16. Libertádor

Depoizde Joshua mate, povu Izrael la obedese ba Maromak. Sira la obedese ba Maromak nia mandamentu sira, no sira mos la duni povu Kaña sira seluk husi Rai ne’ebe Promete ona. Povu Izrael komesa adora fali ba Kaña sira nia maromak no laos ba Nai Maromak, Maromak ne’ebe loloos. Povu Izrael sira laiha liurai, nune’e kada ema halo buat hotu konforme ba saida mak sira konsidera los.

Tamba la obedese ba Maromak, povu Izrael dalabarak moris ho padraun ida ne’ebe mak repete. Padraun ne’e mak nune’e: povu Izrael la obedese ba Maromak durante tinan balun nia laran, depois Maromak kastigu sira ho husik sira nia inimigu sira manán husi sira. Inimigu sira ne’e sei naok ema Izrael sira nia rikusoin no sasan, estraga sira nia sasan, no oho sira barak. Depois de Izrael nia inimigu sira hanehan sira tinan ba tinan, povu Izrael sei arrepende husi sira nia pekadu sira no husu Maromak atu salva sira.

Kada vez povu Izrael sira arrepende, Maromak sei salva sira. Nia halo nune’e ho fó libertátor ida- ema ida ne’ebe sei funu hasoru sira nia inimigu sira no halakon inimigu sira. Hafoin sei iha dame iha nasaun ne’e no libertádor ne’e sei orienta sira ho diak. Nai Maromak haruka libertádor barak ona atu salva Nia povu. Nai Maromak halo nune’e fila fali depoiz de Nia hatán ema Midian, grupu inimigu ida besik liu, atu halakon povu Izrael.

Ema Midian foti hotu ema Izrael sira nia kolleita durante tinan hitu. Ema Izrael sira senti tauk tebes, sira subar iha fatuk-kuak sira atu nune’e ema Midian la hetan sira. Ikusmai, sira hakilar ba Nai Maromak atu salva sira.

Iha mane Izrael ida naran Gideon. Iha loron ida, nia baku hela trigu iha fatin subar atu nune’e ema Midian sira labele naok. Nai nia anju mosu ba Gideon no dehan, “Nai Maromak hamutuk ho o, eroi ne’ebe maka’as. Ba no salva ema Izrael sira husi ema Midian.”

Gideon nia aman iha altár ida ne’ebe oferese ba estátua. Primeiru liu Maromak haruka Gideon atu harahun uluk altár ne’e. Maibe Gideon tauk ba ema sira, tan ne’e nia hein to’o kalan. Hafoin nia harahun altár ne’e to’o pedasuk kiik sira. Nia konstrui altár foun ida ba Maromak ne’ebe besik ho nia no oferese oferta ba Maromak iha leten nia aas.

Dadersan mai, ema sira haree katak ema balun harahun no destrui ona altár, no sira hirus tebes. Sira ba Gideon nia uma atu oho nia, maibe Gideon nia aman hateten, “Tamba sá maki mi mak tenki ajuda fali imi nia maromak? Kuandu nia maromak, husik ba nia proteje nia ann rasik!” Tamba nia hateten nune’e, ema sira ne’e la oho Gideon.

Tuirmai ema Midian sira mai fila fali atu naok husi ema Izrael sira. Sira barak tebes to’o susar atu sura. Gideon halibur ema Izrael atu hasoru sira. Gideon husu sinál rua ba Nai Maromak atu nia bele fiar katak tebes duni Nai Maromak mak haruka nia atu salva povu Izrael sira.

Sinál primeiru, Gideon tau bibi-malae nia kulit iha rai leten no husu ba Nai Maromak atu maho been dader nian so monu deit iha bibi-malae nia kulit leten no la monu ba rai-leten. Nai Maromak halo duni nune’e. Kalan tuirmai, Gideon husu atu halo rai-leten bokon maibe bibi-malae nia kulit nafatin maran. Nai Maromak halo tuir nune’e. Tamba sinál rua ne’e, Gideon fiar katak Nai Maromak hakarak duni atu salva povu Izrael husi povu Midian.

