ja'dan a bob abrardite, do sonuman anin a danunkurdi jengan abparate.

Kan a garamgaman kani do sonuman Kristun a d'ong kabhidte, bindo Kitungan anin a d'ong karajid maranji a mang saring abdite, do ante a tiki Kristun tordong ayam apsele sonuman a ranapti abrardite. Ateng mihum a tiki, Kitungan apunggieten do Jisun na kun a Kristu. Kitungan angante rablodan batte kuddub ordaran absi'deten, kun ayamlingan ayengante amandraji anin amanglingan derrinji aninji arabraban apsele bungsangan tiyetenji.

Jardijten gamle kun ambrij, dele mandran aninjidaman a pintun apsele a si'dben tungna dakuli, bindo ayengante amandraji anin a manglingan dertenji aninji a d'ong a rabrabben asan Kitungan Jisun a d'ong tiayten. Soa soa mihum hamle mandranji aninji a pintun asan itente a pintu apsele panadradan hangben tungna dakule antate absuijben asan buyanji tordong Kitungan a temangba sanoi kanuban kubleji.

Bindo kun a kuddub kanuban aninji a pintunji rapti ad-sangaijad. Jisun na murda buyan. Bigarda buyanji ambrij ted, itente Jisun lumle apsuijeten-aboi ma'ih kanubgi anin anindam kubdamneten itente ordarlingan kuddub pintunji sabngaite. Jisun marid gugu buyan na, eten asan gamlenden ordarlingan bute delijanang anga delijanang a lumeten a kuddub pintu panadradan anin anindam alanangkan pangeten. Kitungan Abraam a d'ong gameten"ordarlingan kuddub mandranji aman batte anabsittan hangteji.

Jisun aboi Abraam a berinda mar dakule. Kuddub mandran a ompu anin batte anabsitta, eten asan gamlenden Jisun ahimlingan a dertenan a dile mandranji pintun saring ranabraban hangle daku. Bar Abraam a karudkud birinda lingan banandan dele.

Abraam a d'ong anin a onan Isaak a d'ong kanuban akubben apsele angante Kitungan oblingeten, anten adnang anin a onan Isaak a panardu a kubdamnaben asan aboi murkundarda apsuijeten. Anlen kuddulen anlenji a pintun asan karahidan a hangben tungna daku!bindo Kitungan anin a murkundardan Jisun anlen apanardu aboi kanuban ambrij karahidan apsele tiyeten. Kitungan angante Misor lingan takud kanal kalan appaiyeten anin dile Israel berindan a d'ong tangboi tangboi marid murkundardan kabhidle aninji agaranna daranni lingan alangka kun murkundardan a mihaman a jodben asan oblingeten.

Kitungan angante mihaman gijeten, anin aninji a si'nganji umdrengten do aninji apardikud a onger o'nanji a d'ong aggareten. Kan atanangadan Anelai Abdur ganaman dete. Jisun na anlen Anelai Abdur linglen a murkundarda.

Anin mariddam do er pintu dakule bar anelai abdur ganangkil ayamlingan na kanabhidan dele. Angante bute delijanang a mandra Jisun amang derten, anten adnang Jisun a miham kun a mandra a pintu absi'dte, bar Kitungan a panadradan kun amadra saring sangaite. Kitungan Israelanji ampra anosaijan dakkueten, ayengante amandraji anin asaneda maranji dakuleji.

Bindo Kitungan nami aboi tabme anosaijan gabdeleten itente kuddub mandran apsele temanglen daku. Kan tabme anosaijan batte, bute deli janang amandra, a ompu bute delijanang amandra Jisun amangling a dertenan batte Kitungan a mandraji aboi tanamsudagi rapti dete. Mojes aboi gugu tungmadgij mar dakule, butente Kitungan a berna oblingeten.

Bindo Jisun kuddub tungmadgij maranji saring murda gugu dakule. Anin Kitungan na. Anten asan anin itente itente lumete bar anten ate Kitungan a bara do Kitungan a berna dakule. Anten asan Jisun Kitungan a berna ganaman dete. Kitungan Daudo Rajan a d'ong jib-jible gameten do anin a berindan saring aboi Kitungan a mandraji a lanangka tordong ayam rajagodte.

Eten asan gamlenden Jisun Kitungan a on bar Kristun dakuli, anin karalogi Daudon a berinda dakuli, butente tordong ayam rajagodte. Daudo israelanji a raja dakuli, bindo Jisun barij ordaran a rajan na!

Anin bar okij yertai do janardin bar sanabyun batte tordong ayam rajagodte.