18. ହାଟ୍‌କା ରାଜି

ଦାଉଦ୍ ରାଜାସ୍ ଚାଳିଷ ବରଷ ତୋକ୍ ଶାସନ୍ କାମ୍‌ଚାସ୍ । ହୁଦ୍ ଘି ବାଦେନୁ ହୁସ୍ କେଚାସ୍ କେରାସ୍, ଆରୁ ହୁସ୍‌କି କୁକ୍‌କସ୍ ସୁଲେମାନ୍‌ସ୍ ଇସ୍ରାଏଲ ମିଆଁ ଶାସନ କାମ୍‌ନା ସୁରୁ କାମ୍‌ଚେଚାସ୍ । ପାରମେଶ୍ୱରସ୍ ସୁଲେମାନ୍ ସିନ୍ କାତ୍‌ଥା କାମ୍‌ଚାସ୍ ଆରୁ ହୁସିନ୍ ମେଞ୍ଚାସ୍ କା ହୁସ୍ ଜାମାସ୍ତିନ୍ ବାଗଗେ ଏନ୍ଦେର୍ ଚାହାଲ୍‌ଏସ୍ କ ପାରମେଶ୍ୱରସ୍ ହୁସ୍ ଘି ଲାଗାନ୍ କାମସ୍ । ସୁଲେମାନ୍‌ସ୍ ପାରମେଶ୍ୱରସିନ୍ ନିଚାସ୍ କା ହୁସ୍ ହୁସ୍ ସିନ୍‌ବାଗଗେ ବୁଦ୍ଧିୟର୍ କାମାଚା । ଇ କାତ୍‌ଥା ବୋଦ୍ ପାରମେଶ୍ୱର ସିନ୍ ଖୁସ୍ ନାଚ୍‌ଚାସ୍, ହୁଦ୍ ଘି ଲାଗାନ୍ ପାରମେଶ୍ୱରସ୍ ସୁଲେମାନ୍ ସିନ୍ ଦୁନିଆଁ ଜାମାରସ୍ତିନ୍ ବୁଦ୍ଧିୟାର୍ ଆଲ କାମ୍‌ଚେ ଚାସ୍ । ସୁଲେମାନସ୍ ବହୁତ୍ କିଛି କାତ୍‌ଥା ବୋନ୍ ଶିଖ୍‌ରାସ୍ ଆଉ ହୁସ୍ ଅଣ୍ଟା ବୁଦ୍ଧିୟାର୍ ଶସକ ରାଚାସ୍ । ପାରମେଶ୍ୱରସ୍ ହୁସିନ୍ ବାଗ୍‌ଗେ ଧାନ୍ନୁ ବାଲା କାମ୍‌ଚେଚାସ୍ ।

ୟେରୁ ସାଲେମ୍ ନୁ ସୁଲେମାନ୍‌ସ୍ ହୁ ମନ୍ଦିର ବୋନ୍ କାମ୍‌ଚାସ୍ ନେକାଗେ ଲାଗାନ୍ ହୁସ୍ ଘି ବୁଆସ୍ ଯୋଜନା କାମ୍‌ଚ୍‌କାଚାସ୍ ଆରୁ ଜିନିଷବୋନ୍ ଅନ୍‌ଠାଣ୍‌ସାନ୍ କାମ୍‌ଚ୍‌କାଚାସ୍ । ଆକୁନ୍ ଆଲାର୍ ମିଲାପ୍‌ବାଲା ତାମ୍ବୁ ନୁମା କାମି କିରି ମନ୍ଦିର୍‌ନୁ ପାରମେଶ୍ୱରସ୍ ଘି ଆରାଧନା କାମାଲ୍‌ଗାର୍ ଆରୁ ହୁଦ୍ ଘି ଲାଗାନ୍ ବାଲି ଆରର୍ତା ଲାରା । ପାରମେଶ୍ୱରସ୍ ବାରିକିରି ମନ୍ଦିର ନୁଁ ହାଜିର ମାନାଲାସ୍, ଆରୁଁ ହୁସାନ୍ ହୁସ୍ ନିଜର୍ ଆଲାରିନ୍ ଗୁଠି ସାଙ୍ଗେନ୍ ରାଲାସ୍ ।

