48. ୪୮. ୟୀଶୁ ଗି କିରିୟା କାନ୍ତେୟା ମାସୀହ୍ ତାନିଃ

ଚିମ୍ତାଙ୍ଗ୍ ପାର୍ମେଶ୍ଵାର୍ ନେ ଦିଶୁମ୍ କେ ବାଇକେଦାଏ ଦୋ ସବେନ୍ ତେଆଃ ବୁଗିନ୍ ତାଇକେନା। ଆଦାମ୍ ହାର୍ ହାୱା ମିହୋଡ଼୍ ଏଟାଃ ନିଃଲୋଃ ଦୁଲାଡ଼୍ ତିନାକିନ୍, ହାର୍ ଇନ୍ କିନ୍ ପାର୍ମେଶ୍ଵାର୍ କେ ଦୁଲାଡ଼୍ ତିନାକିନ୍। ଯେତେନାଃ ବେମାର୍ ୟାଦ ଗୋନୋଏଃ କା ତାଇକେନା। ପାର୍ମେଶ୍ଵାର୍ ନେକାଗି ଦିଶୁମ୍ ସାନାଙ୍ଗ୍ ତାଇନାଏ।

ଶାଏତାନ୍ ବିଙ୍ଗ୍ ରାଃ ହୋରାତେ ବାଗିଚାରେ ହାୱାଲୋଃ ବାଖାଣ୍ କେଦାଏ, ଚିୟାଃଚି ଇନିଃ ଆଏଃକେ ଧୋକା ଏମ୍ ସାନାଙ୍ଗ୍ ତାଇନାଏ। ଏନାତେ ହାୱା ହାର୍ ଆଦାମ୍ ପାର୍ମେଶ୍ଵାର୍ ରାଃ ବିରୁଦ୍ଦ୍ ପାପ୍ କେଦାକିନ୍। ଚିୟାଃଚି ଇନ୍ କିନ୍ ପାପ୍ ଲାଆକିନ୍ ଏନାଲାଗିନ୍ ଦିଶୁମ୍ ରେ ତାଇନ୍ ସୋବେନ୍ କୋ ଗୋଜୋଃ ତିନାକୋ।

ଚିୟାଃଚି ଆଦାମ୍ ହାର୍ ହାୱା ପାପ୍ ଲାଆକିନ୍, ଏନାଲାଗିନ୍ ଆଡୋଃଗି ଖାରାପ୍ ଜାନା। ଇନ୍ କିନ୍ ପାର୍ମେଶ୍ଵାର୍ ରାଃ ସାର୍ରୁ ବାଇଜାନାକିନ୍। ଏନାରାଃ ପାରିନାମ୍ ତାନାଃ ଏନ୍ତାଏତେ ସୋବେନ୍ କୋ ପାପ୍ କେଦାକୋ। ସୋବେନ୍ ମିହୋଡ଼୍ ଯାନାମ୍ ତେଗି ପାର୍ମେଶ୍ଵାର୍ ରାଃ ବାଇରି ବାଇଜାନାଏ। ପାର୍ମେଶ୍ଵାର୍ ହାର୍ ହୋଡ଼ୋକୋୱାଃ ଥାଲାରେ ଶାନ୍ତି କା ତାଇକେନା। ମେନ୍ଦୋ ପାର୍ମେଶ୍ଵାର୍ ଶାନ୍ତି ବାଇ ସାନାଙ୍ଗ୍ ତାଇନାଏ।

