48. Jesus Is the Promised Messiah

Bainhira Nai Maromak kria mundu, buat hotu perfeitu. Laiha pekadu. Adaun no Eva hadomi malu, no sira hadomi Maromak. Laiha moras ka mate. Nai hakarak mundu ida hanesan ne’e.

Satanás koalia ba Eva iha jardim liu husi samea tamba nia hakarak lohi nia. Tuirmai Eva no Adaun halo sala ba Maromak. Tamba sira halo pekadu, ema hotu iha mundu mate.

Tamba Adaun no Eva halo pekadu, buat ida att liu tan akontese. Sira sai Nai Maromak nia inimigu. Nia konsikuensia, desde momentu ne’eba ema hotu halo sala ona. Ema hotu-hotu sai Maromak nia inimigu desde sira moris. Laiha paz entre ema no Maromak. Maibe Maromak hakarak atu dame.

Nai Maromak promete katak Eva nia jerasaun ida sei sama Satanás nia ulun, no Satanás sei tata nia ain-tuban. Ho liafuan seluk dehan, Satanás sei oho Mesias, maibe Maromak sei halo Nia moris fila fali. Mesias sei domina Satanás nia kbiit too rohan. Tinan barak mai, Nai Maromak hatudu katak Mesias ne’e mak Jezús.

Maromak haruka Noé atu halo ró boot hodi salva nia familia husi inundasaun boot ne’ebe sei mai. Ne’e nu’udar Maromak nia meiu atu salva ema sira ne’ebe fiar ba Nia. Ho meiu ne’ebe hanesan, ema hotu-hotu merese hetan kastigu mate husi Maromak tamba sira halo ona pekadu. Maibe Nai Maromak haruka Jezús atu salva ema sira ne’ebe fiar ba Nia.

Durante tinan atus ba atus, amlulik sira kontinua hasa’e sakrifísiu ba Maromak. Ida ne’e hatudu ba ema katak sira halo sala no merese Maromak nia kastigu. Maibé sakrifísiu sira ne’e la bele perdua sira nia sala. Jezús halo buat ne’ebe amlulik sira labele halo. Nia hasae Nia aan nudar sakrifisiu mesak ne’ebe bele kasu ema hotu nia sala. Nia simu kastigu ne’ebe ita merese tanba ita-nia sala. Tanba razaun ida ne’e, Jezús mak Amlulik Boot.

Nai Maromak dehan ona ba Abraun, “Hau sei fó bensaun ba povu hotu iha mundu ne’e liu husi o.” Jezús nu’udar Abraun nia jerasaun. Nai Maromak fó bensaun ema hotu-hotu liu husi Abraun tanba Nai Maromak salva ema sira ne’ebe fiar ba Jezús husi pekadu. Bainhira ema sira ne’e fiar ba Jezús, Maromak konsidera sira nu’udar Abraun nia jerasaun.

Nai Maromak haruka Abraun atu sakrifika nia oan-mane rasik, Izak, ba Nia. Maibe depoiz Maromak fó bibi-malae aman ida sai sakrifísiu hodi troka Izak. Ita hotu merese mate tamba ita nia pekadu sira! Maibe Maromak fó Jezús atu sai sakrifísiu troka ita. Tanba ne’e mak ita bolu Jezús Maromak nia Bibi-malae-Oan.

Bainhira Maromak haruka malisan ikus ba Ejiptu, Nia haruka família Izrael ida-idak atu oho bibi-oan ida. Bibi-oan ne’e tenke perfeitu. Tuirmai sira tenke kose raan ne’e iha sira-nia odamatan nia kuadru leten no sorin. Bainhira Maromak haree raan, Nia liu sira nia uma no la oho sira nia oan primeiru. Bainhira ne’e akontese, Nai Maromak hanaran ne’e Páskoa.

Jezús hanesan Bibi-malae-Oan Páskoa nian. Nia nunka halo sala, tan ne’e la iha buat ida mak la loos husi Nia. Ema oho Nia iha selebrasaun Páskoa nian. Kuandu ema ida fiar ba Jezús, Jezús nia raan selu fali ema ne’e nia sala. Hanesan Maromak liu tiha ema ne’e tanba Nia la fó kastigu ba nia.

Nai Maromak halo promesa ho ema Izrael sira tanba sira mak Maromak hili ona sai nia reinu. Maibe agora Maromak halo ona promesa foun ba ema hotu-hotu. Se ema ruma husi suku ne’ebe deit simu Promesa Foun ida ne’e, nia hamutuk ho Maromak nia povu sira. Nia halo ida ne’e tamba nia fiar ba Jezús.

Moizes mak profeta ida ne’ebe iha kbiit boot tebes haklaken Maromak nia liafuan. Maibe Jezús mak profeta boot liu hotu. Nia mak Maromak, tan ne’e buat hotu ne’ebe Nia halo no koalia mak Maromak nia hahalok no liafuan. Tan ne’e mak Bíblia bolu Jezús nu’udar Maromak nia Liafuan.

Nai Maromak promete ba Liurai David katak nia jerasaun ida sei ukun Nai nia povu nu’udar liurai to’o rohan. Jezús mak Maromak Oan no Mesias, tan ne’e Nia mak David nia jerasaun ida ne’ebe sei ukun to’o rohan.

David mak liurai Izrael, maibe Jezús mak liurai ba universu tomak ida ne’e. Nia sei mai fila fali no ukun nia reinu ho justisa no dame to’o rohan.