17. ଦାଉଦ୍ସ୍ ଘି ଗାନେ ପାରମେଶ୍ୱରସ୍ ଘି ଶପଥ୍ ।
Listen to this story Audio file · 7.4 MB
The words of this recording are below, in Kisan.
ଶାଉଲ୍ସ୍ ଇସ୍ରାଏଲର୍ ଘି ପାହିଲା ରାଜା ରାଚାସ୍ । ହୁସ୍ ଲାମ୍ବା ଆରୁ ବାନେ ଟିକେ ରାଚାସ୍ । ଯେ ଲେଖାନୁ ହୁ ଆଲର୍ ଚାହାଲାର୍ ଏକଦମ୍ ହୋନ୍ନେହି । ଇସ୍ରାଏଲ ଘି ମିଆଁ ନିଜର୍ ଶାସନ୍ ଘି ପାହିଲେ କେତ୍କୋ ବରଷ୍ ତୋକ୍ ଶାଉଲ୍ସ୍ ଅଣ୍ଟା ବାନେ ମୁଖିଆ ରାଚାସ୍ । ଲେକିନ୍ ବାଦ୍ନୁଁ ହୁସ୍ ଅଣ୍ଟା ଖାରାପ୍ ଆଲାସ୍ ମାନ୍ଚାର୍ କେରାସ୍ ଯେବୋନ୍ କା ପାରମେଶ୍ୱରସ୍ ଘି କତ୍ଥା ଗୁଠିନ୍ ବୋନ୍ ମା ମାନ୍ଚାସ୍, ଇ ବାକେନ୍ ପାରମେଶ୍ୱରସ୍ ଅଣ୍ଟା ଦୁସ୍ରା ଆଲାସିନ୍ ଚୁନ୍ଚାସ୍ କା ଆଣ୍ଟା ଉଲ୍ଲା ନୁ ହୁସ୍ ଘି ଜାଗାନୁ ମୁଖିଆ ମାନୋସ୍ ।
ପାରମେଶ୍ୱରସ୍ ଦାଉଦ୍ ନାମେ ଘି ଅଣ୍ଟା ଜାୱାନ୍ ଇସ୍ରାଏଲ ଆଲାସ୍ ସିନ୍ ଚୁନା କିରି ଅଣ୍ଟା ଉଲ୍ଲାନୁ ଶାଉଲ୍ସ୍ ଘୀ ଜାଗାନୁଁ ମୁଖିଆ କମାଗେ ଲାଗାନ୍ ତିଆର୍ କାମ୍ନା ଶୁରୁ କାମ୍ଚାଚାସ୍ । ଦାଉଦ୍ ବେତେଲ୍ହେମ୍ ଘି ପାଡ଼ାନ୍ତା ଅଣ୍ଟା ଚାରୁୱାହାସ୍ ରାଚାସ୍ । ଜୁକ୍କୁ ସମୟ ଘି ବାଦେନୁ , ଦାଉଦ୍ସ୍ ସିଂହିଁ ଆରୁ ଭାଲୁ ଜୋଡ଼େ ବୋନ୍ ପିଟ୍ଟା ଚିଚ୍କାଚାସ୍ ଏନ୍ଦେର୍ ଗେକା ଦାଉଦ୍ ଦେଖ୍ଭାଲ୍ କାମ୍ନା ବାକେନ୍ ହୁସ୍ କି ତାମ୍ବାସ୍ ଗି ଭେଢ଼ି ଗୁଠି ମିୟାଁ ହାମ୍ଲା କାମ୍ଚିକି ଚାଦ୍ । ଦାଉଦ୍ ଅଣ୍ଟାସ୍ ଦାୟାଲୁସ୍ ଆରୁ ଧାରମିସ୍ ଆଲାସ୍ ରାଚାସ୍ । ହୁସ୍ ପାରମେଶ୍ୱରସ୍ ଘି ମିୟାଁ ଭାରୋସା କାମ୍କାଚାସ୍ ଆରୁ ହୁସ୍ ଘି କାତଥା ଗୁଠିନ୍ ମାନ୍କାଚାସ୍ ।