ପାର୍ମେଶ୍ଵାର୍ କିରିୟାଃ କେଦାଏ ଚି ହାୱା ରାଃ ମିୟାଃ ବାଂଶ୍ ସାଏତାନ୍ ରାଃ ଭଅକେ ସେରେଦେୟାଏ। ଇନିଃ ନେୟାଃଅଗି କାଜିକେଦାଏ ଚି ସାଏତାନ୍ ଆଜାଃ ଏଡ଼ିକେ ସଦାୟାଏ। ସାଏତାନ୍ ମାସୀହ୍ କେ ଗୋଜିଆଏ, ମେନ୍ଦୋ ପାର୍ମେଶ୍ଵାର୍ ଇନିଃକେ ଆଡୋଃଗି ଜିହିଦ୍ ଇଆଏ। ନେୟାଃ ତାୟୋମ୍ତେ, ମାସୀହ୍ ସାଏତାନ୍ ରାଃ ପେଡ଼େଏ କେ ସୋବେନ୍ ହୁଲାଙ୍ଗ୍ ସାନ୍ତେ ଛାବା ତାଆଏ। ଚିମିନ୍ ବାରାଶ୍ ରାଃ ତାୟୋମ୍ତେ, ପାର୍ମେଶ୍ଵାର୍ ଉଦୁବ୍ କେଦାଏ ଚି ଇନିଃ ମାସୀହ୍ ୟୀଶୁ ତାନିଃ।

ପାର୍ମେଶ୍ଵାର୍ ଏନ୍ ବାଇଡ୍ ତେ ଆଜାଃ ପାରିବାର୍ କେ ବାଚାଅ କେଦାଏ ଅକନାଃ ରେ ଇନିଃ ହିଜୁଃନିଃ ତାଇକେନାଏ। ନୁହ୍ କେ ମିୟାଃ ମାରାଙ୍ଗ୍ ଦାଆ ଯାହାଜ୍ ବାଇଲାଗିନ୍ କାଜିକେଦାଏ ଚି ଇନିଃ ନେ ଲେକାତେ ଏନ୍ ହୋଡ଼ୋକୋକେ ବାଞ୍ଚାକେଦାଏ ଅକନ୍ କୋ ଇନିଃଜାଃରେ ବିଶ୍ଵାସ୍ ତିନାକୋ। ନେ ଲେକାତେ,ଇନ୍‍କୁ ସୋବେନ୍ କୋକେ ପାର୍ମେଶ୍ଵାର୍ ରାଃ ହରାତେ ଗୋଜୋଃ ଲାଗିନ୍ ତାଇକେନାକୋ ଚିୟାଃଚି ଇନ୍‍କୁ ପାପ୍ ଲାଆକୋ। ମେନ୍ଦୋ ପାର୍ମେଶ୍ଵାର୍ ଏନ୍ ସୋବେନ୍ କୋକେ ବାଞ୍ଚାଅ ଲାଗିନ୍ ୟୀଶୁକେ କୁଲ୍ କିଜାଏ ଅକନ୍ କୋ ଇନିଃ ଜାଃରେ ଚେତାନ୍ ରେ ବିଶ୍ଵାସ୍ ତିନାକୋ।

ଶାଅ-ଶାଅ ବାରାଶ୍ ସାନ୍ତେ, ୟାଜାକ୍ ପାର୍ମେଶ୍ଵାର୍ ଲାଗିନ୍ ଦାଣେ ରାକାବ୍ ତିନାକୋ। ନେୟାଃ ଉଦୁବ୍ ତାଇନାଏ ଚି ହୋଡ଼ୋକୋ ପାପ୍ ଲାଆକୋ, ହାର୍ ନେୟାଃ ତାନାଃ ଚି ଇନ୍‍କୁ ପାର୍ମେଶ୍ଵାର୍ ରାଃ ପାଡ଼୍ ଏତେ ଇନ୍‍କୁକେ ଶାଜାଇ ନାମେ ଲେକା ତାଇକେନାକୋ। ମେନ୍ଦୋ ଏନ୍ ଦାଣେ ଇନ୍‍କୁୱାଃ ପାପ୍ କୋକେ ଛାମା କାଏ ଧାଡ଼ି ତାଇନା। ୟୀଶୁ ସୋବେନ୍ କୋଏତେ ମାରାଙ୍ଗ୍ ୟାଜାକ୍ ତାନିଃ। ଇନିଃ ଏନା ରିକାକେଦାଏ ଅକନାଃ ଜେତାଏ ୟାଜାକ୍ କାଏ ରିକା ଧାଡ଼ିତେୟାଃ। ଇନିଃ ଏନ୍ ମିୟାଃଗି ଦାଣେ ହୋବା ଲାଗିନ୍ ଆପାନ୍ କେ ଏମ୍ ତାଦାଏ ଅକନାଃ ସୋବେନ୍ କୋୱାଃ ପାପ୍ କୋକେ ମେଟାଅ କେୟାଏ। ଇନିଃ ମାନାତିଙ୍ଗ୍ କେଦାଏ ଚି ପାର୍ମେଶ୍ଵାର୍ ଏନ୍ ସୋବେନ୍ କୋୱାଃ ପାପ୍ ଲାଗିନ୍ ଇନିଃକେ ଦାଣ୍ଡିତ୍ ଇଆଏ। ନେ କାରାନ୍, ୟୀଶୁ ଶିଦ୍ଧ୍ ମାରାଙ୍ଗ୍ ୟାଜାକ୍ ତାନିଃ।