ଲେକିନ୍ ସୁଲେମାନ୍‌ସ୍ ଦୁସ୍‌ରା ରାଜି ଘି କୁକାଇରିନ୍ ପସନ୍ଦ କାମ୍‌ଚାସ୍ । ହୁସ୍ ଜୁକ୍‌କୁ ଲେଖା ଲାଗ୍‌ଭାଗ ୧,୦୦୦ କୁକାଇରିନ୍ ବେଞ୍ଚେରି କିରି ପାରମେଶ୍ୱରସ୍ ଘି ଆଜ୍ଞା ବୋନ୍ ଅବହେଲା କାମ୍‌ଚାସ୍ ଇସ୍‌ସ୍ତିନ୍ତି ଜୁକୁ କୁକାଏର୍ ଦୁସ୍‌ରା ରାଜି ତିନ୍ ବାର୍‌ଚାର୍ ଆରୁ ନିଜର ସାଙ୍ଗେନୁ ନିଜର୍ ଦେବ୍‌ତା ଗୁଠିନ୍ ଅନ୍ଧରାର୍ । ବାକେନ୍ ସୁଲେମାନ ପାଚ୍‌କିମାନ୍‌ଚାସ୍ କେରାସ୍ ତା ହୁସ୍ ହୁବ୍ଡ଼ାର୍ ଘି ଦେବ୍‌ତା ଗୁଠିନ୍ ଉପାସନା କାମ୍‌ଚାସ୍ ।

ଇଦ୍‌ଘି ଲାଗାନ୍ ପାରମେଶ୍ୱର ସୁଲେମାନ୍‌ସିନ୍ ଖିସାରାସ୍ । ହୁସ୍ ତେଙ୍ଗିୟାସ୍ କା ହୁ ଇସ୍ରାଏଲ ରାଜି ବୋନ୍ ଜୋଡ଼େ ରାଜିନୁ ଭାଗ କମ୍‌ନାଘୀ ତାର୍‌ତିନ୍ ହୁସିନ୍ ଦଣ୍ଡ ଚିୟସ୍ । ହୁସ୍ ସୁଲେମାନ୍ ଘି କେଚ୍‌କା ଘି ପାଛ୍‌ଲି ଏନ୍ ମୋସ୍ ।

ସୁଲେମାନ୍‌ସ୍ ଘିଓ କେଚ୍‌କା ଘି ପାଛ୍‌ଲି, ରହବାମ୍ ରାଜା ମଚାସ୍ । ଇସ୍ରାଏଲ ରାଜି ଘି ଆଲାର୍ ହୁସିନ୍ ନିଜର୍ ରାଜା ଘି ରୂପ୍ ନୁ ଗ୍ରହନ୍ କାମାଗେ ଅନ୍‌ଠାଣ୍‌ସାନ୍ ମାନ୍‌ଚାର୍ । ହୁବ୍ଡ଼ାର୍ ରହବାମ୍‌ସିନ୍ ଜୁଗୁଲି କାମ୍‌ଚାର୍ କା ସୁଲେମାନ୍‌ସ୍ ହୁବ୍‌ଡ଼ାରିନ୍ ମରୁକ୍ କଠିନ୍ ପରିଶ୍ରମ୍ କାମ୍‌ତାଲାସ୍ ଆରୁ ଜୁକ୍‌କୁ ଲେଖା ମାଲ୍‌ଗୁଜାରି ନିଆଁଲସ୍ । ହୁବ୍ଡ଼ାର୍ ରହବାମ୍‌ସିନ୍ ହେକ୍‌ଖା ଯୋଡ଼୍‌ଚାର୍ କା ହୁସ୍ କମ୍‌ତି ନାଲ୍‌ଖୁ କାମ୍‌ତୋସ୍ ।

