19. Profeta sira

Maromak sempre haruka Profeta ba ema Izrael. Profeta sira rona mensajen husi Maromak depois hato'o ba ema.

Elia mak Profeta ida bainhira Ahab sai liurai ba reinu Izrael. Ahab mak ema aat ida. Nia koko halo povu adora Maromak falsu ida naran Baal. Tan ne'e mak Elia fo hatene ba Liurai Araun katak Maromak sei kastigu nia povu sira. Elia dehan ba nia(Liurai Araun), "Sei laiha udan ka mahobeen iha reinu Izrael to'o hau dehan udan sei tuun fali." Ida-ne'e halo Araun sai hirus tebes to'o nia deside atu oho Elia.

Nune'e Maromak haruka Elia bá rai-fuik hodi subar husi Araun. Elia bá rai-fuik iha mota ida-ne'ebé Maromak haruka nia bá. Dadeer-dadeer no lorokraik, manu sira lori paun no na'an ba Elia. Iha tempu ne'ebá, Araun ho ninia tropa buka Elia, maibe sira la hetan nia.

Tanba laiha udan, neneik-neneik mota ne'e sai maran. Nune'e Elia bá rai seluk ne'ebé besik. Iha rai ne'ebá iha feto faluk ki'ak ida ho nia oan mane. Sira kuaze atu laiha ai-han tanba laiha kolleta. Maibe nafatin, bainhira feto ne'e tau matan ba Elia, Maromak prepara nia no nia oan mane nia nesesidade. Fariña no mina nia fatin nunka mamuk. Sira hetan hahan durante tempu hamlaha. Elia hela iha ne'ebá besik tinan tolu.

Liu tiha tinan tolu ho balu, Maromak hatete ba Elia katak nia sei haruka fali udan. Nia haruka Elia atu fila fali ba reiñu Izrael no ko'alia ho Araun. Nune'e Elia bá hasoru Araun. Bainhira Araun haree nia, Araun dehan, "mak ne'e, ó ne'ebé halo problema!" Elia hatan ba nia, "ó mak halo halo problema! imi abandona ona Maromak. Nia mak Maromak loos, maibe imi adora Baal. Agora ó tenke lori povu reiñu Izrael hotu ba foho Karmelu."

Nune'e ema Izrael hotu la'o bá foho Karmelu. Ema balu dehan katak sira hato'o mensajen ba Baal mos mai. Baal nia Profeta sira mak ne'e. Iha na'in Atus-haat lima nulu. Elia dehan ba ema sira-ne'e, "to'o bainhira imi sei muda hanoin? Se Maromak ne'e Maromak, imi tuir Nia! Maibe se Baal, imi tuir nia!"

Elia dehan ba Baal nia profeta sira, "Oho karau-aman ida, fahe nia na'an ba pedasuk, no tau iha altar leten hodi hasa'e sakrifísiu, maibe keta sunu ahi. Depois hau sei halo hanesan ne'e, no hau sei tau na'an ne'e iha altar seluk. Tuirmai bainhira Maromak haruka ahi ba altar, imi sei hatene katak Nia mak Maromak loos." Nune'e Baal nia profeta sira prepara sakrifísiu maibe la sunu ahi.

Tuirmai Baal nia profeta sira harohan ba Baal dehan, "Rona mai ami, Baal!" Loron tomak sira harohan, hakilar, no to'o sira hakanek an ho tudik, maibe Baal la hatan, no la tiru ahi ida.

Baal nia profeta sira gasta kuaze loron tomak hodi harohan ba Baal. Ikusmai sira para harohan. Tuirmai Elia tau karau-aman seluk nia isin iha Maromak nia altar leten. depois ida-ne'e, nia haruka ema sira iha ne'ebá hodi fakar bee sanan boot 12 ba sakrifísiu nia leten to'o na'an, ai, no rai ne'ebé hale'u altar sai bokon hotu.

Depois Elia harohan, "Maromak, Abraun, Izak, no Jakó nia Maromak, hatudu mai ami agora katak Ita-boot mak Izrael nia Maromak no katak hau Ita-boot nia atan. Hatan mai hau hodi ema sira ne'e hatene katak Ita-boot mak Maromak loos."

Momentu ne'e kedas, ahi tun husi lalehan. Ahi ne'e sunu na'an, ai, fatuk, rai, no mós bee ne'ebé hale'eu altar. Bainhira ema sira haree ida-ne'e, sira hakru'uk ba rai no dehan, "Maromak mak Maromak! Maromak mak Maromak!"

Liu tiha ne'e, Elia dehan, "Keta husik Baal nia profeta ida halai sai!" Nune'e povu kaer Baal nia profeta sira no lori sira sai husi ne'ebá depois oho sira.

No Elia dehan ba liurai Araun, "Fila kedas ba ó-nia uma, tamba udan besik mai ona."Lalehan sai metan kedas, no udan boot komesa tun. Maromak hakotu rai-maran(bai-loron). Ida-ne'e mos hatudu katak Nia mesak mak Maromak loos.

Bainhira Elia remata ninia servisu, Maromak hili ema ida ho naran Eliza hodi sai nia profeta. Maromak halo milagra barak liu husi Eliza. Milagre ida mak akontese ba Naaman. Nia mak komandante tropa inimigu nian, maibe nia iha moras kulit ne'ebé grave. Naaman rona kona-ba Eliza, nune'e nia ba hasoru Eliza no husu ho kura nia. Eliza haruka Naaman ba iha Mota Jordaun no habokon nia an ba bee laran dala hitu.

Naaman sai hirus. Nia lakohi atu halo ida-ne'e tamba hanesan la lojika. Maibe tuirmai Nia troka ninia hanoin. Nia ba iha Mota Jordaun no habokon nia an dala hitu iha bee laran. Bainhira nia sai husi bee-mota ikus, Maromak kura nia.

Maromak mós haruka profeta barak seluk ba ema Izrael. Sira hotu haruka ema sira hodi para adora buat lulik. Duké halo nune'e, sira tenke trata malu ho justu no hatudu laran-sadia ba malu. Profeta sira fó-hanoin ba ema katak sira tenke para halo krime no fila hodi obedese ba Maromak. Se ema la halo ida-ne'e, Maromak sei konsidera sira halo sala, no Nia sei kastigu sira.

Dala barak ema la obedesse ba Maromak. Dala barak sira halo aat profeta sira no to'o oho sira. Loron ida, sira hatama profeta Jeremias ba bee posu maran ida nia laran no husik nia mate iha ne'ebá. Nia mout iha tahu iha bee posu nia okos. Maibe depois liurai sente laran-sadia ba nia no haruka ninia atan sira hodi hasai Jeremias husi bee posu molok nia mate.

Profeta sira nafatin ko'alia reprezenta Maromak maske ema balu odi sira. Sira fó-hanoin ema sira katak Maromak sei oho sira se sira la arepende. Sira mos fó-hanoin ema sira katak Maromak promete sei haruka Mesias ba sira.