ପାର୍ମେଶ୍ଵାର୍ ଆବ୍ରାହାମ୍ କେ କାଜିକିଯାଏ, “ଇଙ୍ଗ୍ ଆମାଃ ହୋରାତେ ସୋବେନ୍ କିଲିଲେନ୍ କୋକେ ଆଶିଷ୍ ଏମାକୁଇଙ୍ଗ୍।” ୟୀଶୁ ନେ ଆବ୍ରାହାମ୍ କିଲି ରେନ୍ ତାଇକେନାଏ। ପାର୍ମେଶ୍ଵାର୍ ଆବ୍ରାହାମ୍ ରାଃ ହୋରାତେ ସୋବେନ୍ କିଲିରେନ୍ କୋକେ ଆଶିଷ୍ ଏମାକୋ ତାନାଏ, ଚିୟାଃଚି ଅକଏ ୟୀଶୁ ଚେତାନ୍ ରେ ବିଶ୍ଵାସ୍ ୟାଃକ ପାର୍ମେଶ୍ଵାର୍ ଏନ୍ ସୋବେନ୍ ପାପ୍ କୋତେ ବାଞ୍ଚାଅ କୋୱାଏ। ଚିମ୍ତାଙ୍ଗ୍ ନେ ହୋଡ଼ୋକୋ ୟୀଶୁ ଚେତାନ୍ ରେ ବିଶ୍ଵାସ୍ ୟାଃକୋ,ଦୋ ପାର୍ମେଶ୍ଵାର୍ ଇନ୍‍କୁକେ ଆବ୍ରାହାମ୍ ରାଃ କିଲି ମାନାତିଙ୍ଗ୍ ଏୟାଏ।

ପାର୍ମେଶ୍ଵାର୍ ଆବ୍ରାହାମ୍ କେ କାଜିକିଯାଏ ଚି ଇନିଃ ଆପାନ୍ ନିଜ୍ କୋଡ଼ାହୋନ୍ କେ ଇନିଜାଃ ଲାଗିନ୍ ଦାଣେ ରାକାବିକାଏ। ମେନ୍ଦୋ ପାର୍ମେଶ୍ଵାର୍ ଇସହାକ୍ ରାଃ ବାଦ୍ଲା ଦାଣେ ଲାଗିନ୍ ମିୟାଃ ମିଣ୍ଡି ଏମ୍ କିଜାଏ। ଆବୁ ସୋବେନ୍ କୋ ଆପାନାଃ ପାପ୍ ଲାଗିନ୍ ଗୋଜୋଃ ଲେକା ତାଇକେନାବୁ! ମେନ୍ଦୋ ପାର୍ମେଶ୍ଵାର୍ ଆବୁଆଃ ଜାଗାରେ ଗୋଜୋଃ ଲାଗିନ୍ ୟୀଶୁକେ ଦାଣେରାଃ ରୁପ୍ ରେ ଏମ୍ ତିଜାଏ। ନେ ଲେକାତେ ଆବୁ ୟୀଶୁକେ ପାର୍ମେଶ୍ଵାର୍ ରାଃ ମିଣ୍ଡି କାଜିୟାଃବୁ।