ଲେକିନ୍ ରହବାମ୍‌ସ୍ ହୁବ୍ଡ଼ାରିନ୍ ବାଡ଼୍‌କା ମୁରୁଖ୍ ଲେଖା ଜାବାବ୍ ଚିଚ୍‌ଚାସ୍,“ ନିମ୍ ତେଙ୍ଗାଲ୍‌ଦାର୍ କା ଏଙ୍ଘାଁ ବୁଆସ୍ ସୁଲେମାନ୍‌ସ୍ ନିମାରିନ୍ କଠିନ୍ ପରିଶ୍ରମ କାମ୍‌ଚା ଚାସ୍ । ଲେକିନ୍ ଏନ୍ ନିମାରିନ୍ ହୁସ୍‌ସ୍ତିନ୍‌ନ୍ତି ବାଗ୍‌ଗେ କଠିନ୍ ପରିଶ୍ରମ କାମ୍‌ତୋନ୍, ଆରୁ ଏନ୍ ନିମାରିନ୍, କଷ୍ଟ ହୁସ୍ ସ୍ତିନ୍ ନ୍ତି ବାଗ୍‌ଗେ ସତାବୋନ୍

ଯେ ବାକେନ୍ ଆଲାର୍ ଗୁଠି ହୁସ୍ ଏନ୍ନେ ତେଙ୍ଗେତେ ମେଞ୍ଚାର୍ ତା ହୁନ୍ନୁନ୍ତିର୍ କେତ୍‌କୋର୍ ହୁସ୍ ଘି ମିଆଁ ଲାଡ଼ାଇ କାମ୍‌ଚାର୍ । ଦଶ୍ ଗୋତାର୍ ହୁସିନ୍ ଆମ୍ବିୟାର୍ ଚିଚ୍‌ଚାର୍ । ଇବ୍‌ଡ଼ା ଜୋଡ଼ ଗୋତାରିନ୍ ନିଜର ବୋନ୍ ୟିହୂଦା ରାଜି ତେଙ୍ଗିୟାର୍ ।

ବାକି ଦଶ୍ ଗୋତାର୍ ୟାରୋବାମ୍ ନାମେ ଘି ଅଣ୍ଟା ଆଲାସିନ୍ ନିଜର୍ ରାଜା କାମ୍‌ଚାର୍ । ଇ ଗୋତାର୍ ରାଜି ଘି ଉତ୍ତର – ପୁରୁବ୍ ଭାଗ ନୁ ରାଚା । ହୁବ୍‌ଡ଼ାର୍, ନିଜର୍ ଘି ରିନ୍ ଇସ୍ରାଏଲ ଘି ରାଜି ତେଙ୍ଗିୟାର୍ ।

ଲେକିନ୍ ୟାରବାମ୍‌ସ୍ ପାରମେଶ୍ୱର ଘି ବିରଦ୍ଧନୁ ଲାଡ଼ାଇ କାମ୍‌ଚାସ୍ ଆରୁ ଆଲାର୍ ସ୍ତିନ୍ ପପ୍ କାମ୍‌ତା ଚାସ୍ । ହୁସ୍ ନିଜର୍ ଆଲାର୍ ଘି ଚାଲ୍‌ତେ ଉପାସନା କାମାଗେ ଜୋଡ଼ା ମୁର୍ତ୍ତୀବୋନ୍ କାମ୍‌ଚାସୀ ହୁବ୍‌ଡ଼ାର୍ ଆକୁନ୍ ଯହୂଦା ଘି ରାଜିନୁ ୟେରୁସାଲେମ୍ ନୁଁ ପାରମେଶ୍ୱରସ୍ ଘି ମନ୍ଦିର୍ ନୁଁ ହୁସ୍ ଘି ଆରାଧନା କାମାଗେ ମା’ କେରାର୍ ।

