46. ୪୬. ପାଉଲୁସ୍ ମାସୀହ୍ ବିଶ୍ଵାସୀ ବାଇୟୋଃତାନାଏ

ଶାଉଲ୍ ନୁତୁମ୍ ରେନ୍ ମିୟାଃ ହୋଡ଼୍ ତାଇକେନାଏ ଅକନିଃ ୟୀଶୁ ଚେତାନ୍ ରେ କାଏ ବିଶ୍ଵାସ୍ ଲାଆ। ଚିମ୍ତାଙ୍ଗ୍ ଇନିଃ ଜାୱାନ୍ ତାଇକେନାଏ, ଏନ୍ତେ ଇନିଃ ସ୍ତିଫାନୁସ୍ କେ ଗୋଏଃ ତାନ୍ ହୋଡ଼ୋକୋଆଃ ଲିଜାଃକୋକେ ହୋର ତାଇନାଏ। ତାୟୋମ୍ତେ, ଇନିଃ ବିଶ୍ଵାସୀ କୋକେ ସାତାଅ କେଦାଏ। ଇନିଃ ୟୀରୁଶାଲେମ୍ ସାହାର୍ ରେ ଅଡ଼୍ଆଃ-ଅଡ଼୍ଆଃରେ ସେନ୍ କେତେ କୋଡ଼ାକୋକେ କୁଡ଼ିକୋକେ ବାରାନ୍ କୋକେ ଥୋଲ୍ କେତେ ଜେଲ୍ ଅଡ଼୍ଆଃରେ ଆଦେର୍ ଲେଦାଏ। ଏନ୍ତେ ମାରାଙ୍ଗ୍ ୟାଜାକ୍ ଶାଉଲ୍ କେ ଦାମିଶକ୍ ସାହାର୍ ସେନ୍ ଲାଗିନ୍ ଆନାଚୁ କିଜାଏ। ଇନିଃ ଏନ୍ତାଃରେନ୍ ମାସିହି ହୋଡ଼ୋକୋକେ ଥୋଲ୍ କେତେ ହାର୍ ଇନ୍‍କୁକେ ଯିରୁସାଲେମ୍ ସାହାର୍ ତେ ଆଉଲାଗିନ୍ ଶାଉଲ୍ କେ କାଜିକିଜାଏ।

ଏନ୍ତେ,ଶାଉଲ୍ ଦାମିଶାକ୍ ସାହାର୍ ସେନ୍ ଏଟେଃ କେଦାଏ। ଏନ୍ ସାହାର୍ ସେଟେର୍ ରାଃ ସିଦାରେ, ଇନିଃଜାଃ ସୋବେନ୍ ପାଡ଼୍ ହାର୍ ଚେତାନ୍ ଏତେ ମାର୍ଶାଲ୍ ଜାନା, ହାର୍ ଇନିଃ ଅତେରେ ଉୟୁଃ ଜାନାଏ। ଶାଉଲ୍ କେ ଅକଏ କାଜିତାନ୍ ଲେକା ଆୟୁମ୍ କେଦାଏ, “ହେ ଶାଉଲ୍!ହେ ଶାଉଲ୍! ଆମ୍ ଇଙ୍ଗ୍ କେ ଚିକାଲି ଦୁକୁ ଏମିଙ୍ଗ୍ ତାନାମ୍?” ଶାଉଲ୍ କୁଲିକିଜାଏ, “ହେ ପ୍ରାଭୂ ଆମ୍ ଅକଏ ତାନ୍ମେ?” ୟୀଶୁ ଇନିଃ କେ କାଜି ରୁଆଡ଼୍ କିଜାଏ, “ଇଙ୍ଗ୍ ୟୀଶୁ ତାନିଙ୍ଗ୍। ଆମ୍ ଇଙ୍ଗ୍ କେ ଦୁକୁ ଏମିଙ୍ଗ୍ ତାନାମ୍!”

