47. Paul and Silas in Philippi

Bainhira Saul lao haleu Imperiu Romanu tomak, nia hahu uza nia naran Romanu, ‘Paulo.’ Loron ida, Paulo no nia belun, Silas, ba sidade Filipe atu fahe novidade kona-ba Jezús. Sira ba fatin ida iha mota ninin sai husi sidade fatin ne’ebe ema halibur hodi halo orasaun. Iha ne’eba sira hasoru vendedor feto ida naran Lidia. Nia hadomi tebes Nai Maromak no adora Nai.

Nai Maromak halo Lidia fiar ba novidade kona-ba Jezús ne’e. Paulo no Silas fó sarani nia no nia familia sira. Nia konvida Paulo no Silas atu hela iha nia uma, nune’e sira hela iha ne’eba.

Paulo no Silas hasoru beibeik ho ema sira iha fatin ne’ebe ema Judeu sira reza ba. Loron-loron bainhira sira lao ba ne’eba, atan feto ida ne’ebe diabu tama nia laran sempre tuir sira. Liu husi satanás ne’e, nia halo predisaun ba ema-sira nia futuru, to’o nia hetan osan barak ba nia nain ne’eba mak adviñadór ida.

Atan feto ne’e sempre lao ho hakilar, “Ema sira ne’e Maromak ne’ebe Aas liu nia atan. Sira fó hatene ba imi oinsa atu hetan salvasaun!” Nia halo nune’e hela deit to’o halo Paulo sateia.

Ikusmai, loron ida bainhira atan feto ne’e foin hakilar, Paulo haree ba nia no dehan ba satanás ne’ebe iha nia laran ne’e, “Hodi Jezús nia naran, sai husi nia.” Satanás ne’e mos husik kedan nia.

Mane ida atan feto nia nain ne’e hirus tebes! Sira realiza katak, sei satanás ne’e laiha, atan feto ne’e sei labele fó hatene sai ema nia futuru. Ne’e signifika katak ema sei la selu tan ba nia nain hodi hatene sira nia futuru.

Tan ne’e atan feto nia nain ne’e lori Paulo no Silas hasoru ukun-nain Romanu nian, ne’ebe baku Paulo no Silas, no hafoin hatama sira ba komarka.

Sira hatama Paulo no Silas iha komarka ne’ebe guarda maka’as liu. Sira to’o kesi sira-nia ain ho ai pedasuk boot. Maibe iha kalan boot, Paulo no Silas kanta knanuk hodi hahi Nai Maromak.

Derepenti, akontese rai nakdoko ne’ebe maka’as! Odamatan sira iha komarka ne’e nakloke luan hotu, no korrente hodi kesi dadur sira ne’e kotu hotu.

Hafoin xefi prizaun ne’e hader mai. Nia haree katak odamatan prizaun nakloke hotu. Nia hanoin dadur sira halai hotu ona. Nia tauk tebes kuandu autoridade Romanu sira oho nia tamba hanoin karik nia husik ona sira halai, tan ne’e nia prepara atu oho ann! Maibe Paulo hetan nia no hakilar, “Para! Labele hakanek o-nia ann. Ami hotu iha ne’e hela.”

Xefi prizaun ne’e nakdedar tebes bainhira nia lao ba Paulo no Silas no husu, “Saida mak hau tenki halo atu hetan salvasaun?” Paulo hatán ba nia, “Fiar ba Jezús, Maromak, no o ho o nia familia sira sei hetan salvasaun.” Tuirmai xefi prizaun ne’e lori Paulo no Silas ba nia uma no fase sira nia kanek-sira. Paulo fó sai novidade kona-ba Jezús ba ema hotu iha nia uma.

Xefi prizaun no nia familia sira hotu sai fiar ba Jezús, hodi Paulo no Silas fó sarani sira. Hafoin xefi prizaun ne’e fó hahan ba Paulo no Silas hodi han, no sira haksolok hamutuk.

Loron tuirmai, ulun-nain sidade nian hasai Paulo no Silas husi komarka no husu sira atu sai husi Filipe. Paulo no Silas bá vizita Lídia no sira-nia belun sira seluk hafoin sai husi sidade ne’e. Novidade kona-ba Jezús kontinua espalha, no Igreja kontinua buras.

Paulo no líder ema fiar-nain sira seluk halao viagem ba sidade barak. Sira haklaken no hanorin ema barak novidade kona-ba Jezús. Sira mós hakerek karta barak hodi enkoraja no hanorin ema fiar-nain sira iha kongregasaun sira. Husi karta balun sira ne’e mak sai livru sira iha Bíblia.