Tuirmai Gideon bolu forsa sira atu mai ba nia, no ema nain 32.000 mak mai. Maibe Nai Maromak hateten ba Gideon katak númeru ne’e barak liu. Tan ne’e Gideon haruka ema nain 22.000 fila fali, sira ne’ebe tauk atu funu. Nai Maromak dehan ba Gideon katak nia ema sei barak nafatin. Nune’e Gideon haruka sira hotu fila hodi ikus hela forsa nain 300.

Kalan ne’e Nai Maromak dehan ba Gideon, “Ba ema Midian sira nia akampamentu no rona sira koalia seda. Depoizde rona saida mak sira koalia, o sei la tauk tan atu hasoru sira.” Nune’e kalan ne’e, Gideon ba akampamentu no rona Midian nia soldadu ida konta ba nia belun kona ba nia mehi. Nia belun hatan ba nia, “Mehi ne’e signifika Gideon nia soldadu sei halakon ita, soldadu Midian sira!” Bainhira Gideon rona nune’e, nia mos adora kedan Maromak.

Hafoin Gideon fila ba nia soldadu sira no fó kada ema ida dikur ida, sanan rai-mean ida, no ahi-oan ida ne’ebe sei lakan hela. Sira hale’u akampamentu fatin soldadu Midian sira toba ba. Gideon nis soldadu nain 300 hatama tiha ahi-oan sira ne’e iha sanan laran nune’e ema Midian sira la hetan ahi-oan nia naroman.

Depois, Gideon nia soldadu sira hotu halo rahun sira-nian sanan iha tempu ne’ebe hanesan, no derepenti mosu ahi husi ahi-oan sira ne’e. Sira huu trombeta no hakilar, ”Surik ba Maromak no ba Gideon!”

Nai Maromak halo ema Midian sira konfundi hodi sira komesa ataka no oho malu. Lakleur, Gideon haruka mensajeiru ida atu bolu ema Israel sira seluk sai husi sira nia uma no ajuda duni ema Midian. Sira oho ema Midian barak no duni restu sira sai husi rai Izrael. Iha loron ne’eba Nai Maromak halo ema Midian nain 120.000 mate. Ho meiu ida ne’e Nai Maromak salva povu Izrael.

Ema sira ne’e hakarak foti Gideon sai nu’udar sira nia Liurai. Gideon la fó sira halo nune’e, maibe nia husu kadeli osan-mean balun ne’ebe sira foti husi ema Midian sira. Ema sira ne’e fó Gideon osan-mean baluk bo’ot ida.

Hafoin Gideon uza osan-mean ne’e atu halo roupa espesiál hanesan ida ne’ebe sacerdote boot sira baibain uza. Maibe, ema sira ne’e hahú adora nia sira konsidera roupa sira ne’e hanesan ídolu. Tan ne’e, Nai Maromak kastigu tan povu Izrael tamba sira adora ídolu. Maromak husik sira nia inimigu sira halakon sira. To’o ikusmai sira husu tan Maromak nia tulun, no Maromak haruka libertádor ida atu salva sira.

Buat hanesan ne’e akontese fila-fila: ema Izrael sira halo pekadu, Maromak kastigu sira, sira arepende, no Maromak haruka ema ida hodi salva sira. Durante tinan barak ona, Nai Maromak haruka libertádor barak hodi salva povu Izrael husi sira nia inimigu sira.

Ikusmai, povu ne’e husu ba Maromak liurai ida ba sira hanesan nasaun sira seluk nian. Sira hakarak liurai ida ne’ebe aas no forte, no ida ne’ebe bele lidera sira bainhira iha funu nia laran. Nai Maromak la gosta pedidu ne’e, maibe Nia nafatin fó ba sira liurai hanesan sira nia hakarak.