ଚିମ୍ତାଙ୍ଗ୍ ଶାଉଲ୍ ବିରିଃ ଜାନାଏ ଦୋ ଇନିଃ କାଏ ନେଲ୍ ଉରୁମ୍ ତିନା। ଇନିଜାଃ ଗାତିକୋ ଦାମିଶାକ୍ ସାହାର୍ ତେ ଇଦି କିଜାକୋ। ଶାଉଲ୍ ଆପି ଶିଙ୍ଗି ସାନ୍ତେ କାଏ ଯୋମ୍ ହାର୍ କାଏ ନୁ ଲାଆଏ।

ଦାମିଶାକ୍ ସାହାର୍ ରେ ହାନାନେୟା ନୁତୁମ୍ ରେନ୍ ମିୟାଃ ଚେଲା ତାଇକେନାଏ। ପାର୍ମେଶ୍ଵାର୍ ଇନିଃକେ କାଜିକିଜାଏ, “ଏନ୍ ଅଡ଼୍ଆଃରେ ସେନ୍ ମେ ଅକତାଃରେ ଶାଉଲ୍ ତାଇୟୋ ତାନାଏ। ଆମାଃ ତିଇକେ ଇନିଜାଃ ଚେତାନ୍ ରେ ମାନ୍ ଡାଅ ଏମେ ଏନାତେ ଇନିଃ ଆଡୋଃ ମିଶା ନେଲେକାଏ। “ମେନ୍ଦୋ ହାନାନେୟା କାଜିକେଦାଏ, “ହେ ପ୍ରାଭୂ, ଇଙ୍ଗ୍ ଆୟୁମ୍ କାଦିଙ୍ଗ୍ ଚି ନେ ହୋଡ଼୍ ବିଶ୍ଵାସୀ କୋକେ ଚିଲିକା ତେ ଦୁକୁ ଏମାକୋ ତାନାଏ।” ପାର୍ମେଶ୍ଵାର୍ ଇନିଃକେ କାଜିରୁଆଡ଼୍ କିଜାଏ, “ସେନ୍ ମେ! ଇଙ୍ଗ୍ ଆଏଃକେ ୟାହୁଦୀଆ ଦିଶୁମ୍ ରେ ହାର୍ ଏଟାଃ ଜାତିକୋକେ ଇଙ୍ଗ୍ଆଃ ନୁତୁମ୍ କେ ପାର୍ଚାର୍ ଲାଗିନ୍ ଶାଲାକିଜିଙ୍ଗ୍। ଇନିଃ ଇଙ୍ଗ୍ଆଃ ନୁତୁମ୍ ଲାଗିନ୍ ଥିମ୍ବାଗି ଦୁକୁ ସାହାତିଙ୍ଗ୍ ଏୟାଏ।”

ଏନ୍ତେ ହାନାନିୟା ଶାଉଲ୍ ରାଃ ନାଡ଼େଏ ସେନୋଃ ଜାନାଏ, ଆଜାଃ ତିଇକେ ଇନିଜାଃରେ ମାନ୍ ଡାଅ କେଦାଏ, ହାର୍ କାଜିକେଦାଏ, “ୟୀଶୁ, ଅକନିଃ ନେତାଃ ହିଜୁଃ ସାମାୟ୍ ରେ ସାଣ୍ଡାକ୍ ରେ ନେଲ୍ କାନ୍ତିନାଏ, ଇଙ୍ଗ୍ କେ ଆମାଃ ନାଡ଼େଏରେ କୁଲାକାଦିଙ୍ଗ୍ଆଏ,ଏନାତେ ଆମ୍ ଆଡୋଃ ମିଶା ନେଲ୍ ଧାଡ଼ିୟାଃମ୍, ହାର୍ ପାବିତାର୍ ଆତ୍ମା ଆମ୍ କେ ଫେରେଃ କେମାଏ।”ସେକାଡ଼୍ ଗି ଶାଉଲ୍ ଆଡୋଃମିଶା ନେଲ୍ ଧାଡ଼ିକେଦାଏ, ହାର୍ ହାନାନିୟା ଇନିଃକେ ବାପ୍ତିସ୍ମା ଏମ୍ କିଜାଏ। ଏନ୍ତେ ଶାଉଲ୍ ଯୋମ୍ କେଦାଏ ହାର୍ ଆଡୋଃମିଶା ପେଡ଼େଏ ନାମ୍ କେଦାଏ।