ଯେବାକେନ୍ ଦାଉଦ୍ସ୍ ଆକ୍କୁନ୍ ଜାୱାନ୍ ଆଲାସ୍ ରାଚାସ୍, ହୁସ୍ ଲାମ୍ବା – ଚୁଉଡ଼ା ଗୋଲିୟତସ୍ ଘି ବିରୋଧ୍ ନୁ ଲାଢ଼େଇ କାମ୍କାଚାସ୍ । ଗୋଲିୟାତ୍ ଅଣ୍ଟା ବାନେ ସେନାସ୍ ରାଚାସ୍ । ହୁସ୍ ମୁରୁକ୍ ତାକତ୍ବର୍ ଆରୁ ଲୋଗ୍ଭୋଗ୍ ତିନ୍ ମିଟର ଲାମ୍ବା ରାଚାସ୍ ! ଲେକିନ୍ ପାରମେଶ୍ୱରସ୍ ଗୋଲିୟତ୍ସିନ୍ ପିଟାଗେ ଆରୁ ଇସ୍ରାଏଲ୍ ରାଜିବୋନ୍ ବାଚାବାଗେ ଲାଗାନ୍ ଦାଉଦ୍ ସିନ୍ ସାହାୟାତା କାମ୍କାଚାସ୍ । ଇଦ୍ଘି ବାଦେନୁ, ଦାଉଦ୍ସ୍ ଇସ୍ରାଏଲ ଘି ଶତ୍ରୁ ଘି ମିୟାଁ କେତ୍କୋ ଥର୍ ସଫଲ୍ ମାନ୍ଚାସ୍ । ଦାଉଦ୍ ଅଣ୍ଟା ବାଡ଼୍କା ସେନା ମାନ୍ଚାସ୍ କେରାସ୍ । ଆରୁ ହୁସ୍ ଜୁକ୍କୁ ଲାଢ଼େଇ ଗୁଠିନୁ ଇସ୍ରାଏଲିର୍ ଘି ସେନାରିନ୍ ଆଗୁଆ କାମ୍କାଚସ୍ । ଆଲାଲ୍ ଗୁଠିର୍ ହୁସିନ୍ ମୁରୁକ୍ ପସନ୍ଦ୍ କାମଚାର୍ ।
ଆଲାର୍ ଗୁଠିର୍ ଦାଉଦ୍ସିନ୍ ଏତ୍କୋ ଆଦାର୍ କାମ୍ଚରକା ଶାଉଲସ୍ ହୁସିନ୍ ଜଲନ୍ ମାନ୍ଚାସ୍ । ଆଖିରିକାର୍ ନୁ ଶାଉଲସ୍ ହୁସିନ୍ ପିଟାଗେ ଚାହାଲାସ୍, ଇବାକେନ୍ ଦାଉଦସ୍ ଆରୁ ହୁସ୍ ଘି ସେନା ଗୁଠିର୍ ନୁହରାଗେ ଜଙ୍ଗଲ ତାରା ବୁଙ୍ଗେ ଚିଚ୍ଚାର୍ । ଅଣ୍ଟା ଉଲ୍ଲାନୁ ଯେ ବାକେନ୍ ଶାଉଲସ୍ ଆରୁ ହୁସ୍ପି ସେନାର୍ ଦାଉଦ୍ ସିନ୍ ବେଦ୍ଦାଲାର୍ ବାକେନ ଶାଉଲସ୍ ଅଣ୍ଟା ଗୁଫାନୁ କେରାସ୍ ।