ଚିମ୍ତାଙ୍ଗ୍ ପାର୍ମେଶ୍ଵାର୍ ମିଶାର୍ ରେ ଆଖ୍ରୀ ମାହାମାରି କୁଲ୍ କେଦାଏ ଦୋ ଇନିଃ ସୋବେନ୍ ମିୟାଃ ପାରିବାର୍ କେ କାଜିକେଦାଏ ଚି ଇନ୍‍କୁ ମିୟାଃ ମିଣ୍ଡି ରାଃ ଦାଣେ ଏନେକାକୋ। ଏନ୍ ମିଣ୍ଡିରାଃ ଜେତାଏ ଦୋସ୍ କା ତାୟୋଃ ଚାହି। ଏନ୍ତେ ଆକୋୱାଃ ଦୁହାର୍ ରାଃ ଚାଉଖାଟ୍ ରାଃ ଚେତାନ୍ ରେ ହାର୍ ବାଂଲାରେ ଇନ୍‍କୁ ଇନିଜାଃ ମାୟୋମ୍ ତେ ଯୋଲୋମ୍ ତାଦାକୋ। ଚିମ୍ତାଙ୍ଗ୍ ପାର୍ମେଶ୍ଵାର୍ ଏନ୍ ମାୟୋମ୍ କେ ନେଲ୍ କେଦାଏ ଦୋ ଇନିଃ ଇନ୍‍କୁୱାଃ ଅଡ଼୍ଆଃତେ ଆୟୁର୍ ସେନୋଃ ଜାନାଏ ହାର୍ ଇନ୍‍କୁୱାଃ ପାହିଲା ହୋନ୍ କୋକେ କାଏ ଗୋଏଃ କେଦା। ଚିମ୍ତାଙ୍ଗ୍ ନେୟାଃ ହୋବାନା ଦୋ ପାର୍ମେଶ୍ଵାର୍ ନେୟାଃକେ ଫାସାହା ରାଃ ପାରାବ୍ କାଜିକେଦାଏ।

ୟୀଶୁ ଫାସାହ୍ ରାଃ ପାରାବ୍ ରେନ୍ ମିୟାଃ ମିଣ୍ଡି ଲେକା ତାନିଃ। ଇନିଃ ଚିଉଲା କାଏ ପାପ୍ ଲାଆ ଏନାଲାଗିନ୍ ଇନିଃଜାଃରେ ଯେତେନାଃ ଅଗୀ ଗାଲ୍ତି କା ତାଇକେନା। ଇନିଃ ଫାସାହ୍ ରାଃ ପାରାବ୍ ସାମାୟ୍ ରେ ଗୋଏଃ କାନ୍ତିନାଏ ଚିମ୍ତାଙ୍ଗ୍ ଜେତାଏ ୟୀଶୁଗାଃରେ ବିଶ୍ଵାସ୍ ତାନାଏ,ଏନ୍ତେ ୟୀଶୁ ରାଃ ମାୟୋମ୍ ଏନ୍ ହୋଡ଼୍ କେ ପାପ୍ ରାଃ ହାଲ୍ ଫେରେଃ ତାଇନାଏ। ନେୟାଃ ନେଲେକା ତାନାଃ ଜେଲେକା ଚି ପାର୍ମେଶ୍ଵାର୍ ଏନ୍ ହୋଡୋଃ ରାଃ ନାଡ଼େଏତେ ଆୟୁର୍ ସେନୋଃ ଜାନାଏ, ଚିୟାଃଚି ଇନିଃ ଆଏଃକେ ଦାଣ୍ଡ କାଏ ଏମିୟାଃଏ।

ପାର୍ମେଶ୍ଵାର୍ ଇସ୍ରାଏଲୀ ହୋଡ଼ୋକୋଲୋଃ ମିୟାଃ ନିୟାମ୍ ଥଲ୍ କେଦାଏ, ଚିୟାଃଚି ଇନ୍‍କୁ ଏନ୍ କା ହୋଡ଼୍ କୋ ତାଇକେନାକୋ ଅକନ୍ କୋକେ ପାର୍ମେଶ୍ଵାର୍ ଆପାନାଃ ହୋବା ଲାଗିନ୍ ସାଲାଲେଃ କୋୱାଏ। ମେନ୍ଦୋ ନାଆ ପାର୍ମେଶ୍ଵାର୍ ମିୟାଃ ନେକା ନିୟାମ୍ ଥଲ୍ କାଦାଏ ଅକନାଃ ଚି ସୋବେନ୍ କୋଆଃ ଲାଗିନ୍ ତାନାଃ। ଆଗାର୍ ଜେତାନ୍ ଜାତି ରେନ୍ ଜେତାନ୍ ହୋଡ଼୍ ନେ ନାୱାଃ ନିୟାମ୍ କେ ମାନାତିଙ୍ଗ୍ ତାନାଏ, ଦୋ ଏନ୍ ପାର୍ମେଶ୍ଵାର୍ ରାଃ ହୋଡ଼ୋରେ ମେଶା କେନୋଗାକୋ। ଇନିଃ ନେକା ନେୟାଲାଗିନ୍ ରିକାୟାଏ ଚିୟାଃଚି ଇନିଃ ୟୀଶୁକେ ବିଶ୍ଵାସ୍ ତାନାଏ।