ଏନ୍ତେ, ଶାଉଲ୍ ଦାମିଶାକ୍ ସାହାର୍ ରେନ୍ ତାଇନ୍ ତାନ୍ ୟାହୁଦୀକୋକେ ପାର୍ଚାର୍ ଲାଗିନ୍ ଏଟେଃ ତାଦାଏ। ଇନିଃ କାଜିକେଦାଏ, ୟୀଶୁଗି ପାର୍ମେଶ୍ଵାର୍ ରାଃ କୋଡ଼ା ହୋନ୍ ତାନିଃ!” ୟାହୁଦୀକୋ ଆକ୍ ଦାନ୍ଦାଅ ତିନାକୋ, ଚିୟାଃଚି ଶାଉଲ୍ ଦୋ ବିଶ୍ଵାସୀକୋକେ ଗୋଏଃ ଲାଗିନ୍ ସାନାଙ୍ଗ୍ ତାଇନାଏ, ମେନ୍ଦୋ ନାଆ ଇନିଃ ୟୀଶୁରେ ବିଶ୍ଵାସ୍ ଲାଆଏ। ଶାଉଲ୍ ୟାହୁଦୀ କୋଲୋଃ କାଜି-କାପାଜି ଜାନାଏ। ଇନିଃ ଉଦୁବ୍ କେଦାଏ ଚି ୟୀଶୁଗି ମାସିହା ତାନିଃ।

ଥିମ୍ବାଗି ସାମାୟ୍ରାଃ ତାୟୋମ୍ତେ,ୟାହୁଦୀକୋ ଶାଉଲ୍ କେ ଗୋଏଃ ଲାଗିନ୍ ସାନାଙ୍ଗ୍ କେଦାକୋ। ଇନ୍‍କୁ ଇନିଃକେ ଗୋଜି ଲାଗିନ୍ ହାତୁରାଃ ଛକ୍ କୋରେ ହୋଡ଼ୋକୋକେ କୁଲ୍ କେଦାକୋ। ଚି ଇନ୍‍କୁ ହୋରୋଇକାକୋ ମେନ୍ଦୋ ଶାଉଲ୍ ଏନ୍ କାଜିକୋକେ ଆୟୁମ୍ କେଦାଏ, ହାର୍ ଇନିଜାଃ ଗାତିକୋ ବଚାଅ କେତେ ଅଡୋଙ୍ଗ୍ ଲାଗିନ୍ ଇନିଜାଃ ଦେଙ୍ଗା କେଦାକୋ। ମୂଷିଙ୍ଗ୍ ନିଦାରେ ଇନ୍‍କୁ ଇନିଃକେ ଗେଣ୍ଡୁଆରେ ଦୁବ୍ କେତେ ହାତୁରାଃ ଭୀତ୍ତେ ଲାଥାର୍ ଆଡ୍ଗୁ ତିଜାକୋ। ଦାମିଶାକ୍ ସାହାର୍ ତେ ବାଚାଅ ଅଡୋଙ୍ଗ୍ ରାଃ ତାୟୋମ୍ତେ ଶାଉଲ୍ ୟୀଶୁରାଃ ବିସାଏରେ ପାର୍ଚାର୍ କେଦାଏ।

ଏନ୍ତେ ଶାଉଲ୍ କୁଲାକାନ୍ ଚେଲା କୋଲୋଃ ଭେଟ୍ ଲାଗିନ୍ ଯିରୁସାଲେମ୍ ସାହାର୍ ତେ ସେନୋଃ ଜାନାଏ, ମେନ୍ଦୋ ଇନ୍‍କୁ ଇନିଃକେ ବୋରୋଗାଇ ତିନାକୋ। ଏନାତେ ବର୍ନବାସ୍ ନୁତୁମ୍ ମିୟାଃ ବିଶ୍ଵାସି ଶାଉଲ୍ କେ କୁଲାକାନ୍ ଚେଲାକୋ ନାଡ଼େଏରେ ଇଦିକିଜାଏ। ଇନିଃ ଇନ୍‍କୁକେ ଉଦୁବ୍ କେଦାଏ ଚି ଶାଉଲ୍ ଚିଲ୍‍କା ସାହାସ୍ ତେ ଦାମିଶାକ୍ ସାହାର୍ ରେ ପାର୍ଚାର୍ ଲାଆଏ। ଏନା ତାୟୋମ୍ତେ, କୁଲାକାନ୍ କୋ ଶାଉଲ୍ କେ ମାନାତିଙ୍ଗ୍ କିଜାକୋ।

