15. Rai ne’ebe Promete ona

Finalmente tempu to’o ba povu Izrael sira atu tama iha Kanaan, Rai ne’ebe Promete ona ba sira. Iha rai ne’ebá iha sidade ida naran Jerikó. Sidade ne’e iha moru ne’ebe metin hale’u nia hodi proteje nia. Joshua haruka espiaun nain-rua ba sidade ne’e. Iha feto prostituta ida hela iha sidade ne’e, nia naran Rahab. Nia mak subar tiha espiaun nain-rua ne’e, no to’o ikus ajuda sira hodi halai sai husi sidade ne’e. Nia halo nune’e tan nia fiar ba Nai Maromak. Espiaun sira ne’e promete sei proteje Rahab no nia familia bainhira Izrael mai atu harahun Jerikó.

Povu Izrael tenki hakur Mota Jordaun atu tama ba iha Rai ne’ebe Promete ona. Nai Maromak dehan ba Joshua, “Dehan ba sacerdote sira atu lao uluk.” Bainhira sacerdote sira hahu hakat ba Mota Jordaun, be’e husi mota ulun mos para sulin hodi ikusmai ema Izrael sira bele hakat ba mota sorin ho kondisaun mota ne’ebe maran.

Hafoin povu Izrael sira liu tiha Mota Jordaun, Nai Maromak orienta Joshua atu prepara ann hodi funu hasoru sidade Jerikó, mazke sidade ne’e forsa tebes. Nai dehan ba povu Izrael katak sacerdote sira hamutuk ho sira-nian forsa ábrigu sira tenki forma haleu sidade ne’e dala-ida lorloron durante loron ne’en. Nune’e sacerdote sira no ábrigu sira mos halo tuir.

Maromak mos dehan katak iha loron da-hitu, povu Izrael sira tenki forma haleu sidade ne’e dala-hitu. Tuirmai secerdote sira tenki hu’u korneta no ema hotu tenki hakilar ho maka’as. No sira mos halo nune’e.

Lakleur parede sira haleu Jerikó mos monu! Ema Izrael sira harahun buat hothotu iha sidade ne’e, tuir saida mak Nai haruka. Sira husik hela deit Rahab no nia familia, hodi sai parte ida husi povu Izrael. Bainhira ema sira seluk ne’ebe hela iha Kanã rona katak ema Izrael sira harahun ona Jerikó, sira tauk se ema Izrael mos sei funu hasoru sira.

Nai haruka ona povu Izrael sira atu labele halo aliansa dame ho grupu saida deit husi populasaun sira iha Kaña. Maibe, iha grupu ema Kaña nian ida, ne’e mak ema Gibeon sira, sira bosok Joshua no hateten katak sira mai husi rai ida ne’ebe dook husi Kaña. Sira husu Joshua atu halo aliansa dame ida ho sira. Joshua no líder povu Izrael sira seluk la husu ba Maromak saida mak sira tenki halo. Pela kontrariu, sira halo aliansa dame ho ema Gibeon sira.

Loron tolu tuirmai, ema Izrael sira foin hatene katak ema Gibeon sira hela duni iha Kaña. Sira hirus tamba ema Gibeon sira bosok ona sira. Maibe, sira kumpri nafatin aliansa dame ne’ebe sira halo ona ho ema Gibeon sira tamba aliansa ne’e nu’udar promesa ne’ebe halo ona iha Nai nia futar oin. Hafoin, tempu balun tuirmai, liurai sira husi grupu sira seluk iha Kaña, ida mak povu Amori, rona katak ema Gibeon sira halo ona aliansa dame ho ema Izrael, nune’e sira forma sira nia armada konjunta ida boot tebes no ataka Gibeon. Ema Gibeon sira lori mensajem ba Joshua atu husu ajuda.

Nune’e Joshua halibur Izrael nia soldadu sira. Sira marsa kalan ida tomak hodi ba Gibeon. Iha dadersan mai, sira halo hakfodak ábrigu Amori no ataka sira.

Maromak funu ba Izrael iha momentu ne’eba. Nia halo ema Amori sira sai bilang no hatun udan gelu fatuk boot ne’ebe oho ema Amori barak.

Nai Maromak mos halo loron-matan metin nafatin iha fatin ida iha lalehan hodi nune’e ema Izrael sira iha tempu naton atu halakon ema Amori. Iha loron ne’eba, Nai Maromak fo vitoria boot ba Izrael.

Depoiz de Nai Maromak halakon ábrigu sira ne’e, Kaña nia grupu barak sira seluk halibur atu ataka Izrael. Joshua no ema Izrael ataka no destroi sira.

Hafoin funu sira ne’e hotu, Nai Maromak fahe ba kada suku Izrael hotu hetan ida-idak nia fatin iha Rai ne’ebe Promete ona. Tuirmai Nai Maromak fó dame ba Izrael iha nia fronteira.

Bainhira Joshua katuas ona, nia halibur povu Izrael hotu. Hafoin Joshua fó hanoin povu Izrael katak sira promete ona atu kumpri akordu ne’ebe Nai Maromak halo ona ho povu Izrael sira iha foho Sinai. Povu Izrael promete atu leal ba Maromak no obedese ba Nia mandamentu sira.