ହୁଦ୍ ହୁ ଗୁଫା ରାଚାଦ ହୁନ୍ନୁ ଦାଉଦ୍ ନୁହୁର୍କା ଚାସ୍, ଲେକିନ୍ ଶାଉଲ୍ସ୍ ହୁସିନ୍ ଏରାଗେ ପଲ୍କା ଚାସ୍ । ଦାଉଦ୍ ଶାଉଲ୍ସ୍ ଘି ପିଛ୍ଲି ତାରତ ହୁସ୍ ଘି ଚାହାଁନ୍ତି ପାର୍ ମାନ୍ଚାସ୍ ଆରୁ ହୁସ୍ ଘି ଚିଢ଼ା ସ୍ତିନ୍ ଅଣ୍ଟା ଖାଣେ ମୁର୍କେ ଚିଚ୍ଚାସ୍ । ବାଦେନୁଁ ଯେବାକେନ୍ ଶାଉଲସ୍ ହୁ ଗୁମ୍ଫାନ୍ତିନ୍ ସେ ଉର୍ଖିଆସ୍ ବାକେନ୍ ଦାଉଦ୍ସ୍ ହୁସିନ୍ ଚିର୍ରାରାକିରି ହୁ ଧାରଚ୍ କା ଅଚ୍କା ଚିଢ଼ା ଘି ଟୁକ୍ଡ଼ା ବୋନ୍ ଏଦିୟାସ୍ । ଇ ରିତିନୁ ଶାଉଲସ୍ ଆଖିଆସ୍କା ଦାଉଦ୍ସ୍ ରାଜା ମାନାଗେ ଲାଗାନ୍ ହୁସିନ୍ ପିଟାଗେ ଇନ୍କାର୍ କାମ୍ଚେଚାସ୍ ।
କିଛି ସମୟ ଘି ବାଦ୍ନୁ, ଶାଉଲସ୍ ଲାଢ଼େଇ ନୁ କେଚାସ୍ କେରାସ୍, ଆରୁ ଦାଉଦ୍ସ୍ ଇସ୍ରାଏଲଘି ରାଜା ମାନ୍ଚାସ୍ କେରାସ୍ । ହୁସ୍ ଅଣ୍ଟା ବାନେ ମୁଖିଆ ରାଚାସ୍, ଆରୁ ଆଲାର୍ ଗୁଠିର୍ ହୁସିନ୍ ବାନେ ହାକ୍ଖୀଆର୍। ପାରମେଶ୍ୱରସ୍ ଦାଉଦ୍ସିନ୍ ଆଶିଷ୍ ଚିଚ୍ଚାସ୍ ଆରୁ ହୁସିନ୍ ସଫଳ ବାନାବାଚାସ୍ । ଦାଉଦ୍ସ୍ କେତ୍କେ ଲାଡ଼େ ଲାଢ଼ିୟାସ୍, ଆରୁ ପାରମେଶ୍ୱରସ୍, ଇସ୍ରାଏଲି ରାଜି ଘି ଶତ୍ରୁ ଗୁଠିର୍ସ୍ତିନ୍ ହାରାବାକେ ହୁସ୍ ଘି ମାଦେତ୍ କାମ୍ଚାସ୍ । ଦାଉଦ୍ସ୍ ଯେରୁଶାଲେମ୍ ପାଡ଼ାବୋନ୍ ଜିତିକିରି ହୁବୋନ୍ ନିଜର୍ ରାଜଧାନି କାମ୍ଚାସ୍, ହୁସାନ୍ ହୁସ୍ରାଚାସ୍ ଆରୁ ଶାସନ୍ କାମ୍ଚାସ୍ । ଦାଉଦ୍ସ୍ ୪୦ ବଛର୍ ତୋକ୍ ରାଜା(ମୁଖିଆ) ରାଚାସ୍ । ଇ ସମୟ ଘି ଅନୁସାର୍ ନୁ ଇସ୍ରାଏଲ ତାକତ୍ବର୍ ଆରୁ ଧନି ମାନ୍ଚାର୍ କେରାର୍ ।
ଦାଉଦ୍ ଅଣ୍ଟା ମନ୍ଦିର୍ ବାନାବାଗେ ଚାହାଲାସ୍ ହୁସାନ୍ ଜାମା ଇସ୍ରାଏଲରିନ୍ ପାରମେଶ୍ୱରସ୍ ଘି ବିନ୍ତି କାମା ଅଙ୍ଗୋର୍ ଆରୁ ହୁସ୍ ଘି ଲାଗାନ୍ ବାଲିଦାନ୍ ଚାଢ଼ାବା ଅଙ୍ଗୋର୍ । ଲାଗ୍ଭାଗ୍ ୪୦୦ ବରଷ୍ ତୋକ୍, ହୁବଡ଼ାର୍ ଆଲାର୍ ମୁଶାସ୍ ଘି ବାନାବାଚ୍କା ମିଲମିଲାପ୍ , ବାଲା ତାମ୍ବୁନୁ ପାରମେଶ୍ୱରସ୍ ଘି ବିନ୍ତି କାମ୍ଲାର୍ ଆରୁ ହୁସ୍କେ ବାଲିଦାନ୍ ଚାଢ଼ା ବାଲାର୍ ।
ଲେକିନ୍ ହୁସାନ୍ ନାତାନ୍ ନାମେ ଘି ଅଣ୍ଟା ଭବିଷ୍ୟତବକ୍ତା ରାଚସ୍ । ପାରମଶ୍ୱରସ୍ ହୁସିନ୍ ଦାଉଦ୍ ସିନ୍ ଇ ବୋନ୍ ତେଙ୍ଗାଗେ ତାଇୟାସ୍ କା,“ନିନ୍ ବାଗଗେ ଲାଢ଼େଇ ଲାଢ଼୍କାଦାୟ, ଇଦ୍ ଘି ନିନ୍ ଏଘାଁ ଲାଗାନ୍ ଇ ମନ୍ଦିର୍ ବୋନ୍ ଆମ୍କେ ବାନାବାଗେ । ନିଘାଁ କୁକ୍ସ୍ ଇ ବୋନ୍ ବାନା ବୋସ୍ । ଫିର୍ ଭି, ଏନ୍ ନିଙ୍ଗାନ୍ ଜୁକୁକୁ ନ୍ତି ଆଶିଷ୍ କାମୋନ୍ । ନିଘାଁଏ ଅଣ୍ଟା ବଂଶର ଜାମା ବାକେନ୍ ଲାଗାନ୍ ଏଘାଁ ଆଲାର୍ ଘି ମିୟାଁ ରାଜା ଘି ରୂପନୁ ଶାସନ୍ କାମୋର୍ ।” ଜାମା ବାକେନ୍ ଘି ଲାଗାନ୍ ଶାସନ୍ କାମ୍ନା ବାଲା ହୁ ଦାଉଦସ୍ ଘି ଅଣ୍ଟା ବଂଶର ମାସିହି ରାଚାସ୍ । ମାସିହି ପାରମେଶ୍ୱରସ୍ ଘି ଚୁନୁଚ୍କା ବାଲା ଆଲାସ୍ ରାଚାସ୍ । ଯେ କା ଦୁନିଆଁ ନ୍ତା ଆଲାର୍ ଗୁଠିର୍ ଘୀ ହୁବ୍ଡ଼ାର୍ ଘୀ ପାପ୍ ଗୁଠୀନ୍ ସ୍ତିନ୍ ବାଚାବୋସ୍ ।
ଯେ ବାକେନ୍ ଦାଉଦ୍ସ୍ ନାତାନ୍ସ୍ ଘି ସନ୍ଦେଶ୍ ବୋନ୍ ମେନ୍ଚାସ୍ ଆରୁ ହୁସ୍ ଘି ମାହିମା କାମ୍ଚାସ୍ ବାକେନ୍ ହୁସ୍ ପାରମେଶ୍ୱରସ୍ ସିନ୍ ଧନ୍ୟବାଦ୍ ଚିଚ୍ଚାସ୍ ଆରୁ ହୁସ୍ ଘି ମାହିମା କାମ୍ଚାସ୍ । ପାରମେଶ୍ୱରସ୍ ହୁସ୍ ଘି ଇଜ୍ଜତ୍ ( ମନ୍ ସମ୍ମନ୍ ) ବୋନ୍ ବାଢ଼ା ବାଲାସ୍ ଆରୁ ହୁସିନ୍ ଜୁକ୍କୁ ଲେଖା ଆଶିଷ୍ ଗୁଠି ଚିୟାଲାସ୍ । ଜରୁର୍, ଦାଉଦ୍ସ୍ ବାଲ୍ଲା ଲାସ୍ କା ପାରମେଶ୍ୱରସ୍ ଇ କାତ୍ଥା ଗୁଠିବୋନ୍ ଏକଲା କାମୋସ୍ । ଇ ସମୟନୁ ଏମ୍ ଆହାଲ୍ ଦାମ୍ କା ଇସ୍ରାଏଲରିନ୍ ଅଣଟା ଲାମ୍ବା ସାମାୟ ତୋକ୍, ଲୋଗ୍ଭୋଗ୍ ୧,୦୦୦ ବରଷ୍ ତୋକ୍ ମାସିହିସ୍ ଘି ବାରନା ଘି ଇନ୍ତିଜାର କାମାଗେ ପାଡ଼୍ରୋଦ୍ ।
ଦାଉଦସ୍ କିଛି ବଛର୍ ତୋକ୍ ନ୍ୟାୟ ଲେଖାନୁ ନିଜର୍ ଆଲାଘି ମିୟାଁ ସେବା କାମ୍ଚାସ୍ । ହୁସ୍ ବାଡ଼େ ଭକ୍ତି ଘି ଲେଖା ପାରମେଶ୍ୱରସ୍ ଘି କାତ୍ଥା ଗୁଠିନ୍ ମାନ୍ଚାସ୍ ଆରୁ ପାରମେଶ୍ୱରସ୍ ହୁସିନ୍ ଆଶିର୍ବାଦ୍ କାମ୍ଚାସ୍ । ଲେକିନ୍, ନିଜର୍ ଜିବନ୍ ଘି ଅନ୍ତ ବାକେନ୍ ହୁସ୍ ପାରମେଶ୍ୱରସ୍ ଘି ବିରୁଦ୍ଧନୁ ପାପ୍ କାମ୍ଚ୍କା ଚାସ୍ ।
ଅନ୍ଦୁଲ୍ ଦାଉଦସ୍ ନିଜର୍ ମୋହଲ୍ ସ୍ତିନ୍ ବାହାରି ଡୋଙ୍ଗଚାରାସ୍ ଆରୁ ଅଣ୍ଟା ସୁନ୍ଦିର୍ ଆଲିବୋନ୍ ଏମ୍ନା ବାକେନ୍ ଏରିୟାସ୍ । ହୁସ୍ ହୁବୋନ୍ ବାଲ୍ଲା ଲାସ୍ ଲେକିନ୍ ହୁସ୍ ପାତା ଲାଗାବାସାସ୍ କା ହୁଦ୍ ଘି ନାମେ ବତ୍ସେବା ରାଚାଦ୍ ।
ନିଜର୍ ନଜର୍ ବୋନ୍ ମା କିରତା କିରି, ଦାଉଦସ୍ ହୁବୋନ୍ ନିଜର୍ ଚାହାଁନୁ ଅନ୍ଦରା ଗେ ଲାଗାନ୍ ଅଣ୍ଟା ସିନ୍ ମେଁହାଗେ ତାଇୟାସ୍ । ହୁସ୍ ହୁଦ୍ ଘି ଗାନେ ଚୁତିୟାସ୍ ଆରୁ ହୁବୋନ୍ ଏଡ଼୍ପା ତାଇୟେ ଚିଚ୍ଚାସ୍ । ଥଡ଼େ ସମୟ ଘି ବାଦେନୁ ବତ୍ଶେବାଦ୍ ଇ ତଙ୍ଗି କିରି ଦାଉଦସ୍ ଘି ଚଁହାନୁ ଖବର ତାଇୟା କା ହୁଦ୍ ଗର୍ଭବତି ଆତ୍ଲି ।
ବତ୍ଶେବାଦ୍ ଘି ଆଲାସ୍ ଉରିୟାନ୍ ନାମେ ଘି ଅଣ୍ଟା ଆଲାସ୍ ରାଚାସ୍ । ହୁସ୍ ଦାଉଦସ୍ ଘି ସାଚ୍ଚା ବାନେ ସେନାସ୍ ସ୍ତିନ୍ ଅଣ୍ଟା ରାଚାସ୍ । ଇ ସମୟ ନୁ ହୁସ୍ ଲାଢ଼େଇ କାମାଗେ ଲାଗନ୍ ବାହାରି କେର୍କାଚାସ୍ । ଦାଉଦସ୍ ଉରିୟାହ୍ ସିନ୍ ଲାଢ଼େଇ ସ୍ତିନ୍ କିର୍ତି କିରି ହୁସ୍ ନିଜର୍ ଆଲି ଗାନେ ରାଗେ ତେଙ୍ଗିୟାସ୍ । ଲେକିନ୍ ଦୁସ୍ରା ସେନାର୍ ଲାଢ଼େଇ ନୁ ରାଚାର୍ ବାକେନ୍ ଉରିୟାହାସ୍ ଏଡ଼୍ପା କାଲାଗେ ମାନା କାମ୍କେ ଚିଚ୍ଚାସ୍ । ଆଖିର୍ ନୁଁ ଦାଉଦସ୍ ଉରିୟାହାସିନ୍ ଆରୁ ଲଢ଼େଇ ନୁ ତାଇୟେ ଚିଚ୍ଚାସ୍ ଆରୁ ସେନାର ଘି ମୁଖିଆସିନ୍ ହୁସିନ୍ ଲାଢ଼େଇ ଘି ଶତ୍ରୁ ଜାମାର୍ ସ୍ତିନ୍ ତାକୋତ୍ ବୋର୍ ରୋର୍ ଏନ୍ଦେର୍ ଗେ କା ହୁସ୍ ଖୁଅସ୍ କୋସ୍ । ତା ଏନ୍ନେ ମାନ୍ଚା କା ଉରିୟାସ୍ ଲାଢ଼େଇନୁଁ କେଚ୍ଚାସ୍ କେରାସ୍ ।
ଉରିୟାସ୍ ଘି ଲାଢ଼େଇ ନୁ ଖିନା ଘି ପାଛ୍ଲି ଦାଉଦସ୍ ବତ୍ଶେବା ବୋନ୍ ବେଞ୍ଜେରିୟାସ୍ । ବାଦେନୁ, ହୁଦ୍ ଦାଉଦସ୍ ଘି କୁକ୍ସିନ୍ ଜନମ୍ ଚିଚ୍ଚାଦ୍ । ଦାଉଦସ୍ ଏନ୍ଦ୍ରିନ୍ ଭି କାମ୍ଚାସ୍ ହୁଦ୍ଘୀ ଲାଗାନ୍ ହୁସିନ୍ ପାରମେଶ୍ୱରସ୍ ମୁରୁକ୍ ଖିସାରାଚାସ୍ । ଇ ଲେଖା ହୁସିନ୍ ଲାଗାନ୍ ହୁସିନ୍ ନାତାନ୍ ଭବିଷ୍ୟତବକ୍ତାସିନ୍ ଦଉଦସ୍ ତେଙ୍ଗାଗେ ତାଇୟାସ୍ କା ହୁସ୍ ଘି ପାପ୍ ବୋଦ୍ କେତ୍କୋ ଖରାପ୍ ରାଚାସ୍ । ଦାଉଦସ୍ ନିଜର୍ ପାପ୍ ବୋନ୍ ପାଛ୍ଚାରାଚାସ୍ ଆରୁ ପାରମେଶ୍ୱରସ୍ ହୁସିନ୍ ମାଫ୍ କାମ୍ଚ୍ଚେଚାସ୍ । ନିଜର୍ ଆଖ୍ରି ଜିବନ ନୁଁ, ନିଜର୍ କଠିନ୍ ସମୟ ବାକେନ୍ ନୁଁ ଦଉଦ୍ ପାରମେଶ୍ୱରସ୍ ଘି ପାଛ୍ଲି – ପାଛ୍ଲି ଏକିୟାସ୍ ଆରୁ ହୁସ୍ ଘି କାତଥା ଗୁଠିନ୍ ବୋନ୍ ମାନ୍ଚାସ୍ ।
ଲେକିନ୍ ଦାଉଦସ୍କି ହାଦ୍ଦୁସ୍ କେଚ୍ଚା କେରାସ୍, ଇ ଲେଖାନୁଁ ପାରମେଶ୍ୱରସ୍ ଦାଉଦ୍ସିନ୍ ଦଣ୍ଡ ଚିଚ୍ଚାସ୍ । ଇବୋନ୍ ଆମ୍ବିକିରି, ଦାଉଦ୍ସ୍ ଘି ଖିନା ତୋକ୍, ହୁସ୍ ଘି ନିଜର୍ ପରିବାର୍ ଘି କିଛି ଆଲାର୍ ଗୁଠିର୍ ହୁସ୍ ଘି ବିରଦ୍ଧ୍ ନୁ ଲାଢ଼େଇ କାମ୍ଚାସ୍, ଆରୁ ଦାଉଦ୍ସ୍ ଘୀ ନିଜର୍ ଶକ୍ତି / ( ତାକତ୍ ) ବୋଦ୍ କମ୍ ମାନ୍ଚା କେରକିଚାଦ୍ । ଲେକିନ୍ ପାରମେଶ୍ୱରସ୍ ବିଶ୍ୱାସ୍ କାମ୍ନା ବାଲାସ୍ ରାଚାସ୍ ଆରୁ ଆକ୍କୁନ ଭି ହୁସ୍ ହୁବୋନ୍ କାମ୍ଚାସ୍ ଯେ କି ହୁସ୍ ଦାଉଦ୍ସିନ୍ କାମାଗେ ଶପଥ୍ କାମ୍କାଚାସ୍ କି ହୁବୋନ୍ କମୋସ୍ । ଭାଲେ ହି ଦାଉଦ୍ ହୁସ୍ ଘି ଆଜ୍ଞା ବୋନ୍ ମା’ ମାନ୍ଚାକାଚାସ୍ ପାଛ୍ଲି , ଦାଊଦ୍ ଆରୁ ବତ୍ଶେବା ଘି ଦୁସ୍ରା ସାନ୍ତାନ୍ ଜନମ୍ ମାନ୍ଚାର୍, ଆରୁ ହୁବ୍ଡ଼ାର୍ ହୁସ୍ ଘି ନାମେ ସୁଲେମାନ୍ ଉଇୟାସ୍ ।
୧ଶାମୁୟେଲ ୧୦;୧୫-୧୯;୨୪;୩୧; ୨ଶାମୁୟେଲ ୫;୭;୧୧-୧୨ ସ୍ତିନ୍ ଅଣ୍ଟା ବାଇବେଲ୍ ଘି କାଥ୍ ନୀ
Free to use, adapt, and share under an open license (CC BY-SA 4.0).