ଚିମିନ୍ ନାଙ୍ଗ୍ ବିଶ୍ଵାସୀକୋକେ ଯିରୁସାଲେମ୍ ରାଃ ଦୁକୁରାଃ ଚାଲ୍ତେ ନିର୍କାନ୍ ତିନାକୋ ଇନ୍‍କୁ ସାଙ୍ଗିନ୍ ଆନ୍ତାକିଆ ସାହାର୍ ରେ ସେନୋଃ କାନ୍ ତିନାକୋ ହାର୍ ୟୀଶୁରାଃ ବିସାଏରେ ପାର୍ଚାର୍ ତିନାକୋ। ଆନ୍ତାକିଆ ରେ ତାଇନ୍ତାନ୍ କୋ ହୋଡ଼ୋକୋ ଥିମ୍ବାତେଦୋ ୟାହୁଦୀ କାକୋ ତାଇନ୍, ମେନ୍ଦୋ ନେୟା ସିଦା ହବାଅଗା, ଇନ୍‍କୁଏତେ ଥିମ୍ବାଗି ହୋଡ଼ୋକୋ ବିଶ୍ଵାସୀ ବାଇଜାନାକୋ। ବାର୍ନାବାସ୍ ହାର୍ ଶାଉଲ୍ ନେ ନାୱାଃ ବିଶ୍ଵାସିକୋକେ ୟୀଶୁରାଃ ବିସାଏରେ ହାର୍ ଥିମ୍ବାଗି ସିଖାଅ ଲାଗିନ୍ ଏନ୍ତାଃରେ ସେନୋଃ ଯାନାକିନ୍ ହାର୍ କାଲିସିୟାକୋକେ କେଟେଃ କେଦାକୋ। ୟୀଶୁ ଚେତାନ୍ ରେ ବିଶ୍ଵାସ୍ ତାନ୍ କୋ ପାହିଲା ବେର୍ ଆନ୍ତାକିଆ ରେଗି “ମାସିହି(ଖ୍ରୀଷ୍ଟିୟାନ୍)” କାଜିଜାନାକୋ।

ମୂଷିଙ୍ଗ୍ ହୁଲାଙ୍ଗ୍, ଆନ୍ତାକିଆ ରେନ୍ ମାସିହିକୋ ଉପାସ୍ ଲୋଃ ବିନ୍ତି ତାଇନାକୋ। ପାବିତାର୍ ଆତ୍ମା ଇନ୍‍କୁକେ କାଜିକେଦାଏ, “ଇଙ୍ଗ୍ଆଃ ଲାଗିନ୍ ବାର୍ନାବାସ୍ ହାର୍ ଶାଉଲ୍ କେ ଏନ୍ କାମିରିକା ଲାଗିନ୍ ଆଲାଗ୍ କିନ୍ ପେ ଅକନାଃ ଲାଗିନ୍ ଇଙ୍ଗ୍ ଇନ୍ କିନ୍ କେ କେଡ଼ା କାଦିଙ୍ଗ୍।” ଏନାଲାଗିନ୍ ଆନ୍ତାକିଆ ରେନ୍ କାଲିସିୟା(ମାଣ୍ଡିଲି) ବାର୍ନାବାସ୍ ହାର୍ ଶାଉଲ୍ ଲାଗିନ୍ ବିନ୍ତି କେଦାକୋ ହାର୍ ଇନ୍ କିନାଃ ଚେତାନ୍ ରେ ଆକୋୱାଃ ତିଇ ମାଣ୍ଡାଅ କେଦାକୋ। ଏନ୍ତେ ଇନ୍‍କୁ ଇନ୍ କିନ୍ କେ ଏଟାଃ ଥିମ୍ବା ଜାଗାକୋରେ ୟୀଶୁରାଃ ବିସାଏରେ ସୁସାମାଚାର୍ ରାଃ ପାର୍ଚାର୍ ଲାଗିନ୍ କୁଲ୍ କେଦାକୋ। ବାର୍ନାବାସ୍ ହାର୍ ଶାଉଲ୍ ଏଟାଃ-ଏଟାଃ ଜାତିରେନ୍ କୋକେ ସିଖାଅ କେଦାକିନ୍, ହାର୍ ଥିମ୍ବାଗି ହୋଡ଼ୋକୋ ୟୀଶୁକେ ବିଶ୍ଵାସ୍ କେଦାକୋ।