ୟହୁଦା ଆରୁ ଇସ୍ରାଏଲିର ରାଜିର୍ ଶତ୍ରୁ ମାଞ୍ଚାର୍ କେରାର ଆରୁଁ ସବୁବାକେନ୍ ଏକ୍ ଦୁସ୍‌ରେନୁ ଲାଢ଼ଆଇ କାମାଗେ ଲାଗିଚାର ।

ଇସ୍ରାଏଲ ଘି ପୁନା ରାଜିନୁ । ଜାମାର ରାଜାର୍ ଖାରାପ୍ ରଚାର୍ । ଇନ୍ନୁ ନ୍ତିନ୍ ଏକିନ୍ ରାଜା ହୁସ୍ ଘି ଜାଗା ମିଆଁ ରାଜା ମାନାଗେ ଇଛା ଉଇକାବାଲା ଦୁସ୍‌ରା ଇସ୍ରଏଲିର ଘି ଚାଲ୍‌ତେ କେଚାର୍ କେର୍‌କାଚାର୍ ।

ଇସ୍ରାଏଲ୍ ରାଜି ଘି ଜାମାର ରାଜା ଗୁଠିର ଆରୁଁ ଜୁକ୍‌କୁ ଲେଖା ଆଲର୍ ଗୁଠି ମୁର୍‌ତି ଘି ଉପାସନା କାମ୍‌ଚାର୍ । ଯେ ବାକେନ୍ ହୁବ୍‌ଡ଼ାର୍ ହନ୍ନେ କାମ୍‌ଚାର, ତା ହୁବ୍‌ଡ଼ାର୍ ସବୁବାକେନ୍ ରାଣ୍ଡିର୍ ଘି ସାଙ୍ଗେ ଜୁତିୟାର୍ ଆରୁଁ ଇୟୋଁ ତୋକ୍‌କା କେତ୍‌କୋଥର୍ ମୁର୍‌ତି ଘି ଆଘ୍‌ଲି ହାଦ୍ଦୁର୍ ଘି ବାଲି କାମ୍‌ଚାର୍ ।

ୟହୁଦା ରାଜି ଘି ରାଜା, ଦାଉଦ୍ ଘି ବାଉଁଶାର୍ ରାଚାର୍ । ଇ ରାଜା ଗୁଠିର୍ ସ୍ତିନ୍ ନେର୍ ବାନେ ଆଲ୍ ରାଚାର ହୁବ୍ଡ଼ାର୍ ଗୁଠି ପୂର୍ବକ ଶାସନ କାମ୍‌ଚାର୍ ଆରୁ ପାରମେଶ୍ୱରସ୍ ଘି ଉପାସନା କାମ୍‌ଚାର । ଲେକିନ୍ ୟହୁଦା ଘି ବାଗଗେ ରାଜାର୍ ଖାରାପ୍ ରଚାର୍ । ହୁବ୍‌ଡ଼ାର୍ ଖାରାପ୍ ସ୍ତିନ୍ ଶାସନ୍ କାମ୍‌ଚାର୍, ଆରୁଁ ମୂରତି ଗୁଠି ଘି ଉପାସନା କାମ୍‌ଚାର୍ । ଇତ୍‌କ ତକ୍ କା ଇବ୍ଡ଼ାରନ୍ ସ୍ତିନ୍ କିଛି ରାଜା ଗୁଠିର୍ ଝୁଠା ଦେବି ଗୁଠିର୍ ଘି ଆଘ୍‌ଲି ନିଜର ହଦ୍‌ଦୁରିନ୍ ହିଁ ବାଲି କାମ୍‌ଚାର୍ । ୟହୁଦା ଘି ଜୁକ୍‌କୁ ଆଲାର ଗୁଠି ପାରମେଶ୍ୱର ଘି ବିରୁଦ୍ଧନୁ ଲାଢ଼ାଇ କାମ୍‌ଚାର୍ ଆରୁ ଦୁସ୍‌ରା ଦେବତା ଗୁଠିନ୍ ଉପାସନ୍ କାମ୍‌ଚାର୍ ।