17.Maromak nia promesa ho David.

Saul mak Izraél nia liurai dahuluk. Nia aas no kmanek, hanesan nia ema sira hakarak. Saul maka liurai di'ak ida durante periode dahuluk nia ukun Izrael. Maibé, ikusmai nia sai ema aat neʼebé la halo tuir Maromak, tan neʼe Maromak hili ema seluk atu troka nia nuʼudar liurai.

Maromak hili joven ida hosi Izrael naran David no hahú prepara nia atu loron ida sai filafali liurai depoizde Saul. David mak bibi-atan ida husi sidade Belein. David oho ona leaun ida no mós oho ona ursu ida ne'ebé ataka nia aman nia bibi sira bainhira nia tau matan hela ba sira. David ema ida ne'ebé haraik-an no piadozu. Nia fiar ba Nai Maromak no halo tuir Nia.

Bainhira David sei joven, nia funu hasoru jigante ida ho naran Golias. Golias mak funu-naʼin neʼebé matenek tebes. Nia forte tebes no aas besik metru tolu!Maibé Maromak ajuda David atu oho Golias no salva Izraél. Depois neʼe David manán barak hasoru Izraél nia inimigu sira. David sai soldadu neʼebé diʼak, no nia mak dirije tropa Izraél iha funu oioin. Povu admira tebes nia.

Povu hadomi tebes David toʼo Liurai Saul sai laran-moras ba David. Ikusmai Saul hakarak atu oho nia, tan neʼe David halai ba rai-fuik hodi subar husi nia no ninia soldadu sira. Loron ida, wainhira Saul ho nia soldadu buka hela nia, Saul tama ba fatuk kuak ida. Fatuk-kuak neʼe mak ida-ne'ebe David subar hela, maibé Saul la haree nia. David hakbesik an ba iha Saul nia kotuk no tesi nia roupa pedasuk ida. Depois, bainhira Saul sai hosi fatuk-kuak, David hakilar ba nia hodi haree hena ne'ebé nia kaer hela. Ho maneira ida ne'e, Saul hatene katak David lakohi oho nia atu bele sai liurai.

Tempu liu daudaun, Saul mate iha funu no David sai liurai ba Izraél. Nia mak liurai neʼebé diʼak no ninia povu hadomi nia. Maromak haraik bensaun ba David no halo nia hetan susesu. David luta iha funu barak, no Maromak ajuda nia atu manán inimigu sira Izraél nian. David manán sidade Jeruzalein no halo sidade neʼe sai ninia kapitál, fatin ida-ne'ebé neʼebé nia hela no ukun. David sai liurai ba tinan 40 nia laran. Durante tempu neʼe, Izraél sai forte no riku.

David hakarak harii fatin adorasaun ida iha neʼebé nasaun Izraél tomak bele adora Maromak no hasaʼe sakrifísiu ba Nia. Durante maizumenus tinan 400, povu ne'e adora Maromak no hasa'e sakrifísiu sira ba Nia iha Tabernákulu Reuniaun nian ne'ebé Moisés harii.

Iha profeta ida naran Natan. Maromak haruka nia atu dehan ba David ida-ne'e: "Ó luta iha funu barak ona, nune'e ó sei la harii Templu ida-ne'e ba Ha'u. Ó nia oan-mane maka sei harii ida-ne'e. Maibé, Ha'u sei haraik bensaun boot ba ó. Ó nia bei-oan ida sei ukun ha'u nia povu ba nafatin!" David nia bei-oan ida deʼit neʼebé bele ukun ba nafatin mak Mesias. Mesias mak Maromak hili atu salva ema mundu tomak hosi sira nia sala.

Wainhira David rona liafuan ne'ebé Natan hato'o, David foo agradese no hahii Maromak. Maromak foo onra nia no haraik bensaun waꞌin ba nia. Klaru katak David la hatene bainhira mak Maromak sei kumpre promesa neʼe. Agora ita hatene katak ema Izraél tenke hein kleur molok Mesias mai, neʼe mak besik tinan 1.000.

David ukun ninia povu ho justisa ba tempu kleur. Nia halo tuir Maromak ho laran-metin, no Maromak haraik bensaun ba nia. Maibé, iha tinan sira tuirmai, nia halo sala boot hasoru Maromak.

Loron ida, David hateke ba liʼur husi ninia palásiu nia janela no nia haree feto bonita ida hariis hela. David la rekoñese nia, maibé nia husu no hatene katak nia naran Batseba.

Laos hadook nia matan, David haruka mane sira atu lori feto neʼe ba nia. Nia toba ho feto ne'e no depois haruka nia fila ba uma. Lakleur, Batseba haruka mensajen ba David hodi fó-hatene nia katak nia isin-rua.

Batseba nia laʼen, Urias, mak David nia soldadu ida neʼebé diʼak liu. Nia ba hela hodi funu bainhira ida-ne'e akontese. David bolu Urias fila husi kampu funu nian atu hela na'in rua ho nia feen. Maibé, Urias lakohi fila bainhira tropa sira hotu funu hela. Tan neʼe, ​​David haruka Urias fila fali ba kampu funu nian no haruka ninia jenerál atu tau Urias iha pozisaun ida-ne'ebé tenke hasoru inimigu ho pozisaun neʼebé forte liu atu nuneʼe nia bele mate. No nune'e akontese. Urias mate iha kampu funu nian.

Depoizde Urias mate iha nia funu laran, David kaben ho Batseba. Tuirmai, nia tuur-ahi oan-mane ida ba David. Maromak hirus tebes ho David tanba buat neʼebé nia halo toʼo Nia haruka profeta Natan atu fó-hatene David kona-ba ninia sala neʼebé aat tebes. David arrepende nia sala no Maromak perdua nia. Iha ninia moris tomak, David halo tuir Maromak, maski iha tempu susar nia laran.

Maibé David nia oan-mane neʼebé sei bebé mate. Neʼe mak Maromak nia maneira atu fó kastigu ba David. No mós, iha tempu neʼebé David mate, ninia família balu kontra hasoru nia, no David lakon ninia kbiit barak. Maibé Maromak laran-metin no kumpre Nia promesa ba David, maski David la halo tuir Nia. Tuirmai, David no Batseba iha oan-mane ida tan, no sira hanaran nia Salomão.