ମୁଶା ନାବୀ ମିୟାଃ ନେକା ଆୟାର୍ କାଜି ନିଃ ତାଇକେନାଏ ଅକନିଃ ପାର୍ମେଶ୍ଵାର୍ ରାଃ ବାଚାନ୍ କେ ମାରାଙ୍ଗ୍ ପେଡ଼େଏତେ ଲୋଃ ପାର୍ଚାର୍ ଲାଆଏ। ମେନ୍ଦୋ ୟୀଶୁ ସୋବେନ୍ ଆୟାର୍ କାଜି କୋୱାଃତେ ମାରାଙ୍ଗ୍ ତାନିଃ। ଇନିଃ ପାର୍ମେଶ୍ଵାର୍ ତାନିଃ,ଏନାଲାଗିନ୍ ଯାହାନାଃଅଗି ଇନିଃ ରିକାକାଦାଏ ହାର୍ କାଜିକାଦାଏ ଇନିଃ ପାର୍ମେଶ୍ଵାର୍ ରାଃ କାମି ହାର୍ ବାଚାନ୍ ତାଇକେନା। ଏନା ଲାଗିନ୍ ପାବିତାର୍-ପୁଥି ୟୀଶୁକେ ପାର୍ମେଶ୍ଵାର୍ ରାଃ ବାଚାନ୍ କାଜିଅଗା।

ପାର୍ମେଶ୍ଵାର୍ ଦାଉଦ୍ ରାଜାଲୋଃ କିରିୟା ଲାଆଏ ଚି ରାଜା ରାଃ ଲେକା ଇନିଜାଃ ମିୟାଃ କିଲିରେନ୍ ପାର୍ମେଶ୍ଵାର୍ ରାଃ ହୋଡ଼ୋ କୋକେ ସୋବେନ୍ ହୁଲାଙ୍ଗ୍ ଲାଗିନ୍ ରାଇଜ୍ ଏୟାଏ। ୟୀଶୁ ପାର୍ମେଶ୍ଵାର୍ ରାଃ ହୋନ୍ ହାର୍ ମାସୀହ୍ ତାନିଃ, ଏନା ଲାଗିନ୍ ଇନିଃ ରାଜା ଦାଉଦ୍ କିଲିରେନ୍ ତାନିଃ ଅକନିଃ ସୋବେନ୍ ହୁଲାଙ୍ଗ୍ ଲାଗିନ୍ ରାଇଜ୍ ଧାଡ଼ିୟାଏ।

ଦାଉଦ୍ ଦୋ ଇସ୍ରାଏଲୀ କୋଆଃ ରାଜା ତାଇକେନାଏ,ମେନ୍ଦୋ ୟୀଶୁ ସୋବେନ୍ ଦିଶୁମ୍ ରେନ୍ ରାଜା ତାନିଃ!ଇନିଃ ଆଡୋଃ ମିଶା ହିଜୁଃଗାଏ ହାର୍ ସୋବେନ୍ ହୁଲାଙ୍ଗ୍ ଲାଗିନ୍ ବିଚାର୍ ହାର୍ ଶାନ୍ତି ଲୋଃ ଆଜାଃ ରାଇଜ୍ ରେ ରାଇଜ୍ ଏୟାଏ। ବାଇବାଲ୍ ମିୟାଃ କାହାନୀ: